2
Na-Jonah aniiḏii na-God-guy.
1 Naagi-yung na-Jonah ni-bu-burri ana-lhirribala a-ngujija-rruj. Marri ni-yambini na-Yawei-wuy na-God. Ni-yamaa,
2 “Nga-wurrij-galadi-wiiyn anaani Yawei,
marri ngaaḏangi nugawi-wuy.
Marri nimba-yaynjangani ngaya, amaar-lhirribala-wala a-lhal wubani-rruj wu-ngawina-yinyung, ngaya ngaaḏangi ‘Nimba-maṉmang!’
marri nagang nimba-yaynjangani ngaya.
3 Nugawaj numba-barawudiyn amaar-lhirribala-wuy.
Nga lhirribala ama-lhagayag-duj, nga mana-lhagayag ngamaambamadhiyn ngaya,
nugawi-nyinyung maar-waladhaa ma-wadbarrini,
marri ngamaambamadhiyn ngaya.
4 Ngaya yingga ngaan-jamayn, nimba-barawudiyn nugawi-wala,
nga yagi ngawu-ni nugawi-nyinyung ana-maṉngulg ana-wumurrng ngijang,
anubani-rruj ngayawi-nyinyung ana-lhal.
5 Mana-lhagayag ngamaambamadhiyn, nga ngama-yingalandi ngaya.
Mana-lhagayag ngamaambamadhiyn-bindiyung, nga mana-mungulu ngama-yinag-gabaabaa.
6-7 Ngaya nga-dhirridiyn ama-mangujang-guy ama-ṉuga,
wubani-yung a-lhal wudhawang wu-dhidina-yinyung wuguuguni.
Ngaya anaani ngaaḻamin-jamaa, ana-wiri anggu-jadugini,
yagu Yawei, ngayawi-nyinyung na-God, ngaya nga-yambiyn nugawi-wuy,
marri nagang Yawei, nimba-yaynjangani ngaya, nugawi-wala a-maṉngulg-gala a-wumurrng.
Marri nagang nimba-wiri-gayn ngaya.
8 Wugurraayung warruburru-yung wurru-maṉdhangi-yinyung ana-rangag marri aynba-gaynbaj-jinyung wurru-warraarriwana-yinyung,
waari ambi-ngaynbandang nagang.
9 Yagu ngaya-waj nga-mayana warraarriwana nugawi-wuy, ngaya wiiyn wujiigurung nga ngunu-lhalamayana.
Yawei, nagang nimba-wiri-gana-yinyung nurru anaani.”
Dani-yung ni-yamaa na-Jonah, ana-lhaawu.
10 Anubanila-wala, na-Yawei ni-yamijgayn ana-ngujija, nga ninggu-lhagaliyn na-Jonah ama-madhaḻag-duj.