11
Na Kurais unam izeg fu fine ke ruainma na iji matame ijeg reoij. Ijefuon ni jak unam na kegoinva iji makai ijia jajieme keof.
Unam izeg baru bara bu sos guf ijia God agoiknum kegokfuon ijin
Efnun iviakma na ja arordiav. Ijefuon maiji na vierafe ja ire fok no nijaidiainva iji jaba rubdiav. Regavo jaka vek giriesame vuak iji vierafeoij. Regavo ja madu unam nun fok na kegoinva iji jaka mukorigia vierafene makai nun ijia jajiev. Regavo iviakma na una unam izeg ja besum afuime God agoivo iji ja mukorigia vierafeknum besum afuim kegokfuon iji kuardiak. Vuak amur iji ja vierafekfuon iji bara iji ja barufjon ijiebuon rotit ijia ijefuon ja barufjon agordiak. Regavo baru iji jak ja Kuraison rotit ijia ijefuon ja Kurais agordak. Regavo Kurais fuk fu Godon rotit ijia ijefuon fu God agoik. Regavo iji fuka ma ijefuon na unam izeg ja besum sos ijia mimatame rekfuon na iji kuardiako ni mukoi faif. Efarif iji fu sirimame ga Godon vuak abe kuaikma fu nigen fuon fub okurak. Ijefuon maiji fu ijegreno iji fu E Bomana fuon Jesu Kurais fuba agoim. 5-6 Regavo bara be fu sirimame ga Godon vuak be Kaven Akai ijar vierafe maga fu abe kuaikro vierafe gavo fuba nigen fuon okurakma iji fuka juf bomana abe baru fuon fu samuamo iji mam. Bara iji fu sos guf ijia unam ijegreno iji fuka bara be fu ebuon baru turaga bu ga kuaiga fu juf abeno ijeg fuka bomana juf abek. Ijefuon bara erar fu vierafe fuba ijeg juf abekro vierafekma iji fuka nigen fuon okurakfuon.
7-8 Regavo madu vuak ijefuon kafo na kuaikfuon iji efarif iji fuba nigen fuon okuriak. Ijefuon maiji efarif iji fu Godri fu aikin amaren. Fu vierafero fu efarif iji amarega fu uri ire kafokafo fu reoga e roin bu ijia giame una God aroikro fu ijeg vierafene amaren. Unam besum ijeg bara iji fu ire kafokafo reokma fuka unam izeg fu baru fuon aroikfuon ijesugin vierafene reok. Regavo iji fuka ma ijefuon maiji ik anej ijia God fuba bara ijefuon ken abe efarif iji amaren. Regavo fu e Adamon ken ijin abe una bara iji amaren. 9-10 Regavo madu God fuba efarif iji amarme kua, Ani barak on iji ifejdamne kuain. Regavo fu bara iji amarme kua, Ani baru on iji ifejdamne kuain. Ijefuon bara iji fu nigen fuon okurak. Fu ijegrekma anera fok bu iji game fuon oimark. Ijefuon maiji bara iji fu nigen fuon okurame anf abedenmado fu baru fuon ijefuon rotit ijia fiok. 11-12 Regavo ni mukorigia vierafef vuak igi na kuardiavo iji efarif ijieb bu Godon nifak ijia buka e ikin ga bara iji bu bakin iji na ijeg vierafene kuaivo bakin. Naba ijeg vierafene kuaiv revo Godon vierafenma ijia bara iji fu baru fuon iji vierafeke ga baru iji fuk fu bara fuon iji vierafek. Ijefuon maiji bu besum karikva bu buon dasunamik. Regavo no vierafe ik anej ijia Godri efarif ijefuon an ijia abe bara amaren. Regavo iviakma no kari roko ijia no gavo efarif fok bu bara ijieb nafej. Regavo iji fun Godri fuon vierafenma ijia ijeg ren.
13 Regavo bara iji bu nigen buon okuriame sirimamekfuon vuak iji nan kuardiava jan faime vierafen. Ijefuon bara iji bu ar bu afuime God aroivo ijia buba nigen buon okuriame Godon sirimamekva iji fuka ba marek. 14 E fok non vierafen. Efarif be fu nigen jau fuon arega fu jauname jaoijor reno e iji fuka koikfuon juf abekfuon. 15 Regavo bara ijar nigen jau fuon arega fu jauname uikinik fuon okurakma iji fun marek. Ijefuon maiji fu ugon fat abe nigen fuon fun okurainma igekin ijefuon e bu fu game aroikfuon. 16 Regavo e kafo ijia bu vuak igi na kuaivo ijefuon abe kuaim musikuaikuai vierafekva ni vierafe no una unam be izegrekva bakin. Regavo madu Godon sos ijia buk unam kafokafo bu bagavo bu unam besum ijesugin reoij.
E Bomana fu radkma iji e vuak fuon faivo ijiena duok inma ijin
(Metiu 26:26-29; Mak 14:22-25; Ruk 22:14-20)
17 Regavo efnun na madu vuak nun kafo madu kuardiakrejo ni faif. Vuak amur iji na vuak jon be faiva naka ba bomana jon oimaren. Ijefuon maiji ja besum afuime Godon sirimamejo iji jaba jon ifenamin revo jaka uri unam ise kafo rene jon arafirinamiv. 18 Ja sos ijia besum afuivo jaka ba oimarknum besum afuim karioin revo jaka atame kafokafo karioijo na iji fain. 19 Regavo igia fai iji ja ijegreoijo iji fuka ba maren. Regavo naba gain jakafu vierafero ja ijeg ata kafokafo kariokva e kafo bu jon izeg ja ma vierafene rejo iji giame kam arordiakuai ja ijefuon ijeg rej. 20 Regavo madu tavan iji ja besum afuime duok ijo iji ja izeg Jesu Kurais fu nuvuifuon kuros ijia guainma iji ja abe ma vierafeknum reoijo bakin. 21 Ijefuon maiji ja duok ijo iji jaka ba joi samuanamiknum duok ij. E roin buka migegare duok uruvana iko buka defiam revo e roin bu duok isema ijo ijefuon buka vasiakma vak. Regavo madu e roin buka do vuain uruvana ine nigen kam karoiv. 22 Ja e fok ja e aikin ga e juaikin ijefuon ja irerafuon ba ar jon ijia duok nifie iknum do iga fu mukoi defiam? Efnun ijeg ja rejo iji fuka unam ma ise ijin ja rej. Ja ijegrejo iji jaka juf bomana abe e iji bu duok bakin ga sinuom bakin iji miav. Ijefuon maiji bu duok bakin ijefuon bu imut kiriasame duok ikuai rok. Revo naba gain jakafu Godon e iji jaba mukoi akardiavo ijefuon ja unam ijeg rej. Regavo ja ijegrekva na ja naba arordiak.
23-24 Na vierafe na E Bomana duok radkma iji fu e vuak fuon faivo ijiena inma ijefuon anej ma iji abe kuardiaga ja faikfuon. Vuak iji fu E Bomana ijar na nijaidienma na ijin madu abe una ja kuardiain. Regavo vuak iji fu ijeg kuardie, Naki besum iji e Judas fu Jesu abe e Jius miainma ijia Jesu fu e vuak fuon faivo ijiena besum afuime duok in. Fu bred fat be abe Godon oimareme abe ukakna tuaseme vajiaknum kia bred igi fu surif nun ijekin. Regavo na surif nun igi abe joifuon guakro miav. Ijefuon ja oine besum afuime bred iji ikva ni irerag nar joifuon renva iji vierafef. 25 Fu ijegrene fu una madu uri kafus iji do vuain ijekma namo ijin aben. Fu abe kia do vuain igi kafus igia nafuinma iji fu kavuan nun ijekin. Regavo kavuan nun fuka ma darokido fu ise jon fok somdiame ja kege una Godna besum mazik. Ijefuon ja oine do vuain ijekin ikva ni irerag nar joifuon renva iji vierafef.
26 Ijefuon ivia igia anerene vake tavan iji E Bomana fu una roko ijia ja ijeg besum afuime bred iknum ga kafus igia do vuain ijo ijia ja izeg Kurais fu e fok igiebuon guainma iji vierafene kuaimok. 27 Ijefuon erar fuba E Bomana agoiknum bred ijiga do vuain iji kege ikma e iji fuka ise ren. Ijefuon maiji fuba E Bomana ijefuon surif ijiga kavuan iji mukorigia agordiam. 28 Ijegvo e besubesum noka koiknuvuon oinuvuon guf iji mukorigia vierafekfuon. No vierafega no ise kafo rega iji noka amur ise nuvuon iji migegare visume God kuardak. No ijegrene noson ijar bred ijiga do vuain iji kege ik. 29 Regavo erar fu Kurais kuros ijia fu guainma ijefuon maiji fuba mukoi vierafegavo fum bred ijiga do vuain iji kege ikma E Bomana fu koikfuon abe vajai fian mak. 30 Ja e uruvana ja unam iji jaba mukorigia vierafeknum ijegreoijo ijefuon jaka zazaiknum adam ise uruvana abeknum ga e roin jaka aoiv. 31 Regavo no e Kurais ma vierafejo roin no koiknuvuon migegare unam ise nuvuon iji no mukoi giame una karoime unam ma ijesugin reoijobatie E Bomana fuba no kege vajai fian vajuok. 32 Regavo iji fu no kege vajai fian vajuomon iji fu no nijaiduom. Fu vierafero fu ijeg nijaiduoga no una karoime efuon maiji fu vierafenma ijegrene karikro fu iji ijeg ren. Regavo madu fu vierafero fu iviakma no kege vajai fian vajuinki tavan rad fu e fok kam arafiriamo ijia fuba una no kege buna besum vajai fian vajuokro fu ijeg vierafene ren.
33-34 Ijefuon efnun na ja soisoime kuardiavo ni faif ja oine besum afuime duok iknum unam izeg E Bomana fu e fok igiebuon kuros kaf ijia vajai fian abenma iji vierafekva ni mukoi ganamiknum ikfuon. Ja mukorigia giamga e fok bun rua barga ni duok if. Regavo erar fu vierafega fu vasiaguainma ijefuon fu kaifuon roin ba samuagdiakro vierafenma e iji na vierafe fu amur ar fuon ijia duok ine ruakfuon. Fu ijegrekma fun mardo E Bomana iji fuba fu unam ise iji fu renma ijefuon vajai fian mak. Regavo vuak kafo una unam sirimamejo ijefuon iji nason vuakva ijia na kuardiame nijaidiak.