3
No izeg e maturaime karikfuon ijin
1 God fu Jesu Kurais guamga fu keunama fu una urin. Unam besum ijeg fu kaven jon iji karauniama bu una uri nivek karinvano tavan bog ire varur ijia naoivo iji vierafef. Regavo ire iji naoivo iji bu ar ma iji God fu kaf gufia Kurais mainma Godon imut mainak iji fu fino ijia naoiv.
2 Ijefuon nika oijon ga nigen jon fok ire iji kaf gufia naoivo iji vierafeof. Regavo ire kafokafo moikigia naoivo ema ijieb rejo iji jab tavan bog vierafek revo jaka dazef.
3 Regavo moik igefuon ise kafokafo ja ur reoinva iji jan ijia aoime tote vain. Ijefuon maiji unam iviamkor jon ja rad ma karivakfuon iji bu Jesuna Godon nifak ijia sauim naoiv.
4 Jesu Kuraisri kaven nuvuon fok kega bu nivek karij. Bu karido God fu Jesu abe una e fok samafrediakma ijia fu jak kega ja besum usem samafrek. Regavo ja una usem samafrejo ijia ja Godon sanainma iji fateroin abek.
Unam ise iji agordiakfuon ijin
5 Ijefuon tavan bog ire isekma kafokafo ja reoijo iji nika aref. E gua namo iji fu izeg ire kafokafo vierafekma bakin. Ijefuon jak besum ijeg ire isekma kafokafo ja vierafejo iji jan aoime ruainvano nika aref. Ire ise ebuon baru turavo ijiga baru uri baru roina ise reoijo iji jab rejo. Tavan bog jab ijeg mimataoijo revo jab ire isekma kafokafo reokuai iji uruvana vierafejo. Regavo madu jab uri ire ma ka uruvana kafo madu karekuaime uruvana vierafek. Regavo jab uri e kafobuon sinuom iji giame karekuai uruvana vierafeok. Ijefuon maiji ja ijegreoijo iji ja sinuom moik igefuon iji sirimameknum bu kam god igeg vierafej.
6 Regavo eraneb bu unam ise ijekin reokva God fu bu kam arafiriak.
7 Usuibe jaba God vierafejo ijia ja ire ise ijin ijegrene ruain.
8-9 Regavo iviakma ni ire ise kafokafo na kuardiakrejo iji giame agordiaf. Regavo ire ise iji zieme deajin abeknum vo e roin oi isema vierafeoknum buisina kuaimoijo ijin. Regavo madu e musikiaknum vo kaibuon vuak ma ise kafo iti jon ijia jab kuaimoijknum vo jab vuak kufui e roin kuardiak. Regavo jab unam ijeg mimataoijo ijefuon maiji ja unam ise jon usuikor iji ja reoijo iji jan azo koreme rubdiain.
10 Regavo iviakma God fu jon izeg ja kari roko iji fur kege karoime una unam iviamkor fuon fu izeg fine roko ijeg amardiam. Fu ijegrega ja una fu mukorigia ma vierafekfuon.
11 Regavo Kurais fuonkua fur e ni kafokafo iji ka besum karauniamo. Ijefuon fur e Grik ga E Jius ga e iji vajai anf nain ga ba anf nainva ijigam e iji isama kafokafo kuaivo ijigam e kafokafo bu e kafobuon ikrejo ga bu buonkua ikrejo iji Kuraisri e ni kafokafo iji besum karauniain.
Unam ma ijesugin rejknum oijmanamikfuon ijin
12 Regavo jaiji jan Godon e iji fu oijmiamo ijin. Ijefuon fu ja kege una efuon ren. Ijefuon nika isuar igia oi mafaime e suaiki rene adumaduigin reoknum e iji bu vajai fian abeknum ire kafo karekuai vierafejo iji ifejdiaf. Regavo e kafo bu ire ise ukakna kafokafo tavan uruvana jon reunaivga nin oi mafaime buna karif.
13 Regavo ja e kafob ire ise kafo jon rekva ni izeg Kurais fu ise jon giame dazenma ijeg oijon ijia dazme aref.
14 Regavo oijmanamivo ijar vuak fok igi kuainma iji ka ma asidiain. Ijefuon ja oijmanamiokva ijar ifejdiaga ja besum afuime karik.
Ejafanamime Jesuon vuak iji faikfuon ijin
15 Regavo jaiji fun Godri kenmano tavan bog Kuraison kafaimo iji arega fu oijon ijia ikrene jon ja vierafejo iji fur samuagdiaf. Fu ijia ikrega ja e roin ga ejon ja buna karijo ijiena afuime tavan bog God oimardakfuon.
16 Regavo nika mukorigia tavan bog jon ja nijainamivo ijia Kuraison vuak iji oijon ijia vierafef. Regavo unam be iji ja oijon ijia God vierafekfuon iji ja dua oimarevo iji urukfuon. Regavo be iji dua iji Kaven Akai ijar nijaidiaga ja roinva ijia God rokafaknum oimardaf.
17 Regavo ire fok ja kuaiknum reoijo ijia nika e fok ijiebuon nifak ijia Jesuon e rene ik iji fu joifuon renma ijefuon God Asoi iji oimardaf.
E God ma vierafejo gire besum karijo ijiebuon vuak ijin
18 Bara iji barufjon iji igiame oijon bu vajiaf. Ijefuon maiji jaiji jan Jesuna besum ren ijefuon ja tavan bog igiakfuon.
19 Baru iji barafjon iji mukorigia oijmiaf. Regavo jab vuak gigikin kuardia vo kiaga bu tavan bog ire fok joifuon rek.
20 Regavo am iji eofjon iji tavan bog unam kafokafo ijia igiaf. Ijefuon maiji e iji Jesuna besum renva iji bu ijeg igiavo iji bu God oimardav.
21 Regavo eof iji jab tavan bog afjon ire roin bu uzaknum isema rejo iji giame kuaik. Ja ijegrekva bu oifiadiaga tavan bog buba oimarknum ok.
22 Regavo e iji e kafobuon ba monfuon ikrejo iji e mamkanuk jon moikigia ire kafokafo bu kiavo iji mukoi igiaf. Regavo jab tavan iji bu samaij ijia ireme giaknum samuagdiavo ijefuon ja uri bu juvknum ikrek. Regavo madu jab vierafero ja ikrega bu jon oimarkuai ja ijeg jab vierafene ikrek.
23 Regavo ire kafokafo ja reoijo ijia nika oijon ijekma E Bomana Jesu Kuraison ikreof. Regavo jab emabuon ik ja reoijo ijeg reok.
24 Ijefuon maiji ni vierafe E Bomana iji fu tavan rad unam izeg ja kegoinva iji vef una ijefuon vajiak. Regavo ire iji God irerag fu usuibe vajiakafa kuainma ijin. Ijefuon maiji ja emabuon ikrenva bakin revo ja ma E Bomana jon ijefuon ikrej.
25 Regavo e iji e kafobuon ba monfuon ikrejo iji ga e iji fu e bomana rene e roin kiaga bu ir fuon ijesugin faime ikreoijo e ijekin iji bu ise reokva Godri bu kege besum afuime ise bu renva iji faik.