4
E iji fu moik igefuon unam iji oijmiamo iji fu Godon e ani
1 E fok ja bijaiknum musikuaivo iji erar kiaga ja ijeg rej? Ja koikjo oijon ijia vajai jon iji uruv vierafeoijo ijefuon ja iji karine musikuaiknum bijaimoij.
2 Ja vierafe jaka e kafobuon sinuom iji karekuai vierafen gavo buba kege ja vajiavo iji jaka e iji kaniame sinuom buon iji karvo. Revo be iji ja madu e kafobuon sinuom karekuai uruvana vierafeoijo ijefuon ja e roina musikuaiknum bijaiv. Ire kafo ja karekuai uruvana vierafenva iji jaba amur God kuavo ijefuon jaba ire iji keg.
3 Regavo ja God kuakva irerag ja vierafenva iji fuba ifejdiak ijefuon maiji irerag ja kuavo iji fu vajiakma ja kege una vajai jon iji fu oimarkfuon ijia reok. Ijefuon God fuba irerag ja kuavo iji mukoi faime ja igiak.
4 Regavo jaiji ja bara iji fu baru fuon ba ma vierafen revo fu baru fuon ijefuon e ani iji oijmiamo ijekin. Ijefuon e guri ka ba vierafenva gurie igia faif ja moik igefuon ire iji oimarknum oijmiavo iji ni vierafe jak ja Godon e ani.
5 Regavo Godon vuak ijia bu isoime kuai,
Emabuon kaven God fu kege no vajuinma iji buka unam ise kafokafo uruv vierafen.
Regavo iji bu kuainva iji buka ma kuain revo bu kufuimenva bakin.
6 Regavo Godon ma iji fu vajuomo iji fuka ma bomana gigikin ga madu fuka ise igi no vierafejo iji fu asin. Vuak iji fu buk akaij ijia kuai,
God fu e iji adumaduigin oijo iji fuon ma iji vajiamo revo e iji aroikaraoijo iji fu nuigafiamo kuain.
7 Ijefuon ni una karoime Godon vuak iji igiaknum vo irerag fu vierafenma ijia keof. Regavo ni giriesame Setan rarega fu ja areme vak.
8 Regavo ni biom God samaij ijia vaga fu biom jon ruak. E guri oi nokarok (2) vierafene tavan bog ise rejo gurie. Ni imut jon ijiga oijon kege do some una karoif.
9 Regavo iviakma igi nika oifian abeknum niraiknum isema oifiaigma kariof. Regavo ja tavan bog kimokva ni niraif revo ja tavan bog oimarkva ni iviakma ise jon ja renva ijefuon oifian abeknum of.
10 Ni Godon nifak ijia adumaduigin karioga fu ja ejafiame ifejdiame kam arordiakfuon.
A uviaion ijefuon ise iji ab kuaimo ijin
11 Uviaifnun jab uviaifjon ijiebuon ise iji giame kuaimok. Erar fu e kafobuon vuak iji abe kuai vo ise buon bu renva iji abe kuaimoijo iji bu Godon akaij iji abe tuasev. Ja akaij ijin abe tuasekva ja akaij iji jaba mukoi igavo ijefuon ja e iji akaij iji nijainma iji jaba igiav.
12 God fu fuonkua akaij iji vajuomo ga ise nuvuon iji kege mazim guomon ga fu fuonkua e karauniaknum ga kege vajai fian vajiamo. Regavo jaiji jaka daro bakin ijefuon ja irerafuon una e uviaifjon ijiebuon ise iji kege mazim giav?
Jab ire iji ja niar rekfuon ijefuon aroikarak
13 Vuak nun igi mukoi faif. E roin ja kuai, Ivia vo baga niar no uri va mai mamkanuk ijia useme ijia karine juaivasia besum (1) guf ijia no mon unam kafokafo amardiame mon uruvana kekno kuain.
14 Regavo niar ja izegrekfuon iji jaba vierafen ijefuon maiji jaiji ja mian fu iviakma utuamevo migegare una bakreno ijekin.
15 Regavo ja kuaik, Ni arega E Bomana ijar fuon fu vierafenma ijia ire fok nijaiduoga no ijia karine ire fok rejknum okno kuaikva iji fuka marek.
16 Regavo iviakma jaka aroikaraknum uri koikjon irerag ja vierafejo ijin reoijo revo iji ja ijegreoijo iji fuka ba marem.
17 Ijefuon erar fuka ire ma ijesugin reokafa vierafen revo fuba ire iji fu vierafenma iji mimatame reoinon iji fuka ma ise iji reoin.