FIRIMON
Firimonon Vuak Amur
Firimon fu e Korosiko ga fuka sinuom zarain ga madu fu e be God ma vierafeno. Fu Onesimas kuamga fu fuifuon ba mon ikreoin revo rad Onesimas fu Firimon ijia are ko vain. Fu ko va For dibur fino ijia For bien. Onesimas fu va For bieme fusik kari vuak kuaivo ijia Onesimas fu oi dakaroime Jesu Kurais ma vierafen. Regavo rad For fu vierafe Onesimas fu una Firimonon ar ijia vak. Ijefuon fu fas igi isoime Firimon nijamga Onesimas fu abe vain. Regavo fas ijia For fu isoinma iji fu Firimon kua, Onesimas fu una vuako iji na vierafe anka fu oimardame afek. Revo ab fu eon ba mon ikreno igeg afekgavo nika e be fu God ma vierafeno igeg afemne kuain.
Firimonon vuak kafokafo fu isoinma ijin
1:1-3 For fu Firimon anainma ijin.
1:4-7 For fu Firimonon God oimarenma ijin.
1:8-22 For fu vierafe Firimon fuka Onesimas oimarknum afekfuon ijin.
1:23-25 For fu Firimon anainma ijin.
1
Foron fas fu isoime e Firimon nijainma ijin
1-2 Fas igi For nar e Timoti e iji nosik ikreno ijek isoiv. Revo naiji na Jesu Kuraison ik reoijo ijefuon iviakma na dibur fij. Ijefuon fas igi no isoime e Firimon a nona ik besum reoino iji nijav. Regavo madu fas igi no isoime e sos iji bu ar on ijia besum afuivo iji abevo bara Afia ko e kainuvuon Akifas ik besum igi no reoijo ijekin ijin vajai fian abeknum reoijo iji nijiav.
3 Na sirimamega God Asoinuvuon ijiga E Bomana Jesu Kurais bu tavan bog ma rediame mukorigia ifejdiame samuadiaga ja afuime kariokfuon.
Izeg Firimon fu Godon e ijin oijmiaknum vo E Bomana Jesu ma vierafenma ijin
4 Eko Firimon uviainu na tavan bog na sirimamejo naka a vierafej. Regavo na if on kuame oifuon God nun ijefuon oimarev.
5 Ijefuon maiji na faiga aka Godon e uruvana mukorigia oijmian. Regavo madu on a izeg E Bomana Jesu ma vierafeno iji fuka ma bomana ren.
6 Na sirimamega aka giriesame Jesu Kuraison vuak iji abe e roin nijaidiakfuon. A ijegrekma a Godon ma iji fu efkin vajuomo iji a mukorigia anej ma iji giame vierafekfuon.
7 Eko uviainu on a e roin oijmiamo na iji faiga naka oimadien revo madu na on izeg a e oijmiamo na iji faivo naka bomana vajai nairdiem. Ijefuon an ar Godon e ijiebuon oij iji kam karoima bu bomana oimarev.
For fu e Onesimas kuaga fu oimarknum e Firimon afekfuon ijin
8 Regavo a Godon e uruvana oijmiamo ijefuon nan uviaion be na izeg a Kuraison makai ijia jaoijo nak na ijeg reoij. Ijefuon na ma ijefuon kuriaireme kuaga a irerag na kuavo ijin rekfuon.
9 Regavo ni vierafe naiji nan ma eoren revo na Jesu Kuraison fateroin ijia na vuak fuon abe oij ga madu iviakma na fuifuon dibur fij. Ijefuon na unam ijeg vierafene kuardaga a ijegrekma iji fu marek. Regavo noka nuvuon oijmanamivo ijefuon nam isuar a kua gak.
10 Ijefuon na e Onesimason fateroin ijia na a anadame kuav. Revo e Onesimas fu Kuraison if ijia fuiji fuka ma farinun igekin. Ijefuon maiji na dibur finva igia na Godon vuak ma iji kuardavga fu oi dakaroime una Jesu ma vierafen.
11 Fu usuibe ijia fuka irerag ma kafo oifuon renma bakin revo iviakma fuka bomana a ga na ifejduokfuon.
12 Ijefuon iviakma nan kuaga fu una on vuak. Regavo fuiji naka ma bomana oijmav ijefuon fu vuakon fu oinun igi fun abe ijia vuak.
13 Regavo na vuak ma iji abe kuaimoijo ijefuon na igia dibur fij. Ijefuon naka Onesimas kuaga fu igia nosik fikro na ijeg vierafen. Fu igia nosik fikin irerag fok ar dasumdiekfuon iji fur ifejdiek.
14 Regavo naiji naiba a ejafame kuaga a Onesimas kuaga fu igia nosik fik. Regavo na vierafe ar koikon izeg a vierafenma ijia rek. Ijefuon nam samuaga ar koikon keno kiekma nason ijia ire kafo rek.
15 Regavo na vierafega Onesimas fukafu Godri kuama fu tavan ivuankbe a uname ruaido iviakma fu una ma vierafene osik tavan uruvana ijia fivak.
16 Regavo iviakma na vierafe fu e be fum una oifuon ba mon ik reokma bakin. Regavo aka uviaion be ja fusik Kurais ma vierafejo igeg oimardakfuon. Na Onesimas naka bomana vierafen ijefuon na vierafe ak aka fu bomana vierafek. Ijefuon maiji fuka e be fum oifuon ba mon ikrene a fu bomana ifejdak. Regavo madu fu izeg a E Bomana iji ma vierafeno fuk fu ijeg ma vierafek.
17 Ijegvo no osik no besum E Bomana ijefuon ik reoijo. Ijefuon ni unam izeg a na oimardiemo ijeg Onesimas oimarda vo anaiknum afemne.
18 Regavo fu ire ise kafo on rejknum vo sinuom on kafo fur niet karkma iji ni if nun ijia isoiga nar sinuom on ijefuon una roib vajak.
19 Regavo igi naka ma imut nun ijia isoiv na For nar Onesimas sinuom irerag on fu kenma iji una roib vajak. Regavo ni vierafe nar a ifejdavga a una Kuraison e ren ijefuon a irerag ma ijin abe na miek?
20 Ijefuon uviainu ni E Bomana ijefuon if ijia ire ma iji nuifuon rene Onesimas oimarknum afemne. Regavo noiji non besum Kuraisna mazinva ijefuon ni irerag na kuavo ijin rega na oimadiemne.
21 Ijegvo na fas igi abe a nijaknum ma vierafega irerag nar a kuavo iji a igieme rekfuon. Regavo madu na vierafe a irerag na kuavo iji aka biom mukorigia rek.
22 Regavo madu na vierafe a ar be nuifuon kanafukfuon. Ijefuon maiji naka ma vierafega God fu sirim jon fok ja isoinva iji avediado fu kiega na una jon vuak.
Foron vuak radkma fu anadiainma ijin
23 E Ifafras fuiji fu igia dibur fin ijefuon maiji fu nosik besum Jesu Kuraison vuak abe kuaimon iji fu ja anadiam.
24 Regavo madu e Mak ga Eristakas ga Dimas ga Ruk iji bu nana ik besum reoijo ijefuon bur ja anadiav.
25 Regavo na sirimamega E Bomana Jesu Kurais fu ja ma rediame ifejdiaga ja mukorigia kari vakfuon. Fun ijin.