20
Setan bu dab juaivasia vuan taosen (1,000) ijeg tome dibur unainva ijin
1 Areme na ga anera be fu varur ijia ari rok. Regavo imut fuon ijia fu mako bomana ka dibur iji ba gavo ijefuon ki ijiga ire sen afikin ijin imut fuon ijia kuniain.
2 Regavo anera iji bun ire dregon iji amur bu kua tabar Setano kuavo iji kunaime sen dab tome juaivasia vuan taosen (1,000) ijeg unain.
3 Areme bun kunaim dab mako iji dibur ba gavo ijia abesme vien bijukurain. Fu una kekome e moikigia oijo iji arafiriakro bu ijefuon dab bijukurain. Ijefuon fu juaivasia vuan taosen (1,000) ijeg fu ijia fikfuon. Fu ijia fine juaivasia iji barga bu sen irasga fu tavan ivuankbe ijesugin ok.
4 Na ijia manine varur ijia ire fata kafo e ijia ajie karinva iji giain. Regavo e iji karinva iji bu Godri daro vajiaga bu e fok ijiebuon ise iji kege mazim giakfuon ijieb ijia karin. Regavo na madu e iji bu nuibakin Jesuon vuak ma iji dab e kuardiaoijga bu kaniainva ijiebuon kaven ijin ijia giain. E iji bu kaven ise maf kuriai ijiga kaven imut amarenva iji ba buon sirimameknum vo buba ire anf kafo variatar ijia ga imut ijia nain. Regavo bum una uri e mamkanuk rene juaivasia vuan taosen (1,000) bu Kuraisna moikigi samuame karin.
5 Regavo e roin bu aoinva iji buba una urin revo bu samua vake juaivasia vuan taosen (1,000) abega bu ijiason una urin. Regavo bu una urinva iji bur amur urin.
6 E iji eraneb ijia amur urinva iji buka bomana oimarek ijefuon maiji bun Godon e redo rad buba una mian iji naino ijia naoime barek. Bu God ko Kuraisbuon e isuf baroijo rene Kuraisna besum juaivasia vuan taosen (1,000) ijeg moikigi samuak.
Jesur rareme Setan arafirinma ijin
7 Areme juaivasia vuan taosen (1,000) iji fun barekoga Setan bu sen iji bu toinva iji irasdakva fu dibur fuon iji fu areme kekokfuon.
8 Fu kekome moik fok ar iror igia oknum e iji Gog ga Megog bu ateseme oinva iji biesiak. Setan fu e iji biesiame aferdia ijia afuime bu e uruvana ire jier saof irif ijia naoivo ijegrega fu aferdia bijaikfuon.
9 Bu useme ar iror igia oknum Godon e bu mai Jerusarem ar God fu oijmamo guf ijia karinva iji azi bukurian. Regavo God fu varur ijia mian iji kuamga fu ari e fok jakia baren.
10 Rene Setan e iji fu bu biesiainma iji bu kunaim dab mian kavuaime naino bu kua sarfano kuavo ijia akozen. Bu kunaime ar iji maf kuriaij ijiga e iji bu e biesiame vuak nijaidiaoijo bu koreva ijia korek. Regavo e iji bu nakikmazak ijia vajai fian abene vak.
E fok ijiebuon ise iji kege mazim giakfuon ijin
11 Areme na fata abaikin iji be gavo e iji fu ijia ajie fino iji gain. Regavo Godon nifak ijia moik ijiga varur buka bakiteme vaka fuba una giain.
12 Regavo na gia Godon fata ijefuon nifak ijia e fok aoinva ukakna ga mamkanuk iji bu ijia iren. Bu ijia irekoga bu buk kafo kam irame madu una buk be e iji bu tavan bog ijia karivako ijiebuon if bu isoinva iji dab irain. Bu ijia irame e fok aoinva ijiebuon unam izeg bu kegoinva iji bu buk ijia isoinva iji kege mazim giain.
13 Amur iji bu e iji saof ijia aoinva ijieb Godon vaka fu kege mazim giain. Fu giame una e moikigia aoinva bu zuarunam karinva ijiebuon unam iji izeg bu kegoinva iji kege mazim giain. Fu unam buon izeg bu kegoinva iji bu buk ijia isoinva ijia giaknum kuardiain.
14 Rene unam iji aoivo ijiga e ar iji e bu aoime va karijo iji fu kam ar iji mian tavan bog naino ijia koren. Regavo ar iji mian naino bu vainva iji bu una ijia tavan radkma ijia aoime barkfuon.
15 Regavo e iji eranebuon if iji buba buk iji e bu tavan bog ijia karivakfuon ijia isoinva iji bu kam ar iji mian naino ijia koren.