4
God fu varur gufia fata fuon ijia figa Jon fu nimamaime gainma ijin
1 Areme na una madu nimamaime ga varur gufia vien be fu dajain. Regavo kua be veg igekin fu amur kuardiema na fainva ijar vek ijia kume, Ajieme igia roga na irerag fu rad rekreno iji nijaidavno kumen.
2 Fu ijeg kumekoga migegare Kaven Akai ijar na dab niroikiema na varur ijia gak Godon fata ijia e be fu ijia fin.
3 E iji fata ijia fino nifak fuon fu abaikirame ire mun ka mukor kavuan be bu jasfa kuavo ijekin ga madu mun inak vajat be bu kanerian kuavo ijekin. Regavo fata iji fu fino irif ijia ire anuag inak vajat be ijar ijia same ameoin.
4 Regavo Godon fata irif ijia fata kafo madu tuenti fo (24) ijeg ijia iren. Regavo e uguaikin tuenti fo (24) bu ugon abaikin iji same vo ire kafo gord zin igeg iramo ijia amardiavo iji nigen buon ijia same ijia karin.
5 Regavo Godon fata ijia na ga varur ijar ijia karame sanaknum uruvana ijia tavuam. Regavo Godon fata ijefuon uinak ijia na ga ire ikuosaij igekin seven (7) ijieb buin ijia mian igeg naine sanav. Regavo ikuosaij iji naine sanamo iji Godon Kaven seven (7) ijin.
6 Regavo madu Godon fata uinak ijia ire be na ga saof igeg nafuin revo fuka ma rituraime ma abaren.
Godon fata iji namo irif ijia ire kafo nivek fo (4) ni buon roin nuon ijia ga roin oinak ijia ijieb ijia karin.
7 Ire iji karinva amur iji na gaga fu fanuf raion igekin ga be iji na ga fu maf-kau igekin. Regavo uf be iji fino iji na ga fu emabuon uikinik igekin revo rad iji fino iji na ga fu ire um buruof kaf ijia rame oinon igekin.
8 Regavo ire fo (4) nivek karijo iji bu daf siks (6) ijeg bijianain. Regavo ire ijiebuon vajai fok azan ga guf iji buka niom ijieb okuriain. Regavo nakikmazak bu dua igi roij,
Akai Akai Akai iji God E Bomanak. E Darokin fu ik anej ijia fi ruain ga iviakma fu vek fin ga fur rad una ruakfuon.
9 Regavo ire fo (4) nivek iji karinva ijieb e iji fu fata ijia tavan bog fivako iji dua rokafav. Bu tavan bog Godon sanainma ijefuon dua roij. Bu ijegrejknum fu dab aroime oimardaknum dua rokafav.
10-11 Bu ijegreko ijia e uguaikin tuenti fo (24) iji karinva iji bu e fata ijia tavan bog fivako ijefuon nifak ijia tuame moik dijeme fuon sirimamej. Bu ire iji gord ijia amardiainva bu nigen buon ijia sainva iji kare fata iji manino moik ijia korme ijeg kuai, Aiji a E Bomana nuvuon ga God nuvuon ga ar ire fok igi naoiko no giavo iji amardiain. Regavo on vierafenma ijia kege uniaga bu nivek kari ikrej. Ijefuon fun mardo no on daro bomana ijiga on sanainma ijiebuon no arordame aroifiriknum oimardame dua rokafav.