3
Ire ise iji bu tavan radkma ijia rekfuon ijin
Regavo igi vierafef. Tavan radkma iji Jesu fu una ruakma ijia ire ise ni kafokafo bu rek. E uruvana buka uri vajai buon iji uruvana oijmiame uri mon bomana oijmiaknum koikbuon kam e mamkanuk rene aroikarak. Regavo vuak buon bu kuaivo iji buba e roin ifejdiaknum vo eofijaf igiak revo buka oifiaigma oknum oibuon ijia buka ire ma kafo vierafekva bakin. Regavo buka e roin oijmia vo buon oifian abekva bakin. Regavo e kafobuon ise iji buba giame arek revo madu buka kufuimene e kafobuon vuak kuaik. Regavo buka tavan bog nigaraiknum karik ga buka fanuf taraiko igeg ura oknum unam ma kafo bu oijmiavo bakin. Regavo fu kaifuon ijek vuak besum kuaim iganamik gavo rad fu una vuak ise fuisina kuaik. Regavo ka zabarene ire mijem keok vo ka aroikarame fuonkua vierafek. Regavo buka ire moikigia oimareoijo iji uruvana oijmiak revo bu Godon unam iji buka oijmiakva bakin. Bum vajai buon iji kege va guriguri rek revo oibuon ma iji buba Godon daro iji abek. E ijegreoijo iji mukorigia giame agordiaf. E ijieb e kafobuon ar ijia ajie bara iji ise buon ijieb kam anu kuniainva iji bu izeg arekfuon iji buba mukoi vierafeknum samuagdiak. Regavo e iji vuak kufuimeoijo ijieb una bu ifejdiame samuagdiaknum vuak iviamkor buon iji nijaidiak. Bara iji bu tavan bog Godon vuak ma iji izeg fu e fok karauniamo iji gakuai nisain revo buba bien. E Jenes ko Jebres bu Mosis nui mainva ijeg e iji vuak kufui nijaidiavo iji buk bu Godon ma iji buba biek. Ijefuon maiji oibuon buka isema vierafen revo bu Godon vuak ma iji ma vierafejo bakin. Regavo buba ijegrene tavan jaoijmana vak. Ijefuon maiji e uruvana bu giamga bu e Jenes ko Jebres bu vierafenva ijeg isema vierafen.
Timotion vuak radkma iji fu ijia giame jakfuon ijin
10 Regavo Timoti aiji a e iji na amur kuardainva ijekin bakin. Revo vuak nun fok na nijaidiavo ijiga unam nun na fine roko iji an vierafen. Regavo madu an izeg na ma vierafejo ijiga na adumaduigin oijo ijiga e oijmanamivo iji an vierafen. Regavo madu an daro nun iji na tavan bog giriesame nuibakin ikreoko e bu vuak ise nuisina kuaime arafiriega na vajai fian abejo iji an gieme vierafen. 11 Ire iji bu ai Entiok ga Aikoniam ga Ristura ijia nun rokga na uruvana vajai fian abenva iji naba zazaivga Jesu fu ifejdieme keunien. 12 Ijegvo e uruvana eraneb bu Jesuon if ijia Godon unam ma iji abekva e bu buisina vuak ise kuaim arafiriaga bu vajai fian abek. 13 Regavo e iji ise reoijo iji bu ise ukaknak iji kam biom mamkanuk rejknum e kafo vuak kufuimene kuardiaknum vo koikbuon arafirinamiv.
14 Regavo aiji nika Godon vuak ma iji bu nijaidiainva iji mukorigia giriesame vierafe. Ijefuon maiji a e iji bu nijaidiainva iji an koikon giame vierafen. 15 Regavo a vek am ukakbe ijia Godon vuak bu usuibe isoinva iji bun nijaidain. Vuak iji bu nijaidiainva ijieb e iji bu Jesu Kurais ma vierafejo iji fu ijeg karauniak. 16-17 Vuak fok bu buk akaij ijia isoinva iji Godri vajiama bu isoin. Ijefuon vuak ma ijesugin abe e roin nijaidiakfuon. Regavo e vuak kufuimeoijo ga ire ise reoijo iji kuriairega bu arek. Regavo e iji bu God ma vierafejo iji ifejdia nijaidiaga bu mukoi vierafene e damuigin rene ik kafokafo mukoi vierafene rekfuon.