Ⅷ
Nmi nyʋ -za -nɩꞌa kɔkui ꞌsraga ꞌmʋ, *Zeziiꞌa nyʋ ꞌbhɛɛꞌo ʋn ꞌke ɛ liꞌa?
Ⅰ A -gblee, dɩ a dedeꞌa ꞌɩnmʋ ti -lrɛɛ ꞌbho kɔkuiꞌa ꞌsraganmiꞌa damʋ, ꞌɩnnɩ ꞌɩn-ɩ ꞌꞌduꞌo ꞌꞌkpi. A na: Nyɔ ꞌbhɛɛꞌo ɔ ꞌke ɛ liꞌa? ꞌYa damʋ ꞌɩn na: A-a ꞌla-a aꞌba ꞌꞌbhi lɛyriyibomʋ ꞌbho -Lagɔꞌɔ -ziadɩꞌa damʋ, ꞌle a-a nʋꞌo na, -ka a ꞌka nʋ ꞌbho ꞌɔ -jeyi a, a yibo nɛ-oꞌo. -Ziadɩ moꞌo. Ɛ -nɩꞌa -kaa ꞌmʋ a, -bho nyʋꞌa dɩkmɛɛ se amʋ ꞌmʋ -nɩ, lɛ a-a yiboꞌa, ɛ-ɛ ꞌpo-o amʋ ꞌꞌjɛꞌɛ ꞌꞌyibhɛɛɛ -pɔlʋ gbo. Nyʋꞌa dɩkmɛɛ, ꞌɩnnɛ nʋ ɛꞌo ꞌle Zeziiꞌa nyʋ-ʋ muꞌo nya ꞌbho -Lagɔjeyi.
Ⅱ A ꞌye li-ɔ, nyɔ-ɔ nʋꞌa ɔbɔ yiboꞌo-o -Lagɔꞌɔ -ziadɩ ꞌle ɔ ꞌye nyʋ -lrʋʋ -zi a, ꞌɔ nyɔtu -see -bhla -Lagɔ yibo ke -ka -zɛgɛka.
Ⅲ Ɛ -nɩꞌa -kaa ꞌmʋ a, nyɔ-ɔꞌɔ ꞌbhɛɛꞌɛ ꞌɔ ꞌꞌbhuo ꞌꞌyi, ꞌle ɔ ꞌke -Lagɔꞌɔ dɩ -kma a, -Lagɔ na ꞌɔ nyɔ ɔ ꞌꞌduꞌo.
Ⅳ -Yɛ ꞌma-a kɔkuiꞌa ꞌsraganmiꞌa liliaꞌa ꞌꞌkpidɩ a, ꞌɩn na: -Aꞌba ꞌꞌbhi yiboꞌo-o na, kɔku ꞌka nyɔꞌɔ ꞌwɩ ꞌbhle, ɛ se -nɩ. Bhebhelɛ moꞌo. -Bho ɛ -se -Lagɔ -nɩ -lue ꞌtɩn, ꞌɩnnɔ ꞌbhleꞌe nyɔꞌɔ ꞌwɩ.
Ⅴ -Ziadɩ moꞌo, lɩꞌa -dadudu-u -nɩꞌe ꞌle yaku ꞌꞌyi -ke ꞌnɔɔ ꞌbhlʋkpa ꞌꞌkpi, ꞌɩnnɩ nyʋ-ʋ ꞌlaꞌa ꞌwa -lagɔ, ʋn-ʋ bʋbɔꞌo, ꞌle ɩ ꞌbhleꞌe wɔnkuɛ ꞌbho ꞌʋ ꞌꞌkpi.
Ⅵ Ɛ -nɩꞌa -kaa ꞌmʋ a, -a-bʋ tbhaꞌa *Zezii gbɔ, -a yiboꞌo-o ꞌwee na, -aꞌba -tɩta -Lagɔ -nɩꞌe-e -lue, ꞌɩnnɔ -yaꞌa lɩ ꞌwee ti. Ɔbɔ ꞌmnɔ, ꞌɩnnɔ -yaꞌa -amʋ ti -a ꞌke ꞌɔ nyʋ ꞌꞌdu. A yiboꞌo-o -lrɛɛ Zezii *Kliisɩ ꞌmʋ -Lagɔ -zi -nɩꞌo ꞌle ɔ ꞌye lɩ ꞌwee ti-ya ꞌle ɔ ꞌye -amʋ tinɩɛlre ꞌꞌnyɩ. Ɔ -nɩ -lue ꞌtɩn, ꞌɩnnɔ ꞌmo-o -aꞌba -kɔyi.
Ⅶ ꞌKa-a ɛ -nɩꞌe ꞌmʋ. Ɛ -nɩꞌa -kaa ꞌmʋ-ɔ, Zeziiꞌa nyʋtɔlʋ -see -bhla ꞌya lɩtuꞌa ꞌꞌkpidɩ ꞌmʋtiꞌwɔn ke. Ʋn -see ꞌꞌyritiku ke ꞌbho ꞌɔ -jeyiꞌa dɩ a, -bho ʋn -ka kɔkuiꞌa ꞌsraganmi-i li a, ꞌle ʋ gbo ɛ kɔkɔɔꞌɔ -ka ʋn-ʋ bʋbɔꞌɔ -bhla ɩ-bɩ kɔkuisʋa ꞌmnɩ, ꞌle ꞌwa -pɔlʋ gbo ʋn-ʋ nʋꞌo, -bho ʋn li ɛ, ʋn-ʋ ꞌnʋ-o ꞌꞌnyinynidɩ ꞌbho -Lagɔꞌɔ ꞌꞌyigbeyi.
Ⅷ A -gblee, -Lagɔꞌɔ ꞌꞌdu liliɛꞌɛ dɩ, nyɔꞌɔ dɩꞌa -nya nɔ li, ꞌle ꞌɛ nʋ ꞌɔ ꞌtʋ -lrɛɛ. -Bho -ɩn li ɛ o, ꞌɛ -nyni lɛ wɔn. -Bho -ɩn -see ɛ li o, ꞌɛ nmaze lɛ -lrɛɛ.
Ⅸ ꞌƐ dɩ a ꞌbhɛɛꞌo a ꞌke lɛꞌꞌo lɛ li. Ɛ -nɩꞌa -kaa ꞌmʋ a, a ꞌꞌdu aꞌba ꞌꞌbhiꞌa dɩ gba ꞌmʋ, nyʋ-ʋ -ke aꞌba ꞌꞌgwlideɛ seꞌa ꞌmʋꞌbhɛɛ -ʋ -ke -nɛ ꞌfɩɩnꞌa ꞌmʋ, ʋn -kaa aꞌba dɩ ꞌꞌdu ʋn -kaa ꞌꞌnyinynidɩ ꞌmʋ ꞌkpa.
Ⅹ-Ⅺ ꞌƐ dɩꞌa kpɛ -lue ꞌka-a: Nyɔ-ɔ -ke ꞌꞌgwlideɛ ꞌfɩɩnꞌa ꞌmʋ, ꞌle -ɔ -ke -pɔlʋ gbo nʋꞌa, -bho nyɔ li kɔkuiꞌa ꞌsraganmi, ɔ ꞌnʋ-o ꞌꞌnyinynidɩ ꞌbho -Lagɔꞌɔ ꞌꞌyigbeyi, ꞌle, -ɩnmɔ nʋꞌa -ɩn yiboꞌo-o -Lagɔ -ziaka, ꞌꞌlemnɩɩ, -bho -ɩn mu ꞌle kɔkuiꞌa bʋbɔbudu ꞌli ꞌle -ɩn ꞌke ꞌya ꞌsraganmi li a, ꞌɛ -nyna -ɩnmʋ ka, -bho -aꞌa -pɔlʋ gbo nʋ -kaa, ꞌle ɔ ꞌke ɛ -ɩnmʋ wɔn ꞌꞌyi ꞌyee ꞌle kɔkuiꞌa bʋbɔbudu ꞌmnɛ ꞌli a, ꞌɛ lɛtu ꞌbhɛɛꞌɛ ɛ ꞌke ɔ ꞌꞌmaa, ꞌle, lɛ-ɛ ꞌma-a ꞌꞌnyinynidɩ ɔ -bodɩ a, ɔ ꞌke ɛ nʋ ꞌle -aꞌa dɩ ɔbɔ ꞌke li -lrɛɛ. -Aꞌa ꞌlotʋꞌa ꞌꞌyu -ke dɩ Zezii Kliisɩ ꞌmɛꞌɛ ɛ, -bho -aꞌa nʋnʋdɩ ꞌmnɩ ꞌꞌmaa nɔ ɔ, ɛ se ꞌꞌyrili-nmɔ.
Ⅻ A ꞌye li-ɔ, ꞌlotʋꞌa ꞌꞌnynuu -ke ꞌꞌgwlideɛ ꞌfɩɩnꞌa ꞌmʋ, -bho -ɩn -see ꞌwa dɩ gba ꞌmʋ ꞌꞌdu ꞌle -aꞌa nʋnʋdɩ ꞌke ꞌwa -pɔlʋ gbidiwlu -za a, ꞌɛ ꞌꞌnyinynidɩtu, Zezii Kliisɩ -ɩn nʋ ꞌɛ ꞌꞌlruli -lrɛɛ.
ⅩⅢ ꞌƖnnɛ ꞌbhleꞌe ꞌnynɩꞌa dɩ, -bho ɛ ꞌꞌdu liliɛfɔfʋꞌa dɩ ꞌan ꞌlotʋꞌa ꞌꞌyu ꞌke ꞌꞌnyinynidɩ ꞌmʋ ꞌkpa a, ꞌꞌlemnɩɩ, ɛ -nmɔꞌɔ-ɔ ꞌꞌyrili ꞌɩn ꞌke ꞌɛ liliɛtuꞌa dɩ ꞌbhɔ ꞌle ꞌɩn -kɔɔ ɔ ꞌꞌnyinynidɩ ꞌmʋ po.