Ⅻ
*Zezii ꞌꞌdu-o *ꞌɔ -namʋ ꞌꞌdɩ ꞌmʋ ꞌꞌyrabhaꞌa dɩ
Ⅰ Ɛ-bɛ -nɔɔ ꞌmnɛ ti a, nyʋꞌa -gbogboyoko ꞌꞌyi-e ꞌbho *Zeziiꞌa ꞌꞌtroli ꞌle ꞌwa ꞌꞌyidieɛꞌɛ dɩ ʋn-ʋ ꞌꞌsideꞌe -side ꞌꞌkpi. ꞌLe ɔ na *ꞌɔ -namʋ -bodɩ: Aꞌba -za *Faliziɛɛn ꞌꞌsɛlɩ -le! Ʋn-ʋ ꞌmo-o -mɩɛ ꞌsɔn wɔn ꞌmʋ ꞌbhlemʋ. -Ka ꞌꞌbuubuulɛ ꞌꞌbuuꞌa ꞌꞌflɔɔ ɔ, ꞌka ꞌmnɔ, ꞌka-a, -bho ʋn -nɩ ꞌle nyʋꞌa ꞌꞌklumʋ, ꞌle ꞌwa ꞌꞌnyinynikpli ꞌꞌjriꞌe ꞌwa -dadudu ꞌꞌlru ꞌle ʋn -ke ʋn-ʋ plɛꞌɛ ɩ-bɩ kplisasʋɩ ꞌmnɩ ꞌmʋ.
Ⅱ A -gblee, lɩ-ɩ ꞌꞌzizeꞌa, ɩ-ɩ ꞌye-e ꞌꞌpiemʋ ꞌkpa -mʋ, ꞌle, lɩ -yɩ -nɩ ꞌka ꞌꞌzizekwla ꞌmʋ, ɩ-ɩ ꞌye yibo-ɛ mʋ.
Ⅲ ꞌƐ kamʋ, -bho a -za dɩ gbɩ ꞌmʋ dodogwia a, ꞌyrʋgbagbʋ nyʋ-ʋ ꞌye ɩ ꞌbʋꞌwɔn mʋ. ꞌLe, -bho -budu -kɛ wɔn ꞌꞌyi, ꞌle a ꞌke nyɔ ꞌꞌwʋnwan, ɩ-bɩ dɩ ꞌmnɩ, ꞌbho -gwlɔduu, ꞌbho-o nyʋ-ʋ ꞌye ɩ ꞌmʋ-za -nɩ mʋ.
Nyɔ -yɔ nyɔ ꞌka ꞌbho ꞌꞌdu ꞌle ɔ ꞌka ple
(Matiee 10:26-31)
Ⅳ ꞌAn bha ꞌꞌwe-a! ꞌƖn-ɩ ꞌtmʋʋꞌo amʋ-ɛ, nyʋ -yʋ ꞌka kuꞌa ꞌꞌsɛ ꞌlbha, aꞌba ple ʋ -le!
Ⅴ Nyɔ -yɔ a ꞌka ple, ꞌɩn-ɩ yi-oꞌo ꞌɩn ꞌke ɔ amʋ -tɔ: ꞌɩnnɔ ꞌmo-o -Lagɔ, -ɛkedɩmaa, ꞌɩnnɔ ꞌbhɛɛꞌo, -bho nyɔ ꞌmɛꞌɛ ɛ, ɔ ꞌke ɔ ꞌkleyeɛɛ wɔnpo ꞌle ꞌꞌkɔgwlɛnɛ ꞌmʋ. Kɩn! ꞌƖn-ɩ ꞌtmʋʋꞌo amʋ-ɛ, ꞌɩnnɔ a ꞌke ꞌbho ꞌꞌdu.
Ⅵ *Zezii poꞌa wlu ꞌmnɛ ti a, ꞌle ɔ ꞌye ꞌꞌyi -lue po, ꞌle ɔ na: Nyɔ-ɔ ꞌkpʋn-o nɩkpɩyreetɩ -muu ꞌle ɔ-ɔ po ꞌnɩ ꞌpɛlʋ mɔniyʋɛ gbɛ ꞌmʋ. Ɛ -nɩꞌa -kaa ꞌmʋ a, -Lagɔꞌɔ ꞌmate ꞌya ꞌyʋɛ -lueꞌa ꞌꞌbhuo gbo.
Ⅶ Ɔ-bɔ -Lagɔ ꞌmnɔ yiboꞌo-o ꞌꞌnɩmnɩ ꞌdiɛ -ke ꞌꞌbhi-i -nɩꞌa ꞌle aꞌba ꞌꞌlru ꞌli. A ꞌꞌdu-o lɛ, a ꞌye ꞌꞌyidienɩkpɩyreetɩ -zi. ꞌƐ dɩ ꞌtɔ ɔ, -sɩanyɩꞌa ꞌlbha amʋ -le!
*Zeziiꞌa ꞌwɔɔnwɔɔn -ke ꞌɔ ꞌꞌyidepoɛ
(Matiee 10:32-33; 12:32; 10:19-20)
Ⅷ ꞌƖn-ɩ ꞌtmʋʋꞌo amʋ-ɛ, nyɔ -yɔ nʋꞌa ꞌbho nyʋ ꞌweeꞌa ꞌꞌyigbeyi ꞌan -nɔ ɔ ꞌꞌduꞌo a, ꞌɩnmɔ *Nyunyɔꞌɔ ꞌꞌYu-u ꞌye -ɔ ꞌꞌyiꞌwɔɔn -mʋ -lrɛɛ ꞌan nyɔꞌɔ kamʋ ꞌbho -Lagɔ -ke ɔ gboꞌa -dalbhomʋꞌa ꞌꞌyigbeyi.
Ⅸ ꞌLe nyɔ -yɔ nʋꞌa ꞌbho nyʋꞌa klɛꞌɛ ꞌꞌyigbeyi ɔ se ꞌɩnmʋ yibo, ꞌɩn-ɩ ꞌye -ɔ ꞌꞌyidepo -mʋ -lrɛɛ ꞌbho -Lagɔ -ke ɔ gboꞌa -dalbhomʋꞌa ꞌꞌyigbeyi.
Ⅹ A -gblee, -bho nyɔ -nyni ꞌɩnmɔ *Nyunyɔꞌɔ ꞌꞌYuꞌa ꞌnynɩ wɔn ɔ, -Lagɔ-ɔ ꞌbhɔ-ɔ ꞌɔ ꞌꞌnyinynidɩꞌa dɩ. ꞌBho ꞌɛ lemʋ ꞌtɔ ɔ, nyɔ -yɔ -nyniꞌa *-Lagɔꞌɔ Lisaazuzuꞌa ꞌnynɩ wɔn, -Lagɔꞌɔ ꞌbhɔ ꞌɔ ꞌꞌnyinynidɩꞌa dɩ ꞌꞌkɔmʋkɔmʋ!
Ⅺ -Bho nyɔ kpa amʋ *-Lagɔꞌɔ wluꞌa ꞌlicɩaanbidi ꞌli -ke ꞌbhlɩkpɩyowli wɔnyi, ʋn ꞌke amʋ -zigle -tu a, ꞌbho dɩ a ꞌka ꞌmʋ-za, ꞌya ꞌꞌkpi, ꞌle, -ka a ꞌkɩ ɩ ꞌmʋ-za, ꞌya damʋ, nymɔꞌɔ ꞌꞌsi amʋ ꞌgwlʋ -le!
Ⅻ -Ɛkedɩmaa, ꞌbho ꞌmnɔ ɔ, *-Lagɔꞌɔ Lisaazuzu ꞌye ɛ amʋ -tɔ mʋ, ꞌle a ꞌke ɛ ꞌmʋ-za.
-Nɩayi -lue-e poꞌa ꞌɔ ꞌꞌwlilɩ -zrʋʋ ꞌmʋ ꞌnɔɔ ꞌkmʋ ꞌmʋ, ꞌɔ ꞌꞌyi
ⅩⅢ *Zezii ꞌgwɛ-ɛ -wluwlua ꞌꞌyi, ꞌle nyɔ -lue ꞌye ʋ-bʋ nyʋꞌa -gbogboyoko ꞌmnʋꞌa ꞌꞌklumʋ ꞌwlʋ ꞌle ɔ na Zezii -bodɩ: ꞌAn -Tɔyi, ꞌtmʋʋ ꞌan vɛnyɩ a, ꞌɩn -ke ɔ ꞌke -aꞌba -tɩtaꞌa tisiewlilɩ ꞌgble!
ⅩⅣ ꞌLe ɔ na: ꞌƖn bha, -yɩ ꞌma-a aꞌba dɩꞌa ꞌꞌyicɛɛ -ke aꞌba ꞌꞌwlilɩꞌa ꞌgblegbleaꞌa dɩ, ꞌɩn se -laa ꞌya dɩ ti-de.
ⅩⅤ ꞌLe ɔ na nyʋ ꞌwee -nɩꞌa ꞌbho -bodɩ: -Bho koo nyɔ ꞌga, ɛ -se ꞌɔ ꞌꞌwlilɩꞌa dɩ ɔ ꞌke tinɩɛzɛgɛ ꞌye -ko; ꞌɛ dɩ, a ꞌꞌdu aꞌba ꞌꞌbhi ꞌꞌyrili ꞌbho ɩ-bɩ ꞌꞌwlilɩꞌa ꞌtʋ-ʋ -nɩꞌa amʋ ꞌmʋꞌa damʋ!
ⅩⅥ ꞌBho ɛ-bɛ wlu ꞌmnɛ ꞌꞌkpi, ꞌbho-o ɔ -po -nɩꞌe ꞌꞌyi -lue ꞌle ɔ na: ꞌBho-o ꞌgagayi -lue -nɩꞌo. Ɔ ꞌbhle-e -kpɩɩꞌa -dadudu ꞌle ɩ-ɩ troꞌo tenyɩ,
ⅩⅦ ꞌle ɔ ꞌye ꞌbho ꞌkpa ꞌle ɔ-ɔ ꞌkabhaꞌo, ɔ-ɔ nʋꞌo, na: -Da ꞌɩn ꞌka ꞌan lɩ ꞌɩn -zaꞌa ꞌꞌdu, ꞌbho seꞌa ꞌꞌyiꞌbhɛ, ꞌle, koo ꞌɩn ꞌke -nynaꞌa?
ⅩⅧ ꞌLe ɔ na: Lɛ ꞌɩn ꞌka nʋ, ꞌɩnnɛ ꞌka-a: ꞌƖn-ɩ yi-oꞌo ꞌɩn ꞌke ꞌan ꞌsrɩ -yɩɩ -bhlua, ꞌle ꞌɩn ꞌke ꞌya ꞌbɩ ꞌmʋ -klɩgbɩ -po. ꞌLe ꞌya ꞌlimʋ ꞌtɔ ɔ, ꞌle-e ꞌɩn-ɩ ꞌye ꞌan lɩꞌa ꞌyɔ -ke ꞌan ꞌꞌwlilɩ -lrɩɩꞌa klɛ -po mʋ.
ⅩⅨ ꞌLe ꞌɩn-ɩ ꞌye -kaa ꞌan ꞌꞌbhuo ꞌꞌyiꞌlɛ mʋ -lrɛɛ: ꞌƖn bha, ꞌꞌwlilɩꞌa -dadudu -ɩn ꞌbhleꞌa a, zʋɩn -ke zʋɩn ꞌliꞌa lɩ moꞌo. -Za nymɔ ꞌgwlʋ, li lɛꞌꞌo lɛ, ꞌna nmɔꞌꞌo nmɔ, ꞌle -ɩn ꞌke ꞌbʋbʋa li.
ⅩⅩ A -gblee, ꞌle -Lagɔ na: -Nɩayi, -a ꞌye-e -zɩan ꞌꞌmatʋ ꞌmɛ -mʋ! ꞌLe, -bho ꞌɩn se ti-nɩ ꞌle, -aꞌa lɩ -ɩn poꞌa -zrʋʋ ꞌmʋ, yɔɔ ɩ -sieꞌe li, -ɔ ꞌke ꞌɩ ꞌmʋ liꞌa?
ⅩⅪ ꞌLe ɔ ꞌye ꞌbho wlu -lrɛɛ ꞌꞌdu ꞌle ɔ na: -Ka -lue ꞌmnɔ, nyɔ-ɔ poꞌa ꞌɔ ꞌꞌbhuoꞌa dɩ ꞌꞌwlilɩ -zrʋʋ ꞌmʋ ꞌnɔɔ ꞌkmʋ ꞌmʋ ꞌle -ɔ -seeꞌa ꞌɔ ꞌnynɩwlʋɛɛꞌɛ dɩ zi ꞌle yaku ꞌli a, ꞌka-a ꞌɔ dɩ -nɩꞌo.
-Lagɔꞌɔ ꞌꞌgwlideɛ
(Matiee 6:25-34)
ⅩⅫ ꞌBho ꞌɛ ꞌꞌkpi, ꞌle *Zezii na *ꞌɔ -namʋ -bodɩ: A ꞌye li-ɔ, ꞌɩnnɩɩnɩꞌa dɩ ꞌɩn-ɩ wɩ ꞌɩ amʋ ꞌꞌyiti, lililɛ a ꞌka li ꞌle a ꞌka ti-nɩ, aꞌba -kple ꞌɛ dɩ -le; -bana a ꞌka ku ꞌꞌyiꞌbhaa, aꞌba -kple ꞌɛ dɩ -le -lrɛɛ!
ⅩⅩⅢ Nyunyɔꞌɔ tinɩɛ -nmɔꞌɔ-ɔ ꞌꞌyrili ꞌle ɛ ꞌye lililɛ -zi; ꞌle nyunyɔꞌɔ ku -nmɔꞌɔ ꞌꞌyrili ɛ ꞌye -bana -zi.
ⅩⅩⅣ A yibo nɩkpɩ ꞌnɩ? ꞌYa po -kɔbʋ, ꞌya cɛ -kɔbʋ, ɩ se ꞌsra ꞌbhle, ꞌle, ɛ -nɩꞌa -kaa ꞌmʋ a, -Lagɔ-ɔ ꞌꞌnyɩ ꞌɩ lilia. Abʋ -se -kaa-a lɛ ꞌle a se nɩkpɩ -zi?
ⅩⅩⅤ Nyɔ se ꞌbhɛɛ, ꞌɔ ꞌꞌbhuoꞌa -kplekplea ꞌmʋ, ɔ ꞌke ꞌbho ꞌɔ ꞌwɩ ꞌꞌkpi ꞌwɩ -lue ꞌtɩn po.
ⅩⅩⅥ ꞌLe, -bho ɛ-bɛ -kplekplea ꞌmnɛ -see -kaabodɩtoope nmaze yi, ɩ-bɩ dɩ -lrɩɩ-ɩ -ziꞌa amʋ wɔn ꞌmʋti, leedɩ a-a popoꞌo ꞌya dɩ ꞌgwlʋtiꞌa?
ⅩⅩⅦ A yibo ꞌkwla ꞌzɔꞌɔ -sukui-i poꞌa ꞌꞌbowle ꞌnɩ? A -gbʋ ꞌya mɛmɛɛ ya. ꞌYa nʋ lbhʋ ꞌle ꞌya ꞌꞌpaꞌa -banɩ. ꞌƖn-ɩ ꞌwɩ -ɩ amʋ ꞌꞌyiti, ɛ -nɩꞌa -kaa ꞌmʋ a, Salomɔɔ ꞌma-a ꞌbhɩɔ, ꞌɔ -bana -ke ꞌꞌbhuo ꞌka ꞌꞌyrili-nmɔ, -ɛ ꞌka ꞌꞌbowle ꞌmnɩ ꞌmʋ-zi, ɛ se -nɩ.
ⅩⅩⅧ A -gblee, ꞌkwla ꞌzɔꞌɔ -sukui, -bho nyɔ gleꞌa, -bho zɔ zɩ, ɔ-ɔ poꞌa ꞌꞌyri a, -Lagɔ-ɔ bɛ nɩ-oꞌo ꞌle ɩ-ɩ nmɔꞌɔ ꞌle ꞌꞌyri lemʋ ti; ꞌle, -taaflɛ, a-bʋ ꞌma-a ꞌan -namʋ, ɔ -see amʋ liꞌgbaa yi -cueyiꞌa? -Ka a seꞌa -Lagɔꞌɔ ꞌꞌgwlideɛ ꞌmʋꞌbhle, a -gbʋ -kaa ya!
ⅩⅩⅨ ꞌƐ dɩ, lililɛ a ꞌka li ꞌle lɛ a ꞌka ꞌna, ꞌya tibɔnamʋ aꞌba -mɔ aꞌba ꞌꞌbhi -pɔlʋ ꞌli -le!
ⅩⅩⅩ Nyʋ -yʋ seꞌa -Lagɔ yibo, ꞌɩnnʋ ꞌbɩ ꞌɩ -kaa ti ꞌyrɛlɛɛ! A-bʋ -yʋʋ, -bho a-bee -mnʋʋ se lɛ ꞌbhle, -ka a -bɔ ꞌnɛ ꞌmʋ, aꞌba -tɩta -Lagɔ yibo nɩ-oꞌo.
ⅩⅩⅪ A ꞌye li-ɔ, -Lagɔ ꞌke amʋ nyʋ -lrʋʋ ꞌgbaa ꞌle ɔ ꞌke amʋ -kɔ ꞌle a ꞌke ꞌɔ ꞌꞌyisrɛɛpie ꞌmʋ -nɩ, a zi ꞌya dɩ -antanyɩ, ꞌle, -yɩ -sieꞌa ꞌbho, ɔ ꞌke ɩ ꞌbho po.
ꞌNynɩwlʋɛɛ ꞌle yaku ꞌli
(Matiee 6:19-21)
ⅩⅩⅫ A-bʋ ꞌma-a ꞌan nyʋ, aꞌba -tɩta -Lagɔ ꞌwɔn-oꞌo ɔ ꞌke amʋ ꞌɔ nyʋꞌa -kɔkɔɔ -ya ꞌle ɔ ꞌye ꞌbho ꞌkpa ɔ-ɔ nʋ ɛꞌo. ꞌƐ dɩ nymɔꞌɔ ꞌꞌsi amʋ ꞌgwlʋ -le!
ⅩⅩⅩⅢ Lɩ a ꞌbhleꞌa a, a -po nɩ ꞌpɛlʋ ꞌle a ꞌke ꞌya mɔni ꞌꞌpʋanlbhamʋ ꞌꞌnyɩ. ꞌꞌWlilɩ -seeꞌa -gwɛ yi ꞌꞌkɔmʋkɔmʋ, a ꞌbhle ɩ! ꞌƐ ꞌzɔ ꞌmo-o, nyɔꞌɔ -ma ꞌkmʋ ꞌmʋꞌa lɩ ꞌꞌyi -le! Ɛ -nmɔꞌɔ-ɔ ꞌꞌyrili nyɔ ꞌke ꞌɔ ꞌnynɩwlʋɛɛ ꞌle yaku ꞌliꞌa dɩ zi. ꞌLeꞌa lɩ-ɩ gwleꞌe ꞌmʋ-ɛ ꞌꞌkɔgwlɛka. ꞌꞌYrimʋ -see ɩ ꞌmʋꞌꞌluo yi, ꞌle kokoyrele -see ɩ -li yi. Nyɔ se ꞌbhɛɛ ɔ ꞌke ɩ wɔn-nyni.
ⅩⅩⅩⅣ A -gblee, -da nyɔꞌɔ ꞌtʋnʋlɛ -nɩꞌa a, ꞌbho-o ꞌɔ -pɔlʋ-ʋ ꞌwlaꞌa ti.
*Zeziiꞌa -namʋꞌa -boti
ⅩⅩⅩⅤ *Zezii nʋꞌa -kaa, ɔ ꞌpo-o ꞌꞌyi -lue ꞌle ɔ na: A -fie li, a san ꞌꞌyi ꞌle a ꞌke yra de. A cɛ aꞌba ꞌꞌnapɩ ꞌꞌyi.
ⅩⅩⅩⅥ ꞌBho ꞌnynɔkpagɔꞌɔ zɔ, ꞌle, -bho lbhʋnʋmʋꞌa -kɔyi -kɛ ɛ ꞌmʋ-ʋ mu a, -ka ʋn-ʋ fuo ꞌnɔ wɔn, ꞌle, -bho ɔ yi, -bho ɔ bhɔtɔ -buduwɔn ꞌꞌyi, ꞌle ʋn-ʋ kati ꞌnɛ -nalo a, a -nɩ -kaa!
ⅩⅩⅩⅦ -Bho ꞌwa -kɔyi -ka yi, lbhʋnʋmʋ deꞌa yra a, ʋn ꞌwa-a ti! -Ziadɩ ꞌɩn-ɩ zaꞌa amʋ -bodɩ ꞌmʋ, ɔ-ɔ ꞌye-e li-fie -mʋ, ꞌle ɔ ꞌke ʋ ꞌla, ꞌle ɔ ꞌke ʋ lilia ꞌꞌnyɩ.
ⅩⅩⅩⅧ -Bho nyʋ -sɔ ꞌꞌnynɔɔꞌɔ -gbaa -lue -ke ꞌɛ ꞌsɔnnɛ ꞌmʋ, -bho ɔ -ka yi ꞌle lbhʋnʋmʋ ꞌmnʋ ꞌke yra de a, ʋn ꞌwa-a ti!
ⅩⅩⅩⅨ ꞌLe ɔ ꞌye ꞌꞌyi -lue -lrɛɛ po ꞌle ɔ na: A po -lokui! -Nɔɔ -ke ti ꞌꞌyriyi ꞌka yi, -bho -buduyowli yibo nɛ ꞌkɩ, ɔ -see ɔ ꞌkɩ ꞌꞌyitiꞌꞌtayi yi, ɔ -see ɔ gbo -pa yi.
ⅩⅬ Ɛ-bɛ ꞌꞌyi ꞌmnɛꞌɛ ꞌzɔ ꞌka-a: -Nɔɔ -ke ti ꞌɩnmɔ *Nyunyɔꞌɔ ꞌꞌYu-u ꞌyeꞌa le -yi mʋ, a se ɛ yibo. ꞌƐ dɩ, aꞌba -boti -le, ꞌle ꞌɩn -kaa amʋ ꞌzɔꞌdaa!
Yrɔɔ ꞌmo-o lbhʋnʋyizɛgɛꞌɛ?
(Matiee 24:45-51)
ⅩⅬⅠ ꞌBho ꞌɛ ꞌꞌkpi ꞌle *ꞌPiɛlɩ na: ꞌAn -Kɔyi, -a-bʋ ꞌma-a *-aꞌa -namʋ, -aꞌba dɩ -ɩn poꞌo ꞌꞌyi -nɛɛ-ɛe, -ale nyʋ ꞌweeꞌa dɩ maꞌa?
ⅩⅬⅡ ꞌLe ɔ na: Yɔɔ ꞌmo-o ꞌꞌyisrɛɛlbhʋnʋyi -ɔ ꞌbhleꞌe -naagɩꞌa? ꞌƆ nyɔtu ꞌmo-o nyɔ -yɔ -ke -kɔyi -kaa ꞌlɩkpada-a mu, ɔ-ɔ sieꞌa ꞌɔ -bolbhʋnʋmʋ li ꞌle ɔ-ɔ ꞌꞌdu ꞌʋ ꞌꞌyrili, ꞌle ɔ-ɔ ꞌꞌnyɩ ꞌʋ lilia.
ⅩⅬⅢ -Bho ꞌɔ -kɔyi -ka le-e yi, ꞌle ɔ ꞌke ɔ ɩ-bɩ lbhʋ ꞌmnɩ kwa ꞌmʋ -yɛ ɛ, ɔ ꞌwa-a ti.
ⅩⅬⅣ -Ziadɩ ꞌɩn-ɩ zaꞌa amʋ -bodɩ ꞌmʋ, ɔ-bɔ ꞌꞌbhlegboyowli ꞌmnɔ, lɩ ꞌwee ɔ ꞌbhleꞌa, ɔ-ɔ ꞌꞌnyɩ -ɔꞌo ꞌle ɔ-ɔ ꞌꞌdu ꞌɩ ꞌꞌyrili.
ⅩⅬⅤ ꞌLe, -bho ɔ-bɔ lbhʋnʋyi popo -kaa ꞌgwlʋti: ꞌAn -kɔyi -see -yi yi -susueyi, ꞌle, ꞌɔ -bonyunyu -ke ɔ -plɛꞌɛ lbhʋ -lue ꞌꞌyi, ɔ ꞌke ʋ ꞌlbha, ꞌle ɔ ꞌke lililɩ li, ɔ ꞌke nmɛ ꞌna, -bho ɩ -kɔ ɔ ꞌlbha a,
ⅩⅬⅥ a -gblee, ɛ-bɛ -nɔɔ -ke ti, ɔ -seeꞌa ꞌɔ -kɔyiꞌa yiyia ꞌꞌgwlide, ꞌbho-o ɔ-ɔ ꞌye -yi -nɩ mʋ ꞌle ɔ ꞌke ɔ ꞌzɔꞌdaa. -Bho ɔ -yɛ nɔ ꞌbho, ɔ-ɔ ꞌkpʋn-o nyɔ ꞌmnɔ ꞌle ɔ-ɔ klɔ ꞌɔ nyanɩ ꞌmʋ tenyɩ. Nyʋ-ʋ -seeꞌa -Lagɔ ꞌꞌgwlide ꞌle -ʋ -seeꞌa ꞌbho ꞌɔ wlu ꞌꞌdu, ꞌka-a ɔ-ɔ ꞌye ꞌʋ -nʋ mʋ ꞌle ʋn ꞌke ꞌle ꞌꞌkɔgwlɛnɛ ꞌmʋ mu.
ⅩⅬⅦ Lbhʋnʋyi -yɔ yiboꞌa lɛ ꞌɔ -kɔyi ꞌybhaꞌa, ꞌle ɔ -see ɛ nʋ, ꞌɔ -kɔyi ꞌmnɔ-ɔ ꞌye -ɔ ꞌꞌsɛɛn -mʋ tenyɩ.
ⅩⅬⅧ ꞌBho ꞌɛ ꞌꞌkpi, -yɔ seꞌa lɛ ꞌɔ -kɔyi ꞌybhaꞌa yibo, ꞌle ɔ-ɔ nʋꞌa dɩ-ɩ -nɩꞌa ꞌlbhalbhaka a, ꞌɔ ꞌꞌsɛɛsɛ -see wɔn-ku yi. ꞌꞌYi Zezii poꞌa, ɔ ꞌke ɛ gbɔ-zaꞌa dɩ, ɔ poꞌo ꞌꞌnna -lue ꞌle ɔ na: Nyɔ -yɔ -Lagɔ ꞌꞌnyɩꞌa lɩꞌa -dadudu, ꞌɩnnɔ ɔ-ɔ ꞌybhaꞌa lɩꞌa -dadudu -lrɩɩ tenyɩ. Nyɔ -yɔ ɔ sieꞌa ꞌɔ lɩꞌa -dadudu li, ꞌɩnnɔ ɔ-ɔ ꞌye ꞌya -lrɩɩꞌa ꞌgbɛ li-sie mʋ.
*Zezii-i ꞌya-a nyʋꞌa ꞌꞌyicɩcɛɛ ꞌnɔɔ ꞌkmʋ ꞌmʋ
(Matiee 10:34-36)
ⅩⅬⅨ *Zezii ꞌpo-o ꞌꞌyi -lue -lrɛɛ ꞌle ɔ na: ꞌƖn ꞌyi-e ꞌnɔɔ ꞌkmʋ ꞌmʋ, ꞌle, -ka -bho nɛ -cɛꞌɛ ꞌꞌyi, ɛ ꞌbhɛɛꞌɛ ɛ ꞌka nyɔ -sin ꞌle ɔ ꞌke ꞌkle ꞌye, ꞌka-a ꞌɩn ꞌbɔꞌɔ ti ꞌan ꞌꞌdɩzɩgɩ ꞌke ꞌbhlɩkpɩ ꞌwee ꞌꞌkpi ti-wa -nalo ꞌle ꞌya dɩ nyʋ ꞌke ꞌkle ꞌye, ʋn ꞌke ꞌmʋcɩcɛ.
Ⅼ -Ka, -bho ʋn -ka nyɔ-ɔ batizee ꞌle ʋn-ʋ sri ꞌɔ ꞌꞌnukɔ ɔ, ꞌka-a ꞌkleyeɛɛ ꞌke ꞌɩnmʋ ꞌꞌkpi ꞌpɩple. ꞌLe nymɔ ꞌꞌsiꞌe ꞌɩnmʋ ꞌgwlʋ tenyɩ, ꞌle ɛ ꞌke -nʋ-ɛ.
ⅬⅠ A -gblee, aꞌba de ꞌꞌgwli na ꞌɩn ꞌyi-e ꞌnɔɔ ꞌkmʋ ꞌmʋ ꞌle ꞌɩn ꞌke -pɔlʋꞌa bhlubhua -ya -le! -Gba! ꞌꞌYicɩcɛɛ ꞌmna-a yaꞌa ꞌnɔɔ.
ⅬⅡ ꞌTraamʋ ꞌtɔ ɔ, ꞌan dɩ, ꞌꞌbhlegbo -yɛ -ke -da nyʋ -muu -nɩꞌa a, ꞌwa tan-a ꞌye-e -na -mʋ ꞌle ʋn -ke nyʋ ꞌsɔn ꞌke ꞌꞌyidede; ꞌle ʋ-bʋ nyʋ ꞌsɔn ꞌmnʋ ꞌke gbɔ-po, ꞌle ʋn -ke ʋ-bʋ nyʋ tan ꞌmnʋ ꞌke ꞌꞌyidede -lrɛɛ.
ⅬⅢ ꞌꞌYunyukpasu -ke ꞌɔ -tɩta-a ꞌye-e ꞌꞌyicɩcɛ -mʋ; ꞌꞌyunynaakpʋ -ke ꞌwa ꞌlotʋ-ʋ ꞌye-e ꞌꞌyicɩcɛ -mʋ; ꞌle nyimiɛꞌɛ ꞌlotʋ -ke ꞌwa ꞌꞌyuꞌa ꞌnynɔ-ɔ ꞌye ꞌꞌyicɩcɛ mʋ -lrɛɛ.
*Zezii ꞌtmʋʋꞌo-o *ꞌɔ -namʋ, ʋn ꞌke -nɔɔ -nɛɛ ꞌmʋtiꞌwɔn ꞌle ʋn ꞌke ꞌɛ kpli nʋ
(Matiee 16:2-3; 5:25-26)
ⅬⅣ *Zezii ꞌlɛꞌɛ -kaa a, ꞌle ɔ na nyʋ-ʋ -nɩꞌa ꞌbho -bodɩ: ꞌLe ꞌyrʋꞌa tiganamʋ, ꞌle -druku ꞌke ꞌle ꞌmʋ-sɔ -nɩ, -bho ɛ -ka zi a, ꞌbho-o a -nynaꞌa ti ꞌle a-a nʋꞌo: ꞌꞌNi-i ꞌye-e -lbha -mʋ, ꞌle ɛ-ɛ lbhaꞌo.
ⅬⅤ ꞌLe -pʋpɔɔ ꞌke ꞌzɔti ꞌmʋ-sɔ, a ꞌke ɛ liꞌye, a-a ꞌnʋ-o: ꞌYrʋ-ʋ ꞌye-e -fan -mʋ, ꞌle ɛ-ɛ waꞌa ꞌnɩgɩɛn.
ⅬⅥ Nyanɩbhlemʋ-a! A yiboꞌo-o ꞌbhlʋkpa -ke yaku ꞌꞌyiꞌa lɩ-ɩ ziꞌa ꞌꞌtibheli, ꞌle, -nɔɔ -ke ꞌmʋyibolɩꞌa dɩ a ꞌwɔnꞌɔ ꞌbɔ see, a se ɩ ꞌꞌyiyibo!
ⅬⅦ Leedɩ, ꞌꞌyisrɛɛlɩ a ꞌka nʋ, ꞌle aꞌba ꞌcrɛꞌɛ aꞌba ꞌꞌbhi ꞌmʋti ꞌya dɩꞌa?
ⅬⅧ -Ɩn ꞌye li-ɔ, -bho nyɔ ꞌꞌklaa -ɩnmʋ ꞌbho -zɩgletumʋ wɔnyi, -bho a -see -bhla ꞌle ꞌgbʋʋ ke a, mu -da ɔ -nɩꞌa, -ɩn ꞌke ɔ ꞌbho -yɛ, -ɩn ꞌke ɔ ꞌgbɛ kwa ꞌmʋ cɛ ꞌle ɔ -kaa -ɩnmʋ -jie ꞌmʋ po.
ⅬⅨ ꞌƖn-ɩ ꞌtmʋʋꞌo amʋ-ɛ, -bho ɛ -se -mnɛɛ ɛ, ꞌle ɔ ꞌke -ɩnmʋ -jie ꞌmʋ po a, lɛ -zigle -cɛꞌɛ -ɩnmʋ, -a ꞌꞌdu ɛ -kpayɩke-ɔ, ꞌle ʋn ꞌke -ɩnmʋ ꞌꞌyitiꞌꞌtayi. Ɛ-bɛ dɩꞌa ꞌꞌyitigʋgɔlɛ -nɛɛ, ɛ ꞌbhle-e ꞌzɔ.