Ⅲ
*ꞌZaan Batiisɩ -zaꞌa-a -Lagɔꞌɔ wlu ꞌmʋ
(Matiee 3:1-12; Maakɩ 1:1-8; ꞌZaan 1:19-28)
Ⅰ -Da ꞌWlomɛɛꞌɛ ꞌbhlʋkpayowliklagba ʋn-ʋ ꞌlaꞌa Tibɛlɩ -kɔ -nɩꞌa ꞌWlomɛɛꞌɛ ꞌbhlɩkpɩ ꞌꞌwe, ꞌɛ -zʋɩn -bue ꞌyɔ -muunɛ ꞌli, ꞌbho-o ꞌbhlʋkpayowli ʋn-ʋ ꞌlaꞌa Pɔnsɩ *Pilaatɩ -kɔ -nɩꞌe Zideeꞌa ꞌbhlʋkpa, nyukpasu -lue ʋn-ʋ ꞌlaꞌa *Elɔɔdɩ, ꞌɩnnɔ ꞌꞌduꞌo Galileeꞌa nɔ. ꞌƆ ꞌlotʋꞌa ꞌꞌyu ʋn-ʋ ꞌlaꞌa Filiipʋ, ꞌɩnnɔ -nɩꞌe ꞌle Itulee -ke Trakonitɩꞌa ꞌbhlʋkpa ꞌꞌkpi. Lisaniasɩ -mnɔɔ-ɔ -kɔꞌɔ Abilɛɛnɩ.
Ⅱ Nyʋ -yʋ ʋn-ʋ ꞌlaꞌa Anɩ -ke Kayifʋ, ꞌɩnnʋ ꞌmo-o *-Lagɔꞌɔ ꞌsragazamʋklɩgbɩ. Ɛ-bɛ -nɔɔ ꞌmnɛ ti a, ꞌbho-o -Lagɔ ꞌtmʋʋ -nɩꞌe Zakaliiꞌa ꞌꞌyu *ꞌZaan ꞌle ꞌꞌmusa ꞌꞌkpi ɔ ꞌke ꞌɔ wlu nyʋ -bodɩ ꞌmʋ-za.
Ⅲ ꞌƐ dɩ ꞌZaan-a pleꞌe -gwlɛ ꞌꞌwe-e -nɩꞌa ꞌꞌnigblʋ ʋn-ʋ ꞌlaꞌa Zudɛɛn wɔnli ꞌꞌyiti, ꞌle ɔ-ɔ poꞌo weze ꞌle ɔ-ɔ nʋꞌo na: A yibo aꞌba ꞌꞌnyinynidɩ ꞌꞌyi ꞌle a ꞌke -Lagɔ gbo ꞌꞌbhiti ꞌle ꞌɩn ꞌke amʋ *batizee, ꞌꞌlemnɩɩ -Lagɔ-ɔ ꞌbhɔ-ɔ aꞌba ꞌꞌnyinynidɩꞌa dɩ.
Ⅳ ꞌZaanꞌa ꞌꞌkpidɩ -Lagɔꞌɔ wluꞌa ꞌmʋtizayi ʋn-ʋ ꞌlaꞌa *Ezayii ꞌcnɩꞌe ꞌle -Lagɔꞌɔ ꞌꞌbɔgʋ ꞌli see, ɔ ꞌye na:
Nyɔ -lue-e -nɩꞌe ꞌle ꞌꞌmusa ꞌꞌkpi, ꞌɩnnɔ poꞌo weze ꞌle ɔ na: A po aꞌba -Kɔyiꞌa -jolʋ! -Bho a po ɛ, a ꞌsrɛɛ nɛ ꞌmʋ!
Ⅴ A -ka -dogwi! A wa trɩ -ke -gɔgɔɛ! A ꞌsrɛɛ -jolʋ ꞌmʋ! -Yɛ -ke -da sɩkpɩ -nɩꞌa, a -zɩ ɩ ꞌbho ꞌle a ꞌke ꞌbho ꞌmʋꞌbhɛɛ!
(ꞌꞌYi Ezayii poꞌa, ꞌɛ ꞌzɔ ꞌka-a: Aꞌba -Kɔyi -nɩꞌe-e yinamʋ. ꞌƐ dɩ a ꞌꞌtayi ꞌꞌnyinynidɩ -nɩꞌa ꞌle aꞌba -pɔlʋ ꞌzɔ ꞌꞌyiti, -Lagɔ ꞌke ɩ ꞌle -za ꞌle ɔ ꞌke ꞌya dɩ ꞌbhɔ!)
Ezayiiꞌa wlu -lue ꞌmnɛ, ꞌɩnnɛ ꞌka-a -bhla:
-Bho -Lagɔ ꞌbhɔ aꞌba -pɔlʋ ꞌzɔꞌɔ ꞌꞌnyinynidɩꞌa dɩ a,
Ⅵ ꞌle nyunyu ꞌwee ꞌke yibo -ka ɔ ꞌpʋʋnꞌa amʋ.
Ⅶ ꞌZaan poꞌa -kaa weze a, ꞌle nyʋꞌa -dadudu-u yi ꞌɔ gbo ɔ ꞌke ʋ batizee, ꞌle ɔ na: ꞌꞌYrabhabhlemʋ-a! Yrɔɔ nʋꞌo, -Lagɔꞌɔ wɔnkucɛ ɔ-ɔ ꞌyeꞌa nyʋ ꞌꞌkpi -ya mʋ, abʋ cɛ ɛ wɔn ꞌmʋꞌa?
Ⅷ Aꞌba kpli-i nʋꞌa, a yiboꞌo-o aꞌba ꞌꞌnyinynidɩ ꞌꞌyi ꞌbho -Lagɔꞌɔ ꞌꞌyigbeyi ꞌle a ꞌye ꞌle ɔ gbo ꞌꞌbhiti, a -tɔ nɩ! Aꞌba nʋ, aꞌba ꞌꞌna ꞌmo-o ꞌtɔ *Ablaamʋꞌa dɩ a, a-a ꞌye -Lagɔꞌɔ -zigle wɔn ꞌmʋ -cɛ mʋ, -le! A -gblee, sɩkpɩ-ɩ ꞌpɛꞌɛ -laa ti ɔ ꞌbhɛɛꞌo ɔ ꞌke ɩ Ablaamʋꞌa ꞌꞌnynuuꞌa ꞌꞌnynuu ꞌmʋ nʋ.
Ⅸ A-bʋ -yʋʋ, tu nyɔ ꞌke amʋ ꞌꞌyi po: Tu -yɛ -seeꞌa ꞌꞌbhizɩgɩ po, ɛ-ɛ ꞌye-e -cɛ -mʋ ꞌle ɛ ꞌke ꞌle nɛ ꞌmʋ ꞌꞌvuto-ɛ. A ꞌꞌdu aꞌba ꞌꞌbhi ꞌꞌyrili! ꞌꞌGbepa -sʋɛꞌo see, ɛ ꞌpɛ-ɛ ꞌbho tu ꞌmnɛꞌɛ kplu ꞌꞌkpi ti ꞌle ɛ ꞌke ꞌɛ ꞌsɩsɩanyɩ cɛ. (-Gblee, ʋn ꞌwɔn-ɔ ꞌꞌyi ꞌmnɛꞌɛ ꞌzɔ ꞌmʋti: Ʋn ꞌke ꞌwa ꞌꞌnyinynidɩ ꞌꞌyiyibo ꞌle ʋn ꞌke -Lagɔ gbo ꞌꞌbhiti.)
Ⅹ ꞌZaan Batiisɩ poꞌa wlu ꞌmnɛ ti a, ꞌle ʋn-ʋ dede ꞌnɔ ti, na: Leelɛ -Lagɔ ꞌybhaꞌa -a ꞌke nʋꞌa?
Ⅺ ꞌLe ɔ na: -yɔ ꞌbhleꞌa -banɩ ꞌsɔn, -yɔ seꞌa -bana ꞌbhle, ɔ ꞌꞌnyɩ ɔ -lue, ꞌle, -yɔ ꞌbhleꞌa lililɛ, nyɔ -yɔ ꞌmʋ-ʋ ꞌlbhaꞌa a, ɔ ꞌꞌnyɩ ɔ!
Ⅻ Ʋn -ka ꞌle-e gbʋ, *lapoozamʋ ꞌyi-e batizeenamʋ -lrɛɛ. -Kaa ꞌka-a ʋn dedeꞌe ꞌZaan ti: Kbhoo -abʋ ꞌke -nynaꞌa?
ⅩⅢ ꞌLe ɔ ꞌye ʋ -kaa ꞌꞌyiꞌlɛ: -Bho a mu a, aꞌba po lapooꞌa mɔni ꞌꞌkpi -le! -Ka aꞌba ꞌbhlɩkpɩyowli cɛꞌɛ nyʋ a, ʋn ꞌꞌdu ꞌna!
ⅩⅣ ꞌLe ꞌꞌsroja ꞌye ɔ -kaa tidede: ꞌLe -abʋ ꞌleꞌa? Kbhoo -abʋ ꞌke -nynaꞌa? ꞌLe ɔ na: Abʋ-aꞌa -za nyʋ mɔni kwa ꞌmʋ -le -glaka, aꞌba kpa nyʋ bhubhudɩ ꞌꞌyi -le! A ꞌꞌdu aꞌba ꞌꞌpɛlemɔniꞌa ꞌꞌsɛ ꞌꞌyrili!
ⅩⅤ -Gblee, nyʋ-ʋ yiꞌa a, ʋn de ꞌko-o ꞌꞌgwli na *wɔnkulɩ ꞌye ꞌkɩ ꞌbho -zi mʋ ꞌle ʋn-ʋ popoꞌo ꞌgwlʋti na ꞌZaan ꞌmo-o *-Lagɔꞌɔ ꞌBhozayi -ɔ ꞌpʋʋnꞌa nyʋ.
ⅩⅥ ꞌWa ꞌgwlʋtipopoɛ ꞌmnɛꞌɛ ꞌꞌkpi, ꞌbho-o ɔ ꞌꞌduꞌo wlu ꞌle ɔ ꞌye ʋ -kaa ꞌꞌyiꞌlɛ: ꞌƖnmɔ -yɔɔ, ꞌꞌni ꞌmna-a batizee nɩꞌe amʋ. Nyɔ -lue-e -nɩꞌe ꞌle ꞌan lemʋ, ɔ-ɔ yi-oꞌo. Ɔ ꞌku-o wɔn ɔ ꞌye ꞌɩnmʋ -zi. ꞌƖn se ꞌbhɛɛ ꞌɩn ꞌke ꞌɔ ꞌgeyikpaankpɩanꞌa ꞌꞌbhuo ꞌꞌdu. Ɔ-bɔ, *-Lagɔꞌɔ Lisaazuzu ɔ-ɔ ꞌye amʋ ꞌmʋ -po mʋ ꞌle ɔ ꞌke amʋ ꞌmʋ ꞌꞌyi, ꞌle aꞌba ꞌꞌklumʋꞌa nyʋtɔlʋ, -ka nɛ-ɛa ƆFa3 16 Nɛꞌɛ ꞌꞌyiꞌa ꞌzɔ -lrɛɛ-ɛ ꞌmo-o, nyʋ Zezii-i ꞌyeꞌa -Lagɔꞌɔ Lisaazuzu ꞌmʋ-po mʋ ꞌle ɔ ꞌke ʋ ꞌmʋ ꞌꞌyi, ɔ-ɔ ꞌye-e lbhʋ -nʋ -mʋ ꞌle ꞌwa -pɔlʋ ꞌzɔ ꞌle ʋn ꞌke liꞌsaa ꞌbho -Lagɔꞌɔ ꞌꞌyigbeyi.
ⅩⅦ A -gblee, ꞌꞌyi -ke aꞌba tinɩɛ gʋgɔꞌɔ ꞌꞌyiti, ꞌɩnnɛ ꞌka-a: Nɩkpɛ ɔ ꞌbhleꞌe kwa ꞌle ɔ ꞌke lɩꞌa ꞌyɔ ꞌmʋ bhla. -Yɩ ꞌbhleꞌa lɛ ꞌli, ꞌle ɔ ꞌke ɩ ꞌsra ꞌyaa, ꞌle, ꞌya flɩ-ɩ ꞌyeꞌa ꞌbho -sie mʋ a, ɔ ꞌke ɩ ꞌle nɛ ꞌmʋ po. (Ɛ-bɛ ꞌꞌyi ꞌmnɛꞌɛ ꞌzɔ ꞌka-a: ꞌsra ꞌmo-o -Lagɔ gbo ꞌle nɛ ꞌꞌduꞌo ꞌꞌkɔgwlɛnɛ.)
ⅩⅧ ꞌZaan -nɩꞌa *Izrayɛɛlɩkɔmʋ ꞌꞌdɩ -lrɩɩꞌa -dadudu ꞌmʋ ꞌꞌdunamʋ a, ɔ-ɔ ꞌzʋ -ʋ -Lagɔꞌɔ ꞌꞌdɩzɩgɩ -bodɩ ꞌmʋ.
ⅩⅨ Ɔ nʋꞌa -kaa, ɔ ꞌkpa-a Galileeꞌa ꞌbhlʋkpayowli *Elɔɔdɩ dɩ ꞌꞌyi, -ɛkedɩmaa, ꞌɔ ꞌlotʋꞌa ꞌꞌyuꞌa ꞌnynɔ -ʋ ꞌma-a Elodiadɩ, ɔ -zʋ ꞌʋ-ʋ ɔ li ꞌle ɔ ꞌye ꞌꞌnyinynidɩ -lrɩɩ nʋ.
ⅩⅩ A ꞌye li-ɔ, Elɔɔdɩ ꞌmnɔ ꞌꞌyi-e ꞌɔ ꞌꞌnyinynidɩ ꞌꞌkpi -lrɛɛke: ɔ ꞌpo-o ꞌZaan -jie ꞌmʋ.
*ꞌZaan Batiisɩ *batizeeꞌe-e *Zezii
(Matiee 3:13-17; Maakɩ 1:9-11)
ⅩⅪ -Nɔɔ -ke ti nyʋꞌa -dadudu-u muꞌa *ꞌZaan gbo ɔ ꞌke ʋ *batizee, ꞌbho-o ɔ batizee -nɩꞌe *Zezii -lrɛɛ. Zezii gwɛꞌɛ batizeeɛ ꞌꞌyi ꞌle ɔ-ɔ poꞌo *-Lagɔ wɔn gbo. ꞌBho -gbaa -lue ꞌmʋ, ɔ ꞌye-e yaku li, ɛ ꞌye wɔn kati
ⅩⅫ ꞌle *-Lagɔꞌɔ Lisaazuzu ꞌye ꞌgbɔlɩɛꞌɛ ku ꞌmʋꞌꞌluo, ɛ ꞌye ɔ ꞌꞌkpi tiꞌꞌsi, ꞌle wlu ꞌye ꞌle yaku ꞌli ꞌwlʋ, ɔ ꞌye ɛ ꞌbʋꞌwɔn ꞌle ɛ na: -Ɩnmɔ ꞌmo-o ꞌan ꞌꞌyuꞌa ꞌdɛ -lue -ke dɩ ꞌɩn -kmaꞌa. ꞌLe -ɩn ꞌmʋ ꞌɩn poꞌo ꞌan ꞌbʋbʋaꞌa ꞌwee.
*Zeziiꞌa ꞌꞌnabhli
(Matiee 1:1-17)
ⅩⅩⅢ-ⅩⅩⅩⅧ Ɛ ziꞌa -kaa a, *Zezii ꞌnyaaꞌa-a nyʋꞌa -tɔtɔɔ ꞌmʋ. Ɔ ꞌka ꞌɔ ꞌlbhʋ ꞌmnɛ wɔnꞌꞌdu a, ɔ ꞌbhle-e -kaa zʋɩnꞌa -gwlʋ -lue ꞌyɔ -bue. Nyʋ na ꞌkɩ ɔ-ɔ ꞌmo-o *ꞌZɩzɛɛfʋꞌa ꞌꞌyu. Ɔ-bɔ ꞌZɩzɛɛfʋ ꞌmnɔ ɔ, ꞌɔ ꞌꞌna ꞌꞌweꞌa ꞌnynɩ ꞌka-a:
-Lagɔ -yaꞌa *Adaa ti. Ɔ -yɔ ꞌɔ ti a, ꞌle ɔ ꞌye Sɛtɩ ꞌwlʋ. Sɛtɩ ꞌwlʋꞌo Enosɩ, Enosɩ ꞌwlʋꞌo Kayinaa, Kayinaa ꞌwlʋꞌo Maleleɛlɩ, Maleleɛlɩ ꞌwlʋꞌo Zalɛdɩ, Zalɛdɩ ꞌwlʋꞌo Enɔkɩ, Enɔkɩ ꞌwlʋꞌo Matusalaa, Matusalaa ꞌwlʋꞌo Lamɛkɩ, ꞌle ɔbɔ ꞌye *Nʋe ꞌwlʋ. Nʋe ꞌwlʋꞌo Sɛmʋ, Sɛmʋ ꞌwlʋꞌo Alɩfasaadɩ, Alifasaadɩ ꞌwlʋꞌo Kayinamʋ, Kayinamʋ ꞌwlʋꞌo Salaa, Salaa ꞌwlʋꞌo Ebɛlɩ, Ebɛlɩ ꞌwlʋꞌo Falɛkɩ, Falɛkɩ ꞌwlʋꞌo Wlagau, Wlagau ꞌwlʋꞌo Seluukɩ, Seluukɩ ꞌwlʋꞌo Nakɔɔ, Nakɔɔ ꞌwlʋꞌo Talaa; ꞌle ɔbɔ ꞌye *Ablaamʋ ꞌwlʋ. Ablaamʋꞌa ꞌꞌyu ꞌmo-o *Izaakɩ, Izaakɩꞌa ꞌꞌyu ꞌmo-o *Zakɔɔpʋ, Zakɔɔpʋꞌa ꞌꞌyu ꞌmo-o *Zidaa, Zidaaꞌa ꞌꞌyu ꞌmo-o Falɛsɩ, Falɛsɩꞌa ꞌꞌyu ꞌmo-o Ɛsɩlɔmʋ, Ɛsɩlɔmʋꞌa ꞌꞌyu ꞌmo-o Alɩnii, Alɩniiꞌa ꞌꞌyu ꞌmo-o Adɩminɩ, Adɩminɩꞌa ꞌꞌyu ꞌmo-o Aminadabʋ, Aminadabʋꞌa ꞌꞌyu ꞌmo-o Nasɔɔ, Nasɔɔꞌa ꞌꞌyu ꞌmo-o Salaa, Salaaꞌa ꞌꞌyu ꞌmo-o Bʋazɩ, Bʋazɩꞌa ꞌꞌyu ꞌmo-o Zobɛdɩ, Zobɛdɩꞌa ꞌꞌyu ꞌmo-o *Izayii, ꞌle Izayii ꞌye *Daviidɩ ꞌwlʋ. Daviidɩ ꞌwlʋꞌo Nataan, Nataan ꞌwlʋꞌo Matataa, Matataa ꞌwlʋꞌo Mɛnaa, Mɛnaa ꞌwlʋꞌo Melea, Melea ꞌwlʋꞌo Eliakimʋ, Eliakimʋ ꞌwlʋꞌo Zonamʋ, Zonamʋꞌa ꞌꞌyu ꞌmo-o ꞌZɩzɛɛfʋ, ꞌZɩzɛɛfʋꞌa ꞌꞌyu ꞌmo-o Zidaa, Zidaaꞌa ꞌꞌyu ꞌmo-o Siminyɔ, Siminyɔꞌɔ ꞌꞌyu ꞌmo-o Levii, Leviiꞌa ꞌꞌyu ꞌmo-o Mataatɩ, Mataatɩꞌa ꞌꞌyu ꞌmo-o Zolimʋ, Zolimʋꞌa ꞌꞌyu ꞌmo-o Eliezɛlɩ, Eliezɛlɩꞌa ꞌꞌyu ꞌmo-o Zezii, Zeziiꞌa ꞌꞌyu ꞌmo-o Ɛlɩ, Ɛlɩꞌa ꞌꞌyu ꞌmo-o Ɛlɩmadaan, Ɛlɩmadaanꞌa ꞌꞌyu ꞌmo-o Kozamʋ, Kozamʋꞌa ꞌꞌyu ꞌmo-o Adii, Adiiꞌa ꞌꞌyu ꞌmo-o Mɛlɩki, Mɛlɩkiꞌa ꞌꞌyu ꞌmo-o Neli, Neliꞌa ꞌꞌyu ꞌmo-o Salatiɛlɩ, Salatiɛlɩꞌa ꞌꞌyu ꞌmo-o Zolobabɛlɩ, Zolobabɛlɩꞌa ꞌꞌyu ꞌmo-o Wlesaa, Wlesaaꞌa ꞌꞌyu ꞌmo-o Zʋanaa, Zʋanaaꞌa ꞌꞌyu ꞌmo-o Zodaa; ꞌle ɔbɔ ꞌye Zozɛkɩ ꞌwlʋ. Zozɛkɩ ꞌwlʋꞌo Semeyinɩ, Semeyinɩ ꞌwlʋꞌo Matatiasɩ, Matatiasɩ ꞌwlʋꞌo Maatɩ, Maatɩ ꞌwlʋꞌo Nagayi, Nagayi ꞌwluꞌo Ɛsɩli, Ɛsɩli ꞌwlʋꞌo Naumʋ, Naumʋ ꞌwlʋꞌo Amɔsɩ, Amɔsɩ ꞌwlʋꞌo Matatiasɩ, Matatiasɩ ꞌwlʋꞌo ꞌZɩzɛɛfʋ, ꞌZɩzɛɛfʋ ꞌwlʋꞌo Zanayi, Zanayi ꞌwlʋꞌo Mɛlɩki, Mɛlɩki ꞌwlʋꞌo Levii, Levii ꞌwlʋꞌo Mataatɩ, Mataatɩ ꞌwlʋꞌo Elii, ꞌle Elii ꞌye ꞌZɩzɛɛfʋ ꞌwlʋ ꞌtɔ.