Ⅵ
*Zezii ꞌbhle-e wɔnkuɛ ꞌbho *lifɔzɔ ꞌꞌkpi
(Matiee 12:1-8; Maakɩ 2:23-28)
Ⅰ *ꞌZuifʋꞌa lifɔzɔ, *Zezii -ke *ꞌɔ -namʋ -yi -nɩꞌe-e ꞌle -kpɩɩ ꞌmʋ. Lɩ-ɩ -ke -kɔbʋ gʋgɔꞌɔ ʋn-ʋ ꞌlaꞌa ꞌblee, ꞌya -kpɩɩ moꞌo. Ʋn -nɩ zinamʋ ꞌle ꞌɔ -namʋ-ʋ cɛꞌɛ ꞌya -flei, ʋn-ʋ sʋsɔ ꞌnɩ -kʋtagwlʋ ti, ꞌle ʋn-ʋ liꞌe ꞌya ꞌyɔ.
Ⅱ *Faliziɛɛntɔlʋ ꞌye ꞌʋ li ꞌꞌsɛɛ, ʋn dedeꞌe-e Zezii ti, ꞌle ʋn na: -Gbʋ ꞌnɔɔ! Lɛ nyɔ -seeꞌa -nʋ yi -aꞌba lifɔzɔ, ꞌɩnnɛ -aꞌa -namʋ-ʋ nʋꞌo, leedɩ maꞌa?
Ⅲ-Ⅳ ꞌLe ɔ na: ꞌꞌDɩ-ɩ -zɛꞌɛ ꞌmʋ ꞌle -Lagɔꞌɔ ꞌꞌbɔgʋ ꞌli, a ꞌmate nɩ-aꞌa-ae? -Aꞌba ꞌꞌna *Daviidɩ, -da ꞌmʋ-ʋ ꞌlbhɔ ꞌɔ, ɔ -ke ꞌɔ -namʋ, koo ʋn -nynaꞌa? Ʋn paꞌa -Lagɔbudu ꞌli, ꞌꞌflɔɔ ʋn -zaꞌa *ꞌsraga ꞌmʋ, ʋn ꞌꞌnyɩꞌa -Lagɔ, -ɩ nɩꞌa ꞌle -Lagɔꞌɔ -budu ꞌli, ꞌɩnnɩ ɔ liꞌo, ꞌle ɔ ꞌye ꞌbho -za, ɔ ꞌye ꞌɔ -namʋ ꞌꞌnyɩ, ʋn ꞌye li. Ɩ-bɩ ꞌꞌflɔɔ ꞌmnɩ, ꞌle -aꞌba gba ꞌli, *-Lagɔꞌɔ ꞌsragazamʋꞌa ꞌꞌsɛ-ɛ ꞌke ɩ li.
Ⅴ ꞌLe ɔ ꞌye ʋ -kaa ꞌꞌyiꞌlɛ -lrɛɛ: A ꞌye li-ɔ, ꞌɩnmɔ *Nyunyɔꞌɔ ꞌꞌYu, ꞌɩnmɔ ꞌbhleꞌe wɔnkuɛ ꞌbho lifɔzɔꞌɔ ꞌꞌbhuo ꞌꞌkpi.
*Zezii ꞌpʋʋnꞌo-o nyɔ -lue -ke sʋ-ʋ ꞌmɛꞌɛ
(Matiee 12:9-14; Maakɩ 3:1-6)
Ⅵ *ꞌZuifʋꞌa lifɔzɔ -lrɛɛ ꞌli a, *Zezii ꞌpa-a ꞌle *-Lagɔwluꞌa ꞌlicɩaanbudu -lue ꞌli, ꞌle ɔ-ɔ tɔꞌɔ nyʋ. -Gblee, ɛ-bɛ -budu ꞌmnɛ ꞌli, ꞌle-e ɔ -yɛꞌɛ nyɔ -lue -ke -linasʋ ꞌmɛꞌɛ.
Ⅶ *-Lagɔꞌɔ gbaꞌa yibomʋ -ke *Faliziɛɛn -nɩꞌa ꞌle a, ʋn-ʋ ꞌgbʋ-o Zezii ya ꞌtɩn, -bho ɔ ꞌke nyɔ ꞌmnɔ ꞌpʋʋn ꞌbho ꞌwa lifɔzɔꞌɔ zɔ. Ɛ -se bhubhuyiti ʋn-ʋ nʋ -kaa -ko. Ʋn-ʋ ꞌbɔ-ɔ ti ʋn ꞌke ɔ dɩ -kpʋn, -ɛkedɩmaa, ʋn na ɔ-ɔ ꞌcɛ-ɛ ꞌZuifʋꞌa gba ꞌmʋ.
Ⅷ -Ka ʋn-ʋ popoꞌa ꞌgwlʋti Zezii -mnɔɔ yiboꞌo-o ꞌna see ꞌle ɔ ꞌye nyɔ -ke sʋ-ʋ ꞌmɛꞌɛ ꞌmnɔ ꞌtmʋʋ ꞌle ɔ na: -Sɔ ꞌmʋ, -nyna -daa nyʋ ꞌweeꞌa ꞌꞌyigbeyi ti. ꞌLe ɔ ꞌye ꞌmʋ-sɔ, ɔ ꞌye ꞌbho ti-nyna.
Ⅸ ꞌBho-o Zezii dede -nɩꞌe Faliziɛɛn -ke -Lagɔꞌɔ gbaꞌa yibomʋ ꞌmnʋ ti ꞌle ɔ na: ꞌBho lifɔzɔꞌɔ zɔ, ɛ -nmɔꞌɔ-ɔ ꞌꞌyrili nyɔ ꞌke -zɛgɛ nʋ-ae, -ale nyɔ ꞌke ꞌꞌnyinynidɩ nʋ? Ɛ -nmɔꞌɔ-ɔ ꞌꞌyrili -lrɛɛ -aꞌba lifɔzɔꞌɔ zɔ nyɔ ꞌke nyɔ ꞌpʋʋn-ae, -ale nyɔ ꞌke nyɔ ꞌꞌyitiꞌꞌtayi ɔ ꞌke ꞌmɛ?
Ⅹ Zezii nʋꞌa -kaa, ɔ gbʋgbʋ ꞌnʋ-ʋ ꞌꞌkpiti ꞌwee ꞌle ɔ na nyukpasu ꞌmnɔ -bodɩ: Sro sʋ! ꞌLe ɔ ꞌye ɛ sro, ɔ ꞌye ꞌpʋn -nalo.
Ⅺ Zezii gwɛꞌɛ ꞌꞌyi a, Faliziɛɛn -ke -Lagɔꞌɔ gbayibomʋ ꞌyeꞌa ꞌɛ da a, ʋn ꞌpo-o ꞌcɛ tenyɩ ꞌle ʋn-ʋ dedeꞌe -dede ti -ka ʋn ꞌka -nyna, ꞌle ʋn ꞌke ɔ ꞌꞌnyinynidɩ ꞌꞌlrulinʋ.
*Zeziiꞌa -namʋ -bue ꞌyɔ ꞌsɔn
(Matiee 10:1-4; Maakɩ 3:13-19)
Ⅻ Ɛ-bɛ -nɔɔ ꞌmnɛ ꞌli, *Zezii ꞌya-a -gɔgɔ ɔ ꞌke *-Lagɔ wɔn gbo po. Ɔ -nɩ -Lagɔ wɔngboponamʋ, ꞌꞌpuu! zɔ ꞌye ɔ ꞌle -zɩ -nɩ.
ⅩⅢ Zɔ zɩꞌa, ꞌle ɔ ꞌye *ꞌɔ -namʋ ꞌla. ꞌBho ꞌwa ꞌꞌklumʋ ɔ -zaꞌa nyʋ -bue ꞌyɔ ꞌsɔn, ʋn ꞌke ꞌɔ -dalbhomʋ ꞌꞌdu ꞌle ʋn ꞌke -Lagɔꞌɔ ꞌꞌdɩzɩgɩ kpa. Ʋ-bʋ ꞌɔ -dalbhomʋ ꞌmnʋ, ꞌwa ꞌnynɩ ꞌka-a:
ⅩⅣ Simɔɔ (Zezii ꞌꞌduuꞌa ꞌnynɩ ɔ-ɔ ꞌlaꞌa *ꞌPiɛlɩ) -ke ꞌɔ ꞌlotʋꞌa ꞌꞌyu Andree, Zaakɩ -ke *ꞌZaan, Filiipʋ -ke Batelemii,
ⅩⅤ Matiee -ke Tomaa, nyɔ -lue ʋn-ʋ ꞌlaꞌa Alɩfeeꞌa ꞌꞌyu Zaakɩ-e, Simɔɔ (-ɔ ꞌma-a ꞌbhlʋkpaꞌa ꞌꞌkpiticɛyi) -ke
ⅩⅥ nyɔ -lue ʋn-ʋ ꞌlaꞌa Zaakɩꞌa ꞌꞌyu, Zidaa, ʋn -ke Zidaa Isikaliyoo -ɔ ꞌyeꞌa -laa Zezii ꞌɔ tʋꞌa nyʋ -jeyi ꞌꞌnyɩ mʋ.
*Zezii -tɔꞌɔ-ɔ nyʋ ꞌle ɔ-ɔ ꞌpʋʋnꞌo ꞌꞌgwizimʋ
(Matiee 4:23-25)
ⅩⅦ *Zezii ꞌtɛꞌɛ ʋ-bʋ *ꞌɔ -namʋ ꞌmnʋ ꞌmʋ a, ɔ -ke ʋn ꞌdre-e -gɔgɔ, ʋn ꞌye ꞌbho ꞌɛ ꞌzɔ nyni, ꞌle ɔ ꞌye ti-nyna. ꞌBho ꞌmnɔ, ꞌbho-o *ꞌɔ -namʋꞌa -dadudu -ke nyʋ -lrʋʋꞌa ꞌplan -nɩꞌo. Ʋ-bʋ nyʋ -lrʋʋꞌa ꞌplan ꞌmnɛ -sɔꞌɔ-ɔ *ꞌZuifʋꞌa -gwlɔ ʋn-ʋ ꞌlaꞌa Zelizalɛɛmʋ -ke ꞌwa ꞌbhlʋkpa ꞌꞌkpi ꞌle -lrʋʋ -sɔꞌɔ ꞌtɔnniwɔnliꞌa -gwlɛ ʋn-ʋ ꞌlaꞌa Tiilɩ -ke Sidɔɔ ꞌmʋ.
ⅩⅧ Ʋn-ʋ ꞌyi-e Zezii -lokuiponamʋ ꞌle ɔ ꞌke ʋ ꞌwalɩ ꞌmʋ -za. Nyʋ -yʋ ꞌbhleꞌa ꞌꞌnyinynidɩꞌa -zuzu ꞌmʋ, ɔ-ɔ ꞌpʋʋn nʋ-oꞌo -lrɛɛ.
ⅩⅨ Nyʋ ꞌwee ꞌbɔ-ɔ ti, ʋn ꞌke ɔ liꞌtʋ, -ɛkedɩmaa, ɔ ꞌbhle-e wɔnkuɛ ꞌmʋ. ꞌLe ɛ ꞌmʋ ɔ-ɔ ꞌpʋʋnꞌo nyʋ ꞌwee.
Ngazeɛ -ke tiwɛɛ
(Matiee 5:1-12)
ⅩⅩ *Zezii nʋꞌa -kaa, ɔ -gbʋꞌo-o *ꞌɔ -namʋ ya ꞌle ɔ na: A-bʋ dɩn-ɩ nʋꞌa a, a ꞌwa-a ti, -ɛkedɩmaa, -Lagɔ ꞌbɔ-ɔ ti ɔ ꞌke amʋ -kɔ.
ⅩⅪ A-bʋ -yʋ ꞌmʋ-ʋ ꞌlbhaꞌa ꞌtraamʋ a, a ꞌwa-a ti, -ɛkedɩmaa, lɛ a ꞌybhaꞌa, a-a ꞌye -ɛ ꞌye -mʋ ꞌle a ꞌke lbho. A-bʋ -yʋ -nɩꞌa ꞌtraamʋ ꞌꞌvinamʋ, a ꞌwa-a ti, -ɛkedɩmaa, a-a ꞌye-e ꞌcɩsɛ -mʋ.
ⅩⅫ ꞌƖnmɔ *Nyunyɔꞌɔ ꞌꞌYuꞌa -nanaaꞌa kamʋ, a-bʋ -yʋ nyʋ-ʋ klaꞌa nyanɩ ꞌmʋ a, -ʋ -ke ʋn cɩcɛꞌɛ ꞌꞌyi a, ʋn-ʋ ꞌꞌjreeꞌa ꞌle -ʋ -ke ꞌnynɩ nyniꞌa wɔn, a ꞌwa-a ti.
ⅩⅩⅢ -Ka -lue ꞌmnɔ ɔ, ꞌka-a ꞌwa ꞌꞌna ꞌꞌweꞌa -nɔɔ ꞌꞌyi ʋn nʋꞌo -Lagɔꞌɔ wluꞌa ꞌmʋtizamʋ. ꞌƐ dɩ, -bho -kaabodɩ -yɛ amʋ a, a li ꞌbʋbʋa tenyɩ, -ɛkedɩmaa, -Lagɔ-ɔ ꞌye-e amʋ ꞌnynɩbhlelɛ ꞌꞌlruli-nʋ -mʋ ꞌle yaku ꞌli.
ⅩⅩⅣ A -gblee, -yeee! Ngazedɩ! A-bʋ nyʋ -yʋ ꞌgaꞌa a, a-a ꞌye-e ꞌkle ꞌye -mʋ tenyɩ, -ɛkedɩmaa, a ꞌye-e aꞌba -bolia see.
ⅩⅩⅤ -Yeee! Ngazedɩ! A-bʋ -yʋ ꞌbhleꞌa ꞌtraamʋ lililɩ ꞌwee a, a-a ꞌye-e ꞌkle ꞌye -mʋ tenyɩ, -ɛkedɩmaa, ꞌmʋ-ʋ ꞌye-e amʋ ꞌlbha -mʋ. -Yeee! Ngazedɩ! A-bʋ nyʋ -yʋ ꞌcɩsɛꞌɛ ꞌtraamʋ a, a-a ꞌye-e ꞌkle ꞌye -mʋ tenyɩ, -ɛkedɩmaa, a-a ꞌye-e ꞌꞌzru -mʋ ꞌle a ꞌke ꞌꞌvi.
ⅩⅩⅥ -Yeee! Ngazedɩ! A-bʋ nyʋ -yʋ -ke ꞌꞌdɩ aꞌba -bonyunyu-u zaꞌa, a-a ꞌye-e ꞌkle ꞌye -mʋ tenyɩ, -ɛkedɩmaa, -ka -lue ꞌmnɔ ꞌka-a ꞌwa ꞌꞌna ꞌꞌwe nʋꞌo nyʋ-ʋ -seꞌa-a -Lagɔꞌɔ wluꞌa ꞌmʋtizamʋzɩgɩ.
Jɛkamʋꞌa dɩkmɛɛ
(Matiee 5:38-48; 7:12a)
ⅩⅩⅦ A ꞌye li-ɔ, a-bʋ -yʋ poꞌa ꞌɩnmʋ -lokui, ꞌɩn-ɩ ꞌwɩ -ɩ amʋ ꞌꞌyiti, a -kma aꞌba jɛkamʋꞌa dɩ, ꞌle, nyʋ-ʋ klaꞌa amʋ nyanɩ ꞌmʋ a, a nʋ ʋ ꞌꞌyrilinmɔdɩ ꞌꞌlruli!
ⅩⅩⅧ Nyʋ -yʋ bhlaꞌa amʋ tu ti, a -wʋnna nʋ ꞌꞌniti, ꞌle, nyʋ -yʋ klaꞌa amʋ nyanɩ ꞌmʋ a, a ꞌke ꞌwa dɩ -Lagɔ libhade.
ⅩⅩⅨ -Bho nyɔ -po ꞌle -aꞌa -loku -lue ꞌmʋ ꞌkpa, -tɔ nɔ -aꞌa -loku -lrɛɛ ꞌꞌyi ɔ ꞌke ꞌle -po. -Bho nyɔ -za -ɩnmʋ ꞌmʋwlayriɛ li, ꞌꞌtayi nɔ ꞌꞌyiti ɔ ꞌke -aꞌa -bana ꞌmʋꞌꞌluo -lrɛɛ.
ⅩⅩⅩ Nyɔ-ɔ ꞌybhaꞌa -ɩnmʋ lɛ, -aꞌa -bhle nɔ -le, ꞌle, -bho nyɔ ꞌꞌluo -aꞌa lɛ ꞌmʋ, -aꞌa nʋ: -Yɛ ɛ le, -le!
ⅩⅩⅪ A -gblee, lɛ a-a ꞌbɔꞌɔ ti nyʋ ꞌke amʋ ꞌꞌlrulinʋ a, a nʋ ɛ aꞌba -bonyunyu -bodɩ!
ⅩⅩⅫ Nyʋ -yʋ -kmaꞌa aꞌba dɩ, -bho a -kma ꞌwa ꞌꞌsɛꞌɛ dɩ ꞌle, lee -ke dɩ a-a fuoꞌo -Lagɔ wɔn aꞌba -zɛgɛꞌɛ dɩꞌa? Nyʋ -yʋ -ke ꞌꞌbhi-i ꞌma-a ꞌꞌnyinynikpliꞌa nʋmʋ, ꞌka ꞌmnɔ, ꞌka-a ʋn-ʋ kmaꞌa nyʋ -yʋ -kmaꞌa ꞌwa dɩꞌa dɩ.
ⅩⅩⅩⅢ ꞌLe, nyʋ -yʋ -kmaꞌa aꞌba dɩ, -bho a -ka ꞌwa ꞌꞌsɛ ꞌꞌyrilinmɔdɩ ꞌꞌlruli-inʋ ꞌle, lee -ke dɩ a-a fuoꞌo -Lagɔ wɔn aꞌba -zɛgɛꞌɛ dɩꞌa? -Ka -lue ꞌmnɔ ꞌka-a ꞌꞌnyinynikpliꞌa nʋmʋ-ʋ nʋꞌo.
ⅩⅩⅩⅣ Nyʋ -yʋ -ke a ꞌka lɛ ꞌꞌyizizia, -bho a -ka ꞌwa ꞌꞌsɛ lɛ-ɛ ꞌꞌnyɩ ꞌle, lee -ke dɩ a-a fuoꞌo -Lagɔ wɔn aꞌba -zɛgɛꞌɛ dɩꞌa? -Ka -lue ꞌmnɔ, ꞌka-a ꞌꞌnyinynikpliꞌa nʋmʋ-ʋ ꞌꞌnyɩꞌe ꞌwa -bonyunyu lɛ, ꞌle ʋn-ʋ za ꞌnɛ ꞌɛ ꞌmʋbhɛɛlɛ ꞌkwla.
ⅩⅩⅩⅤ A -gblee, a-bʋ -yʋʋ a, a -kma aꞌba jɛkamʋꞌa dɩ! A nʋ ʋ ꞌꞌyrilinmɔdɩ ꞌꞌlruli, ꞌle, a ꞌke ʋ lɛ ꞌꞌnyɩ a, abʋ-aꞌa -fuo ꞌɛ leyiɛ wɔn -le! -Ka -Lagɔ -nɩꞌa ꞌle yaku ꞌli-i nʋꞌa a, ꞌka-a a-bʋ ꞌma-a ꞌɔ nyʋ ꞌke nʋ -lrɛɛ. ꞌƐ dɩ ɔ-ɔ ꞌye amʋ ꞌnynɩbhlelɛ ꞌꞌlruli-nʋ mʋ. A -gblee, nyʋ -yʋ, -bho -ɩn ꞌꞌnyɩꞌa lɛ, ʋn-ʋ waꞌa -ɩnmʋ ꞌkpɩ ꞌꞌyiti -ke ꞌlimʋꞌa wɔnnynimʋ, ꞌɔ ꞌlimʋ -nmɔ ꞌnʋ-ʋ ꞌꞌkpi wɔn.
ⅩⅩⅩⅥ A ꞌye li-ɔ, -ka aꞌba -tɩta -Lagɔꞌɔ ꞌlimʋ -nmɔꞌɔ wɔn tenyɩ a, a ꞌꞌdu ꞌna ꞌꞌyrili!
Aꞌba -tu aꞌba -bonyunyu -zigle -le!
(Matiee 7:1-5)
ⅩⅩⅩⅦ A -gblee, ꞌɩn-ɩ ꞌtmʋʋꞌo amʋ-ɛ, aꞌba -tu aꞌba -bonyunyu -zigle -le, ꞌle -Lagɔ -kaa amʋ -zigle -tu! Aꞌba ꞌꞌsraa aꞌba -bonyunyu -jiɛ -le, ꞌle -Lagɔ -kaa amʋ -jiɛ ꞌꞌsraa! A ꞌbhɔ aꞌba -bonyunyuꞌa ꞌꞌnyinynidɩꞌa dɩ ꞌle -Lagɔ ꞌke aꞌba ꞌꞌnyinynidɩꞌa dɩ ꞌbhɔ!
ⅩⅩⅩⅧ A ꞌꞌnyɩ aꞌba -bonyunyu, ꞌle -Lagɔ ꞌke amʋ ꞌꞌnyɩ! Aꞌba -bonyunyuꞌa ꞌꞌnyɩnyɩsʋ -Lagɔ-ɔ ꞌye ya-gbʋ mʋ ꞌle ɔ ꞌke amʋ ꞌꞌnyɩ. A -gblee, -Lagɔꞌɔ ꞌꞌbhuoꞌa ꞌlimʋꞌa wɔnnmɔɛꞌɛ dɩ, -bho ɔ -ka nyɔ lɛ-ɛ ꞌꞌnyɩ a, ꞌɔ -gbʋ nɛ ya; ꞌɛ ꞌꞌyidieɛꞌɛ dɩ nyɔ se ɛ kwa li ꞌbhɛɛ.
ⅩⅩⅩⅨ -Ɩn ꞌye li-ɔ, Zezii ꞌpo-o ꞌꞌyi -lue ꞌle ɔ na: ꞌꞌLɔyi se ꞌbhɛɛ ɔ ꞌke ꞌɔ -bolɔyi -kɔɔtu wɔnyi ꞌbhlee, ꞌka -ko? -Bho ɛ se -kaa ꞌmʋ-nɩ a, ʋn -nɩ ꞌsɔn-ɔ ꞌgaꞌa ꞌle-e ꞌꞌbhie ꞌli ti.
ⅩⅬ A yibo na nyɔꞌɔ ꞌzɔꞌɔ ꞌcɩaanyi se ꞌꞌyiꞌbhɛ ɔ se ꞌɔ -tɔyi -zi. -Bho ɔ ꞌcɩan lɩ ꞌwee ꞌle ɔ ꞌke ɩ yibo a, ɔ -ke ꞌɔ -tɔyi ꞌke ꞌmʋꞌbhɛɛ moꞌo!
ⅩⅬⅠ Leedɩ, -bho -aꞌa ꞌꞌbhuo nʋ dɩklɩgbɩ, -a po ꞌnɩ ꞌꞌyriti, ꞌle, -bho ɛ ꞌꞌdu -aꞌa -bonyunyɔ nʋ dɩtoope, -a ꞌꞌtɩtraꞌa ꞌli -ɩn ꞌke ɔ -zigle -tuꞌa? ꞌKa se ꞌꞌyrili-nmɔ.
ⅩⅬⅡ -Ɩnmɔ ꞌꞌyri ꞌꞌkanyɩ kpʋnꞌa tenyɩ a, -ɩnmɔ nʋꞌo -ɩn -bonyunyɔ -za ꞌꞌkanyɩ ꞌꞌyri ꞌmʋꞌa? -Mɩɛ ꞌsɔnꞌɔ ꞌbhleyi! Nmaze -aꞌa ꞌꞌbhuo -tanyɩ ꞌle -ɩn ꞌke -aꞌa -bonyunyɔꞌɔ nɩꞌa ꞌbɩ ꞌye.
Tu -ke ꞌɛ ꞌꞌbhuo
(Matiee 7:16-20; 12:33-35)
ⅩⅬⅢ -Ɩn ꞌye li-ɔ, *Zezii ꞌpo-o ꞌꞌyi -lue -lrɛɛ ꞌle ɔ na: Tu -ke ꞌꞌbhi ꞌmɩɩꞌa, ɛ se ꞌbhɛɛ ɛ ꞌke -kmakmabhi po, ꞌle, tu -yɛ -kmaꞌa, ɛ se ꞌbhɛɛ, ɛ ꞌke ꞌmɩɩmɩɩbhi po.
ⅩⅬⅣ ꞌLe tuꞌa ꞌꞌbhuo ꞌmʋ, ꞌle-e a ꞌke ɛ yibo -nɩ. Nyɔ se ꞌbhɛɛ ɔ ꞌke ꞌle -kikalɩꞌa ꞌꞌbhluku ya -vajibhuo -za, ꞌle nyɔ se ꞌbhɛɛ ɔ ꞌke ꞌle nnagbakuo ꞌmʋ -nyimiɛbhuo -za.
ⅩⅬⅤ Nyɔzɛgɛ-ɛ ꞌza-a dɩzɩgɩ-ɩ ꞌwlʋꞌa ꞌle ꞌɔ -pɔlʋzɛgɛ gbo ꞌmʋ; ꞌle nyɔ -ke dɩ -nyniꞌa ꞌꞌyrili-i zaꞌa ꞌꞌnyinynidɩ -nɩꞌa ꞌle ꞌɔ ꞌꞌnyinynipɔlʋ gbo ꞌmʋ. A -gblee, lɩ-ɩ ꞌꞌyiꞌa ꞌle -pɔlʋ ꞌzɔ, ꞌɩnnɩ nyɔ-ɔ poꞌo ꞌꞌpiemʋ.
-Bidi ꞌsɔnꞌɔ ꞌꞌkpidɩ
(Matiee 7:24-27)
ⅩⅬⅥ ꞌLe *Zezii ꞌye ꞌbho ꞌkpa ꞌle ɔ na: Lee -ke dɩ a-a ꞌlaꞌa ꞌɩnmʋ wɔn ꞌꞌyiti, -aꞌba -Kɔyi, -aꞌba -Kɔyi, ꞌle aꞌba nʋꞌo ꞌan ꞌgwlʋdɩꞌa?
ⅩⅬⅦ Nyɔ -yɔ yiꞌa ꞌɩnmʋ gbo a, -ɔ poꞌa ꞌɩnmʋ -lokui ꞌle -ɔ -deꞌa ꞌan wlu ꞌmʋ ti a, -ka ꞌɔ nyɔtu -nɩꞌa, ꞌkla-a ꞌka-a:
ⅩⅬⅧ A -gblee, ꞌɔ nyɔtu kɔɔꞌɔ-ɔ -naagɩbhleyi -po -nɩꞌa ꞌɔ lasoobudu ꞌbho trɩ ꞌꞌkpi. ꞌꞌNi nʋꞌa -kaa, ɛ lbha-aꞌo, ꞌle ꞌꞌnisʋɩ ꞌye ꞌꞌyi; ɛ -see bhlu, -ɛkedɩmaa, ꞌɛ ꞌkpʋ -po-ɛꞌɛ-ɛ ꞌbho trɩ ꞌꞌkpi glu.
ⅩⅬⅨ Ɛ-bɛ wlu ꞌɩn -zaꞌa -laa ꞌmʋ, nyɔ -yɔ ꞌwɩn ꞌɩ ꞌbɔ ɔ, ɔ -see ꞌɩ ꞌmʋ ti-de, ꞌɔ nyɔtu kɔɔꞌɔ-ɔ nyɔ-ɔ seꞌa -tɔɔ ꞌbhle -ɔ -po -nɩꞌa ꞌɔ -budu ꞌbho -bɩsɩdudu ꞌmʋ. ꞌꞌNi nʋꞌa -kaa, ɛ lbha-oꞌo, ꞌle ꞌꞌnisʋɩ ꞌye ꞌꞌyi. Ɛ -zɛꞌɛ -bɩsɩ ꞌzɔ ꞌꞌsɛɛ, ꞌbho -gbaa -lue ꞌmʋ gbligbligbli! ɛ bhlu-oꞌo, ꞌle ɛ ꞌye wɔn-nyni ꞌwee.