6
Bhandu bhaanhyubhalila Kilisito bhalihighe bhene kwa bhene
1 Handa mundu ywohele nkati ya mwenga kabhegha na bhulwa na nnyake, kanguyigha bhuli kunkokela kulibalasa lya bhandu bhangali kummanya Chapanga, kihyengo kya kunkokela kwa bhandu bha Chapanga?
2 Bhuli, mungumanya ng'obhe kukita bhandu bha Chapanga bhataatosa bhandu bha nnima? Payibhegha handa mwenga bhandu bha Chapanga mungubhatosa bhandu bha nnima, mungulepelwa bhuli kuyomola milando michoko michoko?
3 Bhuli, mungumanya ng'obhe kukita twabhatosa mahoka bha Chapanga? Handa ndo habhu, munoghwa kuyomola milando michoko michoko ya manjubha ghoha.
4 Kya habhu, handa mungubhegha na bhulwa ghwa milando michoko michoko, bhuli, munguakema bhandu bhene matamilo ghabhe ghanguyitikilwa ng'obhe na ngwemuko ya bhandu bhaanhyubhalila Kilisito ahike alinganihe malobhe bhulwa ghwenu?
5 Nungulongela habhu ngati mmone honi! Ndo kulongele kahone mundu hata yumu mu mwenga ywakabheghite na malango gha kualinganiha malobhe nkati ya alongo ahyubhalila?
6 Kihyengo kyake, mmegha mungukokelana ahyubhalila kwa ahyubhalila kangi muulongolo ghwa libalasa lya bhandu bhangali kunhyubhalila Chapanga.
7 Akwo kukokelana mabhene kwa mabhene kungubhoneha kukita nnepelwa. Bhuli, yinganoghitwe ng'obhe kwa mwenga kubhonelwa? Bhuli, yinganoghitwe ng'obhe kwa mwenga kupokwa utopelo ghwenu?
8 Peni, kihyengo kyake mwenga munguabhonela bhandu, na mungupoka, na kangi, agho munguatendela hata ahyubhalila ayenu!
9 Bhuli, mungumanya ng'obhe kukita bhandu ahakata bhaayingila ng'obhe mu ubhutwa ghwa Chapanga? Nkotoke kutenda ubhichi, bhandu atyahe, bhanakuyitundamila ming'omong'omo na angongola na bhaatyanga na alume ayabhe,
10 bhanabhwihi na bhanaghwimi na alobhi na abukuta ayabhe na apoka, abho bhoha bhaayingila ng'obhe mu Ubhutwa ghwa Chapanga.
11 Amoo mu mwenga mukibha handa abho, peni hinu nng'ululwa na nnyohwa na nhaghulighwa na ntendwa ghwa maha na kuyitikilwa na Chapanga, kwa lihina lya Bambo Yesu Kilisito na kwa Nhuki ghwa Chapanga ghwetu.
Munkwehe Chapanga kwa mmili na Nhuki.
12 Mundu kanguyigha kulongela, “Nunguhotola kutenda kila kilibhi” Tela, peni Chepa kila kilibhi ndo kyamaha kwa nenga. Nunguyitikila kutenda kila kilibhi peni nnema kulongohwa na kilibhi kyoheli.
13 Bhangi munkati yenu bhangulongela kulongela, “Hilyo hibhegha kwa kya lutumbo, na lutumbo lubhegha kwa kya hilyo.” Tela, peni kwa Chapanga hilibhi hyoha hibhili katahitenda hipyokoke. Mmili ghwa anamundu ghubhegha chepa kwa kya kutenda utyahe, ngati kwa kya kuntumikila Bambo, naywo Bambo ndo ywakayibhika maha mibhili.
14 Hino, kwa makakala ghake Chapanga ywakanhyuhite Bambo Yesu kuhuma mu kiho, hilahila katatuhyuha na twenga kwa makakala ghake bhubho.
15 Bhuli, mungumanya ng'obhe kukita mibhili yenu ndo hibhungo hya mmili ghwa Kilisito? Bhuli, munguhwacha ndaahotola kutola hibhungo hya mmili ghwa Kilisito na kuhilunganiha na mmili ghwa ntyahe? Akakaa!
16 Mana handa mummanya, yunakulilunga na ntyahe kabhegha mmili ghumu na aywo ntyahe. Kiyaha Malembo gha Chapanga ghangulongela “Na abho abhili bhaabhegha mmili ghumu.”
17 Peni yunakulilunga na Bambo kangubhegha nhuki ghumu na Bambo.
18 Nhepetuke yomo na utyahe. Ulemwa ghungi ghwoha mundu kangutenda panji ya mmili ghwake, peni ntyahe kangutenda ulemwa mummili ghwake mwene.
19 Mungumanya ng'obhe kukita mibhili ya mwenga ndo Nyumba ya Nhuki ywa Chapanga ywakatama unyumba mwenu, ywene munkingamite kuhuma kwa Chapanga? Hinu, mibhili ayi chepa ya mwenga ngati ndo ya Chapanga.
20 Kakibhahemela kwa utopelo nkulu. Kya habhu muyitumile mibhili yenu kwakya kunkweha Chapanga.