9
Mahengo gha Andumila na kingubhanoghwa kupokela
1 Bhuli, nenga chepa mundu yunuulekekehitwe? Bhuli, nenga chepa nndumila? Bhuli, nenga chepa yunummonite Yesu Bambo ghwetu? Bhuli, lihengo linilindendite nenga ndo chepa liibhatendite mwenga munhyubhalile Kilisito?
2 Hata paayibhele bhandu bhangi bhangumona nenga chepa nndumila, peni mwenga mungumona nu nndumila kwa Bambo.
3 Agha ndo mayango ghangu kwa bhala bhanakumbinga.
4 Bhuli, tungunoghwa ng'obhe kupeghwa hilyo na hya kunywegha kubhukana na lihengo litulitenda?
5 Bhuli, mwenga munguhwacha kukita twenga tunguhotola ng'obhe kulongohana na ahumbu bhetu bhaanhyubhalila Kilisito mu mwanja ghwetu? Handa paatenda andumila bhangi, na alongo bhake Bambo, na bhubho Petili.
6 Ebu ndo nenga na Balinaba ghweka tungunoghwa kutenda lihengo ngati tumokole kukingama hilibhi hya kututangatila hya manjubha ghoha?
7 Bhuli, ndo machonda ghani ywakaghenda ku ngondo manjubha ghoha kwa ngalabha hyake mwene? Bhuli, ndo nkulima ywoki ywangalyegha mapambika gha misabibu gha mung'unda ghwake mwene? Bhuli, ndo nhakila ywoki ywanganywegha maabhele gha mihugho yake mwene?
8 Malagho agho ghanughalongela chepa mahwacho gha anabhandu, ngati hata Malaghilo gha Musa ghangulongela ubhwabhu abhu.
9 Mana Malaghilo gha Musa ghatyekwa, “Ghukotoke kummopa nnomo senga pakahyogha ng'anda.” Bhuli, ndo kulongela Chapanga kangughayila milando ya senga?
10 Handa mwenga munguyitikila kuapegha bhandu bhangi hilibhi hya kuatangatila, kulyaghila mungunoghwa kuyitikila kutupegha hata twenga. Peni twenga tungubhamba ng'obhe hila hiinoghwa kututanga, ngati tungulimbila ghoha tukotoke kubhapingika bhandu kuhyubhalila Nhalo gha Maha ghwa Kilisito.
11 Payibhegha twenga ndo handa tukweta mbeyu ya kinhuki mu mwenga, bhuli, ndo nhilo patumokola hilibhi hya kututangatila kuhuma kwa mwenga kwakya ubhumi aghu?
12 Handa mwenga munguyitikila kuaapegha bhangi hilibhi hya kuatangatila kutama, kulyaghila hata twenga mungunoghwa kuyitikila kutupegha hilibhi hya kututangatila kutama.
Peni twenga tunguaghamba ng'obhe hilibhi ahyo hinoghwa kutupegha, ngati tingulimbilila mu hyoha ngati tokotoke kuapingika bhandu akotoke kuhyubhalila Nhalo ghwa Maha ghwa Yesu Kilisito.
13 Bhuli, mungumanya ng'obhe kukita, bhandu bhanakutenda lihengo mu Nyumba ya Chapanga bhangumokola mulyo ghwabhe kuhuma amwo mu Nyumba ya Chapanga? Nabho bhala bhaatendekeha nyambi mu Likuta lya Chapanga bhangumokola lifungu lya nyambi ayo?
14 Bambo kakilaghila ubhwabhu abhu, kukita bhala bhaalandamiha Nhalo ghwa Maha amokole hilyo hyabhe kubhukana na Nhalo ghwa Maha.
15 Peni nenga nangatumila hata yimoo ya malaghilo agho, kulyaghila, nenga nungughatyeka ng'obhe agho ngati yibheghe kwa nenga bhubho. Mana kwa nenga yibhegha mbaha kuhwegha kafauti na kuntenda mundu kuntenda mundu ywohele kanganile kuliloka kukita nungulandamiha Nhalo ghwa Maha kyangali kupeghwa kilibhi.
16 Peni panandamiha Nhalo ghwa Maha nema kulitika, mana ndo lihengo lyangu lya kulandamiha Nhalo ghwa Maha. Kimone, nenga handa ndakotoka kulandamiha Nhalo ghwa Maha.
17 Handa nangahaghulite numwene lihengo ali, hino, ningadumbilite kupeghwa hupo, peni hinu nungukwilikihwa kuyitenda, kiyaha Chapanga ndo ywakambeghite lihengo ali nilitende.
18 Hinu, hupo yangu ndo kilibhi ghani? Hupo yangu ndo kulandamiha Nhalo ghwa Maha yaghi hela, ngotoke kutumila kafauti na makakala ghangu ghameghite nagho mu kulandamiha Nhalo ghwa Maha.
19 Payibhele nenga chepa mmandwa ghwa mundu ywoheli, peni nilitenda mmandwa ghwa kila mundu ngati numpeghe Kilisito bhandu atangalo muyinoghwa.
20 Kwa Akaayahudi nikitama handa Nnyahudi ngati nuatangatile bhammanye Kilisito, payibhele nenga megha chepa pahi ya Malaghilo, nikitama pahi mwa malaghio kwa bhombe, ngati nuamokole abho bhabheghite pahi mwa Malaghilo.
21 Kwa bhala bhangamanya Malaghilo gha Musa, nungutama handa bhombe, ngati nuamokole bhome bhaabheghite panji ya Malaghilo. Ali lingulaha ng'obhe kukita nenga nungutughila ng'obhe Malaghilo gha Chapanga, kiyaha nungukwilikihwa na Malaghilo gha Kilisito.
22 Kwa bhala bhabheghite na uhyubhalilo nnyoyoho nikilitenda nnyoyoho ngati nuatangatile abho ayoyoho. Nilitenda kila kilibhi kwa bhandu bhoha ngati hotole kaalopoha amoo bhabhe.
23 Nungutenda agha ghoha kwakya Nhalo ghwa Maha, ngati hotole kulihanga na mokole nonelo hyake papamu na bhangi.
24 Bhuli, mungumanya ng'obhe kukita bhala bhaalimbana kwa lubhilo, bhangubhutuka lubhilo bhoha, peni ywakatola hupo ndo yumu ghweka. Habhu nnimbane mu lubhilo kya bhula munnoghwa ngati mmokole hupo.
25 Kila mundu ywakalilunga na malimbano gha kubhutuka lubhilo, bhangughungila kwa milando mitangalo. Bhangutenda habhu ngati bhamokole hupo yinakubhola, peni twenga tungutenda habhu ngati tukingame hupo yangabhola manjubha ghoha kyanga uhiko.
26 Hata nenga, pamutuka lubhilo nungupala kulongoha, ndo mundutana, chepa handa mundu ywakatuta libhako lyake payaghi.
27 Nungughuhenyula mmili ghwangu na kughutenda ghulimbilile, ngati panyomola kualandamihe bhangi, ngotoke kulemwa na Chapanga.