4
Milando ya Kinhuki muhibhigha
1 Kya habhu, Chapanga katupegha twenga lihengo ali kwa luhungu lwake, na habhu tungutunyuka ng'obhe mwoyo.
2 Tulema milando yoha ya mbwepo na ya honi. Tungutama ng'obhe kwa kuakuluha bhandu na kulipotoha lilagho lya Chapanga, hangi kuhangana Lilagho lya Chapanga na uhwangi, ngati tungulongela hoto pekupeku ngati bhandu amanye kukita twenga ndo bhandu bha hoto muulongolo ghwa Chapanga.
3 Nhalo ghwa Maha ghutualandamiha bhandu handa ghungumanyika ng'obhe kya maha, hino, ghukumanyika ng'obhe kwa bhala bhanakuhobha.
4 Bhandu bhanguhyubhalila ng'obhe kiyaha Nchipila ywene ndo chapanga ywa nnima aghu kabhayingiha lubhindo mu mahala ghabhe, ngati akotoke kughubhona ulangalo ghwa Nhalo ghwa maha ghwa Ukulu ghwa Kilisto ywaatubhoneha bhula Chapanga pakabhegha.
5 Mana tungulandamiha ng'obhe mihalo ya kya twenga twabhene, ngati tunguaghombela nhalo ghwa Yesu Kilisto kukita ywene ndo Bambo, na tunguaghombela kukita twenga ndo twaandumitumi bhenu kwakya Yesu.
6 Chapanga ndo ywakalongelite, “Lubhwelo lung'ale kuhuma mulubhindo” ndo kalutenda lubhwelu lwake lung'ale mu myoyo ya twenga, ngati kutupegha lubhwelo lwa kumanya ukulu ghwa Chapanga ghuung'aliha mu kibhungi kya Kilisto.
7 Basi, Chapanga katupegha lilumbo lwa kulandamiha Nhalo ghwake, peni twenga ndo ayoyoho muno handa hibhigha ngati yimanyikane pekupeku kukita makakala agho makulu ghanguhuma kwa Chapanga, hangi chepa kwa twenga twabhene.
8 Tungupungwa mumbande hyoha kila linjubha, peni tungulepelwa ng'obhe, tungubhona bhwaghalili, peni tungutunyuka ng'obhe mwoyo,
9 tubhegha na amyanja atangalo, peni Chapanga kanguleka ng'obhe kututangatila, na payibhele tunguponehwa pahi, tungukomwa ng'obhe.
10 Manjubha ghoha tungubhegha mu mipinguhi ya kukomwa handa payibheghite kwa Yesu, ngati ubhumi ghwa Yesu ghubhonekane kupitila mibhili ya twenga.
11 Mana twenga tuughendelela tungulama, tubhegha mu mpinguhi ghwa kiho kwakya Yesu kila linjubha, ngati ubhumi ghwa Yesu ghubhonekane mu mibhili yetu ya kuhwegha.
12 Basi, kiho kingutenda lihengo nkati yetu, peni ubhumi ghutenda lihengo nkati yetu.
13 Malembo mang'anyimo ghangulongela, “Nikihyubhalila ndo mana nikighulandamiha” na twenga tubhegha na Nhuki ghughula ghula ghwa kunhyubhalila Chapanga, ndo mana tungughendelela kughulongela Nhalo ghwake.
14 Tungumanya kukita Chapanga ywakanhyuhite Bambo Yesu, katatuhyuha bhubho na twenga, na kutubhika muulongolo ghwake papamu na mwenga.
15 Milando yoha ayi yibhegha kwakya kuatangatila mwenga, hata luhungu lwa Chapanga palubhahikila bhandu atangalo muno, kangi bhandu abho bhannumbe muno Chapanga. Ayi yantenda Chapanga kaghendelele kukwehwa.
Kutama kwa kuhyubhalila
16 Kubhukana na agho tungudunyuka ng'obhe mwoyo, na hata mibhili ya twenga kwa panji yingutotokela na kubhegha na ughohi peni mihuki ya twenga yingutendekwa ya hyono manjubha ghoha kyanga uhiko.
17 Kiyaha mapungwo ghatubhegha nagho ndo madoko hela na kangi gha nndaluko ghwa mandina, peni mapungwo agho ghangutubhika kala kuumokola ukulu ghwa manjubha ghoha ghuubheghite nkulu kupitingana mapungwo ghetu.
18 Habhu tungulolekeha milando yingabhonekana, na chepa milando yinakubhonekana. Mana ghala ghatughabhona ndo gha nndaluko ghwa mandina hela, ngati ghala ghangabhonekana ndo gha manjubha ghoha.