4
Nhuki ghwa hoto na nhuki ghwa uhwangi
1 Maalongo bhangu bhanuapala, nkotoke kuhyubhalila kila mundu ywakalongela kabhegha na Nhuki ywa Chapanga, ngati muyihingukihe mihuki aywo ngati muhotole kumanya kukita yihuma kwa Chapanga, kiyaha ambuye atangalo ghwa uhwangi abwituka mu nnima.
2 Ayi ndo njila ya kumanya handa mundu kangulongohwa na Nhuki ghwa Chapanga, ywohele ywakakambuka kukita Kilisto kakihika na kakibhegha, kakibhegha handa mundu, mundu aywo kabhegha na Nhuki ghwa Chapanga.
3 Peni mundu ywohele ywanga kunyitikila Kilisto, kabhegha ng'obhe na aywo Nhuki ghwa Chapanga. Mundu aywo kabhegha na nhuki ghwa kunpingika Kilisto, na mwenga mukiyihwa kala kukita katahika npingika Kilisto, na hino kahika kala pannima.
4 Peni mwenga, ndo bhana bha Chapanga, na mwenga mubhahotola abho bhandu ahwangi kiyaha Nhuki ywakabheghite nkati yenu ndo nkulu kupitingana yula ywakabheghite nkati yabhe.
5 Bhombe bhangubhukana na milando ya munnima, nabho bhandu bha munnima bhanganyitikila kiyaha bhombe ndo bhandu bha nnima aghu.
6 Peni twenga ndo bhake Chapanga. Mundu ywohele ywaanmanyite Chapanga kangutuyihwa, mundu ywanga kubhegha na Chapanga kangutuyihwa ng'obhe. Basi kwa njila ayi twahotola kunmanya kafauti nkati ya Nhuki ghwa hoto na nhuki ghwa uhwangi.
Chapanga ndo Upalo
7 Maalongo apalo, tupalane, kiyaha upalo ghunguhuma kwa Chapanga. Ywohele ywakabheghite na upala kabhelekwa na Chapanga, naywo kangunmanya Chapanga.
8 Yula ywanga kupala kangunmanya ng'obhe Chapanga, kiyaha Chapanga ndo upalo.
9 Na Chapanga kakighubhoneha upalo ghwaki kwa twenga kya kunlaghila mwana ghwaki ghwa kya ghweka munnima, ili kwa njila yake tumokole kulama.
10 Aghu ndo upalo ghwene, chepa twenga tuuyandite kumpala Chapanga, ngati kukita ywombe kakiyanda kutupala twenga mbaka kakinnaghila Mwana ghwake kabheghe nyambi ya kutubhuhila ulemwa ghwetu.
11 Maalongo apalo, handa Chapanga kakitupala habho, basi na twenga tungunoghwa tupalana twabhene.
12 Kahone mundu ywakammonite Chapanga, peni handa patupalana, Chapanga katatama papamu na twenga, na upalo ghwake ghwabhegha handa bhula Chapanga pakatupala twenga.
13 Tungumanya kukita tungutama papamu na Chapanga na ywombe Chapanga kangutama nkati yetu, kiyaha katupegha twenga kipalamande kya Nhuki ghwaki.
14 Na twenga tubhona na kulubhulila kukita Tate kakinnaghila Mwana ghwake ili kabheghe Nnopohi ghwa bhandu.
15 Ywohele ywakalongela na kuyitikila kukita Yesu ndo Mwana ghwa Chapanga, Chapanga kangutama papamu na ywombe, na ywombe kangutama papamu na Chapanga.
16 Habhu, twenga tungumanya na tunguhyubhalila kukita Chapanga kangutupala twenga.
Chapanga ndo upalo. Ywohele ywakatama mu upalo aywo kangutama nkati ya Chapanga na Chapanga kangutama nkati yake.
17 Kwa njila ayi, Chapanga kangutwihiliha upalo ghwake nkati mwetu, ili tubheghe na ukangamalo mu linjubha lya kutoswa.
18 Paabheghite na upala kahone lyogha. Peni upalo ghwa hoto ghungubhingabhinga panje lyogha lyoha. Kiyaha kiituyingiha lyogha ndo mahwacho gha kutoswa. Ywohele ywakabhegha na lyoha kabhegha ng'obhe na upalo ghwa hoto.
19 Twenga tubhegha na upalo kiyaha Chapanga kakitupala kalongohi.
20 Handa mundu katalongela, “Nungumpala Chapanga.” Peni kangunkalalila nnongo ghwaki, aywo ndo nhwangi. Kiyaha mundu ywakanpala ng'obhe nnongo ghwake ywaammona, aywo kahone kunpala Chapanga ywene ywakammonite ng'obhe.
21 Hinu, ali ndo ngwiliho yakatupeghite Kilisto, ywohele yaanpala Chapanga kangunoghwa kupala nnyake.