7
Nhwano kuhuma ku kutolana
1 Maalongo bhangu, hinu, nungulongela na bhala bhaaghamanya Malaghilo, bhuli, mungumanya ng'obhe kukita Malaghilo ghangubhegha na makakala kwa mundu ywakabheghite na ubhumi?
2 Kwa nhwano, nhumbu yunakutolelwa kabhopwa na malaghilo kwa nngwana ghwake pakabhegha na ubhumi, peni yula nnume pakahwegha, yula nhumbu kanguhughulighwa kuhuma mu Malaghilo gha kutolana.
3 Habhu, nhumbu aywo handa pakaghonja na nnume yungi pala nnume ghwake kakali kangukeka, aywo kangukemwa ntyahe, peni nnume ghwake pakahwegha, nndala aywo kabhegha ng'obhe mu kibhopo kya kutolelwa, naywo pakatolelwa na nnume yungi, kangubhegha ng'obhe ntyahe.
4 Ubhwabhu abhu, maalongo bhangu, milando ayi yibha na kwa mwenga bhuho, hata mwenga mungubhopwa kangi ng'obhe na malaghilo kiyaha nhwegha papamu na Kilisito ku lupingika, hinu mwenga ndo bhandu bhake ywombe ywakahyukitwe ngati nhotole kutenda ghala ghakaghapalite Chapanga.
5 Kiyaha patubheghite tungutama kubhukana na kisilia kya ulemwa, tama hakataho hikikolekehwa na Malaghilo ghaatendite mahengo mu mibhili yetu, habhu tukihyatwa na kiyaghabhu kya Chapanga.
6 Peni hinu tulekekehwa kuhuma mu kibhopo kya Malaghilo, kiyaha tuhwegha ya kya ghula nnando ghuututendite twenga tubheghe handa abhandwa. Hinu tungutenda lihengo kubhukana na bhula patutama kya uhyono kwa kulongohwa na Nhuki ghwa Chapanga, na kata kubhukana na ubhumi ghula ghwa makachu ghwa Malaghilo ghaatyekitweghe.
Malaghilo na ulemwa
7 Hino, tulongele bhuli? Kukita Malaghilo ndo ulemwa? Aka kaa! Peni kya nga Malaghilo nenga ningamanyite ng'ombe kukita lumatamata ndo niki. Mana nangamanyite ng'obhe lumatamata lwa uhakata ndo niki? Handa Malaghilo ghangalongelite ng'obhe “Ghukotoke kubhegha na lumatamata.”
8 Peni kwa kukindila malaghilo agho, ulemwa ghukimokola ng'ebhu ya kuhakambula tama nhanganganiko hakataho nkati yangu. Kiyaha kya nga Malaghilo ulemwa ndo kilibhi kiihweghite.
9 Nndaluko ghumo nenga nikibhegha na ubhumi kya nga Malaghilo, peni paghahikite malaghilo, niking'amuha kukita megha na ulemwa, na nikihwegha.
10 Habhu Malaghilo nningo ghwake ghukibhegha kuyegha ubhumi, peni kwa nenga yikiyegha kiho.
11 Kwa njila ya malaghilo agho, ulemwa ghukinguluha na kungoma.
12 Hino, Malaghilo ghanguhuma kwa Chapanga, na ngwiliho yinguhuma kwa Chapanga kangi ndo gha maha na ghabhegha handa paghonogha.
13 Kulyaghila kilibhi akyo kya maha kyahotola ng'obhe, nga kya mandina, kunnyambuhia kiho, ulemwa ndo ghukinyambuhila kiho kwa njila ya malaghilo gha maha, ghukibhegha nningo ghwa Chapanga kukita malaghilo ghabhonehe kukita ulemwa ndo kilibhi kihakana muno.
Makakala gha ulemwa nkati yetu
14 Tungumanya kukita Malaghilo ghakihuma kwa Chapanga, peni mmegha na uanamundu ghwa ulemwa, ndo kulongela nenga ndo handa mmandwa ghwa ulemwa.
15 Nungumanya ng'obhe kinikitenda, kiyaha kila kinikipala nungukitenda ng'obhe, peni kila kinikikalalila ndo kinukitenda.
16 Hino handa panukitenda kila kinukikalalila, ndo nunguyitikila kukita Malaghilo ndo gha maha.
17 Peni, kulyaghila nenga chepa yunughutenda nnando aghwo, ngati ndo ghula ulemwa ghuutamite nkati yangu.
18 Kiyaha nungumanya kukita kahone kya maha kyohele kingubhukana na unabhandu ghwangu. Kiyaha nungupala kutenda nnando ghwa maha, peni nungulepelwa kutenda nnando ghwa maha.
19 Kulyaghila pambala kutenda lila lya maha nungutenda ng'obhe, kihyengo kyake nungulitenda lila lihakataho kya nga kukipala.
20 Hino handa kila kinukipala ng'obhe kukitenda ndo kinukitenda, ndo nenga ng'obhe yunukitenda, ngati ndo ghula ulemwa ghuutama nkati yangu.
21 Hinu, ng'amula nnando aghu, nungupala kutenda lya maha, peni nungulibhona panukitenda lila linulipala ng'obhe kulitenda.
22 Kwa kya umundu ghwangu ghwa nkati, nunguyelelehwa na Malaghilo gha Chapanga.
23 Peni nungubhona kubhegha na lilaghilo lingi lingutenda lihengo mu mmili ghwangu, lilaghilo lyene lingupingikihana na lilaghilo liiyitikilitwe na mahala ghangu. Habhu yinguntenda mmeghe nbhandwa ghwa lilaghilo lya ulemwa liitenda lihengo mu mmili ghwangu.
24 Kiimone nenga na kimbenju! Ndo ghani ywa kunopoha na mmili aghu ghuunyegha mu kiho?
25 Nungunnumba Chapanga kiyaha ywombe katannopoha kukindila Bambo ghwetu Yesu Kilisito!
Kiyaha nenga numwene kwa mahala ghangu ndo nungughatendela mahengo Malaghilo gha Chapanga, peni kya kisilia ya ulemwa pamoo pangi ghanundenda nughatendele mahengo Malaghilo gha ulemwa.