28
Paulus sio pan Malta
1 Hoka ria muni pusima amahaima oyo, ami atinu rerihoni sio nusa niane ata ahokama ria nusa nanae Malta.
2 Sio nusa niane rei oatapeama iake runa oakahaima. Uane. Mahatane. Reiso oakanupu usa osima na asama haineke usa rei.
3 Paulus ieu iamanou menia, oyo iaunutu menia poe usa. Iaunutu menia poe usa oyo, teke minne isa rehokai rerihoni usa rei nanie rerumai rerihoni titie. Oyo reoto Paulus hanai. Realapasiki tewa.
4 Sio nusa niane onoo ata tekene rei realapasiki tewa, oyo oasau osi umau, “Ira oe. Titue. Ia rei ihunu tumata. Masike imatai nau nuae tewa iae, ia anahatana isa, anahatana wain iapasana pusita osa nanie ihunui pusu tekene rei.”
5 Ne Paulus ikunariri hanai, oyo tekene rei realapasi rerihoni hanai. Realapasiki oyo, remnahui poe usa. Paulus iake.
6 Sio oahata mka-mka Paulus hanai reposu te mata hun tewa oyo, iamnohoi imatai. Ne sio onapa potuina, oyo onoo ata ia iake sirinia. Reiso anoo rarinii tamene, oasau ata Paulus wain ia anahatana isa.
7 Tau otoe rei wani ia mainae tau nusa rei ne tuamane. Ia mainae rei nanai Publius. Iatapeama iake, oyo iainisi ami na ararane ria ne numa. Ararane ria ne numa rei onona tonu.
8 Tau muie rei, Publius amai ikupui. Ipusai runa tiai reoto reiso inekei. Paulus ieu inooi, oyo iainisi runa iahusiei. Iainisi oyo, ia kupue rei iake. Ikupui tewa nea.
9 Areimo san rei oyo, sio kupua pusiso sui nusa rei ohokaso mai Paulus. Paulus isuisene sio pusiso, oyo iake.
10 Sio oamuirama orui panesi osima. Ami nanie aeu arihoniso nea, oyo oautue muaina runa apia roe kapane osima na ami mani apia apakere runa mani muaina tau mani weka roe kapane anoe.
Paulus sio oeu arihoni Malta rotu-tu ohokaso roe Roma
11 Ami aruema pan nusa Malta hunana tonu oyo, aeuma asaa kapane wani rehokai on nau Aleksandria. Ereruei pan nusa Malta rotu-tu musum mahatane pusiki. Roe kapane uae wani siaie rerihoni sio no anahatanau waron titue tewa. Oaoiso tau “Anahatanau Sio Alalekau.”
12 Kapane rei reruma rotu-tu remamanui pan namane Sirakusa, oyo amamanuma pan kota rei onona tonu.
13 Ita asaa kapane rei honu rotu-tu ahokama poe namane Regium. Hanroe oyo, ihute on nau haha. Reiso kapane reruma rotu-tu nene hanroe san rei, oyo remamanui poe namane Putioli. Hoka poe oyo, asipuma on roe kapane rei.
14 Poe rei asupu sio umau wason oparisaa tau Yesus. Sio rei oainisi na ararane akataso rotu-tu onona itu. Reiso ahokama roe Roma san rei.
15 Sio wason oparisaa roe Roma oatinu ata ami wani ahokama. Reiso sio umau oeu rotu-tu sio umau ohokaso pan Pasar Apius runa sio umau honu ohokaso pan nia Numau Tonu. Ohoka oatapeama. Paulus isupuso, oyo ianamana osi Anahatana san rei, “Amaku, Anahatana. Ano iake. Ano aisosi me mansiau rei ohokaso oautunuma rotu-tu ahokama roe Roma.” Iasau san rei, oyo iahana anoi kaie.
16 Ahokama roe Roma oyo, otapi Paulus ruai iruei tau ne numa isa ikata ia soratatue isa wain isaka-sakai.
Paulus iaunauso roe kota Roma
17 Paulus wairo kota Roma onona tonu nea oyo, ianaha runa sio ona Yahudiu ohokaso noi tanui. Hoka poe oamanouso samatoro Paulus iasau san rei, “Wea kakau, wea waniu. Masike au una sae isa tewa na unesi ita Yahudiu. Masike au una sae isa tewa wani rei monna ita isupure rerihoni rea upu rasopota iae, sio Yahudiu roe Yerusalem oaisosiso osotaku, oyo oruiku osi sio wason Ia Aia Mainae mai Roma iaisosiso.
18 Ia Aia Mainae Roma ne mansiau oasei tanuku, oyo nanie oalapasiku. Tau sae, osupu sae isa tewa wani au una kahatene na mka ohunuku.
19 Sio Yahudiu rei openeso tau Ia Aia Mainae Roma ne mansiau oalapasiku. Reiso otentene tanuku na uainisi na Ia Aia Mainae Roma iatinu we parakana rei na iasau sae wani titue, sae wani resana. Masike au nanie uamanaru wea kakau, wea waniu wason sio Yahudiu tewa, sio otentene tanuku uainisi san rei.
20 Areimo san rei, reiso uanaha runamo na unoomo, oyo uanamana osimo. Tau sae, sio okanihooku tau rante rei tau uparisaa tau ia wain ita Israel iparisaa ata mka ihokai.”
21 Oyo sio ona Yahudiu oasau osiki san rei, “Ami asupu surate isa on pan Yudea tewa, mai resima runa ano. Ia Yahudi isa tewa ihokai isima runaya. Ia isa iamanarua osi ami reini tewa.
22 Ne ami nanie atinu rerihoni ano aparisaa sapan. Tau sae, ami anei ata sui supan-supan man sio oanamana kahatene rerihoni sio Saraneu wason opusu ano me maunauna.”
23 Reiso ohete umetene na oamanouso honu. Tau ranie hatae rei sio ohetei nea, sio panesi ohokaso noi Paulus ne numa renesi sio wason ohokaso mataanoe. Ohokaso tau omnanoe oyo, Paulus iatuheteso rotu-tu ranie manne. Iatuheteso runa isima osiso runa sapani na Anahatana irime ne mansiau. Paulus iaunauso pusu Musa ne maunauna runa sio mamsima runa Anahatana ne anamanaya no surata na iunisui reaso na oparisaa ata Yesus wain Ia Anahatana Iratiki Iapuheuso.
24 Sio umau oparisaa tau Paulus ne anamanaya. Ne sio umau honu openeso oparisaa.
25 Sio Yahudiu otuntana runa umau nanie onunso nea. Reiso Paulus iasau osiso san rei, “Masuae Anahatana Ne Inaha iuna Yesaya, ia mamsima runa Anahatana ne anamanaya isa, iasau titue. Iasau osi moa upu sani Anahatana iasau san rei,
26 ‘Aeua sui me mansiau rei, oyo asau,
“Mka tinamo ukuna raatinu we maunauna,
ne omi oaneire tewa.
Mka matamo usena ranoo sae waron au uunare,
ne omi oaneire tewa.”
27 Mka sio oanei tewa tau openeso oarinii manisate.
Openeso oatinu tau tinao ukuna.
Openeso onoo tau matao usena.
Munata openeso tewa, mka matao usena ranoo oyo oanei.
Munata openeso tewa, mka tinao ukuna raatinu oyo oanei.
Munata openeso tewa, mka oarinii manisate oyo oanei.
Oanei, oyo anoo rauni rapusu au
na au una heu no rosau.’
28 Reiso kahurae omi oanei ata maunaune rei rerihoni sapani na Anahatana iapuheuso na oamahaiso rotu-tu ria supan haineke Anahatana, iruiki osi sio wason sio Yahudiu tewa. Mka sio oatinu.”
29 Paulus iasau san rei, oyo sio Yahudiu rei onunso. Oeu otuntana runa umau.
30 Paulus iruei roe Roma musum ua. Iruei tau numa wani isehai. Iatapea sio pusiso wason ohokaso onooi runa oanamana osiki.
31 Isima osiso ata Anahatana irime ne mansiau nea. Iatuheteso rerihoni Upuri Yesus Kristus. Iatuheteso mai manahane, iauhuniki tewa. Ikaitau tewa. Sio osopoi tewa.