15
Yesus Kristus iamahaiki honu
1 Wea kakau, wea waniu, hutu nohue. Muie reini mo, nanie una anomo rapeka runa Sou Iake rerihoni Yesus wan usima nnai osimo nea rei. Oatarima Sou Iake rei nea, na rotu-tu muie reini iae orime kurui sirinia.
2 Sani orime kuru Sou Iake rerihoni Yesus wan usima nnai osimo rei sirinia mo, mka Anahatana iapuheumo na pene iapasanamo. Ne sani oparisaa Sou Iake rei ia-ia tewa mo, nene sae isa osimo tewa.
3 Usima osimo nea rerihoni Sou Iake wani au ruaku uatarimai nea rei. Sou Iake reimo, nene isie wan san reini. Kristus imatai nea na iapuheuta arihoni re rosau. Areimo repusu sae waron okanure tau Anahatana ne anamanaya.
4 Okanu ata imatai oyo oeu oautotui. Ne nene onona ua, Anahanatana iapuhaiki honu. Arei iae repusu sani sae waron okanu tau Anahatana ne anamanaya.
5 Iamahaiki honu oyo iatuhete ruai osi Petrus na osi ne mampusua hutusa rahana ua rei oi.
6 Pusi oyo, Kristus iatuhete ruai osi sio kaka wani wason oparisaa tanui mo, sio utun nima nesi wason okata umau. Sio panesi arihon sio rei mo, oamahaiso rotu-tu orase reini asi. Ne sio umau mo, omataso nea.
7 Pusi oyo, Kristus iatuhete ruai osi Yakobis. Oyo iatuhete ruai osi ne maisosia pusiso.
8 Oyo tau muie nai osa, iatuhete ruai osi au ruaku oi. Reiso au reini mo, noo sani ia wain iamrai tau muie nai osa. Tea mo, uparisaa tau muie nai osa. Sio pusiso oparisaa naone.
9 Au mo, Yesus ne maisosie wan nooku sani ia iki honue. Iake tewa sani oiku tau Yesus ne maisosie. Tea mo, au una sinsara Anahatana ne mansiau oni uparisaa tau Yesus tewasi.
10 Ne, masike upalalosa iae, Anahatana irui iake mainae osiku na iunaku tau ne maisosie. Irui iake osiku mo, au una sai-saiki tewa. Arihon Yesus ne maisosia umau rei, au sahoro uanori nnai hunu ruaku. Ne uanori nnai tau ruaku we kawasa mo, tewa. Ne uanori nnai mo, tau Anahatana iakahaiku na masike upalalosa iae, irui iake mainae osiku.
11 Reiso, masike usima runa Sou Iake rerihoni Yesus, te Yesus ne maisosi tamena umau osima runa Sou Iake rerihoni Yesus osimo mo, iake sinia. Pusima asima na Sou Iake wani osa osimo na oparisaa tanui.
Sio matana mka oamahaiso honu
12 Ami, Yesus ne maisosia, asima osimo nea ata Anahatana iapuhai Yesus Kristus honu. Reiso pene omi umau oasau ata sio wason omataso nea mo, mka oamahaiso honu mo, tewa.
13 Sinana sio wason omataso nea mka oamahaiso tewa nea, areimo Kristus iae iamahaiki tewa nea oi.
14 Na sani Kristus iamahaiki honu tewa mo, asima nnai osimo tau nene sae isa tewa. Oparisaa tau Kristus iae, nene sae isa tewa oi.
15 Munata titue Anahatana iapuhai sio matana tewa, areimo ami akarotamo rerihoni Anahatana. Tea mo, ami asau ata Anahatana iuna Kristus iamahaiki honu. Ne, sani titue Anahatana iapuhai sio matana tewa, areimo Anahatana iapuhai Kristus tewa oi.
16 Tea mo, sani Anahatana iapuhai sio matana tewa, Ia iae, iapuhai Kristus tewa oi.
17 Na sani Anahatana iapuhai Kristus tewa, omi oparisaa tanui tau sae isa tewa. Mka iapuheumo arihoni mo rosau tewa oi.
18 Arei iae, sio wason oparisaa tau Kristus wason omataso nea mo, mka oamahaiso tewa honu.
19 Sani ita iaunutu anori tau Kristus mai tuniai reini man mo, ita reini sahoro ilaha kua ruari tewa nai osa arihon mansia pusiki mai tuniai reini.
20 Ne wan titue mo, Anahatana iapuhai Kristus nea honu. Kristus sahoro iuna tumata wain mataanoe tunne imatai oyo iamahaiki honu sani tinipae.
21 Tea mo, mansia pusiki mka omataso noso naone ia tumata wain nanai Adam rei ipalalosa. Ne Anahatana iapuhai sio matana pusiso noso Kristus, Ia tumata osa rei oi.
22 Tea mo, noso Adam ipalalosa, reiso ita, nea upu momou, mka imata pusita. Ne sio wason anoo osa runa Kristus mo, mka oamahaiso honu.
23 Ne Anahatana mka iapuhaita ipusu-pusu umau. Iapuhai Kristus naone sani tinipae. Oyo pannuhu ihokai honu, iapuhai ne mansiau wason oparisaa tanui.
24 Kristus ne kawasa reiso mka inesi sio kahatena wason no kawasa mai tuniai reini. Oyo Kristus wain iuna Aia rei, irui ne kawasa osi Amai Anahatana na Amai sahoro iuna Aia.
25 Tea mo, kahurae Kristus iuna Aia rotu-tu inesi ne nisau pusiso.
26 Inesi pusi ne nisau, oyo mansiau omataso tewa nea.
27 Areimo sani aia Daud ikanu rerihoni Kristus tau Anahatana ne anamanaya ata, “Anahatana iuna sae man runa mansia pusiki okanahata tau Ia.” Ikanu ata “sae man”, areimo iasau tewa ata Anahatana ruai ikanahata tau Kristus. Tea mo, Anahatana sahoro iuna pusire okanahata tau Kristus.
28 Sani Anahatana iuna pusire okanahata tau Anai pusi oyo, Anai ruai ikanahata tau Amai ne kawasa. Ikanahata tau Amai oyo Anahatana sahoro ne kawasa tau pusire.
Pene oatinu tau sio wason oasau ata sio matana oamahai tewa honu
29 Omi umau osohu heu mo rosau okati sio wason omataso nea. Aikee sio umau oasau ata Anahatana iapuhai sio matana tewa honu. Sani titue ata oamahaiso tewa honu, osohuso tau sae isa tewa, tea!
30 Onon ranie ami, Yesus ne maisosia, asima runa Sou Iake rerihoni Yesus. Aikee sio umau nanie ohunuma. Ne sani sio wason omataso mka oamahaiso tewa honu, ami asima na Sou Iake tewa, tea!
31 Onon ranie au reini mo, sio umau nanie ohunuku. Wea kakau, wea waniu, hutu nohue. Au mo, uakarota tewa. Anoku kaie noso omi, areimo tau oparisaa tau Upuri Yesus Kristus nea.
32 Pan kota Epesus uahita runa sio kahatena noo sani uahita na binatang seaya. Uahita nnaso tewa na usupu sae waron mai tuniai reini. Tea mo, usupu sae isa tewa, tea! Sani Anahatana iapuhai sio matana tewa honu,
“Mai. Iaita, ininu,
tau hanroe imatata.”
33 Ainati, pene tu-tu sio umau oakarotamo ata Anahatana iapuhai sio matana tewa. Sou nanae reasau, “Sani sio wason no hali iaka okata sio kahatena, mka sio wason no hali iaka rei oroma sio kahatena no hali.”
34 Reiso, omi mo, kahurae pene oarirunemo. Pene opalalosa nea. Tea mo, sio umau arihon omi reini mo, oationa Anahatana tewa. Ukanu san reini na omi oaumaa.
Ita re patana waron honua roe noiyaha
35 Sio umau kani oasei san rei, “Anahatana iapuhai sio wason omataso nea mo, sapan? Sani no patana rakopuso nea, mka oamahaiso honu sapan? No patana waron sapan?”
36 Oasei rerihoni no patana san rei mo, oariruneso! Tinairi noo sani atuhu kania. Sani irahu atuhu kania areimo, kahurae kania rai ramataso ee, samatoro raruhu honu.
37 Sani irahu atuhu mo, irahu atuhu rei nene tinaie pusiki tewa. Ne irahu nene kanie man. Areimo, noo sani gandum kania, sani reruhu nea, noo sani nene kania tewa nea.
38 Ne Anahatana mka iuna atuhu kania rai raruhu pusu Ia ruai iaunutui nea. Raruhu nita-nitaya pusu ruaya nene nitaya.
39 Sae man waron ramahaiso mai tuniai reini mo, noore osa tewa. Mansia tinain mo, ruae oi. Binatang nene patana, ruaya oi. Manue nene patane, ruae oi. Ikae nene patane, ruae oi.
40 Arei iae sani sae waron roe nante. Noore tewa sani waron mai tuniai. Sae waron roe nante, marainia. Na sae waron mai tuniai reini iae, marainia. Ne ruaya oi.
41 Ranie resita ruae oi. Hunane resita ruae oi. Oneu iae, rasita ruaya oi. Na one isa resita sani one tamena tewa. Pusire marainia nita-nitaya oi.
42 Tinairi san rei oi. Sani imatata oyo iamahaita honu, tinairi honua. Tinairi wan sio okaniki rei, mka rekopui. Ne tinairi wan Anahatana iruiki tau iapuhaita honu rei, mka rekopu tewa.
43 Tinairi wan sio okaniki rei mo, iake tewa. Ne tinairi wan Anahatana iruiki tau iapuhaita honu areimo, marainie. Tinairi wan sio okaniki rei mo, remkona tewa. Ne tinairi wan Anahatana iruki tau iapuhaita honu rei mo, remkona.
44 Tinairi wan sio okaniki rei mo, tinairi wan on mai tuniai reini. Ne tinairi wan Anahatana iruiki tau iapuhaita honu mo, Anahatana ne Inaha ne kawasa sahoro iruiki.
Tinairi nitaya ua. Isa on mai tuniai reini na isa on roe Anahatana ne Inaha.
45 Reiso, sio okanu tau Anahatana ne anamanaya ata, “Anahatana ihaye tau mansia mataanoe tunne mo, nanai Adam, iunai iamahaiki.” Ne Kristus mo, sani Adam oi wain tau muie rei. Ia sahoro mka iuna mansiau wason oparisaa tanui oamahaiso rotu-tu ria supan.
46 Wan Anahatana iruiki naone mo, patane wan on mai tuniai reini. Samatoro irui patane wan on roe noiyaha tau muie.
47 Adam wain mansia mataanoe mo, arihon tuamane. Ne Kristus, wain mansia tau muie, nooi sani Adam oi mo, on roe noiyaha.
48 Mansia pusiki wason oamahaiso mai tuniai reini mo, no patana noo sani Adam wain mataanoe, wain Anahatana iunai arihoni tuamane. Ne mansiau wason roe noiyaha, no patana mo, noo sani Kristus wain on roe noiyaha rei.
49 Ita reini, re patana mai tuniai reini mo, noo sani Adam wain mataanoe ne patane. Ne, tau iamahaita honu, Anahatana mka irui re patane honue, noo sani Kristus wain on roe noiyaha ne patane.
50 Reiso, wea kakau, wea waniu, hutu nohue, nanie uasau osimo. Tinairi na re henate na nasi rarue mka rakata Anahatana wain irime pusire on roe noiyaha mo, tewa. Tea mo, imatata oyo tinairi rakopuso. Tinairi mai tuniai mo, rotu-tu ria supan tewa.
51 Masi atinu mai. Nanie usima na sae isa wan oaneiki tewasi. Mka ita umau imata tewa. Ne mka Anahatana iuna tinairi honua honu.
52 Mka sira tau ikino man ita iatinu tihun tinunue wan tau muie. Tea mo, iatinu tihun rei, oyo sio wason omataso nea oamahaiso honu. Oyo osupu no pata honua waron mka rakopu tewa nea. Ita wan iamahaita reini iae, mka Anahatana iuna re patana honua honu noo sani sio oi.
53 Tea mo, re patana wan on mai tuniai rei, mka rematai oyo rekopui. Ne mka Anahatana ikatiki tau patane on roe noiyaha wan mka remata tewa nea.
54 Sani Anahatana iuna tinairi honua na pene rakopuso nea, areimo sani sio kanu tau Anahatana ne Anamanaya ata,
“Anahatana inesi ne nisau, reiso mansiau omataso tewa nea.
55 Sio matana mo, wasoni sui supan? Wason tewa.
Sio wason oapunokoso, wason sui supan? Wason tewa.”
56 Rosa mo, rehunu tumata. Noo sani minne wan rehunu tumata oi. Ita ianei ata ipalalosa arihon Anahatana ne maunauna waron Musa ikanure.
57 Ne iainisi iake arihon Anahatana. Tea mo, isiru heu ita re rosau nea. Upuri Yesus Kristus ihana re rosau nea. Reiso mka imatata rotu-tu ria supan tewa.
58 Reiso, wea kakau, wea waniu, hutu nohue wan anoku runamo. Omi mo, kahurae oparisaa kuru-kuru tau Kristus. Pene ouni oeu arihoniki. Oanori runa Upuri pusi anomo. Tea mo, oanei nea ata ianori runa Upuri, mka sai-saiki san rei man mo, tewa. Ne mka nene untu.