3
Ia mansia ipalalosa
1 Yahweh Anahatana ihaye tau binatang pusire. Pusire mo iaka. Hasae tekene sahoro ianei panesi, ne iakarota. Tekene rei iasei arihoni ia pina rei, “Titue si? Anahatana isopo iahata, ‘Pene oai ai huae sae man wan nisi anoe reini?’ ”
2 Iahata, “Ami ai ai huaya pusire iake.
3 Ne hasae ai isa wani reooi paka nisi tihue mo, aiki tewa. Tea mo, Anahatana isopo. Akahuui man iae, tewa oi. Tea mo, sani aiki te akahuui, mka amatama.”
4 Iahata, “Hmm. Iakarotamo. Ne titue tewa. Omi mka omatamo tewa.
5 Anahatana iasau san rei tau ianei ata mka oai ai huae rei, oyo onoo hainau. Mka omi sani Anahatana. Omi sani Anahatana reiso, oanei sae sahoro mo hali iaka sae sahoro mo hali kahatena.”
6 Ia pina rei inoo ai huae rei, inooi marainie, reiso iahata iaiki iae mka iahanai iake. Iasau pan anoi iahata, “Nene iake mo, au uanei panesi.” Reiso ikure ai huae rei oyo iaiki. Iaiki samatoro iruiki osi sahai. Reiso sahai iae iaiki oi.
7 Uaso oaiki suka, oyo onoo hainau. Oanei ata sanakuso. Reiso uaso onana ai ara totua samatoro ohonire. Ohonire oyo oateire. Osou nete no patana.
8 Reiso nene ranie hatae rei tau ranie remanu, oatinu Yahweh Anahatana kinakai pan nisi rei. Reiso uaso oauhuniso sui ai aikuna. Oauhuniso na pene inooso.
9 Ne ioi ia hanaie rei. Iahata, “Ano. Ano wani sui supa?”
10 Iahata, “Upu. Uatinu kinakam mai nisi reini so, uauhuniku. Ukaitaua. Tea mo, tenennta.”
11 Iahata, “Ia seia isima ata sanakua rei? Ano aai ai huae wani usopoa rei te sae rei?”
12 Iahata, “Ia pina wain ano aruiki osiku na ikataku rei, sahoro iruiki osiku. Iruiki oyo uaiki.”
13 Ita iasei arihoni ia pina rei. “Amuna na auna me hali rei?”
Iahata, “Tekene rei sahoro iakarotaku. Reiso uai ai huae rei tea.”
14 Reiso Yahweh Anahatana iasau osi tekene rei san rei. Iahata,
“Ano me hali rei, reiso mka uapasanaya.
Arihoni binatang pusire hasae ano sahoro urui kahatene osia.
Urui kahatene osia rei, ranie hatae reini ro-rotu-tu ria supan ausu tau tiam pokone.
Mka ausua pusu tapune hahae ria ro-rotu-tu amataya.
15 Ano runa ia pina rei, uamo mka ouna nisa na umau.
Ano mea upu momou na ia nea upu momou ohiti nisa na umau.
Ano mka arutu upui toui.
Ne ia mo, mka iheta poho unumu.”
16 Ita iasau osi ia pina rei. Iahata,
“Tinaim taua, au mka una resunia.
Ia ikine iamrai, au mka una tiam reun mainae.
Ne masike tiam ereun san rei iae, anom reoto runa saham sirinia.
Masike resunia iae atinu tanui sirinia.”
17 Ita iasau osi ia hanaie rei. Iahata,
“Ano atinu tau saham, reiso aai ai huae rei wani au usopo unete na pene aiki.
Ano apusui reiso uapasanaya.
Urui kahatene osi tuamane.
Reiso kahurae apakarian eresuni-sunia rotu-tu amataya.
Apakarian akahi-kahia samatoro tuamane rei ereuna me atuhu isia iaka tau me muaina.
18 Akahi-kahia tau monota runa awaneu monota waron nene unia.
Mka ai utana waron orahure tewa.
19 Ne masike ai utana waron orahure tewa iae,
mka apakarian mainae tau ruam me kausa wanaya na arahu tuamane reini na asupu me muaina.
Me kausa wanaya rotu-tu amataya na ruam auna tuamane honu.
Mataanoe uposoa arihoni tuamane, reiso anunia auna tuamane honu.”
20 Ia mansia mataanoe rei nanai Adam. Ihete sahai nanai Hawa. Ia pina rei iuna ina tau sio mansiau pusiso, reiso nanai Hawa. Hawa nene nohue, “Iapuhai.”
21 Reiso Yahweh Anahatana iuna apia arihoni binatang unte, samatoro iausahure osi Adam runa sahai uaso.
22 Yahweh Anahatana iahata, “Muie reini mansia nooi sani ita nea. Ianei sae sahoro no hali iaka runa sae sahoro no hali kahatena. Reiso kahurae inetei na pene iai ai huae wani ereuna okarihuru oamahai. Inetei na pene iamahaiki rotu-tu ria supan.”
23 Reiso inei ia mansia rei uaso arihoni Nisi Eden rei. Iaisosiki irahu tau tuamane wani iposoi arihoniki rei.
24 Ineiso samatoro iaisosi sio mamsakaya on roe noiyaha osaka nisi rei, napi on ria ranie mata eresaa. Osaka nene mitanunue. Oyo iautue tunue wani ereita-itai. Tunue rei resawai eretope erenete mitanunue rei. Tunue rei runa sio mamsakaya rai nanie osaka arena wani ereeui nau ai wani nene huae ereuna mansia okarihuru oamahai. Reiso iuna san rei na pene ia seia oi ieu haineke ai rei.