48
Yakup iainisi na Anahatana irui iake osi Efraim runa Manasye
1 Taue isa sio umau oeuso poe Yusup osima oahata, “Yusup. Amamu ikupui mtinte.”
Reiso Yusup ieu ikata ne hehuka hanaia uaso wason nanao Manasye runa Efraim.
2 Hoka poe oyo sio osima oahata, “Ama. Anamu Yusup wain ihokai nea.” Iatinu san rei oyo iamkona runa ruai nanie ihanui. Ihanui oyo iruei roe naniai.
3 Iruei oyo iasau osi Yusup, iahata, “Anahatana wain ne kawasa mainae erenesi pusire iatuhete ruai osiku pan nia Lus pan otoe Kanaan. Iatuhete ruai osiku samatoro irui iake osiku.
4 Iasau osiku san rei, ‘Au mka una me hehuka tau ipana panesi. Mka ipana rai rakikasi rasinena. Mka urui otoe Kanaan reini osi me hehuka osi ruao rotu-tu ria supan.’
5 Reiso me hehuka ua wason oamrae mai otoe Mesir reini on uhokaku mai Mesir tewasi, mka unanaso tau au ruaku we hehuka. Areimo unoo me hehuka Efraim runa Manasye sani ruaku we hehuka, Ruben runa Simeon.
6 Munata saham isusu honu, me hehuka rei mka unooso sani we hehuka tewa. Ne ano ruam me hehuka. Mka onana rusun arihoni Efraim runa Manasye.
7 Au una san rei tau inam Rahel. Ununiku on pan otoe Mesopotamia inam imatai pan otoe Kanaan, haineke nia Efrata. Reiso anoku repunokoi mainae. Ukaniki pan rei, paka arena nusue. Arena rei nanie ereeu napi poe Efrata.” (Muie reini Efrata nanae Betlehem.)
8-10 Yakup inoo iake tewa nea. Tau sae? Ikore-korei nea. Matai kania haineke raputiso nea. Reiso inoo Yusup ne hehuka oyo iasei, “Seia ne hehuka reini?”
Iahata, “Sio ikina reini au we hehuka wason Anahatana iruiso osiku mai Mesir reini.”
Iahata, “Haineke me hehuka reino mai na uainisi na Anahatana irui iake osiso.” Yusup haineke ne hehuka rei osi amai oyo iatipuniso runa imukiso.
11 Oyo Yakup iasau osi Yusup, “Au uahata kani amataya nea reiso unooa tewa nea. Aikee muie reini Anahatana itapiku nanie unoo me hehuka.”
12 Oyo Yusup inana ne hehuka uaso arihoni amai karai oyo ruai ihahue mai amai uai anoe.
13 Ihahue pusi oyo iakahuu ne hehuka uaso tau hanai atua na iroriso na ohaineke noa momo. Manasye, ia manaonete, mai momoi hanai atue wanane. Oo Efraim, ia muie rei, mai momoi hanai atue pante.
14 Ne Yakup hanai atua rasupa neka umau. Hanai atue wanane iaunutui roe Efraim ia muie unui. Hanai atue pante iaunutui roe Manasye ia manaonete unui.
15 Samatoro iainisi na Anahatana irui iake osi Yusup. Iainisi san rei,
“Upuku Anahatana, ano sahoro momoku Abraham runa amaku Isak
oamahaiso opusu me maunaune.
Ano sahoro asakaku sani ia mamsaka rompau isaka ne rompau.
Asakaku on au uamrae rotu-tu reini.
16 Ano sahoro aisosi me maisosie on roe noiyaha na iakahaiku tau we susau pusire.
Uainisi na arui iake osi we hehuka reini.
Uainisi na sio pusiso oanei ata sio wason we hehuka, wason Isak nea momou, Abraham nea upu.
Uainisi na aunaso no ipane rekikasi resinena.”
17-18 Yusup inoo amai hanai atua rasupa neka umau san rei oyo iakahuu amai hanai atue wanane iasau, “Ama. Pene auna hanam atue wanane rei roe Epraim unui tau ia mo, ia muie. Ne una hanam atue wanane rei mai Manasye unui tau ia mo, ia manaonete.”
Iakahuu hanai nanie inea amai hanai atue wanane rei arihoni Epraim unui nanie iunai mai Manasye unui.
19 Ne amai ipenei. Iahata, “Anaku. Au uanei. Au uanei. Manasye mka ne kawasa mainae na ne ipane mka rekikasi resinena. Ne wanin mka ne kawasa mainae inesi ia. Na ne ipane iae, rekikasi resinena panesi erenesi ia.”
20 Ita iainisi arihoni Anahatana honu na irui iake osi sio ikina ua rei tau ranie hatae rei sirinia. Iahata, “Upuku Anahatana. Uainisi na arui iake osi we hehuka reini tau me kawasa. Pani muie, mka sio Israel oainisi na arui iake osi ia isa, mka oainisi san rei, ‘Uainisi na auna ia reini sani Epraim runa Manasye.’ ”
Reiso Yakup ihete Epraim nanai naone arihoni Manasye.
21 Oyo Yakup iasau osi Yusup iahata, “Ano anoo nea, nanie haineke umataku nea. Ne Anahatana mka iakahaimo na ohokamo arihoni otoe Mesir reini na oeumo pan moa upu moa momou no otoe. Areimo otoe Kanaan.
22 Urui nia Sikhem osi ano ruam. Uruiki osi mea kakau tewa. Sikhem wani uahita runai arihoni sio Amori.”