2
Ʉbʉpoki ʉbʉkʉlʉmba ʉbwa Kyala
1 Po leelo ɨsi tʉsipɨliike, tʉkɨndɨlɨlege ʉkʉsikola na maka, tʉlɨngiisa kʉsileka nʉ kʉsikonga ɨsingi.
2 Namanga ɨndʉmi ɨjɨ jaatwaliigwe na bandʉmi kʉ biisʉkʉlʉ bɨɨtʉ jaalondigwaga ʉkʉkongigwa. Boosa aba baajɨlekile nʉ kʉjɨkaana ʉkʉjɨkonga, baapeeliigwe ʉlʉfundo ʉkʉkongana nɨ mbiibi syabo.
3 Lɨnga syalɨ bo ʉlo, bʉle, ʉswe tʉbagiile ʉkʉpona bʉleebʉle ʉkʉlongigwa, lɨnga tukʉbʉsyokela ʉbʉpoki ʉbʉkʉlʉmba bo ʉbʉ? ɄNtwa Jesu jʉʉjo jo ʉjʉ aalyandile ʉkʉbʉfumusya, bwasisimɨkɨsiigwe kʉmyɨtʉ ʉkʉtɨ bwanalooli na aba baalɨmpɨliike.
4 Joope Kyala aabʉsisimɨkiisye nkʉbomba ɨfimanyilo nɨ fiika fingi, nʉ kʉjaba ɨfikʉngɨlwa ɨfya Mbepo Mwikemo ʉkʉkongana nʉ bwigane bwake.
Jesu aalɨ mundʉ
5 Abandʉmi bakaja bo aba Kyala ababɨɨkile ʉkʉja balagɨli baa kiisʉ ɨkɨpya ɨkɨ kikwisa. Kyo kiisʉ ɨkɨ tukʉkɨjoba.
6 Looli Kalata ʉMwikemo ikʉsisimɨkɨsya ʉkʉtɨ,
“Gwe Kyala, bʉle, ʉmundʉ kandʉ nki,
apa ʉgwe kʉmmwinogona fiijo?
Nʉ mwana gwa mundʉ,
ʉjʉ ʉgwe kʉmpaasya?
7 Gwalɨmmbɨɨkile ʉkʉja paasi ʉkʉkɨnda abandʉmi,
kʉkabalɨlo akapimba.
Ʉgwe gwalɨmpeele ʉbʉsisya nʉ lwɨmɨko,
8 nʉ kʉtʉbɨɨka ʉtʉndʉ toosa paasi pa malʉndɨ gaake.”
Po aabapelile abandʉ ʉkʉja balagɨli baa tʉndʉ toosa, kokʉtɨ kakajako aka katikʉlagɨligwa na bandʉ. Looli akabalɨlo aka tʉtikʉbabona abandʉ ʉkʉlagɨla ʉtʉndʉ toosa.
9 Looli Jesu, ʉmwene ʉjʉ kʉkabalɨlo akapimba aabɨɨkiigwe paasi ʉkʉkɨnda abandʉmi, tukʉmmbona bo alɨ nʉ bʉsisya nʉ lwɨmɨko ʉlʉkʉlʉmba, kʉnongwa jaa kʉkʉbɨlwa nʉ kʉfwa kwake. Aabombile bo ʉlo, ʉkʉtɨ kwi ipyana lya Kyala, abafwɨle abandʉ boosa.
10 Kyala ʉjʉ aapelile ʉtʉndʉ toosa nʉ kʉtʉbɨɨka muno tʉjɨɨliile, jo ʉjʉ aaliikyeliile fiijo ʉkʉmmbɨɨka Jesu ʉkʉsita kwagɨlwa nafimo, kʉ njɨla ɨjaa kʉkʉbɨlwa. Aabombile bo ʉlo ʉkʉtɨ, Jesu abingɨsye abaanaake bingi mbʉsisya bwake, paapo jo bwandɨlo bwa bʉpoki bwa bandʉ.
11 Ʉmwene Jesu, ʉjʉ ikʉbeelʉsya abandʉ ʉkʉja biikemo, pamopeene na aba bikʉpeligwa ʉkʉja biikemo, boosa ʉgwisabo alɨ jʉmojwene. Jo nongwa ɨjɨ Jesu atikʉja nɨ soni ʉkʉjoba ʉkʉtɨ baamyabo.
12 Ʉmwene aatile,
“Gwe Kyala,
angʉbafumukɨsya abaamyɨtʉ ʉbʉkʉlʉmba bwako.
Bo babʉngeene, ngwɨmbaga ɨnyɨmbo ɨsya kʉkʉtuufya.”
13 Kangɨ ikʉtɨ, “Angʉnsʉʉbɨlaga Kyala.” Kangɨ ikʉtɨ, “Ndɨ apa, pamopeene na baana aba ambeele Kyala.”
14 Po leelo abaana abo balɨ nɨ mibɨlɨ ɨgya bʉndʉ, ni ilopa ɨlya bʉndʉ. Fyobeene joope Jesu aaliisile nʉ mbɨlɨ ni ilopa ɨlya bʉndʉ, ʉkʉtɨ kʉ bʉfwe bwake ampyute Seetano, ʉjʉ alɨ na maka agaa kʉtwala ʉbʉfwe.
15 Mbʉfwe bwake Jesu, aababɨɨkile abandʉ mbwabʉke, aba baalɨ mbʉtʉmwa ʉbwa kʉbʉtiila ʉbʉfwe, mbʉʉmi bwabo boosa.
16 Ɨsyo sikʉnangɨsya pabwelu, ʉkʉtɨ Jesu akaaliisile kʉkʉbatʉʉla abandʉmi, looli kʉkʉbatʉʉla abandʉ, aba bikʉtɨ Abulahamu jo gwisabo.
17 Fyobeene syalɨmmbagiile ʉkʉfwana na baamyabo ndɨ syosa, ʉkʉtɨ aje mpuuti ʉnkʉlʉmba, ʉjʉ alɨ nɨ kɨbabɨɨlɨsi nʉ bʉgolofu nkʉmmbombela Kyala. Kangɨ nʉ kʉsoosya iikemo, ɨlya kʉbasookesyamo ʉbʉtʉlanongwa abandʉ baake.
18 Paapo ʉmwene aageliigwe nʉ kʉkʉbɨlwa, abagiile ʉkʉbatʉʉla aba bikʉgeligwa.