2
1 Kʉnongwa ɨjo, mubʉleke ʉbʉbiibi boosa, ʉbʉtʉngʉlʉ, ʉbʉsyobi, ʉbʉʉfi nʉ kʉjobana ʉbʉbiibi.
2-3 Akabalɨlo aka monjile, kangɨ mwandile ʉkʉmanya ʉkʉtɨ ʉNtwa nnunu. Po bo ʉlwa baana abafyele aba bʉʉmiilwe amabeele agaa bannabo, munwege ʉlʉkama ʉlwa mwa Mbepo ʉlʉsita kongaania nafimo, ʉlʉ aalukʉbatʉʉla ʉmwe ʉkʉkʉla nʉ kʉpokigwa.
Abiitɨki basʉngʉligwa baa Kyala
4 ɄNtwa Jesu lyo ibwe ɨlyʉmi ɨlya kʉjengela. Ɨliibwe ɨlyo abandʉ baalɨkaanile, looli Kyala alɨsʉngwile, kangɨ lya ntengo nkyeni mmyake. Ʉlʉ musegelele kwa Jesu,
5 po na nuumwe Kyala ikʉbabombela ʉlwa mabwe amʉʉmi ʉkʉjenga ɨtempeli ɨjaa mwa Mbepo Mwikemo. Mu tempeli ɨjɨ, ʉmwe kangɨ mulɨ bapuuti abiikemo. Mukʉsoosya amakemo agaa mwa Mbepo aga gikʉnhobosya Kyala, kʉ maka agaa Jesu Kɨlɨsiti.
6 Po mwa Kalata ʉMwikemo Kyala ikʉjoba ikʉtɨ,
“Namukeete, ʉko nkaaja akaa mu Syoni,
mbɨɨkile ɨliibwe ɨlya lwalo,
kangɨ ibwe ɨlɨ ndɨsʉngwile, kangɨ lya ntengo.
Ʉmundʉ gwesa ʉjʉ ikʉmmwitɨka ʉjʉ jo ibwe ɨlyo,
atikwisa kʉsʉʉkamo sikʉ.”
7 Iibwe ɨlyo lyo lya ntengo kʉmyɨnu ʉmwe mwe mukʉmmwitɨka, looli kʉlɨ aba batikʉmmwitɨka,
“Ɨliibwe ɨlɨ abajenga nyumba baalɨkaanile,
lyo lɨjile ibwe ikʉlʉmba pa lwalo, pa nguto,”
8 na,
“Ɨliibwe ɨlɨ abandʉ aabikwitikangapo,
ɨlɨ aalikʉbapelelaga abandʉ ʉkʉgwa.”
Aabikwitikaga paapo bakaaliitiike iisyʉ lya Kyala, mo muno baabaatɨkɨliigwe na Kyala ʉkʉfuma kʉbwandɨlo bwa kʉpela ɨkiisʉ.
9 Looli ʉmwe mulɨ basʉngʉligwa baa Kyala, ʉmwe mulɨ bapuuti baa kɨnyafyale, ʉmwe mulɨ kɨkolo ɨkiikemo, kokʉtɨ mulɨ bandʉ baake jʉʉjo. Mwasʉngʉliigwe ʉkʉtɨ mufumusyege ɨnduufyo sya Kyala, ʉjʉ aabakooliile ʉkʉtɨ musookemo mu ngiisi, ʉkʉtɨ mujege kʉmyake ndʉmuli lwake ʉlʉnunu.
10 Kʉbwandɨlo mukaalɨ bandʉ baa Kyala, looli akabalɨlo aka mulɨ bandʉ baake. Kangɨ mukaalyambɨliile iipyana lya Kyala, looli akabalɨlo aka mulyambɨliile.
Ʉkʉbɨɨmɨka abalongosi boosa
11 Bakʉndwe, ngʉbapyelesya, paapo mulɨ baheesya nkiisʉ muno kangɨ mukʉkɨnda, mufileke ɨfinyonyo fyɨnu ɨfya tʉndʉ ʉtwa pakiisʉ, ɨfi fikʉlwa ʉbwite na nuumwe.
12 Mujege na kajɨɨlo akanunu pakatɨ pa bandʉ abapanja, aba mukʉtʉʉgala nabo. Po nalɨnga bikʉbajoba ʉkʉtɨ mukʉbomba kabiibi, basibonege ɨmbombo syɨnu ɨnunu, abandʉ aabikʉntuufyaga Kyala kʉnongwa jɨɨnu pi isikʉ lya bʉlongi bwake.
13 Mwijiisyege kʉ balongosi boosa, paapo mulɨ bandʉ baa Ntwa Jesu. Mummwɨmɨkege ʉmalafyale gwa kiisʉ, paapo ʉmwene jo ndamuli ʉnkʉlʉmba ʉgwa bandʉ boosa.
14 Kangɨ mubɨɨmɨkege abalongosi baa fiisʉ, paapo ʉmalafyale abasalile ʉkʉbafunda abandʉ aba bikʉtʉla ɨnongwa, nʉ kʉbatuufya aba bikʉbomba ɨnunu.
15 Po Kyala ikʉlonda mubombege ɨnunu, ʉkʉtɨ abakonyofu aba bakasyagania kanunu, balɨngajaga nalyo nalɨmo ɨlya kʉbajoba ʉbʉbiibi ʉmwe.
16 Ʉmwe mulɨ baabʉke, leelo mulɨngabombelaga ʉbwabʉke bwɨnu ʉkʉbomba ɨmbiibi, looli mutʉʉgalege bo muno ababombeli baa Kyala bikʉlondeligwa ʉkʉtʉʉgala.
17 Mubɨɨmɨkege abandʉ boosa nʉ kʉbagana abiitɨki biinɨɨnu. Muntiilege Kyala nʉ kʉmmwɨmɨka ʉmalafyale.
Ʉkwikasya mu ngʉbɨlo
18 Lɨnga ʉgwe ʉlɨ ntʉmwa gwa nkabi pakiisʉ apa, gwijiisyege kʉmyake, kangɨ ʉmmwɨmɨkege. Kʉkaja kokʉtɨ ʉmwene nnunu kangɨ mooloolo itolo, looli nalɨnga ʉmwene nkalɨ.
19 Lɨnga kʉʉmɨɨlɨla ʉkʉtaamigwa, kʉ nongwa jaa kʉnngana Kyala, kɨsita kʉtʉla ɨnongwa, kʉsajigwa.
20 Lɨnga kʉbomba kabiibi kangɨ kʉʉmɨɨlɨla mu ngʉbɨlo ɨsya kʉkʉfunda kʉ bʉbiibi, bʉle kwinogona ʉkʉtɨ kwambɨlɨla ɨnduufyo? Looli lɨnga kʉʉmɨɨlɨla ʉkʉtaamigwa paapo ʉbombile ɨnunu, po Kyala ikʉkʉsaja.
21 Mukooleliigwe ʉkʉtɨ mʉʉmɨɨlɨlege bo ʉlo paapo Kɨlɨsiti jʉʉjo aalyʉmɨɨliile ʉkʉtaamigwa kʉnongwa jɨɨnu. Ʉmwene gwa kʉkeetelamo, ʉkʉtɨ mwendege mu njɨla jɨlajɨla bo ɨjɨ aalyendile ʉmwene.
22 “Ʉmwene akaatʉlile ɨnongwa,
pamo ʉkʉjoba ʉbʉtʉngʉlʉ bʉmo nkanwa mmyake.”
23 Bo bikʉntʉka akaagomwisye iisyʉ nalɨmo ɨlya kʉheelula. Bo bikʉntaamya akaagelilepo ʉkʉbagomokesya lyolyosa ɨlya kʉbatiilɨsya. Looli syosa aalɨnndekiile Kyala ʉjʉ ikʉbalonga abandʉ kʉ bwanalooli.
24 Kɨlɨsiti jʉʉjo aapɨmbile ʉbʉtʉlanongwa bwɨtʉ mu mbɨlɨ gwake pa kɨkohekano, ʉkʉtɨ ʉswe tʉgoge ɨfinyonyo fyɨtʉ ɨfi fikʉtʉpela ʉkʉbomba ʉbʉtʉlanongwa, looli tʉkabe ʉbʉʉmi ʉbwa kʉnkyela Kyala. Ʉmwene aakabile ɨfifulalo ʉkʉtɨ ʉmwe mupone.
25 Mwasobile bo ʉlwa ngʼoosi ɨsi sisobile ɨnjɨla, looli lɨɨlɨno munngomokiile ʉNtwa Jesu, ʉNtiimi gwɨnu ʉjʉ ikʉbalɨndɨlɨla.