13
Ʉkʉbɨɨmɨka abalongosi
1 Kʉkʉtɨ mundʉ ikʉlondigwa ʉkʉbɨɨmɨka abalongosi abaa silikali. Namanga ʉbʉlongosi boosa bukʉfuma kwa Kyala, kangɨ boope boosa babɨɨkiigwe nagwe.
2 Po leelo ʉmundʉ gwesa ʉjʉ ikʉbʉpɨnga ʉbʉlongosi bwabo, ikʉpɨnga ʉlʉbaatɨko lwa Kyala. Abandʉ abo bikwisa kʉfundigwa.
3 Namanga ʉmundʉ ʉjʉ ikʉbomba ɨnunu atikʉja nʉ lʉtende kʉ ndongosi, looli ʉjʉ ikʉbomba ɨmbiibi. Bʉle, kʉlonda ʉkʉsita kʉja nʉ lʉtende kʉ balongosi baako? Po bombaga ɨnunu, ʉndongosi ikʉkʉtuufyaga.
4 Namanga ʉndongosi mbombeli gwa Kyala, ɨmbombo jaake ko kʉkʉtʉʉla ʉgwe. Looli lɨnga ʉbombile simo ɨmbiibi, po ʉtiilege! Paapo alɨ na maka agaa kʉfunda, bʉkaja bʉlongosi bwa itolo! Ʉmwene mbombeli gwa Kyala, atʉmiigwe kʉkʉbatwalɨla ababomba mbiibi ʉlʉfundo lwa Kyala.
5 Fyobeene abandʉ bikʉlondigwa ʉkwijiisya kʉ balongosi, somma kʉnongwa jaa kʉtiila lwene ʉlʉfundo lwa Kyala, looli kʉnongwa jaa kʉtɨ mumeenye mu ndumbula ʉkʉtɨ kʉnunu ʉkʉbomba bo ʉlo.
6 Kangɨ kʉnongwa ɨjo mukʉsonga ɨsongo. Namanga ababombeli abaa silikali babombeli baa Kyala. Bikwijʉʉla kʉ mbombo ɨjo.
7 Namubapege boosa ɨfi bikʉlondigwa ʉkʉpeeligwa. Lɨnga kʉlondigwa ʉkʉsonga ɨsongo, ʉsongege. Lɨnga ʉmundʉ jʉmo ikʉlondigwa ʉkwɨmɨkigwa, ɨɨmɨkigwege.
Ʉkʉganana
8 Mulɨngameleligwaga akandʉ kokoosa nʉ mundʉ gwesa, looli mumeleligwege ʉkʉganana ʉmwe. Namanga ʉjʉ ikʉnngana ʉnnine, asibombile ɨndagɨlo sya Kyala.
9 Keeta ɨndagɨlo sikʉtɨ, “Ʉlɨngalogwaga, ʉlɨngagogaga, ʉlɨngahɨɨjaga, kangɨ ʉlɨnganyonywaga akandʉ akaa nnino.” Looli ɨndagɨlo ɨsyo syosa silɨ ndʉlagɨlo lʉmolwene itolo ʉlʉ lukʉtɨ, “Ʉbaganege abanino bo ʉlʉ gwijiiganile ʉgwe.”
10 Ʉmundʉ ʉjʉ ikʉnngana ʉnnine, atikʉmmbombela ɨmbiibi. Ʉkʉbagana abandʉ abangɨ ko kʉsibomba ɨndagɨlo syosa ɨsya Kyala.
Kʉlɨ kɨfuki ʉkʉkya
11 Mukʉlondigwa ʉkʉbomba bo ʉlo paapo mumeenye ʉkʉtɨ akabalɨlo akaa kʉlembʉka kafikile. Po akabalɨlo akaa bʉpoki bwɨtʉ kalɨ kɨfuki fiijo, ʉkʉkɨnda kʉbwandɨlo apa twalyandile ʉkʉmmwitɨka ʉNtwa Jesu.
12 Akabalɨlo aka ɨkɨlo kɨmaliike, kʉlɨ kɨfuki ʉkʉkya. Po tʉsileke ɨmbombo ɨmbiibi ɨsya mu ngiisi, tʉfwale ɨfilwɨlo ɨfya ndʉmuli.
13 Tʉjege na kajɨɨlo akanunu bo ʉlwa bandʉ abaa pamuusi. Tʉlɨngajaga bagaala bwalwa, pamo ʉkʉmoga ɨmogo ɨsya bʉlogwe, pamo ʉkʉbomba ɨmbombo ɨngosya soni, pamo ʉkʉlwa nʉ kʉja nʉ bʉʉfi.
14 Looli mumfwalege ʉNtwa Jesu Kɨlɨsiti ngatɨ mwenda. Mulɨngiitɨkaga na panandɨ ʉkʉlongosigwa nɨ finyonyo fyɨnu ɨfibiibi ɨfya bʉndʉ bwɨnu ʉbwa bʉtʉlanongwa.