6
Ʉkʉfwa nʉ kʉsyʉka pamopeene na Kɨlɨsiti
1 Po tʉtɨ fiki? Bʉle, twendelelege ʉkʉbomba ʉbʉtʉlanongwa ʉkʉtɨ iipyana lya Kyala lɨbaalege?
2 Hɨmma na panandɨ! Ʉswe tʉkaja nʉ bʉlɨɨlanisi mbʉtʉlanongwa, tʉfwene bo ʉlwa bafwe kʉ bʉtʉlanongwa. Tʉbagiile bʉleebʉle ʉkwendelela ʉkʉja mbʉtʉlanongwa?
3 Bʉle, mukamanya ʉkʉtɨ ʉswe twesa bo toosiigwe, tʉlʉngiigwe na Kɨlɨsiti Jesu mbʉfwe bwake?
4 Paapo toosiigwe mbʉfwe bwake, nuuswe tʉsyɨliigwe pamopeene nagwe. Namanga bo ʉlʉ Kɨlɨsiti aasyʉkile kʉ maka amakʉlʉmba agaa Kyala, bo lʉlʉʉlo nuuswe tukʉja nʉ bʉʉmi ʉbʉpya.
5 Po lɨnga ʉswe tʉbɨɨkiigwe pamopeene nagwe mbʉfwe bwake, bʉbʉʉbo tukwisa kʉsyʉsigwa ʉkʉja pamopeene nagwe.
6 Nalooli bo toosiigwe, ʉbʉndʉ bwɨtʉ ʉbwa ijolo bwakomeleliigwe pa kɨkohekano, ʉkʉtɨ ʉbʉndʉ ʉbwa bʉtʉlanongwa boomoligwe. Po leelo twalekile ʉkʉja batʉmwa baa bʉtʉlanongwa.
7 Namanga ʉmundʉ lɨnga ʉbʉndʉ bwake ʉbwa ijolo bʉfwile, ʉbʉtʉlanongwa bʉtikʉja nʉ bʉlagɨli kʉmyake.
8 Lɨnga ʉswe twafwile bo ʉlo pamopeene na Kɨlɨsiti, tukwitɨka ʉkʉtɨ aatukʉja nʉ bʉʉmi pamopeene nagwe.
9 Tʉmeenye ʉkʉtɨ Kɨlɨsiti aasyʉkile, atikwisa kʉfwa kangɨ, ʉbʉfwe bʉkaja nʉ bʉlagɨli kangɨ kʉmyake.
10 Bo afwile, aafwile kamokeene, kaafwene ʉkʉbʉtola ʉbʉlagɨli ʉbwa bʉtʉlanongwa. Akabalɨlo aka mʉʉmi, ʉbʉʉmi bwake bʉlɨ mbʉlɨɨlanisi na Kyala.
11 Bʉbʉʉbo na nuumwe mwibonege ʉkʉtɨ mufwile pamopeene na Kɨlɨsiti, ʉbʉtʉlanongwa bʉkaja nʉ bʉlagɨli kʉmyɨnu na panandɨ. Kangɨ mwibonege ʉkʉtɨ mulɨ bʉʉmi mbʉlɨɨlanisi na Kyala mwa Kɨlɨsiti Jesu.
12 Po leelo mulɨngabʉlekaga ʉbʉtʉlanongwa ʉkʉgɨlagɨla ɨmibɨlɨ gyɨnu, ɨgɨ aagikʉfwa, pamo ʉkʉkonga ɨfinyonyo fyake ɨfibiibi.
13 Mulɨngabombelaga ʉtʉmbakaasya ʉtwa mibɨlɨ gyɨnu ʉbʉtʉlanongwa nɨ mbiibi. Looli mwiningege kwa Kyala, ʉkʉtɨ mubombelege ʉtʉmbakaasya twɨnu ɨsya bʉgolofu. Namanga musyʉsiigwe na Kyala, ʉkʉtɨ muje nʉ bʉʉmi ʉbʉpya.
14 Ʉbʉtʉlanongwa bʉkaja nʉ bʉlagɨli kʉmyɨnu, paapo mukʉlongosigwa ni ipyana, somma nɨ ndagɨlo.
Ʉkʉja batʉmwa baa bʉgolofu
15 Po tʉtɨ fiki? Lɨnga tukʉlongosigwa ni ipyana, somma nɨ ndagɨlo, bʉle tukwitɨkɨsigwa ʉkʉbomba ʉbʉtʉlanongwa? Hɨmma na panandɨ!
16 Bʉle, mukamanya ʉkʉtɨ lɨnga mwiningile kʉ mundʉ jʉmo ʉkʉbomba ɨsi ikʉlonda, po mulɨ batʉmwa baake? Mubagiile ʉkʉja batʉmwa baa bʉtʉlanongwa nʉ kʉfwa, pamo mubagiile ʉkʉja batʉmwa baa Kyala nʉ kʉmmwɨmɨka ʉmwene, ʉkʉtɨ mubaligwe ʉbʉgolofu.
17 Kyala atuufigwege! Mwalɨ batʉmwa baa bʉtʉlanongwa, looli akabalɨlo aka musikolile mu ndumbula ɨmanyisyo ɨsi mwapeeliigwe.
18 Mwabʉliigwe ʉkʉfuma mbʉtʉmwa ʉbwa bʉtʉlanongwa, mulɨ batʉmwa baa bʉgolofu.
19 Ngʉjoba nkɨfwanikɨsyo ɨkɨ ɨkya bʉtʉmwa, paapo ʉmwe mukaalɨ ʉkʉsyagania kanunu. Ijolo mwabombelaga ʉtʉmbakaasya ʉtwa mibɨlɨ gyɨnu, ʉkʉja tʉtʉmwa twa bʉnyali nʉ bʉbiibi, ʉkʉbomba ʉbʉtʉlanongwa. Looli akabalɨlo aka ʉtʉmbakaasya twɨnu tʉjege tʉtʉmwa twa bʉgolofu, ʉkʉtɨ muje biikemo.
20 Akabalɨlo kala mwalɨ batʉmwa baa bʉtʉlanongwa, mukaalongosigwaga nʉ bʉgolofu.
21 Akabalɨlo kala, mwabombaga ɨmbombo ɨsi akabalɨlo aka mukwaga soni. Mwakabilemo ɨfiki? Ɨsi sikʉboneka ndɨ sila bo bʉfwe!
22 Looli akabalɨlo aka, mwabʉliigwe ʉkʉfuma mbʉtʉlanongwa, mulɨ batʉmwa baa Kyala. Ɨfya kʉkabamo ko kʉja biikemo, nʉ kʉpeeligwa ʉbʉʉmi bwa bwila na bwila.
23 Namanga ʉmfwalo gwa batʉlanongwa bo bʉfwe. Looli ɨfyabʉpe fya Kyala bo bʉʉmi bwa bwila na bwila, ʉkwendela mu Ntwa gwɨtʉ Kɨlɨsiti Jesu.