9
Kyala aabasʉngwile aBanyaisilaɨli ʉkʉja bandʉ baake
1 Kɨlɨsiti nkeeti gwangʉ ʉkʉtɨ ngʉjoba ɨsya nalooli, ɨndumbula jangʉ jikʉʉsisimɨkɨsya jikʉlongosigwa na Mbepo Mwikemo ʉkʉtɨ ndikʉtʉngʉlʉpa.
2 Nsulumeenie fiijo nʉ kʉbabigwa ʉkʉsita kʉmalɨka mu ndumbula.
3 Naabagiile ʉkʉhoboka ʉkʉgunigwa na Kyala nʉ kʉsoosigwamo mwa Kɨlɨsiti ʉkʉtɨ abandʉ abaa nkɨkolo kyangʉ bapokigwe!
4 Abo bo Banyaisilaɨli. Bo aba Kyala aababɨɨkile ʉkʉja baanaake. Aalɨ pamopeene nabo mbʉsisya bwake. Bo aba Kyala aabɨɨkile ʉlwitɨkano nabo, nʉ kʉbapa ɨndagɨlo syake, nʉ kʉfinga kʉmyabo, nʉ kʉbalagɨla muno bikʉlondeligwa ʉkʉmmwipuuta.
5 ABanyaisilaɨli abo, baa ndʉjungu lwa Abulahamu, Isaka na Jaakobo. Joope Kɨlɨsiti afumile ndʉjungu lwabo. Jo Kyala, ʉNkʉlʉmba gwa fyosa. Atuufigwege bwila na bwila! Ameni.
6 Bʉle, Kyala aatoliigwe ʉkʉbomba ɨsi aafingile kʉ Banyaisilaɨli? Hɨmma! Paapo abaa ndʉjungu lwa Abulahamu bamo bakaja basʉngʉligwa baa Kyala.
7 Kangɨ abaa ndʉjungu lwa Abulahamu bamo batikʉbaligwa ʉkʉja baanaake, paapo Kyala aalɨmmbʉʉlile Abulahamu aatile, “Ʉlʉjungu lwako lukʉfuma kwa Isaka.”
8 Kokʉtɨ, abaana bamo aba aabapaapile Abulahamu bakaja baana baa Kyala. Looli aba bapaapiigwe ʉkʉkongana na muno Kyala aafingiile kwa Abulahamu, bo aba bikʉbaligwa ʉkʉja baana baa Kyala.
9 Namanga ʉlʉfingo ʉlwene lukʉtɨ, “Angʉgomokelako nkabalɨlo aka nkabaatiike, Sala aikʉjaga nʉ mwana ʉnnyambala.”
10 Kangɨ sikaja syo ɨsyo itolo. Ʉmwana ʉjo jo Isaka, ʉnkasi gwake Lebeka aalɨmpaapiile abaana babɨlɨ abiipasya.
11-12 Bo bakaalɨ ʉkʉpaapigwa abiipasya abo, Kyala alɨnkʉmmbʉʉla Lebeka ʉkʉtɨ, “Ʉnkʉlʉmba ikwisa kʉmmbombelaga ʉnnandɨ.” Kyala bo ikʉjoba ɨsyo, abaana abo bo bakaalɨ ʉkʉbomba nasimo ɨnunu pamo ɨmbiibi. Ɨsi sikʉnangɨsya ʉkʉtɨ Kyala ikʉsʉngʉla abandʉ ʉkʉkongana nʉ bwigane bwake. Batikʉsʉngʉligwa ʉkʉkongana nɨ mbombo syabo, looli bikʉsʉngʉligwa na ʉjʉ ikʉbabɨlɨkɨla.
13 Jo nongwa ɨjɨ Kalata ʉMwikemo ikʉtɨ, “Jaakobo naalɨnnganile, looli Esabu naalɨnkaanile.”
Kyala ngolofu
14 Po tʉtɨ fiki? Bʉle, tʉtɨgɨ Kyala akaabombile ɨsya bwanalooli? Hɨmma na panandɨ!
15 Namanga aalɨmmbʉʉlile Moose aatile,
“Ʉne ndɨ nʉ lʉpaakɨsyo
kʉ mundʉ ʉjʉ niiganile ʉkʉmpaakɨsya,
kangɨ ngʉmpelela ɨkɨsa
ʉmundʉ ʉjʉ niiganile ʉkʉmpelela ɨkɨsa.”
16 Akapala kyo kɨsa ɨkya Kyala, bʉkaja bwigane bwa bandʉ, pamo ʉkwijʉʉla kwabo abeene.
17 Kangɨ mwa Kalata ʉMwikemo aalɨmmbʉʉlile Falao aatile, “Naakʉbɨɨkile ʉkʉja malafyale ʉkʉtɨ kʉ njɨla jaako mbanangɨsye abandʉ amaka gangʉ, nʉ kʉtɨ ɨngamu jangʉ jɨfumusigwege ɨkiisʉ kyosa.”
18 Po leelo tʉmeenye ʉkʉtɨ Kyala ikʉmpaakɨsya ʉmundʉ gwesa ʉjʉ abaatiike ʉkʉmpaakɨsya, nʉ kʉmpelela ʉbʉkafu ɨndumbula ʉjʉ abaatiike ʉkʉmpelela ʉbʉkafu.
Ɨngalalɨsi nɨ kɨsa kya Kyala
19 Pamo ʉbagiile ʉkʉʉndaalʉʉsya ʉkʉtɨ, “Lɨnga silɨ bo ʉlo, fiki Kyala ikʉtʉlonga? Namanga akajako ʉmundʉ ʉjʉ abagiile ʉkʉsisigɨla ɨmbaatɨko sya Kyala.”
20 Ʉgwe ʉlɨ mundʉ itolo! Bʉle, ʉbagiile bʉleebʉle ʉkʉtolana na Kyala? Bʉle, ɨkɨpeligwa kɨbagiile ʉkʉtolana na ʉjʉ aakɨpelile nʉ kʉlaalʉʉsya ʉkʉtɨ, “Fiki ʉmbelile bo ʉlʉ?”
21 Bʉle, ʉmbʉmba ndeko atikʉbʉmba muno iiganiile? Ɨndeko jɨmo ikʉjɨbʉmba kʉ mbombo ɨjaa kwɨmɨkigwa, ɨjɨngɨ kʉ mbombo ɨsita kwɨmɨkigwa.
22 Bo silɨ kwa Kyala. Aalondaga ʉkʉbanangɨsya abandʉ ɨngalalɨsi syake na maka gaake, looli abakeeteliile fiijo aba baalondigwaga ʉkʉlongigwa nʉ kʉpyutigwa.
23 Kangɨ aalondaga ʉkʉbʉsetʉla ʉbʉsisya bwake ʉbʉkʉlʉmba, kʉlɨ aba aalondaga ʉkʉbapelela ɨkɨsa, aba aabatendekiisye kɨlɨngaani ʉkʉbapapo ʉbʉsisya bwake.
24 Abandʉ abo, bo aba aabasʉngwile, kokʉtɨ ʉswe twesa twe Bajuuta na aba bakaja Bajuuta.
25 Ɨsi syo ɨsi Kyala aajobile mwa kalata ʉgwa nkunguluka Osija ʉkʉtɨ,
“Aba bakaja bandʉ bangʉ,
ngʉbatɨgɨ, ‘Bandʉ bangʉ.’
Abandʉ aba ngaabaganile,
ngʉbatɨgɨ, ‘Bakʉndwe bangʉ.’ ”
26 Kangɨ,
“Pabʉjo ʉbʉ baajobigwaga ʉkʉtɨ,
‘Ʉmwe mukaja bandʉ bangʉ,’
po apa aabikʉjobigwaga ʉkʉtɨ,
‘Baana baa Kyala ʉMʉʉmi.’ ”
27 Joope ʉnkunguluka Jeesaja ikʉjoba sisiisyo kʉ Banyaisilaɨli ikʉtɨ,
“Nalɨnga aBanyaisilaɨli bingi bo ʉlwa nsanga ʉgwa kʉmbalɨ kʉ nyanja,
poope abandʉ aba aabikʉpokigwa banandɨ.
28 Namanga ʉNtwa Kyala ikwisa kʉbapa ʉlʉfundo ʉlʉsita kwagɨlwa
abandʉ abaa pakiisʉ apa, kɨsita kʉkaabɨla.”
29 Bo muno aajobiile ijolo ʉnkunguluka Jeesaja ʉkʉtɨ,
“Lɨnga ʉNtwa ʉMwene maka goosa akaasyesye bamo abaa ndʉjungu lwɨtʉ,
ngalɨ tʉpyutiigwe loosa bo ʉlwa bandʉ abaa mu Sotoma na Gomola.”
Ɨsi syabapelile aBanyaisilaɨli bamo ʉkʉsita kʉbaligwa ʉbʉgolofu
30 Bʉle, tʉtɨ fiki? Na paapo abandʉ aba bakaja Banyaisilaɨli bakaaliijʉʉlile ʉkʉtɨ babaligwe ʉbʉgolofu na Kyala, poope Kyala aababalile ʉbʉgolofu kʉ nongwa jaa lwitɨko lwabo.
31 Kangɨ kokʉtɨ, aBanyaisilaɨli aba biijʉʉlaga ʉkʉsikonga ɨndagɨlo ʉkʉtɨ babaligwe ʉbʉgolofu, baatoliigwe ʉkʉsikonga ɨndagɨlo sila.
32 Fiki bakaabaliigwe ʉbʉgolofu? Paapo biijʉʉlaga ʉkʉsikonga ɨmbombo sya ndagɨlo, kɨsita lwitɨko kwa Kyala. Balɨnkwitika pi ibwe lɨla iikʉlʉmba, balɨnkʉgwa.
33 Bo muno sisimbiigwe mwa Kalata ʉMwikemo ʉkʉtɨ,
“Namukeete, ʉko nkaaja akaa mu Syoni,
mbɨɨkile ɨliibwe ɨlɨ abandʉ aabikwitikangapo,
ɨlɨ aalikʉbapelelaga abandʉ ʉkʉgwa.
Looli ʉmundʉ gwesa ʉjʉ ikʉmmwitɨka ʉjʉ jo ibwe ɨlyo,
atikwisa kʉsʉʉkamo sikʉ!”