18
Ʉkʉpyutigwa akaaja akaa mu Babeli
1 Ɨsyo bo sikɨndile, ndɨnkʉmmbona ʉgwandʉmi ʉjʉngɨ ikʉsuluka ʉkʉfuma kʉmwanya, aalɨ nʉ bʉlagɨli ʉbʉnywamu. Pakiisʉ poosa palɨnkʉmulɨkigwa nʉ bʉsisya bwake.
2 Alɨnkʉlaata alɨnkʉtɨ,
“Kagwile Babeli akaaja akakʉlʉmba! Kagwile!
Lɨɨlɨno bʉjo bwa mbepo ɨnyali.
Kʉkʉtɨ mbepo ɨnyali jikwifisa ʉmo,
kʉkʉtɨ njʉni ɨnyali ɨjɨ jikʉkalasya,
jikwifisa ʉmo.
3 Namanga abandʉ baa mfiisʉ fyosa
banwile ɨfinga jaake ɨngalɨ nʉ kʉlogwa nagwe.
Boope abanyafyale baa pakiisʉ balogilwe nagwe.
Boope abakyulusi biikabiisye,
ʉkʉfuma mmaka na mbʉlya fyosa bwake.”
4 Po ndɨnkʉpɨlɨka iisyʉ lya Kyala ʉkʉfuma kʉmwanya lɨlɨnkʉtɨ,
“Namusookemo nkaaja ako, ʉmwe mwe bandʉ bangʉ,
mulɨngiisa kʉbomba ʉbʉtʉlanongwa pamopeene nagwe,
kʉlɨngiisa kʉbaaga ʉkʉpyutigwa kwake ʉkʉ kukʉmmwisɨla,
5 paapo ʉbʉtʉlanongwa bwake bwilʉndiike,
mpaka bʉfikile kʉmwanya.
Kyala akaleka ʉkʉnndonga kʉ mbiibi syake.
6 Mummbombelege bo muno joope aababombiile,
mummbujɨkɨsye kabɨlɨ kʉlɨ sila aabombile.
Nkɨkombe kyake ɨkɨ aabongaanikiisye,
ʉmwe mummongaanikɨsye kabɨlɨ.
7 Mumpege ɨngʉbɨlo nʉ kʉmfulasya mu ndumbula,
ʉkʉkongana nʉ kwijumbɨka kwake,
ʉkʉkongana nʉ bʉlya fyosa bwake.
Aaliijumbiike mu ndumbula jaake aatile,
‘Ʉne ndɨ malafyale ʉnkiikʉlʉ!
Ndʉʉgeele apa pa kɨkota kyangʉ ɨkya bʉtwa!
Kangɨ ndikwisa kʉfwɨlɨligwa nʉ nnyambala,
paapo ngeegigwamo sikʉ!’
8 Kʉlɨ ɨsyo, ikwisa kʉpeeligwa ʉbʉtolwe nakalɨnga,
ʉbʉbine, ʉbʉsulumanie, nɨ njala.
Kangɨ ikwisa kʉpyutigwa nʉ mooto,
namanga ʉNtwa Kyala ʉjʉ ikʉnndonga, alɨ na maka goosa.”
9 Abanyafyale baa pakiisʉ, aba balogilwe nagwe nʉ kʉkabɨlamo mbʉlya fyosa bwake, bikwisa kʉlɨla nʉ kwilɨlɨɨsya bo balɨbwene ɨlyosi ɨlya kʉpya kwake.
10 Bikwisa kwɨma pabʉtali paapo bikwisa kʉtiila ɨngʉbɨlo syake, bikwisa kʉjoba ʉkʉtɨ,
“Ahɨɨli! Ahɨɨli ʉgwe Babeli!
Gwe kaaja akafumuke na kaa maka!
Namanga nakalɨnga ʉbʉlongi bʉkwagile.”
11 Boope abakyulusi abaa mfiisʉ fyosa bikwisa kʉlɨla nʉ kwilɨlɨɨsya, paapo akajako ʉmundʉ najʉmo ʉjʉ ikʉʉla ʉtʉndʉ twabo,
12 kokʉtɨ ɨsahabʉ syabo, nɨ feesa, amabwe agaa ntengo, nɨ nyambo ɨsi sikʉlangala. Kangɨ bikwisa kʉleka ʉkʉʉla ɨmyenda gyabo ɨmyelu ɨminunu, nɨ myenda ɨmifubɨɨfu ʉbʉtiitʉ, nɨ mitakanyifu, nɨ mikeseefu fiijo. Fyope nɨ fyombo ɨfya mipiki ɨgya lʉʉma ʉlʉnunu, nɨ fyombo fya mbembe ɨsya sofu, nɨ fya mipiki ɨgya ntengo ʉnnywamu, nɨ fya kɨbʉngʉ, nɨ fya kyela pamo amabwe agaa malimali.
13 Kangɨ bikwisa kʉleka ʉkʉʉla ʉndalasini nɨ filʉngo ɨfingi, ɨfya kʉfuukɨsya, ʉnkota mila, lʉbani, kangɨ ɨfinga na mafuta agaa misyʉngʉtɨ, ʉbʉfu ʉbʉnunu ʉbwa nganu, ɨngʼombe, ɨngʼoosi, ɨfalaasi, amageleeti, na batʉmwa.
14 Abakyulusi bikwisa kʉmmbʉʉla ʉkʉtɨ, “Ʉbʉkabi bwako boosa nʉ bʉlya fyosa bwako fisobile! Ʉkabagɨla ʉkʉfyaga kangɨ!”
15 Abakyulusi abo, aba biikabiisye kʉkaaja ako, bikwisa kwɨma pabʉtali kʉnongwa jaa kʉtiila ɨngʉbɨlo syake. Bikwisa kʉlɨla nʉ kwilɨlɨɨsya,
16 bikwisa kʉtɨ,
“Ahɨɨli! Ahɨɨli akaaja akakʉlʉmba!
Gwaliisibiile ʉkʉfwala ɨmyenda ɨmyelu ɨminunu,
nɨ gya langi ɨfubɨɨfu ʉbʉtiitʉ nɨ ngeseefu,
nʉ kwinosya nɨ sahabʉ,
na mabwe nɨ nyambo ɨsya ntengo!
17 Kʉ kabalɨlo kamokeene itolo,
ʉbʉkabi bwake bʉpyutiigwe!”
Kangɨ boosa aba bikwendesya ɨsitima, na boope aba bikwenda nabo ɨnjɨla, na boosa aba bikʉbomba ɨmbombo mu nyanja, bikwisa kwɨma pabʉtali.
18 Bo bikʉlɨbona ɨlyosi lya mooto gʉla, ʉgʉ gukʉkapyuta akaaja kala, bikwisa kʉlaata fiijo, bikwisa kʉtɨgɨ, “Kakaaliko sikʉ akaaja, bo akaaja akakʉlʉmba aka!”
19 Bikwisa kwinyambɨla ɨfumbɨ mmitʉ gyabo, kʉno bikʉlɨla nʉ kwilɨlɨɨsya,
“Ahɨɨli! Ahɨɨli akaaja akakʉlʉmba!
Akaaja aka boosa, aba balɨ nɨ sitima ɨsya mu nyanja,
biikabiisye ʉkʉkongana nʉ bʉkabi bwake.
Kʉ sala jɨmojeene itolo kapyutiigwe!
20 Musekelege ʉmwe mwe baa kʉmwanya,
kʉnongwa jaa loonangɨko lwake.
Namuhobokege ʉmwe mwe bandʉ baa Kyala,
mwe batʉmigwa na mwe bakunguluka!
Paapo Kyala akalongile,
kʉnongwa jaa sila ɨsi kaababombiile ʉmwe!”
21 Kangɨ ʉgwandʉmi jʉmo ʉjʉ alɨ na maka, alɨnkwinʉla iibwe ɨlɨ likʉfwana lwala ʉlʉnywamu, alɨnkʉlɨsopa mu nyanja, alɨnkʉtɨ,
“Bo ʉlo, Babeli, akaaja akakʉlʉmba,
aakikʉsopigwa kʉ maka,
ʉmundʉ atikwisa kʉkwaga kangɨ sikʉ.
22 Kakajako akoogo akaa ndingala nɨ nyɨmbo,
ɨsya malonge nɨ sya ngangabwite,
sitikwisa kʉpɨlɨkigwamo sikʉ kʉmyako.
Akajako ʉmfundi ʉgwa lʉko loloosa,
ʉgwa kwagigwa kangɨ nkatɨ mmyako.
Kakajako akoogo akaa lwala,
katikwisa kʉpɨlɨkigwamo sikʉ kʉmyako.
23 Lʉkajako ʉlʉmuli ʉlwa nyaale,
ʉlwa kʉboneka kangɨ kʉmyako.
Lʉkajako ʉlʉsekelo ʉlwa aba bikwegana,
kokʉtɨ bʉkajako ʉbwegi sikʉ.
Paapo abakyulusi baako baalɨ bakʉlʉmba baa pakiisʉ,
kangɨ kʉ bʉlosi bwako gwafisofiifye ɨfiisʉ fyosa!
24 Nkaaja kala, lyalimo iilopa ɨlya bakunguluka,
ni ilopa ɨlya bandʉ baa Kyala,
ni ilopa ɨlya bandʉ boosa,
aba abalʉgʉ baa Kyala baabagogile pakiisʉ.”