5
Kalata na Kangʼoosi
1 Po ndɨnkʉmmbona kalata nkɨboko ɨkiilɨɨlo ɨkya jʉla ʉjʉ aatʉʉgeele pa kɨkota ɨkya bʉtwa. Kalata ʉjʉ aasimbiigwe nkatɨ na munyuma. Kangɨ aakolekeliigwe nɨ fikolekelo fihaano na fibɨlɨ.
2 Ndɨnkʉmmbona ʉgwandʉmi ʉgwa maka, ikʉlaata ʉkʉlaalʉʉsya ikʉtɨ, “Jo jwani ʉjʉ abagiile ʉkwabʉla ɨfikolekelo fyake nʉ kʉbaalʉla kalata ʉjʉ?”
3 Akaalipo ʉmundʉ najʉmo, kʉmwanya pamo pakiisʉ pamo kʉ bʉsyʉka, ʉjʉ aabagiile ʉkʉbaalʉla nʉ kʉbala kalata ʉjo.
4 Po ʉne ndɨnkwanda ʉkʉlɨla fiijo, paapo ngaalɨmmbwene ʉmundʉ najʉmo ʉjʉ abagiile ʉkʉbaalʉla nʉ kʉbala kalata ʉjo.
5 Po jʉmo mbakʉʉlʉ bala alɨnkʉʉmbʉʉla alɨnkʉtɨ, “Ʉlɨngalɨlaga! Keeta, Ngalamu ʉgwa nkɨkolo ɨkya Juuta, ndʉjungu ʉlwa malafyale Ndaabɨti, atolile. Ʉmwene jo ʉjʉ abagiile ʉkwabʉla ɨfikolekelo ɨfyo fihaano na fibɨlɨ, nʉ kʉbaalʉla kalata ʉjo.”
6 Po ndɨnkʉmmbona Kangʼoosi ɨɨmile kɨfuki nɨ kɨkota kya bʉtwa, aafwene ngatɨ abooliigwe. Aasyʉngʉʉtɨliigwe nɨ fyʉmi fila fina, pamopeene na bakʉʉlʉ bala. Aalɨ nɨ mbembe ihaano na ibɨlɨ, na maaso mahaano na mabɨlɨ, ɨsi syo Mbepo ihaano na ibɨlɨ ɨsya Kyala, ɨsi aasitʉmile pakiisʉ kyosa.
7 Alɨnkwakwega kalata jʉla nkɨboko ɨkiilɨɨlo ɨkya jʉla aatʉʉgeele pa kɨkota ɨkya bʉtwa.
8 Bo eegile kalata jʉla, ɨfipeligwa fila fina, pamopeene na bakʉʉlʉ bala 24, balɨnkʉfugama nkyeni mwa Kangʼoosi. Boosa baalɨ nɨ fisango, nɨ nyangabya ɨsya sahabʉ ɨsi syaliiswile ɨfya kʉfuukɨsya. Ɨfya kʉfuukɨsya ɨfyo syo nyiipuuto sya biikemo.
9 Balɨnkwɨmba ʉlwɨmbo ʉlʉpya balɨnkʉtɨ,
“Ʉbagiisye ʉgwe ʉkwega kalata ʉjo,
nʉ kwabʉla ɨfikolekelo fyake,
paapo gwabooliigwe,
na kwi ilopa lyako gwalɨmmʉʉliile Kyala abandʉ,
ʉkʉfuma mfikolo fyosa na mu njobelo syosa,
kangɨ ʉkʉfuma mfiisʉ fyosa.
10 Ʉbabɨɨkile ʉkʉtɨ bajege banyafyale nʉ kʉja bapuuti
baa kʉmmbombela Kyala gwɨtʉ,
boope bikwisa kʉlongosyaga pakiisʉ.”
11 Po ndɨnkʉkeeta, ndɨnkʉpɨlɨka amasyʉ agaa bandʉmi bingi, aba bakɨsyʉngʉʉtiile ɨkɨkota kya bʉtwa, nɨ fipeligwa fina na bakʉʉlʉ bala 24. Abandʉmi baalɨ bingi fiijo, ʉkabagɨla ʉkʉbabala.
12 Balɨnkʉlaata ʉkwɨmba balɨnkʉtɨ,
“Kangʼoosi ʉjʉ abooliigwe,
abagiisye ʉkwambɨlɨla ʉbʉkʉlʉmba nʉ bʉkabi,
na mahala na maka,
nʉ lwɨmɨko nʉ bʉsisya nɨ nduufyo!”
13 Po ndɨnkʉpɨlɨka ɨfipeligwa fyosa ɨfi fyalɨ kʉmwanya, na ɨfi fyalɨ pakiisʉ, na ɨfi fyalɨ kʉ bʉsyʉka, na ɨfi fyalɨ mu nyanja. Fyɨmbaga fyatɨgɨ,
“Ʉjʉ atʉʉgeele pa kɨkota ɨkya bʉtwa, na Kangʼoosi,
balɨ nɨ nduufyo nʉ lwɨmɨko nʉ bʉsisya na maka goosa bwila na bwila.”
14 Ɨfipeligwa fila fina filɨnkʉtɨ, “Ameni.” Boope abakʉʉlʉ bala 24 balɨnkʉfugama nʉ kwipuuta.