7
Abandʉ baa Kyala bikʉbɨɨkigwa ɨkɨmanyilo nɨ kɨkolekelo
1 Ɨsyo bo sikɨndile, ndɨnkʉbabona abandʉmi bana, bɨɨmile mfibafu fina ɨfya pakiisʉ. Abandʉmi abo baasigɨlaga ʉmbelo ʉgwa kʉfuma ɨfibafu fina ɨfya pakiisʉ, ʉkʉtɨ ʉmbelo gʉlɨngakulaga pakiisʉ, mu nyanja, pamo mmipiki.
2 Ndɨnkʉmmbona ʉgwandʉmi ʉjʉngɨ ikʉfyʉka ʉkʉfuma kʉbʉsookelo, aalɨ nɨ kɨkolekelo ɨkya Kyala ʉMʉʉmi ɨkya kʉbabɨɨka abandʉ ɨkɨmanyilo. Alɨnkʉlaata ʉkʉbabʉʉla abandʉmi bala bana, aba baapeeliigwe ʉkoonanga ɨfiisʉ nɨ nyanja,
3 alɨnkʉtɨ, “Mulɨngoonanga ɨkiisʉ, pamo ɨnyanja, pamo ɨmipiki, mpaka bo tʉbabɨɨkile ɨkɨmanyilo ɨkyo pa fyeni fyabo, ababombeli abaa Kyala gwɨtʉ.”
4 Po ndɨnkʉpɨlɨka ʉbwingi bwabo aba baabɨɨkiigwe ɨkɨmanyilo ɨkyo, mfikolo fyosa ɨfya Banyaisilaɨli, abandʉ 144,000.
5 Abaa nkɨkolo ɨkya Juuta 12,000
Abaa nkɨkolo ɨkya Lʉbeni 12,000
Abaa nkɨkolo ɨkya Gati 12,000
6 Abaa nkɨkolo ɨkya Aaseli 12,000
Abaa nkɨkolo ɨkya Nafutali 12,000
Abaa nkɨkolo ɨkya Manasi 12,000
7 Abaa nkɨkolo ɨkya Simyoni 12,000
Abaa nkɨkolo ɨkya Leebi 12,000
Abaa nkɨkolo ɨkya Isakali 12,000
8 Abaa nkɨkolo ɨkya Sabuloni 12,000
Abaa nkɨkolo ɨkya Joosefu 12,000
Abaa nkɨkolo ɨkya Benjamini 12,000.
Ɨkɨlʉndɨlo ɨkya bandʉ baa mfiisʉ fyosa
9 Ɨsyo bo sikɨndile, ndɨnkʉkeeta kʉmwanya. Ʉko ndɨnkʉkɨbona ɨkɨlʉndɨlo ɨkɨnywamu fiijo ɨkya bandʉ aba akajako ʉjʉ abagiile ʉkʉbabala. Abandʉ abaa kʉfuma mfiisʉ fyosa na mfikolo fyosa na mu njobelo syosa, baalyɨmile nkyeni nkɨkota ɨkya bʉtwa na nkyeni mwa Kangʼoosi. Baafwele ɨmyenda ɨmyelu, kangɨ bakolile ɨsamba ɨsya tʉgɨndwa.
10 Balɨnkʉlaata ʉkʉjoba, balɨnkʉtɨ,
“Ʉbʉpoki bukʉfuma kwa Kyala gwɨtʉ,
ʉjʉ ikʉtʉʉgala pa kɨkota ɨkya bʉtwa,
na kwa Kangʼoosi.”
11 Abandʉmi boosa baalyɨmile mfibafu fyosa ɨfya kɨkota ɨkya bʉtwa, nɨ fya bakʉʉlʉ nɨ fya fipeligwa fina. Balɨnkʉgwa ʉlʉpi nkyeni nkɨkota ɨkya bʉtwa nʉ kʉmmwipuuta Kyala,
12 balɨnkʉtɨ,
“Ameni!
Gwe Kyala gwɨtʉ,
tukʉkʉtuufya, tukʉkwɨmɨka, tukʉkʉgwɨla ʉlʉpi,
kangɨ amahala, ʉbʉkʉlʉmba na maka,
fyako bwila na bwila.
Ameni!”
13 Mbakʉʉlʉ abo, jʉmo alɨnkʉʉndaalʉʉsya alɨnkʉtɨ, “Abandʉ aba bafwele ɨmyenda ɨmyelu bo baani? Bafumile kʉʉgʉ?”
14 Ndɨnkʉmmwamula ndɨnkʉtɨ, “Gwe ntwa, ʉgwe ʉmeenye.” Po ʉmwene alɨnkʉtɨ, “Abandʉ aba bafumile mu ngʉbɨlo ɨnywamu. Abeene basukile ɨmyenda gyabo nʉ kʉgɨpela ʉkʉja myelu, mwi ilopa ɨlya Kangʼoosi.
15 “Jo nongwa ɨjɨ balɨ nkyeni nkɨkota ɨkya bʉtwa ɨkya Kyala.
Bikʉmmwipuuta Kyala pakɨlo na pamuusi
mu tempeli jaake ɨnyiikemo,
ʉmwene ʉjʉ atʉʉgeele pa kɨkota ɨkya bʉtwa
ikʉbapa ʉbʉjo nʉ kʉbalɨndɨlɨla.
16 Ɨnjala jɨtiisakʉbalʉmamo sikʉ, pamo ʉkʉʉmɨlwa amɨɨsi,
kangɨ iisʉba nʉ bʉpyʉ aafitikʉbookyaga.
17 Kangʼoosi ʉjʉ alɨ pa kɨkota ɨkya bʉtwa aikʉbatiimaga,
aikʉbatwalaga mu nyiibʉko ɨsya mɨɨsi
aga gikʉtwala ʉbʉʉmi.
Kangɨ Kyala aikʉbapyasɨɨla amaasosi goosa
mmaaso gaabo.”