3
1 Na, pomon to dii royd od koti-is kos kovuha roy koniyu, nopuhawang doy nod polintotuwos koy riyot bonuwa to Atenas,
2 woy si Timoteo kos id po-unduwon doy. Suwod ta sikandin diyot kopomakoy woy duma roy riyot pinuungan to Monama to kodponudtuu to Moppiyon Dinoggan moka-atag ki Disas Krays. Id popiyod doy sikandin amoy'd ponokkaa to koniyun ginawa woy kopomakoy,
3 su amoy waa sokkad koniyu nod ka-antog pomon to mgo kodposuppit no no-ukitan dow. Nokosaddoo kowd man no nopuhawang don idda tapoy to Monama.
4 Oyya su laggun to noruma roy pa sikiyu, tapoy royd sikiyu id ikohiyan no od ti-is ki en to mgo kodposuppit, woy nosodsorollan dowd no ini en kos notomanan.
5 De-en pomon to dii kud od koti-is kos ipong ku koniyu, id po-unduwon ku si Timoteo amoy'd kosorollan ko momonnu ron kos kopomakoy row. Diid lonna kos ginawa ku, su saddook od ko-okalan kow ni Moivuyan woy od ko-uug no waa koru-anon to kod-oiluggat doy.
6 Na ko-ungkay, id livod don si Timoteo rini pomon duwot koniyu, woy moppiya kos ponudtulon din moka-atag to kopomakoy woy kodginawa row. Id ponudtuu rin mandad no inaayun kow od sampot konami, woy od ingowollon dow no od kokita koy nikiyu iling to ingowollon doy nod kokita roy mandad sikiyu.
7 De-en mgo suwod, ahad diyon koy to mo-uraan koosayan woy mgo kodposuppit, no-inniyat koy en pomon to kopomakoy row.
8 Woy od pokosongnga-songnga koyd, su mosalig don kos koniyun kopomakoy riyon tod Longaggon.
9 Waad kotawwan to kodposolamat doy to Monama atag koniyu pomon taddot dakkoon kahaan doy riyot isowwan to Monama.
10 Allow bulli, id dasaa koy en no od kokita roy mandon sikiyu amoy'd pokotavang koy ko ondan kos kulang to kopomakoy row.
11 Muopa no iddos Monamon Amoy ta woy si Disas nod Longaggon ta, od tavang konami amoy'd poko-unduwon koy to koniyu.
12 Woy muopa no iddos od Longaggon, od tavang nod monit pe-en kos kodpohinowannoy row woy idda mandad so duma, iling to kodginawa roy koniyu.
13 Muopa mandad no od ponokkalon din kos ginawa row amoy waa id pokosawoy koniyu, woy od molinis kow riyot kod-ontong to Monamon Amoy ta init allow to kodlivod ni Disas nod Longaggon ta duma to langun no minuvu to Monama.