4
Jo hapereketo irari nei
1-2 Eto Keriso na hamo ta memenga kina avoeto ungo ainge dombo ari sasapura toasi avo hotembihe sovera evujo, ke amita be amo hamo memenga kiari embo amita degi ari sasapura amo ivo ambu aisuja avoeto enda ta mihie hamo ta ujeje sasapura avo mane asi hotembasuja te God ta uje vahai avo asi ue iresuja.
3 Eto God kiae embomeni ta ari sasapura ungote tapa ere uaeheva amo ke pepeni poekagora eto emo indito kava ue sarika ue eagora eto sesena sasapura eagora eto pondo kando isapamane eagora eto donda Otohu o, a, ijie jakeka eagora aingeko amo ungo na eheve inono uija avoeto toruheva
4 avo enana na kito ungo do eto enana ga kajueto ari sasapura neite neite ae eagova avo mana mana ue urumbihera
5 rate erevi hotembevujo amo enana na embo pepehekari te embo vasiri te mihera amita ari sasapura siriketo hajire ikari Embo amita degi enana ta ari avoembo ke aro ingesi simba mihia.
6 Eto embomeni mahu pepehekari amina eha vasiri te irari iji te ari do ere uahera amo God na ijuketo kina avoeto enana ta ahihi avo God iraguja ainge dombo irora God ta duru javotoho avo enana ta degi hande ena.
God ta hande simba ari
7 Eto iji tutumota ere puvutuhua avoeto uha javotoho be na pari evujo.
8 Eto pajire be avo jo tapa na osa mine ara evujo, eto osa ari amina ungota ari sasapura tau veto irae aisuja.
9 Eto osa ari na pekari na umoro kamoro ue hande puanda mine ara evujo.
10 Eto ungo God na amita pure do ava kiari hande ikena amina hondate mine ara ue God ta pure ari embomeni be evujo,
11 eto God na no hande ikena amo ke ra avoeto no jo tapa na God ta ke avo hande ejo, eto God na no hande ikena amo hondate ari avo ikena avoeto God ta sovera na embo nei hondate ejo. Eto ari ainge avo ururovo amo Iesu Keriso avoembo God ta degi usasa puvurou embomeni na sago javotoho kesora, eto Iesu Keriso ta degi usasa te sovera te mahu ainge iroi, amen.
Keriso ta embomeni na osaga memenga kiagora
12 Nau namei kamei, eto ungota degi eto kiari memenga te puvuresuja avo kito tututu mane aisova amo ungota degi ari nei do asi mane puvija te
13 Keriso ta memenga avo ungona amiga kajueto ere kogova avoeto tunga javotoho evujo. Eto iji kombu ta puvurou Keriso ta usasa sago kiari peni be araha ta puvurou kito tunga javotoho be aisova.
14 Eto embo na ungo Keriso ta javo ta iragova avo kito ungo urumbasora amo God ta Ahihi usasa te ungota hamota mihia avoeto urumbasora avoeto tunga osaga avojo.
15 Rate ungo vahai amuna embo tari retemo donda pegene retemo ari sapura retemo embo nei ta ke togeto humbuto hande aheva amo ujekari ungota avoembo memenga kiaeheva rate ari ainge amo sapura be ra avoeto mane aisova.
16 Rate umo Keriso ta toho avoembo au memenga osaga kogue mane me kesoa te na Keriso ta tohora ijie God jakeka ejo.
17 Eto God na amita ke be ari embomeni ta ari do aingere avo sirikari iji puvuto ere hua amo ungotenau degi mahu puvija rate God ta duru javotoho ingito ke be ae ari embomeni amita degi hajire do au?
18 Eto ke be amo ari jajavotoho ari embomeni na God ta irari degi ai horari haite rate ngahia be ra te God ke be ae ue ari sasapura ari embomeni na ai ta daingeto horaro?
19 Rate embo amuna ari jajavotoho ururou kitoho embo na aro osaga memenga kogue amita ahihi avo ove ari Embo God ta ingeni ta ikau humbuto simba ururou ari jajavotoho mahainge aisuja.