22
1 Eto Anera na vasiri ikari umo avo God ta eto O Lamb ta avo arumba peni ai ta eto puvutuhoi ehei kehena
2 umo amina da amita jo ta degi tambu orohu ai ta puvuto pambuhoi umo ahone ta vasiri ikari ji amina ereto be ekari iji amo hariga vahai vahai amita jo ta ekasuja eto amita iki amo enda embo tapa ta sivo avoeto indie kokojekasora.
3 Eto enda ta saruka ari memenga ikari neite neite tapa amo irae asuja. Eto God te O Lamb te na da jo ta avo arumba peni ta arumbeto mihiroro amita pure embopo na ke agi aisora.
4 Eto embomeni na God ta tombu kesora eto God ta javo avo enana ta beo ta kajasuja.
5 Eto da ai ta mume mane sihukasuja avoeto embo na mane usasa undukasora te usasa amo Bada God ta degi puvuresuja avoeto usasa iji ta avo mane kesora. Eto embomeni na heteto God ga daroho mihie tihi jigesora.
Bada Iesu ta puvurari
6 Eto Anera na nau degi ta ke einge ehija “Eto ke erevi erena amo ke be ijie humota ue evujo amo Bada God peroveta tapa ta Ahihi amita God na amita pure ari embopo na ari tapa do puvuresuja avo be kiagora amita Anera namo avo ikehei puvena.”
7 “Kivujo na eha puvuto ere hona avoeto embo amuna ambota do puvuresuja avo book eita kajari mihia avo toae jigama ue iresuja amina tunga javotoho be aisuja,” ainge Bada na eria.
8 Na John nanena ke erevi kehena eto ingena avoeto na ari kiari Anera avo jakeka asi veto gombuhone haekihe ke einge ehija.
9 “Na jakeka aojo. Namote umote peroveta tapa amo no namei kamei ra amite eto book amita ke agi eagora embo tapa amiga God ta pure ari embora avoeto God vahai avo jakeka ejo,” ainge ijie ke nei
10 einge ehija, “Ari do asora avo o hamo vujekari ei ta kajari mihia amita iji avo auvehija avoeto o hamo mane egovekasova.
11 Eto ari sapura embo amo ari sapura mahainge ue iresuja God kiae embo amo God kiae ue mahainge iresuja, ari javotoho embo amo ari javotoho mahainge ue iresuja eto embo otohu amo embo otohu mahainge ue iresuja,” ke ainge Anera na ehija.
12 Eto Iesu na ke einge eria “Kivujo, na puvuto ere hona, eto na embo jajavotoho te sasapura te amita ari ta hajire amo mine nau degi ta mihia avo inonota ikasi ere puvutuhona
13 na ihikari tutumota, kihi eto ambota, susu eto kombura.
14 Eto embo amuna da peni ta horasi bo egasuja amo God na au huga pe ta horeto vasiri ikari ji ta be avo indito tunga javotoho ue iresuja.
15 Rate da ahone ta amo embo sasapura amina ino na arako ue mihera amina saruka te tiha paiha te embo tari pehari te god sokova ingeni na ove ari avo humotepain ue iragora ke sokova na tirihie osa ue iragora amina da ahone ta mihera.
16 Eto na Iesu nanena ekalesia nau tapa avo ke erevi kiagora uje eto nau Anera emina au kioa ikehene puvija, na Susu ra, na David ta Meni ra eto na Iho Tarama usasa te ra,”
17 ainge eto Ahihi te O Lamb ta kerari kakara te na “Ungo havu” erera eto ke ingari embo na ke einge aisuja “Ungo havu, umo beuje kogue havu, ungo ujena vasiri ikari umo avo mine vahai indesi havu,” ainge aisuja.
Ke tutumo
18 Eto iji ambota do puvuresuja avo book eita kaehena erevi ingari embo ta degi erena amo amuna ke nei hamota ikasuja amita degi God na memenga osaga book erei ta kajari mihia amo au kesuja.
19 Eto embo amuna book eremita ke davo purasuja amo God na au Da Otohu ta vasiri ikari ji book erei ta kajari amita be amo mane indesuja.
20 Eto ke erevi ikari embo na einge eria “Ke be, puvurari iji nau auvehija,” ainge eria avoeto ‘Bada Iesu umo hae!’ ke ainge na John na erena aravora.
21 Eto Bada Iesu ta hondate ari avo God ta embomeni ta degi iroi. Aravora.