3
Sedrak, Misak me i Abednigo
1 Ratahigi Nebokadnesa mo bolo na gailandolando gena vatu homu. Qaravugi sugu ngavulu geiono me a lawuana sugu gaiono. U labetagi nie lolo tavola hi Dura, lo togagi venue hi tau Babilon.
2 Siu, i ratahigi Nebokadnesa mo ware na nona lalangai tangaloi lalawua lolo vanue doluegi nge mo ratahigi goro vena ran vumai bubugi ra vaigareagi na gailandolando hi nge u boloe.
3 Tavohe ngerehi rau vomai, rau labe lo nagoi gailandolando i Nebokadnesa u veie.
4 A tangaloi waregi leo noi ratahigi mo waregi siaga move, “Tangaloi doluegi vataha na vanue mena lalangai leo. Nge ngaha a havagi huri ve i nigo goin vei:
5 Tavohe nem rongo na diloi tavue, bue balabala, bue warue, bue kore, mwasi mwele, sisingi mena lalangai bue doluegi, i nigo goin soi suvine gom galohagi na gailandolando vatu homu i ratahigi Nebokadnesa u labetagi nie.
6 Tangaloi vin he soi suvine tea ve na galohagi, gamai gain tulie ta lolo avi u mwamwavi de mwamwavi.”
7 Tavohe a lalangai bue me tavue dilogi mo mwagologolo, a lalangai tangaloi doluegi mena lalangai leo ram huduhudu ram galohagi na gailandolando i ratahigi Nebokadnesa u labetagi nie.
8 Lo taro hi i ngere tangaloi tau Babilon, rau vumai ve rain vevegi vogohi na tangaloi tau Juda.
9 Ram veve lawe ratahigi Nebokadnesa, “O ratahigi, goin toga vagituei!
10 O ratahigi, nigo gu teu na leo siaga huri ve tavohe a diloi tavue mena lalangai bue mo mwagologolo gamai gain huduhudu gam galohagi na gailandolando gu boloe lo vatu homu.
11 Me i hine vin he soi suvine tea ve na galohagi, nge vin tuliana ta lolo avi u mwamwavi de mwamwavi.
12 Ngere tau Juda gaitolu gu teure ram leogoro na togagi venue tau Babilon, i Sedrak, i Misak, me i Abednigo rai tabe na nom leo tea. Rai galohaginire nom huqe tea, me hateve rau galohagegi na gailandolando vatu homu gu labetagi nie.”
13 I ratahigi Nebokadnesa u mero garasie, move, “Ne vano ne lai na tangaloi gai toluhi vumai lombegu.” Siu ram laire vumai lawe na ratahigi.
14 Nebokadnesa move, “?A hogo, huri ve gimiu nei tabana tea lawera nogu huqe siu nei galohagi na gailandolando vatu homu tea?
15 Siserigi ngaha, tavohe gom rongo na diloi tavue mena lalangai bue mo mwagologolo, goi huduhudu gom galohagi na gailandolando vatu homu nau labetagi nie. Nge tareve hatie, nein tuliana ta lolo avi mui tasiserigi hi. Huri hate huqe vage ve vin lei gimiu dena nogu huireana.”
16 Nge i ngaraha gaitolu hi ram duvi lawe ratahigi Nebokadnesa, ram veve “Gamai hate nomai leo huri ve gain tugoro gamai dena gineu ngaha.
17 Tareve goi tuli gamai talolo avi huire hi, i Huqe Mauri gamai gam tabana lawe au vei lei ve vin lei gamai dena avi hi. Siu ngeie vin vagamwasoi gamai dena nom hureana, O ratahigi.
18 Nge tareve vin vagamwasoi gamai tea, u garea. Nge i ratahigi na ilo huri ve gamai gain he tabana tea lawera nom huqe me gain he galohagi na gailandolando vatu homu gu labetagi nie.”
19 Siu Nebokadnesa mo merogi Setrak, Misak mei Abednigo, a nagona mo asi ginire. Mo hora huri ve ne huru na avi hi na mwamwavi vaga bitu denie mwerehi tamwere.
20 Me mo hora na nona tangaloi vuro rau huire garagara huri ve ran wesibibi Sedrak, Misak me i Abednigo siu ra tulire talolo avi hi mo mui.
21 Siu tangaloi ram wesibimbire mena luqara, nora roqoroqo mena luqe lavasigi vage, siu ram tulire ta lolo livugei mui evi hi.
22 Huri i ratahigi u veve vena rain vei na avi vin mwamwavi liue tamwere, ngere tangaloi vuro rau welire hage ve ran tulire talolo avi rau mate gena mwamwavi avi hi.
23 Siu i Sedrak, Misak me i Abednigo ngere lo garovauveu teu tavohe ram soi ta lolo mui avi hi.
24 Ratahigi Nebokadnesa mo lehire, mo vutugegi, mo maraga siseri hage mo labe moveve, lawe na nona tangaloi lalawua “Ei ngaraha! ?Nem lado ve dau wesibimbire gaitolu hogosie dam tulire talolo avi?” Ram duvi vena, “Io ratahigi.”
25 Mo veve vena, “Neleo! Nam lehi na tangaloi gaivesi ram dige lategi lolo avi, hateve a garo lure me rai gao tea; Gaivesigi u mwerei neture huqe.”
26 I Nebokadnesa mo vano lo matai evi mo ware, “Sedrak, Misak Abednigo tangaloi tabana noi Huqe Eulu, mwalue!” Siu i Sedrak, Misak, me i Abednigo ram mwalue dena avi.
27 Me a tangaloi lalawua noi ratahigi ram sone dalire. Ram leo a avi he gao na tarabesire tea, a vulure rai gao tea, luqara rai gao tea, siu hate bui evi lure.
28 I ratahigi move, “Galohagi na Huqe Mauri noi Sedrak, noi Misak, me noi Abednigo! U hora na nona lenao mo vagamwasoi na tangaloi ngerelehe rau ladohogo lune. Rai tabe na nogu leo tea me rai lado na nora mwasoana tea. Ram tabana me ram galohagi na nora Huqe Mauri hogosie!
29 Huri hi, a nogu leo mwere: a tangaloi dena hava vanue sige hava leo, mo veve asisigi na leo suvohi na Huqe Mauri noi Sedrak, Misak, me i Abednigo, nain tei vurivurire me a valera rain rurungudo ram vusi vuine. Hate huqe wagineu vage huri ve vin vagamwasoi mwerehi.”
30 Lo tagugi, i ratahigi mo ragasi Sedrak, Misak me i Abednigo sulo here lalawua lolo togagi venue tau Babilon.