18
Elaeja mo vevegi na Leo noi Huqe lawe Ehab
1 Lo tagui taro qaravu, lo higao gai toligi hi a aho huru u eno, a leoi Huqe mo vomai lawe Elaeja vena, “Go vano gon haharagi nigo sibomu lawe Ehab, me nain hora na uhe ta lolo vanue.”
2 Siu Elaeja mo vano vena haharagi nie sibona lawe Ehab. Siseri ngaha a maro u esi garagara lolo Samaria.
3 Me i Ehab mo ware Obadia ngeie mo leogoro na valei ratahigi. (Obadia ngeie a tangaloi ladomava siaga lo Huqe.
4 Tavohe Jesebel mo ue vagamate na tangaloi ligoligogi ngere hi noi Huqe, i Obadia u lei na tangaloi ligoligogi ngere vudolue me mo hiligi nire lolo malanga gairue, a ngavulu geilime lolona tuegi, me a ngavulu geilime lolo na tuegi, me mo bete na hinaga mena wai lawera.)
5 I Ehab u veve lawe Obadia vena, “Go vano turu na vanue sulo wai meuri mena baha doluegi. Bataha dain haqe na songo huri vin wiribibi na hosi mena miul rain mwaso siu dain mese ue vagamate na bulanda kankarue.”
6 Siu ngere ram wahegi na vanue ve ngere roin dige doluegi nire, i Ehab mo vano lo turegi dolue me Obadia lune tuegi.
7 Tavohe i Obadia mo dige mo vano, i Elaeja mo hangwea. Obadia mo leo hogosie, mo siolo suvine lo tano, me mo veve vena, “?Huri ve nigo hogo, nongu huqe Elaeja?”
8 Ngeie mo duvi vena, “Io. Go vano go veve lawe na nomu ratahigi vena, ‘I Elaeja ngeie talehe.’ ”
9 I Obadia mo hui vena, “?Nau vei na havagi u esi? Huri nigo gom bete na nomu tangaloi tabanagi vano lawe Ehab vena vin teue lo mateana.
10 A hogo mwerehi nomu Huqe Mauri mo mwaso, hate togagi venue sige a ara noi ratahigi u eno vurogi hurive a nongu ratahigi na higesi go. Me tareve a togagi venue sige a ara noi ratahigi rain veve hurive nigo hate taie, ngeie u veire ram haharigi siaga vena ngere rahi haqego tea.
11 Siu siseri ngaha goin veve laweau vena, ‘Nain vano lobei nongu ratahigi me nain veve lawea vena, “I Elaeja ngeie tau.’ ”
12 I neu nahe iloe tea vena Vui noi Huqe vin weligo su logo tavohe i neu nam siregi nigo. Tare neu nain vano me nain vevea lawe Ehab me i ngeie vin haqego tea, nge vin ue vagamate au. Maraga i neu nomu tangaloi tabanagi nau ladomava lo Huqe u tevuigi lolo nongu mwalagelo.
13 Ba huri bataha nigo goin rongo tea, havagi nau vei tavohe Jesebel mo ue vagamate na tangaloi ligoligogi noi Huqe. I neu nau hiligi na tangaloi ligoligogi noi Huqe vudolue lolo malanga gairue, ngavulu geilime lolona tuegi siu ngavulu geilime lolona tuegi, me nau bete na hinaga mena wai lawera.
14 Me siseri ngaha i nigo gom veve lawe au vena vano lobei nongu ratahigi me nain veve lawea vena, ‘I Elaeja nge tau.’ I ngeie vin ue vagamate au!”
15 I Elaeja mo veve vena, “Namo haharigi lo henai Huqe Managi hi mo mwaso, ngehi i neu nam tabana lawea, neu nain vosangi eu hogo sibongu lawe Ehab bagataha.”
16 Siu i Obadia mo vano lobei Ehab me mo vevea lawea, me Ehab mo vano lobei Elaeja.
17 Tavohe nge mo lehi Elaeja, nge mo veve lawea vena, “?Ve nigo hingaha, gom vuragi na vui rongesi lolo vanue Israel?”
18 Me Elaeja mo duvi vena, “I neu hateve a vui rongesi lolo Israel. Nge nigo me lo babagi lui tamamu i gimiu neu veie. Gimiu neu siregi na leo hora noi Huqe me nigo gom huri na Tagaro vurogi.
19 Siu siseri ngaha go ware na sinobu dena Israel doluegi ran bulu mei eu lo Vusi Kamel. Me goin lei na tangaloi ligoligogi ngere vudolue vaga vesi avigi ngavulu geilime noi Tagaro vurogi me ngere tangaloi ligoligogi noi Asera ngere vudolue vaga vesi, ngere hi ram gani lo hinaga gai Jesebel.”
Elaeja u qaragi na tangaloi ligoligogi nora Tagaro vurogi
20 Siu Ehab mo hora na leo mo vano doluiegi na Israel me ram lai bubugi na tangaloi ligoligogi lo Vusi Kamel.
21 I Elaeja u vano tomuegi na sinobu me mo veve vena, “?Nem labe lo livugei ladolado gairue vin dadari tagaha? Tareve i Huqe ngeie i Huqe Mauri, nen hurie; nge tareve i Tagaro ngeie a huqe mauri hogo, nen hurie.” Nge sinobu rahe gesi dala tea.
22 Siu Elaeja mo veve lawera vena, “I neu tangaloi ligoligogi noi Huqe gategale hogosie nam tino, nge i Tagaro vurogi nona tangaloi ligoligogi vudolue vagavesi avigi ngavulu gailime.
23 Gimiu nen lai na bulugi boegi gairue lawe gamai. Nen siregi nire ran vile wahe na nora gategale sibora, me nen siregi nire ran teve vurivurie me ram taue talo gai nge rain mese tau na avi lune. I neu nain vei rarai na bulugi tuegi me nain teue lo gai nge nain mese tau na avi lune vage.
24 Siu nein ware lo henai nomiu huqe, me neu nain ware lo henai Huqe noi Ebraham, Aesak me Israel. A huqe nge vin duvi gena avi; ngeie a Huqe Mauri.” Siu a sinobu doluegi ram veve vena, “Gom veve na havagi hi u garea.”
25 I Elaeja mo veve lawe na tangaloi ligoligogi noi Tagaro vurogi vena, “Nen lai na bulugi denie tuegi me nem vagararaie tomue, huri gimiu neu sao. Nein wareware lo henai nomiu huqe, nge nein mese vagao na avi.”
26 Siu ngere ram lai na bulugi hi u beteana lawera me ram vagararaie. Siu ngere ram wareware lo henai Tagaro vurogi, u tevuigi lolo robongi mo dadari lo matainaho mo tuvosa qatu. Ngere ram ngaragi, “O Tagaro gon duvi gamai!” Maraga hatie gaiduvigi, a tangaloi he duvi tea. Me ngere ram wetu dali na vonda hi ngere rau veie.
27 Lo matainaho mo tu vosa qatu i Elaeja mo tiehire. Ngeie mo veve lawera vena, “Nen ngaragi siaga taligu! Hogo ngeie a huqe. Bataha ngeie mo ladolado lawuagi lolo domine, sige mo dige lategi, sige ngeie mo didige. Bataha ngeie mo maturu me ngeie vin maraga.”
28 Siu ngere ram ngarangaragi mo siaga vagevage me ngere ramo gigirire sibora gena buei vuro mena gaimenu, mo huri na nora doridori, mo dadari daire ram hale.
29 Lo matainaho mo begi, me ngere ram vai na nora leo waregi sere siaga hi mo dadari lo taroi hure bonboni lolo revirevi. Maraga hate gaiduvigi, a tangaloi he duvi tea, a tangaloi he rongora tea.
30 Siu Elaeja mo veve lawe na sinobu doluegi vena, “Nen vomai teu lombegu.” Ngere ram vomai lobena, me ngeie mo vai huri na vondai hure bonboni noi Huqe, ngehi rau vei surisuri.
31 Elaeja mo wali na vatu hangavulu domwa gairue, hogo gategale mo tatarise mena babagi ngerehi rau hivo dein renetui Jekob, lawea hi a leo noi Huqe u vomai, mo veve vena, “A henamu vin vuragi Israel.”
32 Ngeie mo bulu na vonda lo henai Huqe gena vatu ngere, me mo geli na walu dalie u lawua tatarise mena laqoloi vurugi wai ngavulu gairue huri ve vin horo lolona.
33 Ngeie mo tau tabe tabegi na gai lo vonda, mo teve vurivuri na bulugi me mo taure lo gai hi. Siu nge mo veve lawera vena, “Nen lingi na wai ta lolo bue vatu lalawoa gairue hogo ngadu hangavulu me nem dandae su lo hure bonboni hi, me ta lo gai.”
34 Ngeie mo veve vena, “Nen vaie taligu,” me ngere ram vaie taligu. Ngeie mo veve vena, “Nen vaie vagatolu,” me ngere ram vaie vagatoligi.
35 A wai hi mo hale mo hivo dali na vonda me vage mo horo lolo walu hi.
36 Lo taroi hure bonboni hi, a tangaloi ligoligogi hi Elaeja mo labe me mo tataro vena, “O Huqe Mauri noi Ebraham, Aesek mei Israel, siregi nie na matamwasara lolo rani bagataha hurive i nigo i Huqe Mauri lolo Israel me i neu a nomu tangaloi tabanagi, me nau vei na gineu doluegi lo nomu leohora.
37 Go duvi eu, O Huqe, go duvi eu, huri tangaloi ngere ngaha rain iloe hurive nigo, O Huqe, i Huqe Mauri, me i nigo goin dori na domire vin tudori taligu.”
38 Siu avi noi Huqe mo soi me mo gao na hure bonboni, a gai, a vatu mena tano, me mo sungu tantau na wai lolo walu hi.
39 Tavohe sinobu doluegi ram lehi na gineu lehe, ramo soi suvine me ramo ngara ngaragi, “A Huqe ngeie i Huqe Mauri! A Huqe ngeie i Huqe Mauri!”
40 Siu Elaeja mo veve vena, “Nen wiribibi na tangaloi ligoligogi noi Tagaro vurogi. Nen mese siregi nie gategale mo vano!” Ngere ram wiribibire, me Elaeja mo vaire ram laire mo hivo su lolo halai wai Kison me mo tai vaga matera taie.
Huqe mo hora na uhe
41 Me Elaeja mo veve lawe Ehab vena, “Go vano go gagani me gom inuinu, huri a roroi uhe lawua mo vomai.”
42 Siu Ehab mo vano vena gagani me mo inuinu, nge Elaeja mo galo ta lo ului Vusi Kamel, mo siolo su vine lo tano me mo tau na nagona lo mahoi qaune.
43 Ngeie mo veve lawe na nona tangaloi tabanagi vena, “Go vano me gon leo suvohi lo tahi.” Me nge mo hage aulu me mo veve vena, “Hate gineu taie,” I Elaeja u veve vaga bitu move, “Go vano taligu.”
44 Vaga bitugi a tangaloi tabanagi mo bete na gaiduvigi vena, “A tailengi u biti mo mwere limei tangaloi mo maraga dena tahi.” Siu Elaeja mo veve vena, “Go vano go veve lawe Ehab vena, ‘Go tagaragi na bulemu jariot me gon hivo vine vaiteu a uhe mo tugoro go.’ ”
45 He rimbi tea, a mahava mo tavuigi mo maeto gena dondoi uhe, a langi mo maraga, a uhe mava mo vumai me i Ehab mo siregi mo toa su vano Jeserel.
46 A huireana noi Huqe mo hivo lui Elaeja, me mo vintegi na luqana ta lolo wasine, me ngeie mo toa tomuegi Ehab su vano Jeserel.