14
Ku ma kapi il maptei mire ilim winkem nemple pouku kolo olo
1 Wuso metine nele le lulpowo Ma Ili wolo le wala lile singe kolo olo, ise ma kesi yaltei isotei le ise ma yire yepi yura nemple yire il menmen wuso le pele onposiepe pepe kolo olo.
2 Metine wuso lirkilau lulpowo Ma Ili lepe, le ma laplei oweli keraitei. Wolo metine wuso singe kolo lepe, morou senge re le ma lalei kolo, le ma laplei nimpu yaupe.
3 Le metine piti laplei oweli keraitei pepe, le ma kelelawo nele piti laplei keraitei kolo lepe, le ma kelelawo kolo olo. Le metine piti lalei morou lo senge kolo olo lepe, le ma kelelawo nele piti laplei oweli keraitei pepe, le ma kelelawo kolo olo, wusoli Ma Ili lulpowo piti le ma laplei oweli keraitei.
4 Ye minele ma kapi il aptei ire metine piti lesio towa lite metine nele? Olo, Metine lele piti luntoluwo lepe, le miso kapi il laptei liri le le ma luluwo metine lele piti lesio towa lele lepe, le lile singe lo le ma lualo. Wolo le ma lile singe wusoli Ma Ili miso kanowo lile singe.
5 Metine nele ma onposi lirpolo, epli wem nele, le wem ilitei piti le ma lesio towa men kolo olo. Le wem piti le ma lifei yawi onposio Ma Ili. Le metine nele, le ma onposi lirpolo epli wem nele re ili kolo olo, epli wem so pante nemple polpepeye pato. Metine niliye niliye, le ma kapi laptei lire onom pele, le le ma lire punkom piti lingiepe.
6 Metine piti onposi lirpolo epli wem fei lepe le wem ili, le ma lingiepe piti leila nange lite Ma Ili. Le metine piti laplei oweli keraitei pepe, le re ma lingiepe lolpepe piti leila nange lite Ma Ili, wusoli le leltei Ma Ili liripe oweli fei pepe le le so laplei. Le metine piti linaulipe oweli nemple le le laplei nemple, le ma lingiepe fei lolpepe piti leila nange lite Ma Ili, le le leletei Ma Ili liripe le le so lingiepe fei lolpepe ko?
7 Ku minele re wuso nampir ratei pepei pepe, le ma onposi lirpolo le ratei piti lailelene onom pele lotei kolo olo. Le wuso nele louku la, le ma onposi lirpolo le la lire onom pele lotei kolo olo.
8 Wusoli wem ku nampir mratei, ku mratei piti mirine onom pite Ma Ili pele teingine. Le wem ku ma, ku ma mingiepe il pite Ma Ili. Ku nampir mratei lo ku ma, ku olo pite Ma Ili pele.
9 Min polpepei so Krais la le le nou leilo namin ratei piti ma ku piti wala nampir ratei le mete wuso pinu pa pepe, ku mepiye ma mirpei molo le Ili louku.
10 Liso piti men ma ise kapi il yaptei yiri line winke nele leise lepe? Le piti men ma ilepe peise kelelawo line winke nele leise? Ku yeflipiye ma fale mile onom pite Ma Ili piti le ma kapi il laptei lirouku.
11 Wusoli il piti paitei yousi, pe pirpei polo,
“Ma Ili lirpei lirpolo, ‘Ki namin ratei le ki kirpei punkom, mete yeflipiye ma yaru yamkelem pratei onom peiki, le pe yeflipiye ma pirpei nomnaipe pirpolo ki Ma Ili’.”
12 Ku yeflipiye ma mirpowo Ma Ili mire wai louku fi fi liti wem ku wala nampir ratei tef fei lepei.
13 So ise ma kapi il yaptei yire ilim winkem nemple peise kolo olo. Wolo ise ma onposi yolpepei, ku ma molomen molomen piti ma maptei ilim winkem nemple pouku pualo tisi oli liti pire il olpe kolo olo, ku ma molpepe kolo.
14 Ki metine piti kulpowo Apa Ili Jisas le ki kretai punkom kolpepei, oweli nemple re pe olpe piti pirouku leinginim pouku olpe kolo olo. Le wuso metine nele le onposi lirpolo oweli fei pepe olo olpe, is le ma laplei kolo oloye, wusoli onom pele leinginim le linu onposi lirpolo oweli fei pepe olo olpe.
15 Le wuso ye aplei oweli wuso line winke nele leiye lepe, le onposiepe lirpolo pe olo olpe. Wolo ye aplei ye irine onom pele one le fei pepei, ye ingowo tisi liti kani onom antowo metine nele kolo olo. Ye miso aplei oweli fei pepe wolo ye ma onposi piti ma irine onom pite metine nele one kolo olo, wusoli le re Krais la lungwi.
16 Menmen teingipe wuso ise peise yingiepe pepe, ise ma yusape mete nemple kelelaise piripe, le pe kesi nange oli paltei kolo olo. Ise ma yolpepe kolo olo.
17 Wusoli oweli re tipeluwi pepe, pe ma kaneise piti yingowo tisi lite Ma Ili laileleise kolo olo. Wolo ise ma ratei teingipe tuwopou, ratei yire onom malye le ise ratei yire enke teingipe, wusoli Riri Teingi le kosaise tisi fei lepei piti ma yingowo.
18 Le metine minele wuso lingowo tisi fei lepei le le lesio towa lite Krais, metine fei lepe ma Ma Ili onom teingine lasio, le mete piti tef re pe ma pulpo pirpolo le lingowo tisi teingi.
19 So ku ma wem oli oli mingiepe menmen piti ma mailelepe mete enke le ku ma ratei mire enke malye, le piti ku ma kane nemple piti mile singe.
20 Oweli yaupe pepe so ku ma mirowo nele miri towa wuso Ma Ili lele lesio lepe lom? Olo, ku ma molpepe kolo. Ku miso maplei oweli eryai pepe, wolo ku ma onposi piti ma maltei metine nele lualo tisi oli kolo olo.
21 Tisi tuwopou piti ku ma mingowo lepe, ku ma mingowo molpepei. Wem line winke nele wuso onposio Ma Ili le le linaulipe oweli watafei morou senge lo wain tipe, wem line winke fei lepe le lau lirouku mifei, is ku ma maplei oweli fei pepe kolo olo. Wusoli wem ku maplei, le le pele piti fol fol lepe, le ma lantouku mepi maplei. Le fei pepei, ku maltei line winke lepe lualo tisi oli wusoli le olo singe kolo olo.
22 So wem ye onposiepe menmen irpolo pe teingipe piti ye ma ingiepe, fei pepe ma pato onom pite ye peiye yoteteiye ire Ma Ili. Metine wuso onom pele leinginim le lulpo lirpolo oweli wuso le laplei pepe olo teingipe, le le onom one lasiepe kolo olo, le ma onom teingine.
23 Le wuso metine fei lepe, le onom nenpe nenpe lasiepe oweli wuso laplei pepe, Ma Ili ma onom one lasio wusoli metine fei lepe, le lingowo tisi piti lulpo lotei kolo olo. Le wuso ku mretai mirpolo menmen fei pepe, pe olo olpe piti ku ma mingiepe kolo, wolo ku mingiepe. Fei pepei, ku mingowo tisi liti mulpowo Ma Ili kolo olo, ku mingowo tisi oli liti mire il olpe.