6
1-2 Bo chuꞌig an Jiosh heki hu oꞌohana ed mo hab kaij g Jiosh:
Ab ant wo em‑kaiham k wo em‑doꞌibia mat hekid wo i e ai g doꞌibiadag tash. Isaiah 49:8
Pegih neh, e at ai hegai tash mamt wo e doꞌibia. Kuch si s‑hemajim am em‑ahgid am wehhejed g Jiosh mamt pi wo heki wua g hemajimataligaj.
3 Ch wabsh chum s‑ap hab junihim g t‑chikpan am wehhejed g Jiosh. Mt hab pi ab hu haꞌichu wo t‑abchud k pi haꞌichukaj an wo e kuh.
4 Kut wo tashok mach d piongaj g Jiosh nach pi ab s‑bahbagi nakog g nahnko mahs kudutadag.
5 Muꞌikko am wa t‑gewittan ch hebai ged hu si t‑kukpa k ch hebai ep t‑bibhiad chum s‑t‑kokdaimkch. Muꞌikko at wabsh i t‑baꞌiwich g chikpan. Kuch pi shaꞌi ha kohsh ch pi shaꞌi t‑gegosid.
6-7 Si ach t‑nuhkud ch si t‑mashcham ch ab si s‑ha bahbgi g hemajkam ch ab ha wui si s‑hemajima ch ab si ha tatchua. Chum ach hekid ahg g wohokam ch chum hekid hab wua g s‑apꞌekam ch hekaj cheggia g pi apꞌekam. K g Hekia S‑apꞌekam Gewkdag am t‑wehmaj ch am chehgidch g Jiosh gewkdag am t‑chikpan ed.
8 Haꞌijj o ab si has t‑elid ch haꞌijj si t‑edawua. Haꞌijj o ab si s‑ap has t‑ahg ch haꞌijj s‑koꞌokam has t‑ahg. Haꞌijj o hab t‑ahg mach s‑chu iꞌattomk. Kuch eda g wohokam ahg.
9 Haꞌijj o pi ab hu t‑mahchimk ch eda muꞌijj s‑t‑mahch. Haꞌijj o hab elid mach koꞌihim. Kum eda s‑mahch mach wabsh kia doda. Chum am hi wa s koꞌokam t‑shoꞌigchud ch wabshaba pi shaꞌi t‑kokda.
10 Haꞌichu o pi ap t‑tahhadchud. Kuch eda chum hekid s‑hehgig. Chum achs hi wa pi haꞌichu edgid ch eda s‑mahch ch ahgachug mo g Jiosh wehs haꞌichu edgid ch ab t‑makiog mach haschu i tatchua.
11 Neh, id ani wehs ahg si ni‑ihbdag amjed nani pi ab si em‑tatchua.
12 Pi ani d ahni manis pi ab hu em‑tatchua. Dam ahpim haꞌi mam pi ab hu ni‑tatchua.
13 Bani masma chum em‑wehm neok mam d ni‑aꞌaliga. Am g hig wo i ni‑chehgid mam ab ni‑tatchua hab masma mani ahni hab masma ab em‑tatchua.
Mat wo s‑e nenꞌoid ab amjed g ha‑himdag g pi wohochuddam
14 Pi g ab hu wabsh wo si e behꞌi ha ab hegam mo pi ab hu ihm g Jesus Christ. Shaht hig masma g s‑apꞌekam ab wo e wehnadk g pi apꞌekam? Shaht masma g tonlig ab wo e wehnadk g s‑chuhugam.
15 Jiawul o ab wui kehk g Christ. Kumt heg hekaj pi ab hu wo i e hemakoj g pi wohochuddam ha wehm.
16 Ab ach ihm g Jiosh. K pi hab chum chuꞌig machs haꞌichu ab ep wo ihmad. Jiosh o am t‑eda. K id heg wa wepo mach d cheopigaj. Neh, bo kaij g Jiosh:
Dant wo em‑Jioshgak ch am wo em‑shahgidk.
Kumt d wo ni‑hemajkamgak. Leviticus 26:12
17 K hab ep kaij:
Am amt wo i e gawulkai ab ha amjed hegam mo pi ni‑mahch k pi am hu wo hudawogad hegai mo haschu d pi apꞌekam.
18 Nt ab wo i em‑bei mamt d wo ni‑aꞌaligak. Isaiah 52:11; 43:6