11
Dasuh han ire ihat saptin Por oh Korin ihirnong da adapetip ohe meng oh
Noh da ban tahat pati han ire iraire winnong taptuhur mengriptiru hat mama napor nabrak matiproh meng moh gur Nuhur garham na amratiprohemur dahapri. Amrat patenmur. Got oh gurnong Ihir ongeng tahat ha patengwe ma dahapat da hatin hat orhor nohdapathe gurnong ihtin da orhor hat ha patengwe dahat napapatmur. Imat ma napapat da oh kuu tap oh han ohnong Gwe kuuhe mohmur pora han ohe boknong kis deipat it itap orhe hrep ongeng mat apapatru mat orhor noh guragure han tit hanwi Krais orhe inapir gurnong mihih mat napapatdapat kaput iman Krais orhe boknong nahatipra rim noh gurnong ongeng naham mihih nahat napapatmur. Imat mihih nahat napapatin hasiap oh dasuh dakuu meng oh Ip uhnong por ma dasuh matipru gurnonghe inahatporhan gure Krais ohnong rum mutuh mat ma papti da oh mandam er matipri rim noh gurnong ake tom nahat napapatmur. Noh gurnong ake tom nahat ma napapat ohe duuptei oh mama ohmur. Kat ihir apris nohe Jisas ohe ihat patesuh hanmur ma naporisuh mengnong oh mandama ihir wan mengnong Jisas oh ihat patesuh hanmur naporiyao nohe Gurnong Got oh Yahsupsi ma nahatipnong oh mandapti ire wan sup tit Moh Yahsupmur naporiyao nohe Got ohe yah meng ma naporpatnong oh mandapti ire wan mengnong Moh Got orhe yah mengmur naporiyo nahatperhan gur kapkap amratin ina haptio rim noh gurnong heimse rim ake tom nahat napapatmur.
Ama ihat meng oh nohe boknong naham dasuh nahat apripti han ihir Nuhurwi Jisas ohe meng pot pison han bap kis nahatip bap oh nuhur pokwi winsi han hat patim ihat apriptimur dahaptimur. Ihir ihat dahapti orhor nohe ma dahapat oh Noh ire hrepdapat hat patim gurnong meng naporpatda. Basra. Nohnong Got orhor kis nahat napapatin noh meng naporpat ohoh ihan ihir norhe hrepdapat hat pati ma hapat dahapatmur. Noh meng ma naporpat oh han ire kopenat meng potinmat tandeim kas hat meng poriptiru hat patim naporpatmur. Ihat meng naporpat orhor norhe dahat patnong oh amnap han hat patim orhor naporpatmur. Ama dakuu amnap hat pat da oh nohe tamreipat ohe peo norhe meng naporpat ohe peo oh gurnong namgit napisapatmur.
Gur Got orhe kintei winsi bap ha hatingwe rim noh norhe winnong amkara gurnong meng naporisuhmur. Noh yan datin ohe danonghe hat patim na tamreisuhmur. Got orhe yah meng napotin danongwi hat patim tamreisuhmur. Noh ihat ma tamrein sasuh oh noh er danong tamrein sasuhda. Basra. Noh yah dawi hat patim orhor tamrein sasuhmur. Noh yan timbas be imat ma naporpat oh wan sios ire bes teidapat napanggeitperhan gurnong oh be mengwi naporisuhmur. Gurnong meng napotinmat noh ire mani oh be noh adarisuhmur. Noh gursi patin nohe erer oh hatip hatporhan Gin gur ti napanggeitin napor ina ruum gure boknong ti na naprisuhmur. Noh hatip hatporhan diradire taptem ihir Masedonia mongdapat patima aprisa napanggeishemur. Ihan noh ina ruumsup gure boknong ti na naprisuhmur. Ama imat ma na naprisuhru hat patru hat orhorwi napaptepramur. 10 Noh yan timbas be napanggeipato rim norhe ina boknong armi tahat patim naporpat meng moh Akaia mong mama pati gur nih norhe armi tahat ripat meng moh nagatmatiproh. Timbasmur. Noh Krais orhe arpin da ohsi nahatporhan noh arpin da meng orhor mama naporpat ohmur. 11 Nohhe gure yan timbas be gurnong napanggeipatmur ma napor moh gur Oh kianorim dire panggeitin mandap oh oh baso naporpat. Oh dirnong na bopor nahat patim ginaporpatkin dahapri. Nohe gure danong ham bopor nahat patim ihpat da moh Got oh am hat patmur.
12 Kat han ihir Nuhurnong Jisas orhe meng pot pisashen han bap kis nahat napapat han bap nuhurmur. Ihat pati han bap nuhur Por ohe yah hat tamrein sus yan darpatru mat orhor nuhurhe ihat yah mat orhor meng pot pisus tamrein sapti han bapmur. Ihan yanhe Por ohe ma darpatru mat orhor naprishenmur napor dasuh nahat apris gure mutuh oh patim yan dariptimur. Ire ihat patim ma yan daripti oh nohri ihathe yan na darpat hanmur. Nohhe ihat yan ma na darpat oh ama ihat dasuh han bap ihir gure mutuhnong aprisa Nure yan ma dariptiru mat orhor Por ohhe imat darpatmur napor dasuh nahatipririm noh yan na dar be tamrein patesuhru patru hat orhorwi patepramur. 13 Ihir nuhur Jisas ohe meng pot pison han bap kis nahatip han bap nuhurmur rima arpin orhe kis mat papat han bap hatin hat tamrein sapti orhora; dasuh ham ihat tamrein sapti han bap ihirmur. 14 Gin gur Por oh yahnap hat pati han bap ire boknong ihir er hat pati han bapmur ma napor moh kinham sa ginapor daham da darhetipri. Da darheriyahanhe Satan dindi han ohnong dahatinmur. Oh ernap han orhor dindi hapat teimdapat enser has yahnap yah dasi han hatin hapatmur. 15 Orhe ma ihpatru hat orhor orhe atamreipti han bap ihirhe wan da haptida. Basra. Orhe ma ina teimdapat yah inasi hatin ham ma tamreipatru hat orhor ihirhe orhe wanohe dindi kasip ohsi teimdapat yah duutin inasi hama yah duutin dasi tamreim ha saya ina hatin hat orhor saya apriya hat patimur. Ihat ma hanip kintei saya apriya hat sapti han bap ihir kaput iraire ma ihat sapti ohe yan oh imat orhor datipri basda. Iraire ihat sapti kis orhor datiprimur.
Por oh trun tit ma tamreindinmat ina ruumsup dat sasuh ohe meng oh
16 Noh Korin aptei sios gurnong rih ma napor meng oh tap meng oh orhor napotiprohmur. Gur Por oh da ban tahat pati han ire iraire winnong daptuhur mengriptiru hat orhor ohhe ihat mengripat han ma hapat dahapri. Noh gur Oh ihat da ban tahat patim tohormi tahat mengripat han ma hapat dahayahanhe ire da ban tahat patim tohormi tahat naporipti mengnong amraptiru mat orhor nohe mengnonghe imat orhor amranmur. Gur imat orhor amrat patin noh tohormi tahatin meng hatin mat napotiprohmur. 17 Nohe norhe boknong tohormi tahat hatin hat patim mama napotiproh meng moh Krais orhe hat patru hat patim mameng moh na naporpatmur. Norhe da ban tahat pat da hatin hat patim imat naporpatmur. 18 Nohe ma ihpat oh kat han ire kakdah ohe danongwi ham tohormi tahapti ma hapat ihan nohhe ire ihat ma tohormi tahapti ohe tan hatpora daham ihpatmur. 19 Gur Nuhur dakuu hanmur daham ire mengnong asoh pan hat orhor amraptimur. Gur da timbas ham ire imat naporiya mengnong amrapti ohoh ihan nohhe ire ma haptiru hatpor daham ihpatmur. 20 Gur ama da timbas hat mengripti han ire mengnong asoh pan hat ma amrapti oh mamaru hat gur amraptimur. Ihirdapat gurnong Nure natamreindin moh gur be natamreinmur napor ire hrepnong nahayao gurnong bisei naham borop nahayao gure da oh ire boknong ha hatingwe rim dasuh nahayao Nuhurwi ihtinsi pati han bapmur naporiyao dak moh pung naporiya hatin hama dasei nahayao nahatperhan gur na garhama yahwa daham amraptimur. Ihan norhe ma napotiprohnong moh ire inahatperhan gur na gapa ham ire mengnongwi amraptiru hat orhor nohe mengnong mohhe imat orhor amranmur. 21 Ire watahpei ham gurnong imat ma naporipti meng oh nuhurri kas hat patim ohoh ama ihtin danong oh na hashemur. Gin noh kas hat patim orhor mameng moh napotiprohmur.
Gin ire watahpei hat patim ma tohormi taham naporipti meng ohor norhe boknong tohormi tahat patim orhor napotiprohmur. Ama imat tohormi tahat patim napotiproh meng oh noh da ban tahat pat han hatin hat patim napotiprohmur. Ma napotiproh oh gur Por ohnong Krais orhor kis mat papat hanhe ha dahatingwe rim napotiprohmur. 22 Nohe tohormi tahat ma napotiproh meng oh mamarumur. Ihir Nuhur Hibru bap nuhurmur ma ripti oh nohhe Hibru basda. Nohhe Hibru nuhurmur. Ihir Nuhur Isrer bap nuhurmur ma ripti oh nohhe Isrermur. Ihir Nuhur Epraham ohe puh nuhurmur ma ripti oh nohhe Epraham ohe puh basda. Nohhe Epraham ohe puhmur. 23 Ihir Nuhur Krais orhe atamreipti han nuhurmur ma ripti oh Noh atnap Krais orhe atamreipat hannap oh nohmur. Nohe Ma napor oh da ban tahat pati han ire tan hat napormur. Noh atnap Krais orhe atamreipat han hat ma pat oh mamaru hat patmur. Atamreindin oh ire pangmur. Nohe ma atamreipatnong oh isipnap atamreipatmur. Isip ma atamreipat ohe pe oh karapushe ire karapus oh pang garpokmur. Noheoh atnap tei karapus hat tei karapus hat ihat apripatmur. Kawsi ma niptihe ihirnong ma supti oh garpokmur. Nohnong ma nipti oh isipnap niptimur. Haputin ina nahat napisonhe noh isipnap tit haputin ina hat sapatmur. 24 Nohnong ma niptihe Juda iraire hanip supti ohe kasip nang tan ohsi hanen gonap dah mah tit dah tit dah ma nipti oh 39 matwi kasip nang ohsi nim namdaptimur. 25 Rom ire bes teidapathe nohnong yitir dah kasip nangsi niptimur. Tit dah tit kweisi rum hemat nasar niptimur. Yitir dah tit noh sip tem sapatin turkat tom hru dahnong wasa aya haputirmur. Tit dah tit sip tem sapatin ma turkatip oh noh prang tan ohsi marima tom hru tei patin kwitem has rima it mong dahas ritipmur. 26 Noh trun ma meih mandap er nahatin ohe mandap katnongwi ma sapat oh tit oh tom oh nipatin orhor sapatmur. Tit oh gapah han ihir gapah ham nitin ina nahat napaptin orhor sapatmur. Tit oh Juda na hat pati hano Juda hat pati nuranuro ihirdapat nohnong nitper ihaptin orhor ire pati kat sapatmur. Tit ma sapat oh garnahaham nitin ap mutuhnong sapatmur. Tit oh hanip timbas er nahatin ohe mong dusnong oh sapatmur. Tit oh tom sor hru tei sip tem ma sapat oh er nahatin orhor sapatmur. Tit oh Diradir Krais ohe nita han bapmur ma ripti dasuh han bap ihir nitper ihapti kat orhor sapat. Noh ama ihtin ohe er nahatin mandap katwi sapatmur. 27 Nohe ruumsan ma ina ruumsupsi hat orhor ma tamreipat oh trun oh ina batbet daro ruumsan tamreio ma hah ohe pe oh noh kin na timapatmur. Na timama trun tit tom din haho pahoh haho den hatip haho watah andin ohe hatip haho damesi hat ao hapatmur. 28 Ama ihat tamreipat ohe ina ruumsup nahatin ohwi basmur. Tit oh aptei aptei ohe sios ihir kinhat patio ire saheih meng ma hat pati asoh ohe meng oh kinmat pomtiproho dahapat ohe ruumsup oh namkat napapatmur. 29 Ama ruumsup namkat napapat da oh mamarumur. Tit han tit ohe yah hat saptin orhe yah hat sapat ohe pe oh ruumsup er tit ohe boknong hatporhan oh yot da ham gapa hahhanoh nohhe ohe ma ihah danong oh hama noh gapa han hatin hama ruumsup darpatmur. Tit han ohdapat tit han ohnong er da mar ambir temnong deihanoh nohhe ama pe oh ihat ambir tapan pat sa dahah ohe ruumsup oh darpatmur. Ama ruumsup nang oh nohnong namkat napapatmur.
30 Noh norhe inanong moh armi tahatin inasi nahat napapat ohoh ihan noh armi tahat indin meng oh napotiprohmur. Armi tahat indin meng ma napotiproh oh kasip hat patim ma indeipat ohe armi tahatin meng oh na napotiprohmur. Gapa hat patim ma ihpat meng oh armi tahatin ohe meng hatin mat napotiprohmur. 31 Nohe arpin meng naporpatnong moh Got oh dire Hanipyah Jisas ohe itap oh dipdipwi armi mat papten han orhor Oh arpin meng porpat ma hapat daham nohnong am hat patmur. 32 Noh gapa hat patim ma ihpat meng oh mamaru hat patmur. Noh Damaskas ap mutuh oh patin kakhan Aretas ohe hrepdapat Damaskas ap mutuhnong wamat pat kiap oh orhe dupsi han ihirnong Por oh tandutipra. Gur doho isip pruhupa gwatei kat oh wamat patenmur. Saporim ihahhanoh nang atpatinmur potporhan ihir arpin wanahat inpamur. 33 Wanahat patin ohoh ihir nohnong nang natpatipri rim norhe yah han ihir bek ung namima nang nadumama doho bas ohotdapat nangdapat namrim napaptin kot dah ohe kakdah but ham namdatperhan noh ahar tandutipmur.