16
Rom ap mutuh Got orhe nita bap sios gonsi ihirnong Gurhe sa yah hat pati por brak atip ohe meng oh
1 Gin diradire kor taptem Pibi uh sios bap Senkria aptei ihirnong panggeim tamreipat kuu uhmur. Ihan gurhe Ihat pat kuu ma hapat daham amburinmur.
2 Ama ihat pat kuu uh apriporhan gur Got orhe nita dirdapat Hanipyah orhe atamreipti kuuhan ihirnong ma amburiptiru mat orhor uhnonghe imat orhor ambutpera daham ambutinmur. Ambura uhe datin han tit hatip hat pathanhe gur Mauh Got orhe nita ihirnong panggeio Por ohnong panggeio hapat kuu ma hapat. Ihan dir panggeitper daham panggeinmur.
3 Nohsi tap hat Got ohe atamreipti kuu gamin Prisirasi; Akwira ihit gaminnong Por oh gut gaminnong dahatahat hangwermur potinmur.
4 Ama kuu gamin ihit kat han ihir nohnong niyarit haputiprarim ihit gamin nohe haputin mandap oh ihit tare nahat napapteshemur. Inahat ma napapteshenong oh nohwi weso na porpatmur. Juda na hat pati sios kuuhan gonsi ihirsi ihitnong Wes Por ohe haputin mandapnong agaheimat papteshe rima weso poriptimur.
5 Ama kuu gamin ite ap ma sios bap ihir tarmur rotu hapti kuuhan gonsi ihirnonghe sa yah hat patio rim dahatahat hangwermur potinmur.
Norhe yah han bopor mat pat han Epinitas ohnonghe Oh sa pato rim dahatahat hangwermur potinmur. Ama han oh Esia mong oh ohri kopenat orhor Krais ohwi inahatin hatin hanwa dahatip han ohmur.
6 Kasip hat tamreim napanggeipat kuu Maria uhnonghe Uhhe sa yah hat pato rim dahatahat hangwermur potinmur.
7 Norhorsi tap bap Juda bap kuu gamin ma nohsi tap hat karapus hat pateshe Andronikassi; Junias ihithe sa yah hat patio rim dahatahat hangwermur potinmur. Nohe ma Krais ohwi inahatin hatin hanwa ma dahatip oh komdapatmur. Ihitri ama danong oh hatpamur. Ama ihitnong oh aposer ihir winsi mat papti yot ihitmur.
8 Amprietas oh Hanipyah ohsi tap hat pat hano rim nohe yah han bopor mat pat ohnonghe dahatahat hangwermur potinmur.
9 Nohsi tap hat Krais ohe atamreipat han Eban ohnongsi; nohe yah han bopor mat pat han Stekis ohnongsi Ihithe sa yah hat patio rim dahatahat hangwermur potinmur.
10 Aperis ohe boknong ruumsup hatporhan oh Krais ohe danong hat pat ohe da oh na gapa ham kasip hat orhorwi pat han ohnonghe sa yah hat pato rim dahatahat hangwermur potinmur.
Aristoburas orhorsi tap aptei pati ihirnonghe sa yah hat patio rim dahatahat hangwermur potinmur.
11 Norhorsi tap gap Juda bap Herodion ohnonghe sa yah hat pato rim dahatahat hangwermur potinmur.
Nasisas ohe aptei Hanipyah orhe danong hat pati ihirnonghe sa yah hat patio rim Por oh dahatahat hangwermur potinmur.
12 Traipinasi; Traiposa ihit kuu yot Hanipyah ohe atamreindin oh kasip hat atamreipti kuu yot ihitnonghe sa yah hat patio rim dahatahat hangwermur potinmur.
Pesis Hanipyah orhe atamreindin oh kasip hat orhor atamreipat han norhe bopor mat papat yah han ohhe sa yah hat pato rim dahatahat hangwermur potinmur.
13 Rupas oh Hanipyah orhe danong hat son ohe da oh kasip hat sapat hanhe poripti han ohsi; sup uh nohnong uh nitip hatin nahat napapat kuu em uhsi ihit imannong sa yah hat patio rim dahatahat hangwermur potinmur.
14 Asinkritaso Prigono Hemiso Patrobaso Hemaso ihirsi; Got orhe nita hat patim ihirsi tap hat ma pati ihirsi irair gonsi sa yah hat patio rim dahatahat hangwermur potinmur.
15 Pirorogaso Juriao Neriaso Nerias ohe koro Orimpaso ihirsi; Got orhe nita hat patim ihirsi tap hat ma pati ihirsi irair gonsi sa yah hat patio rim dahatahat hangwermur potinmur.
16 Krais orhe nita bap sios gonsi aptei aptei mama pati bap ihiroh gurnong dahataptimur potinmur ritperhan noh mama brak nasar ohmur.
Got orhe rim ma ongeng tahat pati bap ire tuhup gosham amam goshaptiru hat orhor gurhe wanggosham ihat tuhup gosham amam goshenmur.
Got ohe nita gurnong er da napris er nahatipririm yah hat patenmur potip ohe meng oh.
17 Nohe taptem bapa gur amratinmur. Sios bap gurnong er naham katket nahat napisusa Krais orhe yah meng ma napotpanong oh amkara er da teinong pranahat napisapti han bap ihirnong inin hat patim kom asar mandanmur. Ire tapnong hathe patepri.
18 Ama ihat pati han bap ihiroh Hanipyah orhe danong hatinmat na ihapti han bap ihirmur. Iraire ina teimdapat er da tarpam tohormi tahat son ohe danong hat sapti han bap ihirmur. Ama ihirdapat Nuhurnong er nahatin han bap ihat apripti ma hapat ma na dahat pati ihirnong oh ambar yah meng tei pora gapa mar wan mandapnong pramat pisapti han bap ihirmur.
19 Gurnong oh ihat na pati han bap gurmur. Gure ma pati oh Got ohe yah mengnong amram kasip hat orhor dindeipti han bap gurmur. Gure ma ihat pati mengnong oh Got orhe nita bap aptei aptei pati bap ihir amram Ihir ihat pati ma hapat daham am hat patimur. Nohhe gure ma ihat kasip hat patinong oh amrama noh Gur ihat patio rim noh amam hat patmur. Ama ihat pati kuuhan gur yah danong am ham dakuu hat orhorwi ha sashengwemur. Dakuu hat susa er danong oh na kis taham hanhan hat ha patengwe daham mameng moh gurnong napormur.
20 Ihat sayahanoh manap gosham yah hat paten dasi nahapat Got orhor kimsi orhor er han Satan ohnong ambapte mar gure hrepnong matipramur.
Gin Got gorhe damdapat orhor Noh ihirnong imat yah matpora ma dahapat da oh ihirnong apris pomat paptenmur por nadahandeipatmur.
Kat sios ihirdapat Rom aptei pati sios ihirnong kapkep matpa ohe meng oh
21 Nohsi tap hat tamreipat han Timoti oh gurhe sa yah hat patio rim dahatahatporhan noh mama gurnong brak mat nasar ohmur. Norhorsi tap bap Juda ihirhe Rusiaso Jesono Sosipatao ihirhe gurnong Ihirhe sa yah hat patio rim dahatahatperhan noh mama brak mat nasar ohmur.
22 Por oh meng ritporhan nohe bes tei abrak deipat han Tetias noh diradire Krais orhe tapnong hat pati bapo rim noh Gurhe sa yah hat patio rim noh mama brak nasar ohmur.
23 Nohnong nambur napapao Sios gonsi bap ihirnong yah mar papao deipat han Gaias ohhe gurnong Ihirhe sa yah hat patio rim dahatahatporhan noh gurnong mama brak mat na sar ohmur. Mama ap mutuh han ire mani itperhan wamat pat han Erastas ohsi diradire taptem Kwotas ihit gurnong Ihirhe sa yah hat patio rim dahatahatperhan noh mama brak nasar ohmur.
24 Gin Got gorhe damdapat orhor Noh ihirnong imat yah matpora ma dahapat da oh ihirnong apris pomat paptenmur por nadahandeipatmur. Arpinwa.
25 Nohe yah meng napot napisapatru hat orhor Got ohhe inahat orhor kasip nahat napapten han Got orhormur. Nohe ma napot napisapat meng oh Jisas Krais orhe yah meng orhor napot napisapatmur. Ama napot napisapat yah meng oh rih orhor treman patesuhru patesuhmur. Gahan ama ihat treman patesuh meng oh Got orhor pitap teinong mar papatmur.
26 Pitap teinong mar ma papat oh rih orhor patesuhru patru patepra Got oh Propet ihirnong rit asarpat meng moh kaput among among pati kuuhan bap gonsi ihir ha amratingwe rim pitap teinong matipramur. Pitap teinong matporhan ihir amram am hama arpinhe daham sa dindeipri daham reman paptesuhmur. Reman paptesuhdapat gin pitap teinong matporhan orhe ma dahatipru gin among among pati kuuhan ihir gonsi amrama am haptimur.
27 Ama ihat patesuhru patru patepra Got oh orhor pokwimur. Orhorwi dakuunap han Got oh orhorwimur. Ama ihat pat Got ohnong Jisas Krais ohe dap teidapat dipdipwi armi mar papten Got oh orhor pokwimur. Arpinwa.