19
1 ꞌMɛfa dá øde mi ña̱ ntsꞌɛdi ndunthi ya ja̱ꞌi nuni mahetsꞌi, mi enaꞌʉ:
¡Drá nsunda Ajua̱! Ngueꞌa̱ xá nsunda ne ja rá tsꞌɛdi ne bi za bi pøhø ya ja̱ꞌi.
2 Ngueꞌa̱ nuꞌá̱ øtꞌa ra hoga tsꞌʉtbi ne núꞌa̱ majua̱ni.
Nuꞌá̱ xa umba ra mfɛi nura tsꞌoꞌbɛhña̱
núꞌa̱ mi japa ya ja̱ꞌi da ꞌyøtꞌa ya tsꞌoqui.
Ajua̱ bi coꞌtsuabiꞌa̱ núꞌa̱ bi ꞌyøtꞌe gue bi hyo núꞌʉ toꞌo mi pɛpabi Ajua̱.
3 Nepʉ bi yopa ꞌñenaꞌʉ maꞌnaꞌqui:
―¡Drá nsunda Ajua̱! Ngueꞌa̱ hinhyaꞌmʉ ma da ntsaya da bøxa rá ꞌbifi núꞌa̱ ra hnini bi za̱tꞌi.
4 Nuꞌbʉ́ núꞌʉ ꞌnatemagoho ya nda̱ ne núꞌʉ goho ya da̱ꞌɛnxɛ bi ndandiña̱hmuꞌʉ, ne bi xøcambeni Ajua̱ núꞌa̱ bí hudi ja rá hudi, ne mi enaꞌʉ:
―¡Njabʉ gueꞌa̱! ¡Drá nsunda Ajua̱!
5 Nepʉ bi ntꞌøde maꞌna ra noya de habʉ mi hudi Ajua̱, ne bi ꞌñena:
Nsundahʉ Ajua̱,
gatho núꞌahʉ guí pɛphʉ
ne guí tsuhʉꞌa̱,
ngu ya notsi ngu ya da̱ngui.
Ra ngo de rá ntha̱ti ra Tꞌʉca Dɛti
6 Nepʉ dá øde ꞌnara ña̱hni de ꞌnara da̱nga hmuntsꞌa ja̱ꞌi, ꞌñena mri nhyahni ndunthi ya dehe, ne ꞌñena ꞌraya ngani, ne mi ena:
¡Drá nsunda Ajua̱! Ngueꞌa̱ núꞌá̱ go gueꞌa̱ ma Hmuhʉ pɛꞌtsa gatho ra tsꞌɛdi, ne go gueꞌa̱ ra Nda̱ de gatho ra ximhai.
7 Johyahʉ ne nsundahʉꞌa̱,
ngueꞌa̱ ya bi zø ra pa de rá ntha̱ti ra Tꞌʉca Dɛti.
Ra na̱via ya xa nhyoqui,
8 ya xa hye núꞌa̱ ra hoga dutu xqui tꞌumbi xá ntꞌaxi y ri huɛxqui.
Nura tꞌaxa dutuꞌa̱ gueꞌa̱ yá te xá ntꞌaxi núꞌʉ toꞌo xa gamfri Ajua̱.
9 Nepʉ ra ɛnxɛ bi ꞌñengagui:
―ꞌYofo nuya ya noya: “Dá johya núꞌʉ to da sipabi pa da ma ra ngo de rá ntha̱ti ra Tꞌʉca Dɛti.”
Nehe bi ꞌñengagui:
―Nuya guehya yá noya Ajua̱, y guehya xi majua̱ni.
10 Nepʉ nuga dá ndandiña̱hmu ja rá ua ra ɛnxɛ pa ga nsundaꞌa̱, pe nuꞌá̱ bi ꞌñengagui:
―Oguí øtꞌa njabʉ, ngueꞌa̱ necagui ne maꞌra ri cu dyá ꞌbɛgohʉ mahyɛgui de Ajua̱, ne dí ma̱ñhʉ rá noya ra Zidada Jesu. Go da xøcambeni Ajua̱.
Nuꞌʉ tóꞌo ma̱mba rá noya Ajua̱ gueꞌʉ damajua̱ni nehe de núꞌa̱ xa ma̱ ra Zidada Jesucristo.
ꞌNara tøgue mri tø ꞌnara tꞌaxfani
11 Nepʉ dá handa mahetsꞌi mi xogui, ne dá handa ꞌnara tøgue mri tø ꞌnara tꞌaxfani, y núꞌa̱ ra tøgueꞌa̱ xa thuꞌmbabi ꞌnara thuhu núꞌa̱ rí bøni da ꞌñena: Núꞌa̱ xa ma̱, nza̱ntho da ꞌyøtꞌe. Ne maꞌna ra thuhu rí bøni da ꞌñena: Majua̱ni. Ngueꞌa̱ nuꞌá̱ xi ra hoga nda̱, øtꞌe xá hño, ne øtꞌa ya tuhni ngu rí ꞌñepi.
12 Yá da ꞌñena mi zø ya tsibi, ne mi huꞌtsa ndunthi ya corona, y nehe xqui tꞌopabi ꞌnara thuhu núꞌa̱ hinto mi pa̱di te mi ne da ma̱, hønsɛꞌa̱ go mi pa̱ꞌa̱.
13 Ne mi he ꞌnara dutu xqui ꞌbobo co ra ji, y rá thuhu gueꞌa̱ Rá Noya Ajua̱.
14 Ne mri dɛniꞌa̱ ndunthi ya memahetsꞌi núꞌʉ øtꞌa ya tuhni, mri hñeꞌʉ dega hoga linu xi xmá ntꞌaxi, ne mri tøgue ya tꞌaxfani nehe.
15 Nuꞌa̱ ra mʉdi tøgue mi pøni de rá ne ꞌnara mahuai dega yo filo. Con gueꞌa̱ ma da naꞌmbabi ya ja̱ꞌi de gatho ya hai de ra ximhai, ne ma da nda̱ de gueꞌʉ con gatho rá tsꞌɛdi, ja ra uɛnda di ha̱ ꞌnara tsꞌʉtꞌo dega bøja̱. Ne ngu ꞌnara ja̱ꞌi netꞌa ya obxi pa da thɛꞌmi, njabʉꞌa̱ ma da huata ya ja̱ꞌi nuto yá ncontra Ajua̱ núꞌa̱ to pɛꞌtsa gatho ra tsꞌɛdi ne pø rá cuɛ con gueꞌʉ.
16 Ne ja rá he de ja rá xinthe xqui tꞌofo ꞌnara thuhu ena: “Ra Nda̱ de gatho ya nda̱ ne ra Hmu de gatho ya hmu.”
17 Nepʉ dá handa ꞌnara ɛnxɛ mi ꞌbai ja ra hyadi, ne bi mafi ntsꞌɛdi pa bi maꞌta gatho ya tsꞌintsꞌʉ di nhyatsꞌi, ne bi ꞌñembiꞌʉ:
―Bá ehʉ gui muntsꞌihʉ pa gui tsihʉ núꞌa̱ ra da̱nga hñuni ma da ꞌraꞌahʉ Ajua̱.
18 Ma da tꞌaꞌahʉ gui tsihʉ yá ngø ya da̱nga nda̱ ne ya nda̱ gá soldado, ne yá ngø núꞌʉ to xi mi jahma̱ yá tsꞌɛdi. Ma gui tsiphʉ yá ngø ya fani ne núꞌʉ to mi tøgueꞌʉ. Xi ma gui tsiphʉ yá ngø gatho ya ja̱ꞌi, ngu ya ꞌbɛgo ne núꞌʉ hingyá ꞌbɛgo, ngu ya notsi ne ya da̱ngui.
19 Nepʉ dá handa ra mba̱nga zuꞌue ne ya nda̱ de ra ximhai xqui muntsꞌiꞌʉ co yá soldado pa da ntunhui núꞌa̱ to mi tøgue ra tꞌaxfani ne núꞌʉ to mi dɛniꞌa̱.
20 Núꞌa̱ ra mba̱nga zuꞌue bri jʉ co núꞌa̱ ra hyate ba̱di to xqui ꞌyøtꞌa ya ntꞌudi ja rá thandi núꞌa̱ ra mba̱nga zuꞌue. Co nuyá ntꞌudi ra hyate ba̱di xqui hyatꞌa ya ja̱ꞌi núꞌʉ xqui thuꞌtsua rá hmeya núꞌa̱ ra mba̱nga zuꞌue ne xqui xøcambeniꞌʉ rá cꞌoiꞌa̱. Núꞌʉ ri yoho bi tꞌɛntꞌa ma tetho ja ra ndehe dega tsibi núꞌa̱ faspi co ra asufre.
21 Y núꞌa̱ to mi tøgue ra tꞌaxfani bi hyo núꞌʉ maꞌra to mri dɛna ra mba̱nga zuꞌue ne ra hyate ba̱di. Bi hyoꞌʉ co núꞌa̱ ra mahuai mi pøni de rá ne, y gatho ya tsꞌintsꞌʉ xi bi niña̱ co yá ngøꞌʉ.