4
1 Guejquitjogöjʉ hne̱je̱, xí xijquijʉ ca Ocja̱, bbʉ gu e̱me̱jʉ car Jesucristo, gu cʉtijʉ pʉ jabʉ bí bbʉ guegue, cja̱ gu tzöyajʉ pʉ. Pe i nesta gu zɛdijʉ, cja̱ gu mfödijʉ pa jin gu cojmʉ jar hñu̱.
2 Dí jñɛjmʉ cʉ cja̱hni israelita cʉ xcuí bøm pʉ jar jöy Egipto cja̱ mír ma pʉ jar jöy Canaán, como guejquitjogöjʉ, xí tsjijquijʉ hne̱je̱ ja gár tzønijʉ pʉ jabʉ bí bbʉh ca Ocja̱. Nu cʉ cja̱hni‑cʉ, jin te gá sirvebijʉ car palabra ca bi xih ca Ocja̱, porque jin gá hñemejʉ.
3 Pe nugöjʉ, como ngu̱ xtá e̱me̱jʉ, dá pöjcöjʉ jar hñu̱ pa gár cʉtijʉ pʉ jabʉ xí xijquijʉ ca Ocja̱, pa guír tzöyajʉ pʉ. Gu nú̱göjʉ car nttzöya ca jin gá nu̱ cʉ ndom titajʉ. Xí ncjá ncja ngu̱ ga ma̱m pʉ jar Escritura:
Bi zøti ʉ́r mʉy ca Ocja̱, cja̱ bi jiɛh quí cja̱hni, bi ma̱ntsjɛ rá ngue cár tju̱ju̱, bi xijmʉ:
“Cierto, ya jin da ñʉti‑cʉ pʉ jar jöy rá tzi zö pʉ jabʉ gua hmʉpje cja̱ di tzöyajʉ.”
Ya xi mí bbʉh car nttzöya pʉ jabʉ di ñʉti quí cja̱hni ca Ocja̱ cja̱ di hmʉpjʉ guegue. Cja̱ ya xi mí tzöya ca Ocja̱, como ya má yabbʉ, bbʉ mí guadi mí dyøti nʉr mundo, bi mʉdi bi tzöya.
4 Cja̱ i bbʉ pe hnar tzi testo pʉ jar Escritura ca i xijquijʉ ter bɛh ca̱ bi mɛh ca Ocja̱ bbʉ mí zʉh cʉ yojto mpa. I i̱na̱:
Ca rá yojto mpa, ca Ocja̱ ya xquí cjuajti göhtjo cʉ xquí dyøte.
Ya xi mí zøte göhtjo, eso, bi tzöya guegue.
5 Nu cʉ cja̱hni cʉ bi mvitabi ca Ocja̱ ya má yabbʉ, nde̱jma̱ jin gá ñʉtijʉ pʉ jar nttzöya ca xquí ma̱ guegue. Bi zʉh ca hnar palabra ca xquí ma̱n ca Ocja̱:
Cierto, ya jin da ñʉti‑cʉ pʉ jar jöy rá tzi zö.
Pʉ jabʉ gua hmʉpje cja̱ di tzöyajʉ.
6 Cʉ cja̱hni cʉ bbɛto bi ttzofo pa di ma jar nttzöya ca xquí ma̱n ca Ocja̱, jin gá ñʉti‑cʉ́, por rá nguehca̱ jin gá hñemebijʉ cár palabra. Eso, ca Ocja̱ pé i tøhmitjo pé ddáa pa da ñʉtijʉ pʉ jabʉ xí tjojqui.
7 Guegue i yojpi i nzojcöjʉ rá pa ya, por rá ngue ca hnar palabra ca bi ma̱n ca ndor David, ya má yabbʉ. Nugö, ya xtú mbe̱mbiquijʉ te i ma̱n car tzi testo‑cá̱, i i̱na̱:
Nuquɛjʉ, bbʉ guí ødejʉ rá pa ya, ga nzohquijʉ ca Ocja̱,
Gui jñu̱hpijʉ ndu̱mʉy cja̱ gui dyøjtijʉ,
Jin gui cjajʉ me̱mʉy.
Bbʉ mí ma̱n yʉ palabra‑yʉ ca ndor David, ya xquí tjogui rá ngu̱ cjeya desde bbʉ mí du̱ cʉ cja̱hni cʉ xcuí bøm pʉ jar jöy Egipto pa drí zøti pʉ jabʉ xquí ma̱n ca Ocja̱. Cʉ cja̱hni‑cʉ, bú tu̱jʉ pʉ jabʉ jin to mí hña̱ni.
8 Nu quí ba̱jtzi cʉ cja̱hni cʉ xcuí du̱, car Josué bi cʉhti‑cʉ pʉ jar jöy ca xquí ma̱n ca Ocja̱, gue car jöy Canaán. Nucá̱ jí̱ múr nttzöya ca xquí ma̱n ca Ocja̱. Porque bbʉ dur nttzöya‑ca̱, ya jim pé di yojpi di nzojcöjʉ ca Ocja̱ rá pa ya, pa gu zɛdijʉ gu cʉtijʉ pʉ jár nttzöya guegue.
9 Pe ncja ya, ya xtí pa̱dijʉ pé i cojti hnar lugar pʉ jabʉ da tzöya yí cja̱hni ca Ocja̱.
10 Cʉ to da ñʉti pʉ jabʉ bí bbʉh ca Ocja̱, da tzöya digue cár bbɛfijʉ ca mí pɛjmʉ hua jar jöy, como guejti ca Ocja̱ bi tzöya bbʉ mí guadi mí dyøti nʉr mundo.
11 Nugöjʉ, rí ntzöhui gu zɛdijʉ pa gu cʉtijʉ pʉ jar nttzöya‑ca̱. Jin gu ncjajʉ ncja ngu̱ cʉ cja̱hni israelita cʉ jin gá hñemejʉ. Mí yomfe̱ni ¿cja di ncja ca mí ma̱n ca Ocja̱?
12 Nʉ́r palabra ca Ocja̱ i nzojquitjojʉ rá pa ya. Como rí hñe̱h ca Ocja̱, ncjahmʉ i bbʉ ʉ́r nzajqui cja̱ i bbʉ ʉ́r ttzɛdi. I jñɛjmi hnar cjuay, göhtjo yojo quí nttza̱ni rá njo. Hnar cjuay rá njo i sirve pa da xa̱ntibi cár xifani hnar zu̱we̱ xí bböhti, pa da ni̱gui ja göhtjo i ncja pʉ mbo cár mʉy. I ncjadipʉ nʉ́r palabra ca Ocja̱ hne̱je̱. Ncjahmʉ i cca̱jtiguijʉ mbo ʉm tzi mʉyjʉ, ja ncja dár mbe̱nijʉ, cja̱ co ter bɛh ca̱ dí nejʉ. Pʉ jár palabra ca Ocja̱, i ma̱ ja i ncja göhtjo cʉm mfe̱nijʉ cʉ jin gui pa̱h cʉm mi̱nga̱‑cja̱hnijʉ. Guejtjo i juzgaguijʉ, i xijquijʉ, ¿cja rá zö ca dí mbe̱nijʉ, cja huá jin gui tzö?
13 Ca Ocja̱ xí dyøjquijʉ, göhtjoguigöjʉ, cja̱ i cca̱jtiguijʉ göhtjo ja dí ncjagöjʉ, cja̱ co te dí øtijʉ. Jin gui tzö te gu a̱jquibijʉ guegue. Ba e̱h car pa bbʉ xta jña̱nquijʉ ʉr huɛnda. Nubbʉ, da nesta cada hnaaguigöjʉ gu xijmʉ ca Ocja̱ göhtjo ca xcúr øtigöjʉ.
Jesús es el gran sumo sacerdote
14 Como ya xtú xihquijʉ pʉ ña̱, i bbʉh ca to i bbö madé, i cuati ca Ocja̱ cja̱ i ña̱hui por rá nguejcöjʉ, gue car tzi Jesús, cár Ttʉ ca Ocja̱. Guegue ya xí nzøm pʉ ji̱tzi, ya xí ñʉti pʉ jabʉ bí bbʉh ca Ocja̱. Gu mbe̱nijʉ, guegue rá nzɛdi, cja̱ segue gu e̱me̱jʉ car Jesús, göhtjo mbo ʉm tzi mʉyjʉ.
15 Car tzi Jesús i bbö madé pa da möxquijʉ, cja̱ i jui̱guigöjʉ, porque i pa̱di jin gui nzɛjcöjʉ. Como guejtsjɛ guegue bú e̱je̱, hne̱ bi sufri göhtjo tema prueba, ncja ngu̱ cʉ dí tjoguijʉ, pe guegue jin te gá dyøti ca már nttzo.
16 Nuya, bí bbʉbi ca Ocja̱ car tzi Jesús, bí ña̱hui por rá nguejcöjʉ, eso ya xí jogui pa gu cuatijʉ car Tzi Ta ji̱tzi. Jin gu yomfe̱nijʉ, cja̱ jin gu tzu̱jʉ. Gu öjpijʉ da nu̱göjʉ co cár tzi tti̱jqui, como dí pa̱dijʉ, guegue da möxquijʉ car hora ca dí tjojmʉ prueba, o bbʉ te dí nestajʉ.