14
1 Bbʉ di bbʉh hnar cja̱hni ca i e̱me̱ car evangelio, pe jí̱ bbe i nzɛh ca rí hñe̱me̱, gui recibijʉ gá hermano. Pe bbʉ i bbʉy tengu̱ asunto pʉ jabʉ hnahño ga mbe̱ni guegue, hnahño gri mbe̱nguɛjʉ, jin gui dé gui mbömbihui palabra.
2 I bbʉj nʉr hermano nʉ i mbe̱ni da jogui gu tzijʉ göhtjo tema jñuni ca dí nejʉ. Cja̱ pé i bbʉh car tzi hermano ca i yomfe̱ni, ga ma̱, jin gui tzö gu tzajʉ ngø, certa xtrú jña̱htibi tema ídolo, eso, jin gui ne da zi jñu̱ni gá ngø.
3 Car hermano ca i tza ngø, jin da xifi ʉr dondo ca hnáa ca jin gui ne da za. Guejti ca hnáa ca jin gui tzi jñu̱ni gá ngø, jin da zohmi car hermano ca i tzi göhtjo tema jñuni. Jí̱ rí ntzöhui gu tzohmigöjʉ car cja̱hni ca xí recibi ca Ocja̱, como guegue‑ca̱ i nu̱ rá zö.
4 Nuquiguɛ, jin guí pɛhtzi derecho gui jña̱mpi ʉr huɛnda cár mɛfi quer vecino. Bbʉ jin gui tzö ca xí dyøte, ya xi ʉ́r huɛnda cár jmu̱. Guegue‑ca̱ da nzofo. Guejtjo bbʉ xí dyøti ca rá zö, guejti‑ca̱, ʉ́r huɛnda cár jmu̱. Bbʉ guí ne gui tzohmi quer hñohui, como guí i̱na̱, jin gui tzö ca i øte, gui mbe̱ntjo, bí pa̱h ca Ocja̱ te rá nguehca̱ ga dyøte ncjapʉ. Guejtjo i pa̱di ja ncja da möx car cja̱hni‑ca̱ pa da hmʉy rá zö cja̱ da zɛdi drí hñe̱me̱.
5 Nuya, pé hnar ejemplo gu ddahquijʉ ya. I bbʉh cʉ ddaa cʉ i ma̱, más rá nttzu̱jpi ca hnar pá nin drá ngue ca pé hnaa. Cja̱ pé i bbʉh cʉ ddaa, i ma̱jmʉ, ddagu̱u̱tjo göhtjo yʉ pa. Cada hnaagöjʉ, gu ntzohmijʉ ter bɛh ca̱ dí mbe̱nijʉ digue yʉ pá, cja̱ gu øtijʉ ca rá zö, como ngu̱ xtá mbe̱nijʉ.
6 Ca to i tzu̱jpi ca hnar pa, i ɛmbi pa da mbe̱n ca Ocja̱ car pa‑ca̱. Guejti car hermano ca jin tema pa i tzu̱jpi, i øte ncjapʉ, porque ga ma̱ guegue göhtjo yʉ pá i jñɛjtjo ga mbe̱n ca Ocja̱. Car hermano ca i tzi göhtjo tema jñuni, bbʉ i tza ngø, nde̱jma̱ i i̱htzibi ca Ocja̱, como guehca̱ i öjpi mpöjcje ante que da zi. Guejti car hermano ca jin gui ne da za ngø, i jɛh‑ca̱, pa más da tti̱htzibi ca Ocja̱, cja̱ guejti guegue i öjpi mpöjcje ca Ocja̱ digue ca da zi.
7 Nugöjʉ, como ngu̱ xtá e̱me̱jʉ car Cristo, ya jin dí bbʉjtsjɛjʉ, cja̱ jin gu tu̱tsjɛjʉ, hne̱je̱, como guegue i mandadoguijʉ göhtjo ʉr tiempo.
8 Menta dí bbʉpjʉ, dí jonijʉ ja grá tzøpijʉ ca Ocja̱, cja̱ bbʉ xtá tu̱jʉ, gue ca Ocja̱ da gʉxquijʉ hua jar mundo. Masque gri bbʉjtijʉ o bbʉ ya xcrú tu̱jʉ, í mɛjtiguijʉ guegue.
9 Cam Tzi Jmu̱jʉ Jesucristo bi du̱, cja̱ pé bi jña̱ ʉ́r jña̱, pa bi cjagui í mɛjtiguijʉ göhtjo ʉr tiempo. Nuya, í mɛjtiguijʉ göhtjo cʉ cjeya gu hmʉpjʉ hua jar jöy. Guejtjo bbʉ ya xcrú tu̱jʉ, guegue da mandadoguijʉ pʉ jabʉ xcrá möjö.
10 Por eso, dí xihquijʉ, jin gui tzohmi guer hñohui masque hnahño gri mbe̱nguɛ, hnahño ga mbe̱ni guegue, cja̱ jin gui despreciabi. Gu mbe̱nijʉ, dí göhtjojʉ, gu ma hmöpjʉ delante car Da̱nzöya, cja̱ guegue‑ca̱ da jña̱nquijʉ ʉr huɛnda.
11 Nubbʉ, xta ncjá ncja ngu̱ ga ma̱n ca Ocja̱ pʉ jár palabra, i i̱na̱:
Nugö, dí bbʉy göhtjo ʉr tiempo, cja̱ ntjumʉy da ncja ca dí ma̱,
Göhtjo cʉ cja̱hni du e̱jmʉ, da nda̱ndiña̱jmu̱ pʉ jam hua, cja̱ göhtjo da xijquijʉ: “Guehquiguɛ, gú Ocja̱‑guɛ, dí i̱zquije.”
12 Nubbʉ, cada hnaaguijʉ gu döjtijʉ ʉr huɛnda ca Ocja̱, gu xijmʉ guegue göhtjo ca xtú øtijʉ.
No hagas tropezar a tu hermano
13 Eso, dí xihquijʉ, ya jin gu tzohmijʉ cʉm mi̱nga̱‑hermanojʉ. Mejor gu ntzohmitsjɛjʉ nʉm vidajʉ, cada hnaaguijʉ, pa jin to gu øhtibijʉ estorbo.
14 Nugö, dí pa̱di por digue cár tzi pöjötjo xí salvagui cam Tzi Jmu̱jʉ Jesús, cja̱ por rá nguehca̱, i nú̱gui rá zö car Tzi Ta ji̱tzi. Eso, dí pa̱di, jin te i ccahtzi ca Ocja̱ digue yʉ dí tzijʉ, como jin gui cca̱hti rá nttzo tema alimento. Nu car hermano ca i i̱na̱, i bbʉh cʉ dda alimento cʉ i ccax ca Ocja̱, bbʉ da zi guegue cʉ jñu̱ni‑cʉ, da ndu̱jpite.
15 Nuquiguɛ, masque guí ma̱nguɛ hne̱je̱, jin te i ccaxquijʉ ca Ocja̱, bbʉ gui yojmi hnar hermano ca i ma̱, jin gui tjɛguijʉ gu tzijʉ cʉ dda jñu̱ni, nuquiguɛ, gui jiɛh‑cʉ hne̱je̱, pa jin gui cjajpi da ungui ʉr du̱mʉy o da jiɛh cár hñu̱ ca Ocja̱. Bbʉ gui tzitjo, masque guí pa̱di, i øhtibi estorbo ca hnáa, ncjahmʉ guí despreciabi car hñohui‑ca̱. Gui ntzohmi, jin tza te i mu̱hui hnar jñu̱ni, hni̱xjma̱ja, car Cristo bi du̱ por rá ngue quer hñohui.
16 Pé ntoja guí i̱na̱, dí pɛhtzijʉ derecho gu tzijʉ ca te dí nejʉ. Cierto, guí pɛhtzi derecho, pe i nesta gui mbe̱ni, puede da cca̱jtiqui quer hñohui, eso, gui jña̱ ʉr huɛnda pa jin gui xöjpi da dyøti ca jin gui tzö.
17 Dí ndo bbʉpjʉ rá zö ca ya xtá cuatijʉ jár dyɛ car Jesucristo. Pe jin gui gue ca dí tzijʉ da pöjpigui yʉm tzi mʉyjʉ. Nu ca i ddajquijʉ car pöjö, guehca̱ dár yojmʉ car Tzí Espíritu Santo, cja̱ nucá̱ i föxquijʉ pa gu øhtibijʉ ca rá zö cʉm hñohuijʉ, cja̱ gu hmʉpjʉ ca Ocja̱.
18 Car hermano ca i mbe̱ni ja ncja da möx cár hñohui cja̱ jin gui ndo cja ndu̱mʉy digue cʉ cosa cʉ jin gui mporta, guegue i pɛjpi car Cristo cja̱ i tzøpi car Tzi Ta ji̱tzi. Guejtji cʉ pé dda cja̱hni cʉ i cca̱htibi cár vida, da ba̱dijʉ, rá zö ga ndɛn ca Ocja̱ car hermano‑ca̱.
19 Ncjá ya, gui jionijʉ car manera ja grí hmʉpjʉ pa jin tema estorbo gui dyøhtibijʉ quir hñohuijʉ. Gui hmʉpjʉ‑cʉ pa gui föxjʉ da zɛdi drí dɛn car Jesucristo.
20 Bbʉ gui tzijʉ hnar jñu̱ni ca i ma̱n cʉ dda hermano, jin gui tzö da ttzi, certa gui dyøhtibijʉ estorbo car tzi cja̱hni ca cja i fʉdi i eme nʉr evangelio. Cierto, i jɛguijʉ ca Ocja̱ gu tzijʉ ca te dí nejʉ. Pe bbʉ guí øhtibi estorbo quer hermano pa da jiɛh ca rí dɛn nʉ́r hñu̱ ca Ocja̱, nubbʉ́, guí tu̱ quer nttzojqui, bbʉ.
21 Mejor jin gu tzajʉ ngø, jin gu tzijʉ vino, cja̱ jin tema cosa gu øtijʉ ca di dyøhtibi estorbo hnar hermano, o di xöjpi di dyøti hnar cosa rá nttzo, cja̱ ya jin di dɛn cár hñu̱ ca Ocja̱.
22 Nuquiguɛ, bbʉ guí pa̱di, ca Ocja̱ ya xí bendeci car jñu̱ni ca guí tzi, jin guí nesta gui pöti quer mfe̱ni. Bí janti ca Ocja̱ ja ncja dar mbe̱nijʉ mbo ʉm tzi mʉyjʉ. Pe guejtjo jin gui nesta gui ta̱pi cár voluntad quer hñohui, pa da dyøte ncja ngu̱ gri dyøtiguɛ. Bbʉ jin guí yomfe̱ni digue ca guí øte, guí bbʉy rá zö, bbʉ.
23 Pe bbʉ guí yomfe̱ni, ¿cja da jogui gui tzi car cosa ca i jña̱jtiqui? mejor jin gui tzi, pa gui pa̱di mbo ir mʉy, i tzøh ca Ocja̱ ca guí øte. Porque bbʉ guí yomfe̱nitjo, cja̱ nde̱jma̱ gui tzi, guí ndu̱jpite, bbʉ, como guí ma̱ mbo ir mʉy, jin gui tzö ca guí øte, cja̱ nde̱jma̱ guí øtitjo.
Agrada a tu prójimo, no a ti mismo