13
ባርናባሳን ሳዉላን ኪትንትዳ
1 አንጾክያ የዘ ዎሳ ኬꬃ ናቡንꬅን አስታማሩንꬅን የነ። ኡን ባርናባሳ፥ ካርꬅ ጋእንትዘ ስሞና፥ ቀሬናፓ ይእደ ሉክዮሳ፥ ካት ሄሮድሳራ ድጭደ ምናሄነን ሳዉላን።
2 ኡን ላꬂ ጎይኖደራን ጾሞደራ ጌሽꬅ አያና፥ «ታኒ ጼግደ ኦችትስ ባርናባሳን ሳዉላን ታስ ሻኮተ» ያጋይዳ።
3 ይኒ ግሾ፥ ኡን ጾምዳንፓን ዎስዳንፓ ማቂ ፋ ኩሽቶ ኡንታላ ጋዲ ዳክዳ።
ባርናባሳን ሳዉላን ቆጵሮሳ ቅትዳ
4 ይኒ ግሾ፥ ጌሽ አያና ኡንታና ኪትዳ። ሰለዉቀ Ꮉንግዳ፤ ኢፓ ማርካበ ግዳ ገሊ ቆጵሮሳ Ꮉꬃራ ተቅንትደ ሳአ ቅትዳ።
5 ኡን ስልማና የሊ አይሁደ ዎሳ ኬꬃ ጾዘ ቃላ ኦህዳ። ዋሐንሳ ማድተራ ኡንታራ የነ።
6 ኡን ቆጵሮሳ Ꮉꬃራ ተቅንትደ ሳአ አꬊ ጳፉ የልዘ ዎደ ፈቲ ዎርዶ ናበ ባር-የሱሳ ጋዘ አይሁደ ማሮ ደንግዳ።
7 የ ማርዘ ዎርዣ አህዘ ሳርግዮሳ ጳዉሎሳ ጋዘ ቆፋራ የዘ አꬄራ የነ። ሳርግዮሳ ጳዉሎሳ ባርናባሳን ሳዉላን ፋጎ ጼጊ ጾዘ ቃላ ስኦደስ ኮይዳ።
8 የዝን ግርኬ ዶናራ ማርዛይ ሱንꬅታን «ኤልማሳ» ጋእንታነ። ኤ ጋደ አህዘ አማናመ ጋር ካዮደስ ኮይ ባርናባሳን ጳዉሎሳን እጽዳ።
9 የዝን ጳዉሎሳ ጋዘ ሳዉላ ጌሽ አያናራ ኩሚ ማርዛያ ዳኪ ብእ፥
10 «ናተ፥ ጻላሄ ናአዮ፥ ኢታትꬅ ኡባ ኩምዳዮ፥ ጽሎትꬅ ኡባስ ሞርክዛዮ፥ ሉለ ላꬄ ኦግቶ ምርቅዛኖ አሾሶ?
11 ይኬ፥ Ꮉተ ላꬄ ኩሸ ኔላ የነ። ነ ቆቀ ማቃዳ፤ ኤራꬅ ዎደስ አዋ ፎኦ በአማ» ያጋይዳ።
ኢራ ቃይቃዮን ꬉማን ኤ ኣፍቶ ጎዝን፥ ፋ ኩሽቶ አይኪ ካልꬅዘ አስ ኮይተራ ዉትዳ።
12 ጋደ አህዘ ይኖ ብእደ ዎደ ላꬄ ባዝ ታማርስዛነ ጋማ ቆፒ አማንዳ።
ባርናባሳን ጳዉሎሳን ጵስድያ አንጾክያ ቅትዳ
13 ጳዉሎሳን ኤራ የዙንꬅ ጳፉፓ ደንዲ፥ ጵንፍልያ የዘ ጰርገ ማርካበራ ቅትዳ። ዋሐንሳ ኡንታፓ ሻክንት የሩሳላመ ማቅዳ።
14 የዝን ኡን ጰርገፓ አꬊ ጵስድያ የዘ አንጾክያ የልዳ። ሳምባታ ዎደ አይሁደ ዎሳ ኬꬃ ገሊ በትዳ።
15 ሙሴ ህግቶን ናቡንꬅ ማጻፍታን ናባብንትዳንፓ ማቂ አይሁደ ዎሳ ኬꬂ Ꮉላቁንꬅ፥ «ኑ እሹንꬆ፥ አስ ምንꬅꬅዘ ቃላ ይንትስ የዛኮ አሱንꬅስ ኦሆያተ» ጋእ ኡንታጎ ኪትዳ።
16 ጳዉሎሳ ደንዲ ኤቂ ፋ ኩሽትራ ማልተራ፥ «እስራኤለ አሱንꬅስ፥ ማህ ጾዝ ጎይንዘ አይሁደ ማቆሰ አሱንꬆ፥ ስኦተ።
17 Ꮉንꬅ እስራኤለ አሱንꬅ ጾዘ፥ ኑ ማይዙንꬃና ዶርዳ። ግብጸ ሳአ ዛቆትꬃ ኡን የሳደራ፥ ኡንታና ጋንꬅ ፋ ዳማ ዎልቃራ ግብጸ ሳአፓ ኡንታና ከስዳ።
18 አኮ ባይዘ ሳአ ኦይታም በረ ጋር ኡንታና ዳንዳእዳ።
19 ካናነ ሳአ አይሁደ ማቆሰ ላፑን ካእቱሞ ካይ ኡን ጋድቶ ፋ አሱንꬃና ላትዝዳ።
20 ይና ኡባ Ꮉንዳንፓ ኦይዲ ጼት እችንታም በረ ማቅዳ። ይንፓ ማቂ ሳሙኤላ ዎደ የሎደስ አህዘ ዳይና ኡንትስ እንግዳ።
21 ይንፓ ማቂ፥ ኡን ፋስ ካት እንጎደ ጋር ዎስን፥ ጾዚ ብንያመ ኮቻፓ ቂሰ ናአ፥ ሳኦላ ኦይታም በረ ካእቶደ ጋር ኡንትስ እንግዳ።
22 ጾዚ ሳኦላ ሻርዳንፓ ማቂ ኡንታላ ዳዉተ ካእꬅዳ። ጾዚ ዳዉተባዝ ማርክꬍተ፥ ‹ታ ዎዝንት ጋር ማቅዳያ ታ ቆፍቶ ኡባ ኦችዛ እሰይ ናአ ዳዉተ ደንግዳ› ጋይዳ።
23 «ጾዚ፥ ታኒ ዳዉተ ኮቻፓ እስራኤለ አሱንꬃና ኡፋይስዛ ኮኦዳ ጋይዳን ጋር የሱሳ ክእዳ።
24 የሱሳ ዮኦዳንፓ ቲኖ እስራኤለ አሱንꬅ ኡባ ፋ ናጋርትፓ ማቂ ጻማቅንቶደ ጋር ዋሐንሳ ቃላ ኦህዳ።
25 ማህ ዋሐንሳ ፋ ኦችቶ ፎሎደስ ይእተ አሱንꬃጎ፥ ‹ታና ኦና ጋእ ቆፐተ? ታኒ ይን ናግዘ ክርስቶሳ ባያ፥ የዝን ታ ኤ ጫማ ብሎደስ ታስ ቤዞሰ ታፓ ሱብተ የእነ› ጋይዳ።
26 «እሹንꬆ፥ አብራሃማ ኮቹንꬆ፥ ማህ Ꮉነ አይሁደ ማቅካይዛራ ጾዝስ ዣሽትዙንꬆ፥ Ꮉና አሽዘ ቃልታ ኑስ ኪትንትዳ።
27 አኮስ ጋይኮ፥ የሩሳላመ የዘ አሱንꬅን ኡን Ꮉላቁንꬅ የሱሳ ኤርካያ። ሳምባታ ኡባነ ናባብንትዘ ናቡንꬅ ቃልቶ ቲሪካይዘ ግሾ ኤዛላ ፍርድ ናቡንꬅ ኦህደ ቃልቶ ፎልዳ።
28 የሱሳ ዎዽሳደስ ፈቲ ምክናተን በንታንጽን ጵላጦሳ ኤዛ ዎꬎደስ እንጎደ ጋር ዎስዳ።
29 ኡን የሱሳ ባዝ ጌሽ ማጻፍተ ጻፍንትዳኖ ኡባ ፎልደ ዎደ ማስቃላፓ ኤዛ ኬꬂ ሞግዳ።
30 የዝን ጾዚ Ꮉይቆፓ የሱሳ ደንꬅዳ።
31 ይንፓ ማቂ፥ ኤ ፋራ ጋልላፓ የሩሳላመ ይእዱንꬅስ ጋማ ቃማ በንትዳ። ኡን Ꮉተ ኤ ባዝ አሱንꬅስ ማርክꬋነ።
32 «ጾዚ ኑ አዱንꬅስ እንጎዳ ጋይደ ዎንገለ ኑኒ ይንትስ ኦህነ።
33 ዳዉተ ፋ ማዝሙረ ማጻፍተ ላምእንꬃ ዞፋንተ፥
« ‹ኔኒ፥ ታ ናአያ፥
ታ Ꮉይኖ ነና የልዳ›
ጋእንት ጻፍንትደ የሱሳ፥ ጾዚ Ꮉይቆፓ ደንꬂ ኑ ማይዙንꬅስ እንጎዳ ጋይዳኖ ኑስ ኡን ናኡንꬅስ ፎልዳ።
34 ኤ ዎቃመ ጋር ጾዚ Ꮉይቆፓ ኤዛ ደንꬅተ ኤርሶደስ፥
« ‹ታኒ ዳዉተስ እንጎዳ ጋይደ
አማንንትደ ጌሽ አንጆ ይንትስ እንጎዳ› ያጋእ ኦህዳ።
35 «ይኒ ግሾ፥ ማዝሙረ ማጻፍተ መለ በሳ ማህ፥
« ‹ነ ጌሽዘ አህቶ ዎቂዞስ› ጋይዳ።
36 «ዳዉተ ፋ ዎደ ጾዘ ቆፍቶ ፎልዳንፓ ማቂ Ꮉይቂ ፋ አዱንꬃራ ሞግንቲ ዎቂዳ።
37 የዝን ጾዚ Ꮉይቆፓ ደንꬅዳይ ዎቂካያ።
38 «ይኒ ግሾ፥ ታ እሹንꬆ፥ ናጋራ አሽዘ የሱሳ ባጋር ቲንꬊ ይንትስ ኦህንትዳኖ ኤሮተ። ሙሴ ህግታ ናጋራፓ ጽልሳደስ ዳንዳኦስ።
39 የዝን የሱሳ አማንዘ ኡቡንꬅ ናጋራፓ ጽላነ።
40 ይኒ ግሾ፥ ናቡንꬅ ጋይዳና ይንታና የላመ ፋና ናግንቶተ።
41 « ‹ጾዚ ጋይደባዝ ለቂዙንꬆ! ቦኦተ!
ጋማ ቆፖተ! ꬋቦተ!
ኦደን ኦህን፥ ይን አማኖሰ ኦቻ
ታ ይን ዎድተ ኦቾዳ› » ያጋይዳ።
42 ጳዉሎሳን ባርናባሳን አይሁደ ዎሳ ኬꬃፓ ከሳደራ፥ ካልዘ ሳምባታ ይኖ ጉጂ ኦሆደ ጋር አሱንꬅ ኡንታና ዎስዳ።
43 ሺቅታ ላንትዳንፓ ማቂ ጋማ አይሁዱንꬅን አይሁዱንꬅ አማንተ ገሊ ጾዝ ጎይንዘ ጋሙንꬅ ጳዉሎሳን ባርናባሳን ካልዳ። አማንዱንꬂ ጾዘ አꬎ ኬሃትꬅተ ምንꬂ የሳደ ጋር ኡንታና ዞርዳ።
44 ላምእንꬃ ሳምባታ ካታማ የዘ አሱንꬃፓ አትደ ባያ ያጋዉደ ዎንꬅስ ጾዘ ቃላ ስኦደስ ሺቅዳ።
45 የዝን አይሁዱንꬅ ጋማ አሱንꬃና በኤዘ ዎደ ጳዉሎሳ አንꬅንቲ ኤ ኦህቶ እጺ ኤዛ ጫዥዳ።
46 ጳዉሎሳን ባርናባሳን ዣሽትካይዛራ፥ «ጾዘ ቃልታ ቲንꬊ ይንትስ ኦህንቶደስ ቤዛነ። የዝን ይን ቃላ እጺ መዽና ደኦ ኤኮደስ ኑስ ቤዞስ ጋእ ይን፥ ይን ኦምተ ፍርድደ ግሾ ይኬ ኑኒ አይሁደ ማቆሱንꬃጎ ማቃዳ።
47 አኮስ ጋይኮ ላꬂ፥
« ‹አላመ ኩሙꬅታ ነ ባጋራ አቶደ ጋር፥
ታ ነና አይሁደ ማቆሰ አሱንꬅስ ፎኦ ማህዳ› ጋእ ኑና ኪትዳ» ጋይዳ።
48 አይሁደ ማቆሱንꬅ ይኖ ስእደ ዎደ ኡፋይት ጾዘ ቃላ ቦንችዳ። ማህ መዽና ደኦስ ዶርንትደ ኡባ አማንዳ።
49 ላꬄ ቃልታ ይና ሳእቶ ኡባ የልዳ።
50 የዝን አይሁዱንꬅ፥ አይሁደ ማቆሰ ጾዝ ጎይንዘ ቦንችንትደ ማቹንꬃናን ካታማ የዘ ዳማ አሱንꬃና ጳዉሎሳላን ባርናባሳላን ደንꬅꬅዳ። የንꬅ አሱንꬅ ኡንታና ባይኤ አይኪ ፋ ሳእትፓ ከስዳ።
51 የዝን ጳዉሎሳራን ባርናባሳራን እጽዙንꬅስ ማላ ማቃደ ጋር ፋ ቶህትፓ ጹራ ፍጺ እቆንዮነ ካታማ ቅትዳ።
52 ማህ አንጾክያ የዘ አማንዙንꬅ ጌሽ አያናራን ኡፋይሳራ ኩምዳ።