19
ጳዉሎሳ ኤፈሶነ ቅትዳ
1 አጵሎሳ ቆሮንቶሳ የዘ ዎደ፥ ጳዉሎሳ ዎካ ዛላራ አꬊ ኤፈሶነ ቅትዳ። እዘን ፈቲ ፈቲ አማንዘ አሱንꬃና ደንግዳ።
2 ኡንታጎ፥ «ይን አማንደ ዎደ ጌሽ አያና ኤክዳተ?» ጋእ ኦጭዳ።
ኡን፥ «አደ፥ ኤክካያ፤ መለ አቶ የዝን፥ ጌሽ አያና የዛኖን ስእካያ» ጋይዳ።
3 ጳዉሎሳ ኡንታጎ፥ «ዬዝን፥ አኮር ጻማቅንትዶተ?» ጋይዳ።
ኡን፥ «ኑኒ ዋሐንሳ ጽንቃተ ጻማቅንትዳ» ጋእ ማህዳ።
4 ጳዉሎሳ፥ «ዋሐንሳ ፋፓ ሱባራ የእዘ የሱሳ አማኖደ ጋር አሱንꬅስ ኦህተር፥ ናጋራፓ ማቀስ ኮሽዘ ጽንቃተ ጻማቅዳ» ጋይዳ።
5 ኡን ይኖ ስእደ ዎደ ላꬄ የሱሳ ታማረ ማቃደስ ጻማቅንትዳ።
6 ጳዉሎሳ ፋ ኩሽቶ ኡንታላ ጋድዘ ዎደ ጌሽ አያና ኡንታላ ዎꬍን፥ መለ መለ ዶናራ ዎላ ኦህንትዳ፤ ማህ ትንቢተ ኦህዳ።
7 ይና በስተ ታጶ ላምእ ማቅዘ አሱንꬅ የነ።
8 ጳዉሎሳ አይሁደ ዎሳ ኬꬃ ገሊ፥ ጾዘ ካእቱሞ ባዝ ዣሽትካይዛራ ማርክꬍተር ሎይꬂ ቆንጭዝተር ኡንታራ Ꮉይꬕ አግና የሎደስ ጋምእዳ።
9 የዝን ኡንታፓ ፈተ ፈተ ꬉበ ማቂ ጋማ አሱንꬅ ቲኖ ላꬄ ኦግቶ ጫዥ አማናንጺ እጽዳ። ጳዉሎሳ አማንዙንꬃና ኡንታፓ ሻጊ ኤኪ ጥራኖሳ ጋዘ ትምርተ ኬꬃ ኡባ ዎደ ኡንታና ታማርስዳ።
10 ጳዉሎሳ ላምእ በረ የሎደስ ቃላ ኦህዳ። ይኒ ግሾ፥ እስያ የዘ አሱንꬅ ኡባ፥ አይሁዱንꬅን አይሁደ ማቆሱንꬅ ላꬄ ቃላ ስእዳ።
ጾዚ ጳዉሎሳ ኩሽተ ኦችደ ክለ ባዝ
11 ጾዚ ጳዉሎሳ ኩሽተ ዳማ ክለ ባዝ ኦችዳ።
12 ይኒ ግሾ፥ አሱንꬅ ኤ ጋልቶ ቦችደ ማራብቶ ዎይ ማእቶ Ꮉርጋንቹንꬅስ ካንጋነ። ኡንትን ፋጻነ፤ ቱና አያኑንꬅን ኡንታፓ ከዛነ።
13 ቱና አያና ከስተራ ዉትዘ አይሁዱንꬃፓ ፈተ ፈተ፥ «ጳዉሎሳ ሳባክዘ የሱሳ ሱንꬅተ ከዞተ ጋእ ይንታና ኪታነ» ጋእ፥ ቱና አያና አይክደ አሱንꬃላ ላꬄ የሱሳ ሱንꬅቶ ጼግዳ
14 አይሁደ ማቅደ ካህኑንꬅ Ꮉላቃፓ ፈቲ አስቄወ ጋዘ አꬄስ ይኖ ኦችዘ ላፑን ꬊራꬅ ናኡንꬅ የነ።
15 የዝን ቱና አያንዘ ኡንታጎ፥ «ታኒ የሱሳን ኤራነ ጳዉሎሳ ባዝን ኤራነ፥ የዝን ይን ኦደ?» ያጋይዳ።
16 ቱና አያንዘ አይክደ አꬄ ኡንታላ ዶሊ ዎꬊ፥ ኡንታና Ꮉርግዝ፥ ይና ኬꬅትፋ ካሎ ዎጽ ꬋቦደ ዎንꬅስ ዎልቂꬍዳ።
17 ኤፈሶነ የዘ አይሁዱንꬅን አይሁደ ማቆሱንꬅ ኡባ ይኖ ስእ ጋማ ዣሽትዳ። ላꬂ የሱሳ ሱንꬅታ ጋማ ቦንችንትዳ።
18 አማንዙንꬃፓ ጋሙንꬅ ፋ ኦችደ ኢታ ኦችቶ ቡጽተራ ቆንጨ ኦህተር የነ።
19 ብትዙንꬃፓ ጋሙንꬅ ፋ ማጻፍቶ ሺሺ አስ ኡባ ቲኖ ምችዳ። ይና ማጻፍት ዋግታ እችንታም ሙኩል ሹች ብራ ሳንትመ ማቅዳ።
20 ይኒ ጋር ይእ ጾዘ ቃላ ዎልቃር ድጭተራን ዳልግተር ቅትዳ።
ኤፈሶነ ካታማ ካች ደንድዳ
21 ይና ፎልንትዳንፓ ሱባ ጳዉሎሳ፥ «ታኒ የሩሳላመ ቅቲ ማቂ ሮመን Ꮉንጎደስ ቤዛነ» ጋእ መቀዶንያራን አካያራን አꬊ የሩሳላመ Ꮉንጎደስ ቆፋ አጭዳ።
22 ማህ ፋና ማድዙንꬃፓ ላምኡንꬃና ጢሞትዮሳን ኤራስጦሳ መቀዶንያ ኪቲ፥ ፋስ እስያ ግዳ ኤራꬅ ዎደ ጋምእዳ።
23 የ ዎደ ላꬄ ኦግት ግሾ ኤፈሶነ ግዳ ዳማ ካች ከዝዳ።
24 ፈቲ ብራ ቆጽዘ ድሜጥሮሳ ጋዘ አꬄ አርጤሚሳ ኤቃ ኬꬃ ምስለ ብራፓ መꬊ ጋማ ትርፈ ድንግዛነ።
25 ይኒ ግሾ፥ ይኒ ፋና ኦቻ ኦችዙንꬃና ፈትላ ሺሺ፥ «አሱንꬆ፥ ኑ ዱረትꬅታ Ꮉና ኦችተ ማቅዳኖ ይን ኤራነ።
26 Ꮉይ ጳዉሎሳ፥ ‹አስ ኩሸ መꬍንትደ ኤቁንꬃና ባነ› ጋእ፥ ኤፈሶነን ኤራꬅ ሳአፕ አትን ኩሙꬅ እስያ ኡባ የዘ ጋማ አሱንꬃና ኦህ አማንꬅዳኖን ባልꬅዳኖን ይን ብእዳ ስእዳ።
27 ማꬋ ማቅዳና፥ ኑ ኦችታ ለቂንትዛኖ ጻላላ ማቅካይዝን እስያ ሳአ ኡባ የዘ አስ ጎይንዘ ዳማ ኤቃ አርጤሚሰ ኬꬅታ ቦንችንትካይዛር አቶዳና እ ዳማትꬅታ ጎልኦዳኖ» ጋይዳ።
28 አሱንꬅ ይኖ ስኤዘ ዎደ ዥልꬊ፥ «ኤፈሶነ አርጤሚሳ ዳማ» ጋእ ኡክዳ።
29 ይና ኡፍታ ካታማ ኡባ የልዳ። ጳዉሎሳራ የꬍዘ መቀዶንያ አሱንꬃና፥ ጋዮሳን አርስጥሮኮሳን አይኪ ጎችተር ካእዘ በሳ ዎጽዳ።
30 ጳዉሎሳን አሱንꬅ ሺቅደ በስተ ገሎደስ ኮይዳ፥ የዝን አማንዙንꬅ ኤዛ ካይዳ።
31 እስያ ሳአ Ꮉላቁንꬃፓ ጳዉሎሳ ላገ ማቅደ ፈተ ፈተ ጳዉሎሳጎ ኪቲ፥ «ካስ በስተ ቆንጨ ኬዚ በንትፐ» ጋእ ኤዛ ዎስዳ።
32 ሺቅደ አሱንꬅ Ꮉኖደባዝ ꬋብዳ፤ ጋንግዘ ባጋ አሱንꬅ መለ አቶ የዝን አኮስ ሺቀዛኮ ኤሮሰ ግሾ ፈተ ፈትባዝስ ኡክዘ ዎደ Ꮉንካይ መለባዝስ ኡካነ።
33 አይሁዱንꬅ እስክንድረ ጋዘ አꬃ አꬂ ቤዝን፥ ፈቲ ፈቲ አሱንꬅ ኤ ጋዉደ ባዝ ኦህ ኤዛ ቲኖ አꬅዳ። ኤ አሱንꬅ ስእ ጋዉደ ጋር ፋ ኩሽተ ማሊ ቤዚ፥ አሱንꬅስ ሞትንቶደስ ኤቅዳ።
34 የዝን እስክንድረ አይሁደ አስ ማቅዳኖ አሱንꬅ ኤርደ ዎደ ላምእ ሳተ ማቃደ ጋር ኡቡንꬅ ፈቲ ቃላራ፥ «ኤፈሶነ አርጤሚሰ ዳማ» ጋእ ኡክዳ።
35 ዉርሱꬅተ ካታማ ጻፍዘ አሱንꬃና ስእ ዪዚ፥ «ኤፈሶነ አሱንꬆ! ኤፈሶነ ካታማ ዳማ አርጤሚሰ ኤቃ ኬꬅን ሳሎፓ ዎꬍደ ዳማ ሹችዛ ናግዛኖ ኤሮሰ አስ ባያ።
36 Ꮉኖ ካድዘ አስ ባይዘ ግሾ ይን ስእ ጋኦደስን ኤልሲ አኮ ባዝ ዪዛንጽ አሾደስ ቤዛነ።
37 ይን Ꮉንꬅ አሱንꬃና፥ ኤቃ ኬꬃ ብራ ካይስትካይዙንꬃናን ኑ ጾዛ ጫዝካይዙንꬃና ክእዳ።
38 ይኒ ግሾ፥ ድሜጥሮሳን ኤራ የዘ ኦችዘ አሱንꬅ ሞቶደስ ኦና ኮይዛኮ፥ ፍርዳ ኬꬅታ ቡጉꬅ የነ፤ ዳይኑንꬅን የነ፤ ኡን ሞቶደስ ዳንዳአነ።
39 የዝን ይን መለ ኦሄ ኮይኮ፥ ሻንጎ ሺቅተ ኦህታ ብእንቶ።
40 ይኖ ማቃንጽኮ Ꮉይኖ Ꮉንደ ባዝስ ሮመ ካእቱምታ ኑና ኦጮዳ። Ꮉና ቡቁꬅትስ ምክናተ ባይዘ ግሾ ኑ ምክናቶ ኦሆደስ ዳንዳኦስ»
41 ያጋእ ሺቅቶ ላልዳ።