24
ጳዉሎሳ አይሁዱንꬅ ሞትዳ
1 እችን ቃማፓ ሱባ ካህኑንꬅ Ꮉላቅዘ ሀናንያ፥ ጭሙንꬃራን ጠርጠሉሳ ጋዘ ፈቲ ጻባቅዘራ ቂሳርያ ቅትዳ። ኡን ጋደ አህዙንꬃላ ጳዉሎሳ ሞትዳ።
2 ጳዉሎሳ ጼግንት ገልደ ዎደ ጸርጸሉሳ ኤዛ Ꮉንጋራ ያጋእ ሞትዳ፦
«ቦንቾ ፍልክሳ፥ ኑኒ ነ ባጋራ ጋማ ሳሮ ደንግዳ፥ ነ ሎኦ አህዛነ ኑ ጋድታ ጋማ ላምንትዳ።
3 ቦንቾ ፍልክሳ፥ ኑኒ አባን አይደ ማቅን ፎሎ ጋላታራ ይኖ ኤካነ።
4 ታኒ ነና ጋምእዝካይዛራ ኔኒ ነ ኬሃትꬅተ ኑ ባዝ Ꮉታራ ስኦደ ጋር ነና ዎሳነ።
5 Ꮉይ አꬄ ꬉበ ማቂ ሳአ ኡባ የዘ አይሁዱንꬅ ግዳ ቡቁꬅ መꬊ ናዝራዉንꬅ ባጋ አሱንꬃና ካልꬅዛያ ማቅዳኖ ኤርዳ።
6 መለ አቶ የዝን፥ ጾዘ ኬꬅቶ ቱንሳደስ ይአደራ ኑኒ ኤዛ አይክዳ፤ [ኑ ህግትጋራ ኤዛላ ፍርዶደስ ቆፕዳ።
7 የዝን ሻላቅዘ ሉስዮሳ ይእ፥ ዎልቃራ ኑ ኩሽትፓ ኤዛ ኬሲ ኤክዳ።
8 ኤዛ ሞትዙንꬅን ኔጎ የኦደ ጋር ኪትዳ]። ኔኒ ነ ኦምተ Ꮉይ አꬃ ቁርች ኑኒ ኤዛ ሞትዘ ሞቶ ኡባ ኤሮደስ ዳንዳአነ» ጋይዳ።
9 አይሁዱንꬅን፥ «Ꮉና ኦህታ ቱሮ» ጋእ ኤ ቆፍቶ ማእዳ።
ጳዉሎሳ ሞትስ ማሄ እንግዳ
10 ጋደ አህዛይ ጳዉሎሳ ኦሆ ጋእ ማሊዳ። ጳዉሎሳ Ꮉንጋራ ጋእ ማህዳ፦ «ኔኒ ጋማ ዎደፓ አይኪ፥ Ꮉንꬅ አሱንꬅስ ፍርድተራ የዛኖ ኤሪ ታ ኦህትስ ኡፋይስ ዎꬍን ማሄ እንጋነ።
11 ታኒ ጎይኖደስ የሩሳላመ ከዝን ታጶ ላምእ ቃማፓ አꬎሳኖ ኔኒ ነ ኦምተ ኤሮደስ ዳንዳአነ።
12 አይሁዱንꬅ ታና ጾዘ ኬꬃ ማቅን አይሁዱንꬅ ዎሳ ኬꬃ ማቅን ካታማ ማቅን ኦደራን ላሎደራ ዎይ አስ ሺሺ ቡቁስ ደንꬅꬆደራ ፈቲ አስን ደንግካያ።
13 Ꮉተን ኡን ታና ሞትዘ ባዝትስ ማርካ ደንጎደስ ዳንዳኦስ።
14 «የዝን ታኒ ፈትባዝ አማናነ፤ ታኒ ህገ ግዳ የዘባዝን ናቡንꬅ ጻፍደ ኡባባዝቶ አማኒ፥ ኑ አዱንꬅ ጾዛ፥ ኡን ዎርዶ ትምርትተ ኦግተ ጎይናነ።
15 ኡን ፋ ኦምተ አማንዛን ጋር ጽሉንꬅን ናጋራንቹንꬅን Ꮉይቆፓ ደንዶዳኖ ታንን አማናነ።
16 ይኒ ግሾ፥ ታኒ ጾዘ ቲኖን አስ ቲኖ ኡባ ዎደ ሎኦ ቆፋ ታስ የሳደ ጋር ምንጋነ።
17 «ታኒ የሩሳላመፓ ከዝዳንፓ ጋማ በረፓ ሱባ ታ ባጋ ዳሁንꬅስ ማደ እማደስን ዣርሾ ዣርሾደስ የሩሳላመ ይእዳ።
18 ታኒ ጾዘ ኬꬅተ ይኖ ኦቺ ጌዠ ዎጋ ፎሊ ማቃደራ ታና ደንግዳ። የ ዎደ ታራ ጋማ አስ ባያ፥ ካችን ከዝካያ።
19 የዝን እስያፓ ይእደ ፈቲ ፈቲ አይሁዱንꬅ እዘ የነ፤ ኡን ታላ ኦሆደስ ኮይኮ ይእ ታና ኔላ ሞቶደስ ዳንዳአነ።
20 ዎይ ታኒ ሻንጎ ቲኖ ሺቅደ ዎደ ኦችደ ባላ የዝኮ Ꮉንስ ነ ቲኖ የዙንꬅ ኦሆ።
21 ቱሮ ታኒ ኡን ግዳ ኤቂ ‹Ꮉይቂዱንꬅ ደንዶ የነ ጋእ Ꮉይኖ ፍርዳስ ይን ቲኖ ሺቅዳ› ጋእ ኡክ ኦህዳ፤ ይንፓ መለ ዪዝደ ባዝ ባያ» ያጋይዳ።
22 የዝን ፍልክሳ ላꬄ ኦገ ባዝ ሻኪ ኤርደ ግሾ «ታኒ ይን ኦህቶ ሻላቃ ሉስዮሳ ይእደ ዎደ ፍርዶዳ» ጋእ ቃጻሮ እንግ ዳክዳ።
23 ፍልክሳ ማህ ጳዉሎሳ አጭካየዛራ ናጎደ ጋራን ኤ እግኑንꬃፓ ኦደን ኤዛ ኦጮደስ የኦደራ ካያመ ፋና ማቶ Ꮉላቅዘስ ኦህዳ።
ጳዉሎሳ ፍልክሳ ቲኖን ድሩሲላ ቲኖ ሺቅዳ
24 ኤራꬅ ቃማፓ ሱባ፥ ፍልክሳ አይሁደ ማቅደ ፋ ማችት ድሩሲላራ ይእ ጳዉሎሳ ኪቲ ክእዚ ክርስቶስ የሱሳ አማኖ ባዝ ኤፓ ስእዳ።
25 ጳዉሎሳ ጽሎትꬅባዝ፥ ፋ ኦማ አህዘባዝን ዮኦደስ የዘ ፍርዳባዝ ኦሆደራ፥ ፍልክሳ ዣሽቲ፥ «ነ Ꮉተስ ቅቶ፤ ታስ ዎትደ ዎደ ነና ጼግሳዳ» ያጋይዳ።
26 የ ዎደ ጳዉሎሳፓ ጉቦ ኤኮደስ ቆፒ ኤዛ ማህ ማህ ጼግዝ ኤራ ኦህንታነ።
27 ላምእ በረፓ ሱባ፥ ፍልክሳ በስተ ጶርቅዮስ ፍስጦሳ ሹሙንትዳ። ፍልክሳ አይሁዱንꬃና ኡፋይሶደስ ኮይ ጳዉሎሳ ብልካይዛራ አሽዳ።