10
1 ሙሴ ህገ ዮኦደስ የዘ ሎኦ ባዝስ ዳሾ ፋትን ፋ ኦምተ ዋና ባያ። ይኒ ግሾ፥ በርተ በርተ ፋጨ ባይዝን ዣርሽንትዘ ዣርሽታ ጎይኖደስ ሺቅዘ አሱንꬃና ፎሎ ማሆደስ ዳንዳኦስ።
2 ህገ ኡንታና ፎሎ ማሆደስ ዳንዳእደባዝ ማቅዛኮ ኡን ዣርሾ ዣርሽዛኖ አሾዳ የሻ። ማህ ጎይኖደስ ሺቅዘ አሱንꬅ ፋ ናጋርትፓ ጌሻዳ፤ ኡን ዎዝንታን ኡንታና ባላ ጋእ ሞቶስ።
3 የዝን ይና ዣርሹንꬅ በርተ በርተ ናጋራ ቆፍዛነ።
4 አኮስ ጋይኮ ኮርማ ሱꬅን ዴሽ ሱꬅ ናጋራ ꬋብሶደስ ዳንዳኦስ።
5 ይኒ ግሾ፥ ክርስቶሳ Ꮉና አላምተ ይእደ ዎደ Ꮉንጋራ ያጋይዳ:
«ኔኒ ዣርሾን እሞ ኮይካያ፤
የዝን ታስ አሾ ጊግዝዳ።
6 ኔኒ ኤጽዘ ዣርሾን
ናጋራ ዣርሽተ ኡፋይትካያ።
7 የ ዎደ ‹ታ ግሾ ማጻፍተ ጻፍንትዳንጋራ፥
ላꬆ፥ ታኒ ነ ቆፍቶ ኦቾደስ ይእዳ› ጋይዳ» ያጋነ።
8 ዣርሽታ ዣርሽንቶደ ጋር ህገ ኪትዘባዝ ማቅዛኮ፥ ክርስቶሳ ቲኖ፥ «ኔኒ ዣርሾን እሞ፥ ኤጽዘ ዣርሾን ናጋራ ዣርሾ ኮይካያ፤ ኡንታራ ኡፋይትካያ» ያጋይዳ።
9 ካልን ኤ፥ «ላꬆ፥ Ꮉይቼ ታኒ ነ ቆፍቶ ኦቾደስ ይእዳ» ያጋይዳ። ይኒ ግሾ፥ ክርስቶሳ ላምእንꬃ ኤሶደስ ቲኖሳያ ሻርዳ።
10 የሱስ ክርስቶሳ ጾዘ ቆፋ ኦቺ፥ ላምእንꬆሰ ኦገራ ፈቲ ቶሄ ፋ አሽቶ ዣርሽደ ግሾ ኑኒ ጌዥዳ።
11 ካህኑንꬅ ኡባ፥ ናጋራ Ꮉሶደስ ዳንዳኦስ ይና ዣርሽቶ ቃምተ ቃምተ ዣርሽተራ ኤቂ ፋ ኦችቶ ኦቻነ።
12 የዝን ክርስቶሳ ኡባ ዎደስ ማቅዘ ፈቲ ናጋራ ዣርሾ ዣርሺ፥ ጾዛፓ ምዛቅ ዛላራ በትዳ።
13 የ ዎደፓ አይኪ ኤ ሞርኩንꬅ ኤ ቶህታ የꬍዘ በሲ ማሆደ ዎንꬅስ ናጋነ።
14 ኤ ላምእንꬆሰ ኦገራ ፈቲ ቶሄ ፋና ዣርሽደ ዣርሽተ ጌሹንꬃና መꬍናስ ፎሎ ኦችዳ።
15 ማህ ጌሽ አያና ኑስ Ꮉኖ ማርክꬋነ። ቲኖ Ꮉንጋራ ያጋይዳ፦
16 «ይና ቃምትፓ ሱባ፥
ታኒ ኡንታራ ጫቂዘ ጫቅታ Ꮉኖ፦
ላꬂ ታ ህግቶ ኡን ዎዝንተ ጋዶዳ፤
ኡን ጉግተ ጻፎዳ»
ያጋይዳ።
17 ካሊ፥
«ታኒ ኡን ናጋርቶን
ኡን ኢታ ኦችቶ ማህ ቆፖስ»
ያጋይዳ።
18 ይኬ፥ ናጋራ አቶ ጋእንትዳንፓ ሱባ ናጋራስ ዣርሽንትዘ ዣርሾ ኮሾስ።
አነ ጾዛጎ ሺቆዳ
19 ይኬ፥ ታ እሹንꬆ፥ ኑኒ የሱሳ ሱꬅት ባጋራ ኡባፓ ጌሽ በሲ ገሎደስ ኑስ አማንꬅዘ የነ።
20 ኑ ገሎዳና ክርስቶሳ ፋ ማጋራጅቶ፥ ይናን ፋ አሽቲ ባጋራ ኑስ ቡግደ ክለን ደኦ ማቅደ ኦገ።
21 ኑስ ጾዘ ኬꬃ ካታራ ሹሙንትደ ዳማ ካህኑንꬅ Ꮉላቃ የነ።
22 ይኒ ግሾ ኑኒ ኢታ ቆፋፓ ጌሻደስ ኑ ዎዝንተ ዉጹርክንት፥ ኑ ጋልቶ ጽሎ Ꮉꬃራ ሜጪ፥ ሉለ ዎዝናራን ፎሎ አማኖራ ጾዛጎ ሺቆዳ።
23 ኑስ ኡፋይስ ቃላ እንግደ ጾዘ አማንንትዳያ ማቅደ ግሾ ኑ ማርክꬍዘ ኡፋይስቶ ምዛቅ ዎርክታ ጋይካይዛራ ምንꬂ አይኮዳ።
24 ፈታይ ፈታ ሲቆስን ሎኦ ኦቻስ ዋይዝ ደንꬅꬆድ የዛኮ አነ ቆፖዳ።
25 ፈተ ፈተ ልምደ ማህ ሺቅዛኖ አሽዳን ፋና ኑኒ ዎላ ሺቅዛኖ አሾስ። የዝን ላꬄ ቃምታ ኡክዳኖ ይን በእዘ ግሾ ይኖ ዛጋንፓ አꬂ ኦቾተ።
26 ኑኒ ቱሪ ኤራትꬅ ኤክዳንፓ ሱባ ኤሪተ ናጋራ ኦቾስ፥ ይኬፓ ኑ ናጋራ ግሾ ዣርሽንቶደ ዣርሾ ባያ።
27 የዝን ይኬ አትዳና ዣሽዘ ፍርዳን ጾዘ ሞርኩንꬃና ምቾደስ ጊግደ ዳማ ታማ።
28 ሙሴ ህግቶ ኪትንታንጽደ ኦደን ላምእ ዎይ Ꮉይꬕ አስ ኤላ አፋ ማርክꬍኮ ይቅስሞ ባይꬅ Ꮉይቃነ።
29 ዬዝን፥ ጾዘ ናአያ ቶችዳይ፥ ፋና ጌሽደ ጾዘ ጫቆ ሱꬅቶ ቱንዝደ፥ ማህ አꬎ ኬሃትꬅ አያና ጫዥዳይ፥ አኮ ጋር ኢታ ፍርዳ ኤኮደስ ቤዝዛኮ አነ ቆፖተ።
30 ይኬ፥ «ኩሸ ማሄ ታ ባዝ፥ ታ ኩሸ ማሆዳ» ጋይዳኖ ኑ ኤራነ። ማህን፥ «ላꬂ ፋ አሱንꬃና ፍርዶዳ» ያጋይዳ።
31 ደኦ ጾዘ ኩሽተ ጎልኤ ጋማ ዣሻነ።
32 ይንትስ ጾዘ ፎኦ ፎእዳንፓ ሱባ ይን ጋማ ዋየራ፥ ዳማ ኦላራ ገንጭደ ዛጋ ዎድቶ ቆፖተ።
33 ፈቲ ፈቲ ቶሄ ይን አስ ቲኖ ጫዥንትዳ፤ ባይእንትዳ፤ ፈቲ ፈቲ ቶሄ ይኒ ፋና ዋየ የልደ አሱንꬃራ ዎላ ዋይንትዳ።
34 አቻ የዘ አሱንꬅስን ይቅስንትዳ። ይንትስ ሎኦን ꬋቦሰ ቆሎ ሳሎ የዛኖ ይን ኤርደ ግሾ ይን ቆልታ ቦንቅንትዘ ዎደ ኡፋይሳራ ዳንዳእዳ።
35 ይኒ ግሾ፥ ዳማ አንጆ የዘ ይን አማንንትዳያ ኦልፐተ።
36 ጾዘ ቆፋ ፎሊ፥ ኤ ይንትስ እንጎዳ ጋይደ ኡፋይስቶ ኤኮደ ዎንꬅስ ገንጮደስ ኮሻነ።
37 ይኬ፥ ጌሽ ማጻፍተ፥
«ኤ፥ የኦዳ ጋይዳይ ኤራꬅ ዎደፓ ሱባ የኦዳ፤ ጋምኦስ።
38 የዝን ጽልዘ፥ አማኖራ የሳዳ፤
ኦደን ሱብ ማቅኮ ታና ኡፋይሶስ»
ያጋይዳ።
39 ኑኒ አማኒ አትዘ አሱንꬅ ባጋ ፋትን ሱባ ማቂ ꬋብዘ አሱንꬅ ባጋ ባያ።