ይሁዳ ጻፍደ ኪታ
ገለ
ይሁዳ ኪታ ጻፍንትደ፥ አማናንጽ የዝተራ አማንዘ አስ አዚ ዎርዶ ትምርተ ዳልግዘ አሱንꬃፓ አማንዘ አሱንꬅ ናግንቶደ ጋር ቆፍሳደስ። Ꮉይ Ꮉታ ኪትዘ ፋ ግዳ አይክደ ቆፍታ ላምእንꬃ ጴጥሮሳ ኪታ አዛነ። ጻፍዘ፥ «አማንዘ አሱንꬅስ ፈቲ ቶሄን ዉርሱꬅ የሎደስ እንግንትደ አማኖስ ኦልንቶተ» ያጋእ ናባብዙንꬃና ምንꬂ ቆፍዛነ።
ኣፈ ቆፉንꬅ
ሳር 1-2
ዎርዶ አስታማሩንꬅ ትምርትቶን ኡን ጎልእቶ 3-16
አማኖ ናጎደ ፋና እንግንትደ ዞረ 17-23
ጋላታ ዎሳ 24-25
1
1 ታኒ ይሁዳ፥ የሱስ ክርስቶሳ አርዘ፥ ያይቆባ እሻይ፤
ጾዚ ጼግዱንꬅስ፥ ጾዘ አዳይ ካꬍዙንꬅን የሱስ ክርስቶሳስ ናግንትዱንꬅስ Ꮉይ ኪትዛ ጻፍዳ።
2 ማሮትꬅ፥ ሳሮትꬅን ሲቆን ይንትስ ጋንጎ።
ዎርዶ አስታማሩንꬃና
3 ታ ሲቆ እሹንꬆ፥ ኑኒ ዎላ ሻክንትዘ አቶትꬅት ባዝ ይንትስ ጻፎደስ ታኒ ጋማ አሙꬍዳ። የዝን አማንዘ አሱንꬅስ ፈቲ ቶሄን ላምእንꬃመስ እንግንትደ አማኖ ግሾ ኦልንቶደ ጋር ይንታና ዞርተራ ጻፎዳና ታስ ኮሽዘ ባዝ ማቅዳ።
4 ጋማ ዎደፓ ቲኖ ኡን ፍርድታ ጻፍንት በትደ፥ ፈቲ ፈቲ አሱንꬅ ኦንን ኤርካይዝን አችንት ይን ግዳ ገልዳ። ኡን ጾዛ ኤሮሱንꬃና፥ ኡን ኑ ጾዘ አꬎ ኬሃትꬅቶ ቱና ኦቻ Ꮉንቶደስ ማድንትዘ ኦገ ማህ ኤካነ። ፋ ጻላላ ካት ማቅደ፥ ኑ ላꬄ የሱስ ክርስቶሳ ካዳነ።
5 የዝን ይን Ꮉኖ ኡባ ኤርዘባዝ ማቅኮን፥ ላꬂ እስራኤለ አሱንꬅ ግብጸ ሳአፓ ዋይዝ ኬሰዛኮ፥ ማህ ሱባፓ አማኖሱንꬃና ꬋብሰዛኮ ታ ይንታና ቆፍሳደስ ኮያነ።
6 ፋ የዘ በስቶ አሺ፥ ፋስ እንግንትደ አደትꬅ ዎልቅቶ ናግካይዘ ኪታንቹንꬃና፥ ዳማ ፍርዳ ቃማ የሎደስ ጾዚ ኡንታና ꬉማፓ ኦሞራ መዽና ሳንꬃላታራ አጪ ጋድዳ።
7 ይኒ ጋር፥ ሶዶማን ጋሞራ አሱንꬅ ኡን ካለ የዘ ካታማ አሱንꬃራ ኦላለ Ꮉንትዳ፤ ኡን መꬎ ዎጋ ባይዘ ኦላለ ኦችዳ። ኡን መዽና ታማር ፍርድንቶዱንꬅስ አዝዘ ማቅዳ።
8 ይኒ ፋናን፥ የንꬅ አሱንꬅ አቡኮራ ፋ ጋልቶ ቱንዛነ፤ አደትꬅ ዎልቃራ የዙንꬃና ቦራነ፤ ሳሎ ቦንቾ የዙንꬃናን ጫዣነ።
9 የዝን ኪታንቹንꬅ Ꮉላቃ ሚካኤለ ሙሴ አሃስ ጻላሄራ ላልደ ዎደ «ላꬂ ነና ሴሮ» ያጋይዳ ፋትን ኤላ አፋ ጫሽ ቃላ ኦህ ሞቶደስ ኮይካያ።
10 የዝን Ꮉንꬅ አሱንꬅ ፋስ ኤሮሰ ባዝ ኡባ ጫዣነ፤ ማህ ኡን ዎዝና ባይዘ Ꮉርስ ፋና መꬎ ቆፋራ ኤርዘባዝ የዝኮን፥ እዛ ኡንታና ꬋብሶዳ።
11 ኡንታና ባደ! ኡን ቃኤላ ኦገ Ꮉንግዳ። ሚሸ ኮይ ባላማ ባልዳነ ጎልእዳ። ቆረ እጽዳን ፋና ኡንትን ጾዛላ ደንዲ ꬋብዳ።
12 Ꮉንꬅ አሱንꬅ፥ ሲቆ ዣጋና በሳ ይንታራ በትዘ ዎደ ዬላ ባይዘ ቦርንትዱንꬃና። ኡን ፋና ጻላላ የንግዙንꬃና። ኡን ዡባ ካንግዘ እራ ባይዘ ꬎነ ፋና። ማህ ኣፈዘ ዎደ ኣፈ ባይዘ፥ ጻጶራ ሾድንትደ፥ ላምእ ቶሄ መልደ ምንጻ ፋና።
13 ኡን ምንꬅ አባ ዙሉንተ ጋር ፋ ዬላ ኦቻር ꬉብዙንꬃና። ኡን መዽናስ ልንጽ ዪደ ꬉማ ናግዘ ዋይንትዘ ጾልንቱንꬃና።
14 አዳማፓ ደንꬂ፥ ላፑንꬃ የለትንታ ማቅደ ሄኖካን፥ Ꮉንꬅ አሱንꬅባዝ ትንቢተ ኦህተራ፥ «ይኬ፥ ላꬂ፥ ፋ ጋማ ሙኩል ጌሹንꬃራ የኦዳ።
15 አሱንꬃና ኡባ ፍርዶዳ፤ ገኑንꬃና ኡባ ኡን ኦችደ ኢታ ኦችት ኡባ ግሾን ገነትꬃራ ኡን ጾዘላ አፋ ኦህንትደ ኢታ ኦህት ኡባ ግሾ ፍርዶዳ» ጋይዳ።
16 የንꬅ አሱንꬅ ኡባ ዎደ ዙዝንግዙንꬃናን ኦሄ ኮይዙንꬃና። ማህ ፋ ኢታ አሞትꬅቶ ካላነ፤ ፋና ጬቃነን ፋና ማድዘ ባዝ ደንጎደስ መሉንꬃና ናሻነ።
ዉርሱꬅ ዞረ
17 የዝን ታ እሹንꬆ፥ ኑ ላꬄ የሱስ ክርስቶሳ ሐዋሩንꬅ ዛጋ ይንትስ ኦህደ ቃልቶ ቆፖተ።
18 ኡን፥ «ዉርሱꬅ ዎድተ፥ ጾዘ ቆፋ አሺ ፋ ኢታ አሞትꬅ ካሊ ጾዝ ቶችዙንꬅ የኦዳ» ጋይዳ።
19 የንꬅ አሱንꬅ አስ ግዳ ሻኮ መꬍዙንꬃና፥ ፋ አሾ አሞꬅስ አቅዙንꬃና ጌሽ አያና ባይዙንꬃና።
20 የዝን ታ እሹንꬆ፥ ጌሽ ማቅደ ይን አማንተ ይንታና አያናር ድቾደስ ምንጎተ፤ ማህ ጌሽ አያና ዎልቃ ዎሶተ።
21 ይንታና መዽና ደኦ የልꬅዘ ኑ ላꬄ የሱስ ክርስቶሳ ማሮትꬅ ናግተራ ይንታና ጾዘ ሲቅተ ናጎተ።
22 ሶእዘ አሱንꬅስ ይቅስንቶተ።
23 ፈቲ ፈቲ አሱንꬃና ታማፓ ኬሲ ኤኮተ። መሉንꬅስ ናጋራራ ቱንደ ኡን ጋልቶ ቦችደ አፉልቶ እጽተራ ዣሽሞራ ማሮተ።
ጋላታን ዎሳን
24 ይን ጎልአመ ፋና ናጎደስን ቦረ ባይዙንꬃና ማህ ዳማ ኡፋይሳራ ኩምደ ቲኖ ሺሾደስ ዳንዳእዘ፥
25 ኑና አሽዘ ፈቲ ጾዘ፥ ኑ ላꬄ የሱስ ክርስቶሳ ባጋራ ቦንቾን፥ ዳማተꬅ፥ ዎልቃን አደትꬅ ዎልቃ፥ ዛጋፓ አይኪ፥ Ꮉተን፥ መዽና ኤስ ማቀ። አምንኤ።