10
ማቾ ዳኮደስ ቤዞስ
(ማቶ. 19:1-2፤ ሉቃ. 16:18)
1 የሱሳ ይንፓ ደንዲ፥ ይሁዳ ሳአ Ꮉንግ ዮርዳኖሳ ቦርካ ፊንግዳ። ጋማ አሱንꬅ ማህ ኤጎ ሺቅን፥ ቲኖስትፋና የንꬅ አሱንꬃና ታማርስዳ።
2 ፈቲ ፈቲ ፋርሳዉንꬅ ፋታኖደስ ኮይ የሱሳ፥ «ፈቲ አስ ፋ ማችቶ ዳኮደ ጋር ሙሴ ህግታ ኪታነ?» ያጋእ ኤዛ ኦጭዳ።
3 ኤ ማህ፥ «ሙሴ ይንታና ዋጋእ ኪትዶ?» ያጋይዳ።
4 ኡንቲ፥ «ሙሴ፥ ‹ፈቲ አስ ፋ ማችትስ ዳፎ ዋርቃተ እንግ ዳኮ› ጋይዳ» ያጋይዳ።
5 የሱሳ ማህ፥ ኡንታና «ይን ኦህን ስኦሱንꬃና ማቅደ ግሾ ሙሴ Ꮉና ኪቶ ይንትስ ጻፍዳ።
6 የዝን ጾዚ ቲኖ መꬍዘ ዎደ ꬊራꬅን ማቾን ማህ መꬍዳ።
7 ይኒ ግሾ፥ ፈቲ አስ ፋ አዳያን ፋ እንቶን አሺ፥ ፋ ማችትራ ዎላ የዛነ።
8 ኡን ላምኡንꬅ ፈቲ አሾ ማቃነ፤ ይኬፓ፥ ኡን ፈቲ አሾ ማቃነፕ አትን ላምእ አስ ማቆስ።
9 ይኒ ግሾ፥ ጾዚ አጭዳኖ አስ ሻግፐ» ያጋይዳ።
10 ኡን ካራ ማቅደ ዎደ ኤ ታማሩንꬅ Ꮉና ኦህት ባዝ የሱሳ ላምእንꬃ ኦጭዳ።
11 የሱሳ ኡንታጎ፥ «ፋ ማችቶ ዳኪ መለ ኤክዘ ኦደን ኦላላነ።
12 ማህ ማችታን ፋ አዝንዘፓ ኬዚ መለ አዝኒ ገልኮ ኦላልዳ» ያጋይዳ።
የሱሳ ኤራꬅ ናኡንꬃና አንጅዳ
(ማቶ. 19:13-15፤ ሉቃ. 18:15-17)
13 የሱሳ ኤራꬅ ናኡንꬃና ቦቾደ ፋና፥ ፈቲ ፈቲ አሱንꬅ ናኡንꬃና ኤጎ ክእዳ፥ የዝን ኤ ታማሩንꬅ የንꬅ አሱንꬃና ካጭዳ።
14 የሱሳ ይኖ ብእ፥ ፋ ታማሩንꬃና ካጪ፤ ኡንታጎ፥ «ኤራꬅ ናኡንꬅ ታጎ ይእዛኖ ካይፐተ፤ ጾዘ ካእቱሞ የንስ ጋርዙንꬅስ።
15 ታኒ ይንትስ ቱሮ ኦህነ፤ ጾዘ ካእቱሞ ኤራꬅ ናአ ፋና ኤኮሰ አꬄ ኦደን ይና ካእቱምቶ ሙሎን ገሎስ» ያጋይዳ።
16 ኤራꬅ ናኡንꬃና እርንግ፥ ፋ ኩሽቶ ፈተላ ፈተላ አፋ ጋዲ አንጅዳ።
ቆሎ ይቅስሞ ክእዘ ማꬋ
(ማቶ. 19:16-30፤ ሉቃ. 18:18-30)
17 የሱሳ ቅቶደስ ከዝደ ዎደ ፈቲ አꬄ ዎጺ ይእ፥ ኤ ቲንተ ቡንቁንቲ፥ «ኬሃ አስታማርዛዮ፥ መዽና ደኦ ላቶደስ ታኒ አኮ ኦቾ?» ያጋእ ኦጭዳ።
18 የሱሳ፥ «አኮስ ታና ኬህዛዮ ጋእ ጼገ? ጾዘ ጻላላፕ አትን መለ ኬሃ ኦደን ባያ።
19 ጾዘ ኪቶ፥ ዎꬍፐ፤ ኦላልፐ፤ ካይስትፐ፤ ዎርዶ ማርክꬍፐ፤ እልአንꬅተ ላምፐ፤ ነ አዳያን ነ እንቶ ቦንቾ ያጋዛኖ ኤራነ» ያጋይዳ።
20 አꬄ፥ «አስታማርዛዮ፥ ታኒ ይኖ ኡባ ናአትꬃፓ አይኪ Ꮉይኖ የሎደስ ናጋነ» ያጋይዳ።
21 የሱሳ አꬃ ዳኪ ብእ ካꬍዳ፤ «ኔስ ፈቲ ባዝ ፋጫነ፤ Ꮉንግ ኔስ የዘ ባዝ ሙሎ ባይዝ፥ ይና ብርቶ ዳሁንꬅስ እንጎ፤ ኔኒ ሳሎ ዱርꬋዳ። የይዝ ማቂ ታና ካሎ» ያጋይዳ።
22 የዝን አꬄ ይኖ ስእ፥ ኤ ጋማ ዱረ ማቅደ ግሾ ፋ ስንቶ ካርꬂ፥ ኡፋይትካይዛራ አሺ ቅትዳ።
23 የሱሳ ፋ ታማሩንꬃና ዉቱꬂ ዳኪ ብእ፥ «ዱረ አስ ጾዘ ካእቱሞ ገሎዳና ዋይዝ ማꬎድየሳ!» ያጋይዳ።
24 ኤ ታማሩንꬅ ኤ ትምርትተ ጋማ ቆፕዳ። የዝን የሱሳ ማህ ኡንታጎ፥ «ናኡንꬆ፥ ጾዘ ካእቱሞ ገሎዳና ዋይዝ ማꬎድየሳ!
25 ዱረ አስ ጾዘ ካእቱሞ ገሎዳንፓ፥ ግማለ ማርፐ ኡሩንꬃራ አꬍዛና ላፋነ» ያጋይዳ።
26 ኤ ታማሩንꬅ ጋማ ቆፒ፥ «ዬዝን፥ ኦደ አቶደ?» ያጋእ፥ ፈተ ፈታ ኦጭዳ።
27 የሱሳ ኡንታና ዳኪ ብእ፥ «Ꮉና ጾዘስ ዳንዳእንታነፕ አትን አስስ ዳንዳእንቶስ፤ ጾዘስ ኡባ ባዝ ዳንዳእንታነ» ያጋይዳ።
28 ጴጥሮሳ የሱሳጎ፥ «ኤሮ፤ ኑኒ ኑ ባዝ ኡባ አሺ፥ ነና ካላነ» ያጋይዳ።
29 የሱሳ «ታኒ ይንትስ ቱሮ ኦህነ፤ ታ ግሾን ዎንገለ ግሾን ኬꬅቶ ዎይ እሹንꬃና ዎይ ምሹንꬃና ዎይ አዳያ ዎይ እንቶ ዎይ ማችቶ ዎይ ናኡንꬃና ዎይ ኦችዘ ጋድቶ አሽዘ ኦደን፥
30 Ꮉተ Ꮉና ዎድተ ጼት ኩሸ ኬꬅቶ፥ እሹንꬃና፥ ምሽቶ፥ እንቶ፥ ናኡንꬃና፥ ኦችዘ ጋድቶ፥ ባይꬃራ ዎላ ኤኮዳ። ቲኖፓ የኦደ ዎደን መዽና ደኦ ኤኮዳ።
31 የዝን ጋሙንꬅ ቲኖ ማቅዱንꬅ ሱብ ማቃዳ፥ ማህ ጋሙንꬅ Ꮉተ ሱብ ማቅዱንꬅ ቲኖ ማቃዳ» ያጋይዳ።
የሱሳ ፋና የሎደ ማꬍቶ Ꮉይꬕንꬃ ኦህዳ
(ማቶ. 20:17-19፤ ሉቃ. 18:31-34)
32 የሱሳራን ኤ ታማሩንꬃራ የሩሳላመ Ꮉማደራ፥ የሱሳ ፋ ታማሩንꬅ ቲንተ የꬋነ። ኡን ጋማ ቆፕዳ። ኤዛ ካልዙንꬅን ዣሽትዳ። ላምእንꬃ፥ ታጶ ላምእ ታማሩንꬃና ጋጻ ኬሲ፥ ፋና የሎደ ባዝ ሻጊ ኡንታጎ Ꮉንጋራ ያጋእ ኦህዳ።
33 «Ꮉይቼ፥ ኑኒ የሩሳላመ Ꮉተ ከዛነ። እዘ አስ ናአይ፥ ካህኑንꬅ Ꮉላቁንꬅስን ህገ አስታማሩንꬅስ አꬂ እንግንቶዳ። ኡንቲ ኤላ አፋ Ꮉይቆ ፍርዳ ፍርዶዳ፤ ማህ አይሁደ ማቆሰ አሱንꬅስ ኤዛ አꬂ እንጎዳ።
34 የ አይሁደ ማቆሰ አሱንꬅ ኤዛ ለቆዳ፥ ኤላ አፋ ጩቶዳ፥ አላንጋራ ጋራፎዳ ዎꬎዳ። ኤ Ꮉይꬕ ቃማፓ ሱባ፥ Ꮉይቆፓ ደንዶዳ» ያጋይዳ።
ያይቆባን ዋሐንሳ ዎስደ ዎሳ
(ማቶ. 20:20-28)
35 ዛብዶሳ ናኡንꬅ ያይቆባን ዋሐንሳን የሱሳጎ ይእ፥ «አስታማርዛዮ፥ ኑኒ ነና ዎስዘ ፈትባዝ ኑስ ኦቾያ» ያጋይዳ።
36 የሱሳ ኡንታጎ፥ «ታኒ ይንትስ አኮ ኦቾ?» ያጋይዳ።
37 ኡንቲ፥ «ኔኒ ነ ቦንቾ ካእቱምተ በትዘ ዎደ ኑፓ ፈታ ምዛቅ ዛላራ ማህ ፈታ ዎርክታ ዛላራ በትꬆያ» ያጋይዳ።
38 የዝን የሱሳ ኡንታጎ፥ «ይንቲ አኮ ዎስዛኮ ኤሮስ፥ ታ ኡሻደስ የዘ ጹአ ኡሻደስ ዳንዳኦዳተ? ማህ ታኒ ጻማቅንቶደስ የዘ ጽንቃቶ ጻማቅንቶደስ ዳንዳኦዳተ?» ያጋይዳ።
39 ኡን ማህ፥ «የ ዳንዳኦዳ» ያጋይዳ።
የሱሳ ማህ፥ «ቱሮ ታ ኡሻደስ የዘ ጹአ ይን ኡሻዳ፥ ታኒ ጻማቅንቶደስ የዘ ጽንቃቶ ይን ጻማቅንቶዳ።
40 የዝን ታፓ ምዛቅ ዛላራን ዎርክታ ዛላራ በቶዱንꬃና ዶሮደስ ታስ አደትꬅ ዎልቃ ባያ፥ የዝን ይና በስታ ጾዚ እማደስ ጊግዚ ጋድዱንꬅስ» ያጋይዳ።
41 አትዱንꬅ ታጵ ታማሩንꬅ ይኖ ስእደ ዎደ ያይቆባላን ዋሐንሳላ ሸንꬍዳ።
42 የሱሳ ኡንታና ኡባ ፋጎ ጼጊ፥ «አይሁደ ማቅን አይሁደ ማቆሰ አሱንꬅ Ꮉላቁንꬅ ዎርዣ አህዙንꬃና ጋእንት ጼግንትዙንꬃናን አህዙንꬅስ ዎርዡንꬃላ አፋ አደትꬅ ዎልቃ የዛኖ ይን ኤራነ።
43 የዝን ይን ግዳ ይኒ ፋና ማቃደስ ቤዞስ፤ ይን ግዳ ዳማ ማቃደስ ኮይዘ ኦደን ይንትስ አሮ ማቃደስ ቤዛነ።
44 ማህ ይን ግዳ ኡባፓ አꬂ ማቃደስ ኮይዘ ኦደን ይን ኡቡንꬅስ አሮ ማቃደስ ቤዛነ።
45 መለ አቶ የዝን፥ አስ ናአይን፥ አስ ማዶደስን ጋሙንꬃና አሾደስ ፋ ሸምፕቶ አꬂ እማደስ ይእዳፕ አትን አስ ኤስ ኦቾደ ጋር ይእካያ» ያጋይዳ።
የሱሳ ቆቀ ባርጤሞሳ ኣፍቶ ፋꬅዳ
(ማቶ. 20:29-34፤ ሉቃ. 18:35-43)
46 ኡንቲ እያርኮ ካታማ Ꮉንግዳ። የሱሳ ፋ ታማሩንꬃራን ጋማ አሳራ እያርኮፓ ከሳደራ፥ ጽሞሳ ናአ፥ ቆቅዘ፥ ባርጽሞሳ ጋእንትዘ፥ ኦገ ጋጻ ዎስተራ በትዳ።
47 ባርጽሞሳ፥ የይጋራ አꬍዘ ናዝረተ የሱሳ ማቅዳኖ ስእደ ዎደ ፋ ቃልቶ ꬎቅ ዪዚ፥ «ዳዉተ ናአ የሱሳ፥ ታና ማሮያ!» ያጋኤ አይክዳ።
48 ጋማ አሱንꬅ ኤዛ፥ «ስእ ጋኦ!» ጋእ ካጭዳ።
የዝን፥ ኤ ፋ ቃልቶ ካሰንፓ ጋማ ꬎቅ ዪዚ፥ «ዳዉተ ናአዮ፥ ታና ማሮያ!» ያጋይዳ።
49 የሱሳ ኤቂ፥ «ኤዛ Ꮉንካ ጼጎተ» ያጋይዳ።
ኡንቲ ቆቅዘጎ፥ «አኮ ባያ፥ ደንዲ ኤቆ፥ ነና ጼጋነ» ያጋይዳ።
50 ቆቅዘ ፋ ማእቶ ኦሊ አሺ፥ ዶሊ ደንዲ ኤቂ፥ የሱሳጎ Ꮉንግዳ።
51 የሱሳ፥ «ታኒ ኔስ አኮ ኦቾደ ጋር ኮየ?» ያጋይዳ።
ቆቅዘ፥ «አስታማርዛዮ፥ ታ በአደስ ኮያነ» ያጋይዳ።
52 የሱሳ ኤጎ፥ «ቅቶ፥ ነ አማንታ ነና ፋꬅዳ» ያጋይዳ። ኢራ ኤ ኣፍታ ብእን፥ የሱሳ ካልዳ።