4
የሱሳ ፋታንንቶ
(ማር. 1:12-13፤ ሉቃ. 4:1-13)
1 ይንፓ ሱባ፥ ጻላሄ የሱሳ ፋታኖደ ጋር ጌሽ አያና የሱሳ አኮ ባይዘ ጋናሳ ካንግዳ።
2 ኦይታም ቃማን ኦይታም አዋራ ጾምዳንፓ ሱባ ናይꬍዳ።
3 ጻላሄ የሱሳጎ ይእ «ነ ጾዝ ናአ ማቅኮ፥ አነ Ꮉይ ሹችዛ ሶሎ ማቃደ ፋና ኪቶ» ያጋይዳ።
4 የሱሳ ማህ፥ « ‹አስ ጾዘ ዶናፓ ከዘ ቃላ ኡባነ የሳደፕ አትን ሶሎ ጻላላራ የዞስ› ጋእንት ጾዘ ቃልተ ጻፍንትዳ» ያጋይዳ።
5 ማህን፥ ጻላሄ የሱሳ ጌሽ ካታማ ካንግ፥ ጾዘ ኬꬅትስ ኦምተ ኬሲ፥
6 «ነ ጾዝ ናአ ማቅኮ፥ አነ ሱለ ሳአ ጎልኦ። አኮስ ጋይኮ፥
« ‹ነ ቶህታ ሹቻላ ꬉቡንታመ ፋና፥
ፋ ኩሽትራ ነና ደንꬆደ ፋና፥
ጾዚ ፋ ኪታንቹንꬃና ነ ግሾ ኪቶዳ›
ጋእንት ጾዘ ቃልተ ጻፍንትዳ» ያጋይዳ።
7 የሱሳ ኤጎ፥ «ማህ፥ ‹ጾዘ ቃልተ ነ ላꬃ፥ ነ ጾዛ ፋታንፐ› ያጋእ ጻፍንትዳ» ጋእ ማህዳ።
8 ዉርሱꬅተ ጻላሄ የሱሳ ፈቲ ዳማ ደረ ኦማ ኬሲ አላመ ካእቱሞ ኡን ቦንችትራ ፈትላ ቤዚ፥
9 «ነ ታስ ጎልእ ጎይንኮ ታ ኔስ Ꮉኖ ኡባ እንጎዳ» ያጋይዳ።
10 የሱሳ ማህ፥ «Ꮉይ ጻላህዛዮ፥ ታፓ Ꮉኮ! ‹ነ ላꬃ፥ ነ ጾዛ ጎይኖ፥ ኤ ጻላላስ ኪትንቶ› ጋይንት ጾዘ ቃልተ ጻፍንትዳ» ያጋይዳ።
11 ይንፓ ሱባ፥ ጻላሄ አሺ ቅትዳ፤ ኪታንቹንꬅ ይእ ኤዛ ማድዳ።
የሱሳ ትምርትቶ
(ማር. 1:14-15፤ ሉቃ. 4:14-15)
12 የሱሳ፥ ዋሐንሳ አጭንትዳኖ ስእደ ዎደ ጋልላ ጋደ ቅትዳ።
13 ናዝረተ ካታማ አሺ ዛብሎነን ንፍታለመ ጉታ፥ አባ ካለ የዘ ቅፍርናሆመ ካታማ Ꮉንግ የይጋ የዝዳ።
14 ይና Ꮉንዳና ናበ ኢሳያሳ ዶንተ፥
15 «ዛብሎነ ጋደን፥ ንፍታለመ ጋደ፥
ዮርዳኖሳ ቦርካፓ ሰኮ ፍንꬃ፥
አባ ኦገ፥
አይሁደ ማቆሰ ዎርዡንꬅስ የዘ ጋልላ፥
16 ꬉማ የዘ ዎርዣ፥
ዳማ ፎኦ ብእዳ።
Ꮉይቆ ዳሾ ጋደ፥
የዙንꬅስ ፎኦ ከዝዳ»
ያጋእ ኦህንትደ ቃልታ ፎልንቶደ ፋና።
17 የ ዎደፓ ደንꬂ የሱሳ፥ «ጾዝ ካእቱሞ ኡክደ ግሾ ይን ናጋርትፓ ማቆተ» ያጋእ ቃላ ሳባክዳ።
ቲኖ ታማሩንꬅ ጼግንተ
(ማር. 1:16-20፤ ሉቃ. 4:16)
18 የሱሳ ጋልላ አባ ካለራ አꬍተራ ላምእ እሹንꬃና፥ ጴጥሮሳ ጋእንትዘ ስሞናን ኤ እሻ እንድራሰ ብእዳ። ኡን ሞሎ አይክዙንꬃና ማቅደ ግሾ ፋ ግትቶ አባላ ኦልዳ።
19 የሱሳ ኡንታና፥ «Ꮉንካ ዮኦተ፤ ታና ካሎተ! ሞሎ አይክዛኖ አሺ፥ ታ ይንታና አስ አይፎ ታማርሶዳ» ያጋይዳ።
20 ኡን፥ ኤልሲ ፋ ግትቶ ኦሊ አሺ የሱሳ ካልዳ።
21 የሱሳ የይጋፓ Ꮉጋ ጎደ ቲኖ ኣꬍተራ መለ ላምእ እሹንꬃና፥ ዛብድዮሳ ናኡንꬃና፥ ያይቆባን ዋሐንሳን ብእዳ። ፋ አዳይ ዛብድዮሳራ ዎላ ጎንገ ግዳ ፋ ግትቶ ሎይꬅዙንꬃና ጼግዳ።
22 ኡን፥ ኤልሲ ፋ ጎንግቶን ፋ አዳያን አሺ የሱሳ ካልዳ።
የሱሳ Ꮉርግንትዙንꬃና ፋꬅዳ
(ሉቃ. 6:17-19)
23 የሱሳ አይሁደ ዎሳ ኬꬃ ታማርስተራ፥ ሳሎ ካእቱሞ ዎንገለ ኦህተራ ዱማ ዱማ Ꮉርገፓ አሱንꬃና ፋꬅተራ ጋልላ ሳአ ኡባነ ዉትዳ።
24 ይንፓ ደንዲ ኤ ሱንꬅታ ሶርያ ጋደ ኡባ ኤርንትዳ። ዱማ ዱማ Ꮉርገራ አይክንትዱንꬃናን ዋይንትዙንꬃና፥ ቱና አያናራ አይክንትዱንꬃና፥ ቢጮራ የዙንꬃና፥ ዎቡንꬃና ኤጎ ክእዳ፤ ኤዝን ኡንታና ፋꬅዳ።
25 አሱንꬅ ጋልላፓ፥ ታጵ ካታሙንꬃፓ፥ የሩሳላመፓ፥ ይሁዳፓን ዮርዳኖሳ ቦርካ ሰኮ ፍንꬃ የዘ ጋደፓ ይእደ ጋማ አሱንꬅ ኤዛ ካልዳ።