16
ሳር
1 ክንክርያ ካታማ የዘ ዎሳ ኬꬅተ ኦችዘ ኑ ምሽታ ፌበኖ ሎኦ ማቾ ማቅዳኖ ይን ኤሮደ ፋና ኮያነ።
2 ይን እዞ አማንዘ አሱንꬅ ላꬄ ሱንꬅተ ሞኮደስ ቤዝዘ አማንዘ አሱንꬃፓ ፈተ ፋና ሞኮተ። እዛ ይንታፓ ኮይዘ ባዝ ኡባ እዞ ማዶተ። እዛ ፋ ኦምተ ጋማ አስ ማድዳ፤ ማህ ታና ታ ኦምተ ጋማ ማድዳ።
3 ክርስቶስ የሱሳ ኦቻ ታራ ዎላ ኦችዘ ጵርስቅላን አቂላ ሳሮ ጋኦተ።
4 ኡን ታ ግሾ ፋ ሸምፕቶ አꬂ እንግዳ። ታ ጻላላስ ባይዝን አይሁደ ማቆሰ አሱንꬅ ዎሳ ኬꬁንꬅን ኡባ ኡንታና ጋላታነ።
5 ኡን ካራ ሺቅዘ አማንዙንꬅ ሳሮ ጋኦተ።
እስያ ሳአ ክርስቶሳ ቲኖ አማንደ፥ ታ ካዽዘ ኤጳነጦሳስ ታ ሳርꬅቶ የልꬆተ።
6 ይኒ ግሾ ኦቻራ ጋማ ላቢደ ማይራሞ ሳሮ ጋኦተ።
7 ታራ አች ኬꬃ የዝደ ታ አይሁደ ላጉንꬃና አንድሮንቆሳን ዩንያሳ ሳሮ ጋኦተ። ኡን የሱሳ ሐዋሩንꬅ ግዳ ኤርንትዱንꬃና። ማህ ኡን ክርስቶሳ ታፓ ቲኖ አማንዳ።
8 ላꬄ አማንዘ ታ ሲቆ ላግዛ፥ አምጵልያጦሳ ሳሮ ጋኦተ።
9 ክርስቶሳ ኦቻ ኑራ ዎላ ኦችዘ ኡርባኖሳን ታ ካዽዘ እስታኩሳ ሳሮ ጋኦተ።
10 ክርስቶሳስ የዛና ፋታንንት አማንꬅዘ አጰሊሳ ሳሮ ጋኦተ። አርስጦቡሎሳ ካራ አሱንꬃና ሳሮ ጋኦተ።
11 ታ አይሁደ ላግዛ ሄሮድዮና ሳሮ ጋኦተ።
ናርስሳነን ኤ ካራ አሱንꬃፓ ክርስቶሳ አማንዱንꬃና ሳሮ ጋኦተ።
12 ላꬄ ኦቻ ላቢዘ ትሩፋይናን ትሩፎሳ ሳሮ ጋኦተ። ማህ ላꬅስ ጋማ ላቢ ኦችዘ፥ ታ ካዽዘ ጰርሲሶ ሳሮ ጋኦተ።
13 ላꬄ ኦቻራ ጋማ ኤርንትደ ሩፎሳስን ታና ፋ ናአ ፋና በእዘ ኤ እንቶ ሳሮ ጋኦተ።
14 አስንክርቶሳስ፥ ፍለጎናስ፥ ሄርሜሳስ፥ ፓትሮባሳስን ኡንታራ የዘ አማንዘ እሹንꬅ ኡቡንꬅስ ታ ሳርꬅቶ ኦሆተ።
15 ፍሎሎጉሳ፥ ዩልያ፥ ኔርያ፥ ኤ ምሽቶ፥ ኦሉምፖሳን ኡንታራ የዘ አማንዘ አሱንꬃና ኡባ ሳሮ ጋኦተ።
16 ጌሽ ዬርንተ ዬርንትተራ፥ ፈታይ ፈታያ ሳርꬆተ። ክርስቶሳ ዎሳ ኬꬂ ኡባ ይንታና ሳሮ ጋነ።
ዉርሱꬅ ዞረ
17 ታ እሹንꬆ፥ ይን ታማርደ ትምርትቶ እጺ፥ ይን ግዳ ሻክንተን ማꬋ መꬍዘ አሱንꬃፓ ናግንቶተ። ኡንታፓ Ꮉኮተ።
18 ይኒ ፋና የዘ አሱንꬅ ፋ ሳዛስፕ አትን ኑ ላꬄ ክርስቶሳስ ኦቾስ። ፋ ማልእዘ ዶናራን ይቅስዘ ቃላራ አኮ ኤሮሰ አሱንꬅ ዎዝንቶ ባልꬃነ።
19 ዎንገለስ ይን ኪትንትዳኖ አስ ኡባ ስእደ ግሾ ታና ኡፋይሳነ። የዝን ይን ሎኦ ባዝ ኤሮደ ፋና ኢታ ባዛፓ Ꮉኮደ ፋና ታ ኮያነ።
20 ሳሮትꬅ ጾዘ ጻላሄ ይን ቶህትፓ ኦሞራ ጋጪ ኦሎዳ።
ኑ ላꬄ የሱስ ክርስቶሳ አꬎ ከሃትꬅታ ይንታራ ማቀ።
21 ታራ ኦችዘ ጢሞትዮሳ ይንታና ሎኦ ያጋይዳ። ይኒ ጋራን፥ ታ እግኑንꬅ ሉቅዮሳ፥ ኢያሶነን ሶስጳጥሮሳ ይንታና ሳሮ ጋነ።
22 Ꮉይ ዳብዳቢዛ ጳዉሎሳስ ጻፍደ ታኒ፥ ጻርጽዮሳ፥ ይንታና ላꬄ ሱንꬅተ ሳሮ ጋነ።
23 ታና ሞክዘ ዎሳ ኬꬅቶ ኡባ ኤ ካራ ሺቅዘ ጋዮሳ፥ ይንታና ሳሮ ጋይዳ። ካታማ ሚሸ አይክዘ ኤራስጾሳን ኑ እሸ ቃርጾሳ ይንታና ሳሮ ጋነ። [
24 ኑ ላꬄ የሱስ ክርስቶሳ አꬎ ኬሃትꬅ ይን ኡባራ ማቀ። አምንኤ።]
25 ጾዝስ ጋላታ ማቀ። ታኒ፥ የሱስ ክርስቶሳ ባዝ ኦህዘ ዎንገለ ቃልተ ጋማ ዎደፓ አችንት ጋምእደ ቱረትꬃራ፥ ጾዚ ይንታና አማኖራ ምንꬂ ኤሶደስ ዳንዳአነ።
26 የዝን Ꮉተ ይና ቱርታ ቆንጭዳ። ካእቱሞ ኡባ አማኒ ኪትንቶደ ፋና መዽና ጾዘ ኪተ ናቡንꬅ ይና ቱርትባዝ ጻፍዳ።
27 የሱስ ክርስቶሳ ባጋራ ጭንጫትꬅ ኤ ጻላላስ የዘ፥ ፈቲ ጾዘስ መꬍናስ ቦንቾ ማቀ። አምንኤ።