4
አብራሃማ አማኖራ ጽልዳ
1 ዬዝን፥ ኑ አዳይ አብራሃማ አኮ ደንግዶ?
2 አብራሃማ ኦቻራ ጽልደባዝ ማቅኮ፥ ኤ ጬቅንትዘ ባዝ የነ፥ የዝን፥ ጾዘ ቲኖ ጬቅንቶደስ ዳንዳኦስ።
3 ጌሽ ማጻፍተ፥ «አብራሃማ ጾዝ አማንዳ፤ ጾዚ ይኖ ኤስ ጽሎትꬅ ማህ ፋይድዳ» ጋይዳ።
4 ኦችዘ አꬄስ ኤክዘ ዳሞዝታ፥ ኤ ኦቻ ዎልቂትስ ጭግንትዘ ጋለፕ አትን ኤስ እሞ ባያ።
5 የዝን ኦቻ ኦቾሰ ኦንን ናጋራንቾ ጽልዘ ጾዛ አማንኮ፥ ኤ አማንታ ኤስ ጽሎትꬅ ማቂ ፋይድንታነ።
6 ጌሽ ማጻፍተ ዳዉተ፥ ኦቻ ባይꬅ ጾዚ ጽልዘ አሱንꬅ አኮ ጋር አንጅንተዛኮ Ꮉኒ ጋር ያጋእ ቆንጭዝዳ፦
7 «ኡን ባልታ አቶ ጋእንትዱንꬅ
ኡን ናጋርታ ካምንትዱንꬅ አንጅንትዳ።
8 ላꬂ ኤ ናጋርቶ ፋይዶሰ አꬄ አንጅንትዳ» ያጋይዳ።
9 ዬዝን፥ ዳዉተ ኦህደ አንጅታ ጋራዝንትደ አሱንꬅስ ጻላላሶነ? ዎይ ጋራዝንትካይዘ አሱንꬅሶ? ኑኒ፥ «ጌሽ ማጻፍታ፥ ‹አብራሃማ ጾዝ አማንዳ፤ ጾዚ ይኖ ኤስ ጽሎትꬅ ማህ ፋይድዳ› ጋነ» ኑ ያጋይዳ።
10 ዬዝን፥ ይና አይደ Ꮉንዶ? አብራሃማ ጋራዝንትንነ? ዎይ ጋራዝንትካይዝን? ጋራዝንተፓ ቲኖ Ꮉንዳፕ አትን ሱባ ባያ።
11 አብራሃማ ጋራዝንቶዳንፓ ቲኖ ኤ አማንታ ኤስ ጽሎተꬅ ማቂ ፋይድንትዳኖ ኤርሶደስ፥ ኤ ጋራዝንታ ማላ ማቅዳ። ይኒ ግሾ፥ አብራሃማ ጋራዝንትካይዛራ አማንዙንꬅስን አማኖራ ጽልዙንꬅስ ኡባ አደ ማቅዳ።
12 ኤ ጋራዝንተዙንꬅስን አደ። አብራሃማ ኡንትስ አደ ማቅደ ኡን ጋራዝንትደ ግሾ ጻላላ ባይዝን ኤ ጋራዝንቶዳንፓ ቲኖ አማንደ አማንተ ኡን ካልደ ግሾስ።
ጾዘ ኡፋይስታ አማኖራ ኤክንትዳ
13 አብራሃማስን ኤ ዛርትስ፥ «አላምቶ ታ ይንትስ እንጎዳ» ያጋይደ ኡፋይስታ፥ አብራሃማ አማኖራ ጽልደ ግሾስ ፋትን ህገ ናጊ ፎልደ ግሾ ባያ።
14 ህገስ ኪትንትዱንꬅ ጾዘ ኡፋይስቶ ላትዙንꬃና ማቅኮ፥ አማኖ ማዶስ፤ ጾዘ ኡፋይስታን ጨር ማቃነ።
15 ህገ ጾዘ ካች ከእነ፥ የዝን ህገ ባይዘ በሳ ህገ አን አሸን ባያ።
16 ይኒ ግሾ፥ ጾዚ እንግደ ኡፋይስታ አማኖራ ኤክንታነ። Ꮉና ኡፋይስታ አብራሃማ ኮች ኡባስ ጾዘ አꬎ ኬሃትꬅ ባጋራ እንግንትዳኖ ቆንጭዛነ። ይናን ህገ ናግዙንꬅስ ጻላላስ ባይዝን አብራሃማ ፋና አማንደ ኡቡንꬅስ። አብራሃማ ኑ ኡቡንꬅስ አደ።
17 ጌሽ ማጻፍተ፥ «ታ ነና ጋማ ዎርዣስ አደ ማህዳ» ጋእንት አብራሃማ ግሾ ጻፍንትዳ። ይና ኡፋይስታ አብራሃማስ እንግንትደ Ꮉይቂዱንꬅስ ደኦ እንግዘን ባይዘ ባዝ የዝዘ ጾዘ ኤዛ ማቅዳኖ ኤ አማንደ ግሾስ።
18 ጾዚ አብራሃማስ ነ ኮችታ ጋንጎዳ ጋይዳና፥ ኡፋይስ ጋዶደስ አኮን ዳንዳእንቶሰ ዎደ አብራሃማ ጾዝ አማንደ ግሾን ኡፋይስ ጋድደ ግሾ ጋማ ዎርዣስ አደ ማቅዳ።
19 አብራሃማስ ጼት በረ ኩምደ ባዝ ማቅኮን፥ ፋ ጭንግደ አሽተን ሳራ ናአ የሎደስ ዳንዳኦሳኖ ኤርተራ ፋ አማንተ ላቢካያ።
20 ኤ ፋ አማንተ ሚንግ ጾዝስ ቦንቾ እንግዳፕ አትን ጾዚ እንግደ ኡፋይስቶ አማናንጺ፥ ሶእካያ።
21 አብራሃማ፥ ጾዚ እንግደ ኡፋይስቶ ፎሎዳኖ ፋ ኩሙꬅ ዎዝንተ አማንዳ።
22 ይኒ ግሾ፥ ጾዚ ኤ አማንቶ ጽሎትꬅ ማህ ፋይድዳ።
23 የዝን፥ «ፋይድንትዳ» ጋዘ ቃልዘ አብራሃማስ ጻላላ ጻፍንትካያ።
24 የ ቃልዘ ኑ ላꬄ የሱሳ Ꮉይቆፓ ደንꬅደ ጾዛ አማንዘ ኑስን ኑ አማንታ ጽሎትꬅ ማቂ ፋይድንቶደ ጋር ጻፍንትዳ።
25 ጾዚ ኤዛ ኑ ናጋርት ግሾ Ꮉይቆስ አꬂ እንግዳ፤ ኤ ኑና ጽልሳደስ Ꮉይቆፓ ደንድዳ።